Disiembri

¿Tata Diosï Jeoba jatsiski uinhapikua para tsítaantani uarhiriichani? Jo. Ima jindeesti “enga iámindu ambe újka úni” (Apok. 1:8). Uaati andani náki uéjki enemiguni, asta uarhikuani jamberi (1 Kor. 15:26). Máteru ambe engachi jimbo míteka eska Tata Diosï Jeoba uaaka tsítaantani uarhiriichani, jindeesti jimboka ima iámindu ambe miásïnga. Biblia uandasïndi eska ima nombri jatsikuaska iámindu jóskuechani (Is. 40:26). Tata Diosï Jeoba miáuasïndi iámindu imeechani engaksï uarhikia (Job 14:13; Luk. 20:38). Ima úsïndi iámindu ambe miántani imeecheri enga tsítantauaka, komu na engaksï jásïipka ka na engaksï jámeenga, ka ístu na engaksï irekapka ka ambe engaksï nitamakuarhipka. Uaakachi seguru jarhani eskaksï uarhiriicha tsíntaaka jimbokachi míteska eska Tata Diosï Jeoba uékasïnga tsítaantani ka eska jatsiska uinhapikua para ísï úni. Máteru ambe engachi jimbo seguru jaka, jindeesti jimboka ima tsítaantaspka máru kʼuiripuechani. Imani jurhiatikuecha jimbo enga Biblia karanhapka, Tata Diosï Jeoba íntsaaspti uinhapikua máru achamasïichani, komu tata Jesukristuni para tsítaantani uarhiriichani. w23.04 9, 10 párr. 7-9

Engachi jucha iátsitakuarhu mókukuasta máteruechani ka sési kaani, segurueuati eskajtsïni uékaaka kurhajchani. Peru enga nema juchantsïni jingoni uékaaka arhirperani, ojtsïni teresmarhuni, nóchi jatsiska para seguiriini uandontskuarheni imani jingoni (Prov. 26:4). Peru sáno iámindu kʼuiripuechaksï no ísï jámasïndi; jamberijtsïni uánikuecha uékaati kurhajchani. Kánikua marhuasïndi sési kámpini ka iátsitakuarhu mókukuantani máteruechani. Kurhaku je Tata Diosï Jeobani eskaksïni íntskua uinhapikua, parajtsï iátsitakuarhu mókukuantani imeechani engaksïni kurhamarhiaka ambe engachi jucha jakajkujka o engaksïni arhinchani jauaka. Asï mirikurhi je eska engajtsï iátsitakuarhu mókukuantaska, uaati eskajtsï no arhirperaaka. Ka engajtsï respetu jingoni mókukuantaska ka sési, jamberi uaati eskaksï máteruecha ménderueni eratseaka juchaari ambe ka ima ambeeri enga Biblia jorhentpijka. Ísï jimbo, “méntkisï jingontku ja je parajtsï úni mókukuantani [...] iátsitakuarhu ka kánikua janhanharhikua jingoni” (1 Ped. 3:15). ¡Iátsitakuarhu mókukuanta je máteruecha ka xarhataa je eskajtsï uinhapitiiska! w23.09 19 párr. 18, 19

Ju je exeni na enga jásïika kʼuiripu ma enga tekaantstiika, tʼámu ambechi exeaka. Orheta, no sóntku ikiasïndi. Jánguarhintasïndi para no no sési mókukuarhini engaksï máteruecha no sési ambe arhijka, ka no májkueni ambe úkuantaasïndi. Ístu, no no sési kaasïndi máteruechani enga jukari uandanhiani jarhajka (Éx. 34:6). Segundu, kʼuiripu ma enga tekaantstiika, mítesti erokuarhini. No sóntku kuatantasïndi, nijtu sóntku ikiani enga ambe ma ióndani jarhajka úkuarhini (Mat. 18:26, 27). Terseru, kʼuiripu ma enga tekaantstiika no jirejiresï úsïndi ambe ma. Enga uétarhijka úni ambe ma enga kánikua jukaparhakueka, ima kʼuiripu no jirejiresï ueenasïndi úni indeni ambe, nijtu sóntku uéjki kʼamarani. Sánderu sési, arhutasïndi tiempu para sési eratsentani néna uaa úni indeni ambe ka tátsekua xáni tiempu úrasïndi eska na xáni uétarhiaka para sési úni. Kuartu, kʼuiripu ma enga tekaantstiika jánguarhintasïndi no uandauandamini jarhani jiáni enga no sési nitamakuarhini jarhajka. Jánguarhintaati méntkisï tsípikua jingoni marhuakuni Tata Diosï Jeobani (Kol. 1:11). Kristianuechachi jatsiska para tekaantstiini iámindu ini ambe jimbo engachi exekia. w23.08 20, 21 párr. 3-6

Ma ambe engachi jimbo jatsika para kuájchakuni juchaari mintsitani jindeesti jimboka Tata Diosï Jeoba exesïnga ambe enga jaka juchaari mintsitarhu. ¿Ambe arhikuekasïni? Eska ima sánderu ambe exesïnga eska kʼuiripuecha. Ima mítesti na engachi jásï kʼuiripueka. Tata Diosïjtsïni kánikua xénchaati engachi juchaari mintsitarhu jatsiauaka imeeri konsejuechani (Juanu 4:14). Ka ísï, juchaari mintsita méntku no jámaati jakajkuni Satanásiiri chkuanderakua ambe nijtuchi ísï jámaa eskaksï i parhakpini anapuecha (1 Juanu 5:18, 19). Engachi sánderu andarhieraska Tata Diosïni, sánderuchi xénchaaka ka janhanharhini. Ka jimbokachi no uékasïnga no sési pʼikuastani juchaari Taatini, nóchi eratsesïnga imani ambe úni enga pekadu máeka para ima. Croacia anapu pirenchi ma enga Marta arhinhajka, uékasïreendi úni ambe ma enga no sési jaka. Ima karaspti: “No jánhaskasïreenga ambe úni. Ka kánikua úkua jukanchasïreenga nóteru tsitinia imani ambe enga no sési jaka. Peru chénharhini Tata Diosï Jeobani kánikuarini jarhuataspti”. ¿Néna? Marta uandaspti eska chénharhini Tata Diosï Jeobani úspka eska eratsentapiringa na enga xáni no sési nikupiringa enga úpiringa ambe enga no sési jaka. Engachi juchajtu tsʼéjkukua ma jatsiaka uaakachi májkueni úni eska pirenchi. w23.06 20, 21 párr. 3, 4

Jesúsi mítespti eska Tata Diosï Jeoba uékasïnga eska imeeri nombri pímbinhaxentaaka iámindu imani chkuanderakuecheeri ambe engaksï xáni no sési pakatajka. Ísï jimbosï jorhendaapti imeeri chúxapatiichani eskaksï kómarhipiringa: “Juchaari Taati engari auandarhu jaka, eska niáraaka mítenhani eska chiiti nombri pímbinhasïiska” (Mat. 6:9). Jesúsi kurhangusïreendi eska no jarhaska iámu parhakpinirhu ka auandarhu sánderu jukaparhakua ambe ka eska pímbinhajkuntani Tata Diosïiri nombrini. Ka no nema jarhasti enga xáni jánguarhintaka eska Jesúsi para pímbinhajkuntani Tata Diosïiri nombrini. ¿Joperu andiksïsï jupikapi Jesúsini imeeri ikiatspitiicha? Jimbokaksï uandasïreenga eska no sési ambe uandaspka imeeri Taati jémbeeri nombriiri ambe. Para Jesúsi no jarhaspti sánderu k’éri pekadu ma eska indeni ambe úni. Jimbosï ante de jupinhani, ima t’uini no sési pʼikuarherani japtia jimboka kʼuiripu indeni ambesï uandapiringa (Luk. 22:41-44). w24.02 11 párr. 11

Jatsiskachi para sánderu xénchani Tata Diosï Jeobani ka Jesúsini ka eska juchaari familiani (Mat. 10:37). Joperu no arhikuekasïndi eskachi jatsiska para jurajkuani responsabilidadichani engachi familiarhu jatsiaka, enajki ambe máepirini engajtsïni ójkutajka para marhuakuni Tata Diosï Jeobani. Sánderu sési, engachi uéjka eskajtsïni Tata Diosï Jeoba jaiapanhentaaka, jatsiskachi para kumpliriuani juchaari responsabilidadichani familiarhu (1 Tim. 5:4, 8). Tata Diosï Jeoba mítesti eskaksï familiecha uaaka tsípikua jingoni irekani engaksï temungurhiriicha xénchperaska ka engaksï janhanharperaska, engaksï taatiicha xénchaaska uájpeechani ka sési tʼarhexeraani, ka engaksï sapiicha kurhajchaaska taatiichani (Éfes. 5:33; 6:1, 4). Náki uéjki jindeeni chaari responsabilidadi familiarhu, jánguarhinta je kurhajchaani Biblieri ambakiti konsejuechani. Asï imani ambe ú je enga chá eratsejka eska sési jarhaska o na enga pʼindenhaka jima engajtsï chá anapueka o úni ambe engaksï i parhakpinirhu anapuecha uandajka eska sési jarhaska. Úraa je juchaari publikasionichani, jimajtsï exentaaka ambe engajtsï uaaka úni parajtsï ísï úni eskaksï Biblieri prinsipiuecha na uandajka. w23.08 28 párr. 6, 7

Kánikua sési jarhasti engaksï pirenchiicha jorhenajka imani ambe úni enga marhuakuajka. Máru ambe engari jiáni jorhenguarhijka úni engari sapichuejka kánikuakeni marhuachesïndi chiiti irekuarhu. Pori ejemplu, jorhenguarhi karani ka sési arhintani. Máru lugaricha jimbo no xáni jukaparhakuesti eskaksï nanakecha jorhenguarhiaka karani ka arhintani. Joperu kánikua jukaparhakuesti para kristianuecha ísï úni (1 Tim. 4:13). Ísï jimbo, asï jurajku eskakeni ambe ma ójkutaaka parari jorhenguarhini arhintani ka sési karani. ¿Nénakini marhuachea? Jarhuataatikeni parari jatsini ánchikuarhita ma ka no tsïtani, ístu parari úni nitamakuarhini ka jorhenguarhini ka jorhentpini Tata Diosïiri uandakuani. Joperu sánderu jukaparhakua ambe jindeesti eskari uaaka arhintani Bibliani ka eratsentani ka inde ambe uaati eskari sánderu sési pájperaaka Tata Diosï Jeobani jingoni (1 Tim. 4:15). w23.12 20 párr. 10, 11

Ju je kurhakuni Tata Diosï Jeobani eskajtsïni jarhuataaka parachi no úni imani ambe enga no sési jaka. Jimbokachi no perfektueska, jatsiskachi para méntku jánguarhintani jarhani parachi no úni imani ambe enga no sési jaka. Ístu, Satanási mámaru jásï ambe úrasïndi parachi no sési jásï ambe niátani. Pori ejemplu, úsïndi eskachi ikichakueni jásï ambe jingoni tsípikuarhiaka parachi no sési jásï ambe eratseni. Ka inde ambe úsïndi eskajtsïni Tata Diosï nóteru sési exeakia ka eskachi kʼéri pekadu ma uaaka (Mar. 7:21-23; Sant. 1:14, 15). Uétarhinchasïngachi eskajtsïni Tata Diosï Jeoba jarhuataaka parachi no úni imani ambe enga no sési jaka. Jiáni enga Jesúsi uandaspti eskachi kurhajkuarhipiringa: “Asïjtsïni jurajku eskachi terungutanhaaka, sino kuájpijtsïni para Noambakitini jingoni” (Mat. 6:13). Tata Diosïjtsïni uékasïndi jarhuatani, peruchi jatsiska para kurhakuni eskajtsïni jarhuataaka. Peru no solu uétarhisïndi kómarhini, sino ístu eskachi juchajtu jánguarhintaaka. w23.05 6, 7 párr. 15-17

Enga temungurhiri ma jánguarhintajka sési pájperani Tata Diosï jingoni, ísïksï úsïndi eskaksï Tata Diosïiri konsejuecha na uandajka ka ísïksï no xáni jatsiauati uandanhiateechani ka uaatiksï orhepani uérakuani imani uandanhiateechani engaksï uaaka eskaksï nóteru uékperaakia. Ístu, imeecha engaksï Tata Diosï Jeobaeri amigueka, kánikuaksï jánguarhintasïndi paraksï májkueni úni eska ima, komu sési kámpini, tekaantstiini ka puátspentani (Éfes. 4:32–5:1). Enga temungurhiri ma ísï kámberajka, kánikuaksï uékperasïndi. Pirenchi ma enga Lena arhinhajka ka enga jukari 25 uéxurhini páni jakaia enga uambuchaka, uandasïndi: “Kánikua fásiliisti xénchani ka janhanharhini nemani enga sési pájperajka Tata Diosï jingoni”. Ju je exeni ejemplu ma enga Bibliarhu jaka. Iámindu Dabidiiri desendientiicheeri, Tata Diosï Jeoba, Joséni ka Maríani erakuspti parakaksï Mesíasiiri taati jémbeepiringa. ¿Andisï imeechani erakuapi? Jimbokaksï imeeri amiguespka, ka Tata Diosï mítespti eskaksï imeecha méntkisï orheta peerapiringa imani. w23.05 21 párr. 3, 4

Nájkiruka Jesúsi, juchaari Orhejtsïkuti, perfektueka, ima kʼuiripuecha enga ima erakuaka parajtsïni orhejtsïkuni ixú Echerirhu nóksï perfektuesti. Ménisï no fásiliuati ísï úni eskajtsïni ima na arhiaka, sánderia jiáni engachi jucha no uékani jauaka ísï úni. Ma xanhari apostoli Pedru indeni ambe nitamakuarhispti. Ánjeli ma arhispti eska jatsispka para arhani kʼuiripeta ima animaliicheeri enga Moisésiiri Lei uandeenga eskaksï no pímbinhasï jarhaspka. Joperu Pedru tanimu xanhari uandaspti eska no ísï úpiringa (Úku. 10:9-16). Ima ísï exesïreendi enajkiksï no káni sési japi. Joperu, apostoli Pablu kurhajchaaspti ima Jerusaléni anapu kristianuechani engaksï orhekupaenga jiáni engaksï arhipka eska paapiringa tʼámu achamasïicha templurhu ka eska pímbinhaxentapiringa para xarhatani eska kurhajchaxapka Leini. Pablu no ma ambe no sési úspti ka mítespti eskaksï kristianuecha nóteru jatsispkia para úni ambe enga Lei uandeenga. Nájkiruka ísïipka, Biblia uandasïndi: “Ísï pauandikua, Pablu paaspti imani achamasïichani ka imeechani jingoni pímbinhaxentaspti” (Úku. 21:23, 24, 26). Jimboka Pablu kurhandispka, jarhuajpespti parakaksï erachiicha májku kʼéri japiringa (Rom. 14:19, 21). w23.10 10 párr. 15, 16

Imeecha engaksï uéjka sési pájperani Tata Diosï Jeoba jingoni, jatsistiksï para chénharhini o janhanharhini. No arhiparini na engachi xáni ióni páni jakaia jurhimbikuarhu, jatsiskachi para chénharhini Tata Diosï Jeobani. Joperu, ¿ambe arhikuekasïni chénharhini Tata Diosïni? Jindeesti xénchani ka no uékani úni ambe ma enga uaaka eskajtsï nóteru sési pájperaakia. Jesúsi ambakiti ejemplu máesti jimboka “chénharhisïreenga Tata Diosïni” (Ebr. 5:7). Ima no chérhisïreendi Tata Diosïni (Is. 11:2, 3). Sánderu sési, mintsita jingoni xénchasïreendi imeeri Taatini ka uékasïreendi kurhajchani (Juanu 14:21, 31). Juchajtuchi kánikua janhanharhisïnga ka kʼéri ambechi arhisïnga jimboka Tata Diosï máeska enga uékpijka, enga jánhaskatiika, enga iámindu ambe sési újka ka enga kánikua uinhapikua jatsika. Ístu, míteskachi eskajtsïni xénchasïnga jimboka uandanhiasïnga imani ambe jimbo engachi jucha újka. Engachi no kurhajchajka, ima no sési pʼikuarherasïndi; joperu engachi kurhajchajka, ima kánikua sési pʼikuarherasïndi (Sal. 78:41; Prov. 27:11). w23.06 14 párr. 1, 2; 15 párr. 5

Enga Usíasi na niárapkia kánikua juramukua jatsini, mirikurhispti eska iámindu ima ambe enga xáni úpka Tata Diosï Jeobani jimboespka. ¿Ambechi jorhenguarhisïni? Eskachi no jatsiska para mirikurhini eska Tata Diosïni jimboeska iámindu ambakiti ambe engachi jatsika ka eska ístu imani jimboeska ambe engachi újka úni para marhuakuni. Enbesi de kʼéramakuarhini imani ambe jimbo engachi úkia, jatsiskachi para Tata Diosï Jeobani diosmaiamukua íntskuntani (1 Kor. 4:7). Jatsiskachi para kaxumbitiini ka jiókuarhini eskachi no perfektueska ka eskachi uétarhinchasïnga eskajtsïni jurhimberantaaka. Erachi ma enga jukari 60 uéxurhini jatiriikia karaspti: “Jorhenguarhiska no sóntku no sési exeni engareni nema jurhimberantajka imani ambe jimbo engani no sési úka, sánderu sési, jánguarhintasïnga sési úni ambe ma”. Engachi kaxumbitiiska ka chénharhinchi Tata Diosï Jeobani, sésijtsïni nicheati (Prov. 22:4). w23.09 10 párr. 10, 11

Primeru siglurhu anapu kristianuechaksï jatsispti para tekaantstiini. Májkueni eskaksï máteru kʼuiripuecha, imeechajtuksï jatsiaspti problemeechani engaksï sáno iámindu kʼuiripuecha jatsiajka, ístuksï jatsiaspti máteru járhati imeecheeri jakajkukua jimbo. Judiueri relijioniiri orhejtsïkutiicha ka ístu Roma anapu juramutiicha, uánikuechanksï no sési kaasïreendi ka ístuksï imeecheeri familia no sési kaasïreendi (Mat. 10:21). Ka ménichani, jatsisptiksï para jingontku jarhani apostateecha jingoni, engaksï uékeenga támisï páni kúnguarhikuani chkuanderakua ambe jorhentpiparini (Úku. 20:29, 30). Nájkirukaksï ísï nitamakuarhini japka, kristianuechaksï úspti tekaantani (Apok. 2:3). ¿Ambe jarhuataaspi? Eratsentasptiksï ambe enga Biblia uandajka imeecheeri ambe engaksï tekaantapka, komu Jobu (Sant. 5:10, 11). Kómarhisptiksï Tata Diosï Jeobani paraka uinhapikua íntsaapiringa (Úku. 4:29-31). Ka méntkisïksï miáspti eska ima kóndeantapiringa engaksï tekaantapiringa (Úku. 5:41). Juchajtuchi uaaka tekaantani engachi eratsentaska ejempluechani engaksï Bibliarhu ka juchaari publikasionicharhu jaka, imeecheeri engaksï tekaantskua xarhatapka. w23.07 3 párr. 5, 6

Tata Diosï Jeoba ka Jesúsi nójtsïni méni ísï exeati eskachi nóteru uaakia marhuakuani. Jiáni enga apostoli Pedru uandapka eska no mítespka Kristuni, jatsispti para sési eratsentani ambe úpirini. ¿Nóteru jánguarhintapirinia? ¿O seguiriipirini Jesúsiiri chúxapatiini? Jesúsi kurhakuspti Tata Diosï Jeobani eska jarhuatapiringa Pedruni paraka seguiriipiringa mintsikani imani ka no chkétakuarhini. Tátsekua Jesúsi arhispti Pedruni eska kómarhijpikuspka ka eska seguru jarhaspka eska ima sánderu orhepatini úpiringa uinhaperaantani erachiichani (Luk. 22:31, 32). ¡Kánikua uinhaperantapti Pedruni miántani ini ambe! Juchajtuchi jatsiaka para jukaparhakua ambe erakuni, enga ísï úkuarhini jauaka, jamberi Tata Diosï Jeoba orhejtsïkutiichani úrauati engajtsïni uékperakua jingoni uinhaperantaaka parachi no méni jurajkuni imani (Éfes. 4:8, 11). Tata Diosï Jeoba íntskuspti Pedruni ka ístu máteru apostoliichani ambe engaksï xáni uétarhincheenga ka májkueni uaati juchantsïni jingoni engachi orheta peeraska aianhpikuani. w23.09 24, 25 párr. 14, 15

Tata Diosï Jeoba exesïndi asta sánderu sapichu ambe engachi újka máteruechani jimbo. Ima ísï exesïndi indeni ambe komu kʼéri sakrifisiu ma ka eska ambe ma enga jatsika para maiampintani. Enga chá orhejtsïkutiipka o sierbo ministeriali, Tata Diosï Jeoba no mirikurhisïndi ambe engajtsï xáni úka uékperakua jimbo (1 Kor. 15:58). Ka jingontku exesïndi na engajtsï seguiriini jaka uékperakua xarhatani. Tata Diosï Jeoba uékasïndi eskachi sánderu xénchaaka imani ka ístu máteruechani. Parachi sánderu xénchani Tata Diosï Jeobani jatsiskachi para arhintani imeeri Karakatani, eratsentani ambe engachi arhintaaka ka pauani pauani kómarhini. Ka parachi xarhatakuani erachiichani eskachi xénchaasïnga, jatsiskachi para jirinhakuntani néna jarhuataani. Engachi sánderu xénchaska Tata Diosï Jeobani ka ístu juchaari erachiichani, sánderuchi sési pájperaaka imeecha jingoni. w23.07 10 párr. 11; 11 párr. 13; 13 párr. 18

Mándani kristianu jatsisti para jandiajku erakukuarhini ambe úni para kuidarikuarhini. Engachi tratamientu ma erakuni jauaka, jatsiskachi para exeni ambeksï uandasïni Biblieri juramukuecha iurhiriiri ambe, sïkuamikueri ka máteru ambeeri (Úku. 15:20; Gal. 5:19, 20). Peru para máteru ambe, mándanchi jatsiska para erakuni ambe engachi uaaka. Jamberichi jucha eratsejka eska tratamientu ma kánikua marhuasïnga o eska no marhuasïnga, peruchi jucha jatsiska para jurajkuani erachiichani eskaksï ima erakukuarhiaka náki tratamientu úrani. Jimbosï xáni sésiiti eskachi méntku miáni jauaka i ambe: 1) eska Tata Diosïiri Reiunujkusï uaaka kénditani pʼamenchakuechani para méntkisï (Is. 33:24); 2) mándani kristianu jatsisti para sésimindu eratsekata jatsini ambe enga sánderu sésiika (Rom. 14:5); 3) nóchi jusgariuasïnga máteruechani, nijtuchi imani ambe újki enga no sési úkuauaka imeechani (Rom. 14:13), ka 4) kristianuechaksï kánikua xénchperasïndi ka sánderuksï jukaparharasïndi eska kúnguarhikua májku kʼéri jauaka ka eska ima ambe engaksï imeecha eratsejka eska sési jarhaska (Rom. 14:15, 19, 20). w23.07 25 párr. 15

¿Chá jukaparharasïni engajtsï sési pájperajka Tata Diosï Jeoba jingoni? ¡Jo, ísïiti! Desde iónisïa, miioni jimbo kʼuiripuechaksï májkueni pʼikuarherasïndi (Sal. 104:33, 34). Uánikua kʼuiripuechaksï uánikua ambe tekaantasti ka úni Tata Diosï Jeobani jimbo, komueskaksï Israeli anapu nasareuecha o engaksï aiakukuarhetini japka. Íksï uandakuecha sési pakarakuasïreendi imani israeliteechani engaksï ísï marhuauenga komueska nasareu ma, jimbokaksï uánikua ambe tekaantasïreenga paraksï úni sési marhuakuni Tata Diosï Jeobani. Moisésiiri Lei jurajkusïreendi eska tataka o nanaka ma úpiringa ísï aiakukuarheni Tata Diosï Jeobani komueska nasareu ma na enga xáni tiempu uékapiringa (Núm. 6:1, 2). Enga nema ísï aiakukuarhienga jatsisïreendi para úni máru ambe engaksï máteru israeliteecha no ueenga. ¿Joperu andisï ísï ueeni? Jamberi jimboka kánikua xénchasïreenga Tata Diosï Jeobani ka jimboka agradesidu jarhasïreenga xáni uánikua kóntperateecha jimbo enga Tata Diosï Jeoba íntskuenga (Deut. 6:5; 16:17). w24.02 14 párr. 1, 2

Bibliarhu, uandakua enga ebreu jimbo tradusirikuarhijka “no méni jurajkuni” o “ambakiti uékperakua”, arhikuekasïndi na enga xáni xénchajka nema máteru nemani ka eska méntkisï jima jauaka imani jingoni. Uánikua xanhari úrakuarhesïndi para xarhatani na enga xáni xénchaajka Tata Diosï Jeoba imeeri marhuariichani, ka ístu na engaksï xáni xénchperajka imeeri marhuariicha (2 Sam. 9:6, 7). Tata Diosï Jeoba erokuarhisïndi eskachi juchajtu no méni uékaaka jurajkuni imani. I ambesï úkuarhipti profeta Danieli jingoni. Ima uánikua xanhari xarhataspti eska no méni jurajkupiringa Tata Diosï Jeobani. Peru enga jukari 90 jatiripkia nitamakuarhispti ambe ma enga kánikua úkua jukapka. Máru acheetiicha engaksï rei jingoni ánchikuarhienga kurhunhisïreendiksï Danielini ka nóksï janhanharhisïreendi Tata Diosï Jeobani. Ísï jimbo, eratsesptiksï úni ambe ma para Danielini uándikuni. Úsptiksï eska Dariu firmaripiringa lei ma, nani enga Danieli jatsipka para xarhatani néni no méni jurajkupirini Tata Diosïni o reini. Ka para ísï úni jatsispti para 30 jurhiatikua no kómarhini Tata Diosï Jeobani. Peru ima no jurajkuspti Tata Diosïni (Dan. 6:12-15, 20-22). w23.08 5 párr. 10-12

Tata Diosï Jeoba uékasïndi eskachi xarhatakuauaka xénchperakua juchaari erachiichani ka pirenchiichani. Engajtsïni nema no sési kámaaka kúnguarhikuarhu, ju je no sóntku no sési exeni. Uaakachi eratseni eska no uékantku ísï úska o eska jánguarhintaxaka imani ambe úni enga sési jaka (Prov. 12:18). Nájkirukachi no perfektueka, Tata Diosï Jeobajtsïni kánikua xénchasïndi. Nójtsïni jandiajku jurajkusïndi engachi no újka sési úni ambe ma ka nijtujtsïni jatanhechijki (Sal. 103:9). ¡Jimbosï xáni jukaparhakueti eskachi májkueni uaaka eska juchaari Taati ka puákuantanchi máteruechani! (Éfes. 4:32–5:1). Ístu, ju je no mirikurhini eskachi iásïsï jatsika para sánderu májku kʼéri jarhani juchaari erachiicha jingoni, jimboka no ióni jimbo kʼamajkunhaka parhakpinirhu anapu ambe. No ióni jimbochi sánderu no sési kánhaaka ka astachi jamberi ónhanhani. Imani jurhiatikuecha jimbo, uétarhinchaakachi eskajtsïni juchaari erachiicha jarhuataaka (Prov. 17:17). w24.03 15, 16 párr. 6, 7

Biblia uandasïndi tumbiicheri engaksï jánguarhintapka andarhierani Tata Diosï Jeobani, ka ima jaiapanheantaspti ka ísï jimbo kánikua sési nikuaspti irekuarhu, pori ejemplu Dabidi. Jiáni enga tumbi máepka, ima erakuspti marhuakuni Tata Diosï Jeobani ka tiempu jingoni, niáraspti reini ka no méni jurajkuspti (1 Rey. 3:6; 9:4, 5; 14:8). Engari jorhenguarhiska Dabidiiri ambe, imeeri ejemplukini jarhuatati parari no méni jurajkuni Tata Diosï Jeobani. Máteru ambe engari uaaka úni, jindeesti jorhenguarhini sánderu ambe Markusïiri o Timoteueri. Tsimarhanksï erakuspti marhuakuni Tata Diosï Jeobani ka nóksï méni jurajkuspti. Tsíperasptiksï Tata Diosï Jeobani. Tumbi, ¿nénari uékasïni eska jindeuaka chiiti tsípikua sánderu orhepatini? Ambe engari erakuska úni iásï, uaatikeni jarhuatani sánderu orhepatini. Engari mintsinharhiska Tata Diosï Jeobani ka no tʼujku mintsinharhikuarhini, imakeni jarhuataani ambakiti ambe úni. Tʼúri uaaka sési ka tsípikua jingoni irekani. Asï mirikurhi eska Tata Diosï Jeoba kánikua jukaparharasïnga iámindu ambe engari újka imani jimbo. No jarhasti sánderu sési jásï tsípikua ma eska juchaari Taati auandarhu anapuni marhuakuni engajtsïni xáni xénchajka. ¡No jarhasti sánderu ambakiti ambe! w23.09 13 párr. 18, 19

Apostoli Pablu mítespti eskaksï erachiicha no perfektuespka. Pori ejemplu, enga ueenapka Jerusaléni anapu kúnguarhikua jimbo nirani, uánikuechaksï chérhisïreendi ka nóksï uékani andarhierani (Úku. 9:26). Sánderu tátsekua, máruksï uandatsespti Pabluni (2 Kor. 10:10). Ístu, Pablu exespti erachiini ma enga eratsekua jukariipkia imani ambe úni enga no sési japka ka enga úpiringa no sési úkuani máteruechani (Gal. 2:11, 12). Ístu Markusï enga méntkisï pámbeteenga apostoli Pabluni niáraspti kánikua no sési pʼikuastani (Úku. 15:37, 38). Pablu úpirindi jarhariani imani erachiichani engaksï no sési pʼikuastapka. Joperu no ísï úspti, sánderu sési, no jurajkuspti Tata Diosï Jeobani ka seguiriispti marhuakuni ka ístu jánguarhintaspti sési ambe eratseni erachiicheeri ambe. ¿Ambe jarhuataspi? Pablu kánikua xénchaasïreendi erachiichani, jimbosï no imani ambe exeendi engaksï no sési ueenga, sánderu sési, eskaksï ambakiti kʼuiripuespka. Xénchperakua jarhuataspti paraka ima puákuantapiringa, ísï eska na arhijka iásï anapu tekstu. w24.03 15 párr. 4, 5

Bibliarhu uánikua ejempluechaksï jarhasti engaksï xarhatajka eska iátsitakuarhu jámani jukaparhakueska. Pori ejemplu, jiáni enga Isaaki Guerari irekapka, filisteuecha engaksï jima irekapka, úndasptiksï enbidiarini, ka tunhaantasptiksï imani posuechani enga Isaakiiri taati jamberi jántspiriichaksï uaapka. Peru Isaaki enbesi de arhirperani posuecha jimbo, iauanisï niraspti irekani ka máteru posuechani uaaspti (Gén. 26:12-18). Peruksï filisteuecha ménderu ueenaspti uandani eska itsï enga jima japka, imeecheerispka. Nájkiruka Isaaki ísï nitamakuarhipka, ima no ikiaspti (Gén. 26:19-25). ¿Ambe jarhuataspti paraka ima iátsitakuarhu jámapiringa, asta jiáni jamberi engaksï máteruecha uékeenga ikiatani? Seguru eska taati jémbeecheri ejemplu kánikua jarhuataspka. Pori ejemplu, Abraáni sési kámpisïreendi ka Sara ístu pínandikua jatsisïreendi ka “iátsitakuarhu jámani” (1 Ped. 3:4-6; Gén. 21:22-34). w23.09 15 párr. 4

Tata Diosï Jeoba xarhataspti na engajtsïni xáni xénchajka ka axaspti imeeri máechakua Uájpani ixú Echerirhu. Jesúsi aianguaspti kʼuiripuechani Tata Diosïiri Reinueri ambe ka íntspispti imeeri tsípikuani parajtsïni pʼímutantani pekadueri ka uarhikueri. Tátsekua tsíntaspti para auandarhu irekani ka juramuni komu Rei Tata Diosïiri Reinurhu. I ambesï sánderu uandajti Biblia: Tata Diosï Jeoba pímbinhajkuntaati imeeri nombrini jiáni enga uaaka ambe enga eratsetini jaka úni echerirhu, úraparini imeeri Reinuni enga juramuti jindeeka tata Jesukristu. No ma ambe uaati úni eska no ísï úkuarhiaka (Is. 46:10; Ebr. 6:17, 18). Tiempu jingoni Echeri paraisu máeuati, nani engaksï Adáni ka Eba uájpeecha perfektueuaka, sésiksï jámaati ka irekaatiksï para méntkisï (Sal. 22:26). Ka no inde ambejkuesti ambe enga Tata Diosï Jeoba eratsetini jaka úni, ima uaati eskaksï iáminduecha engaksï auandarhu irekaka ka Echerirhu, familia máeuaka engaksï májku kʼéri jauaka ka jiáni iáminduechaksï jiókuarhiati eska Tata Diosï Jeoba jindeeska Sánderu Kʼéri Juramuti (Éfes. 1:8-11). ¿A no eskajtsïni ísku pakatasïnga na enga Tata Diosï Jeoba kumplirini jaka ambe enga ima eratsetini jaka? w23.10 20 párr. 7, 8

Engaksï judiuecha uéakuntapka Babilonia ka Jerusaléni niárani, úndasptiksï úkua jukanchani sentabu ambe jimbo, politikuecheeri problemeechani jimbo ka imeecheeri ikiatspitiichaksï ueenaspti no sési kaani. Ini ambe jimbo engaksï nitamakuarhini japka, máruksï úkua jukanchaxapti mintsita jingoni ánchikuarhini paraksï sési jájkuntani Tata Diosï Jeobaeri Templuni. Ísï jimbo, Tata Diosï Jeoba axaspti profeta Ageoni ka Sakariasini para uinhaperantani iretani (Ageo 1:1; Zac. 1:1). Joperu sáno 50 uéxurhini tátsekua, judiuechaksï ménderu chkétakuarhispti. Esdrasi kʼuanhatsentapti Jerusaléni Babilonia uératini para uinhaperaantani ka jarhuataani paraksï orheta peerani Tata Diosïiri ambe (Esd. 7:1, 6). Ageoueri ka Sakariasiiri profesiechaksï jarhuataspti Tata Diosïiri iretani paraksï seguiriini mintsikani Tata Diosï Jeobani nájkirukaksï imeeri ikiatspitiicha no sési káuenga ka ístujtsïni juchantsïni jarhuataati iásï parachi seguiriini mintsikani eskajtsïni Tata Diosï Jeoba jarhuataaka ambe uéjki enga úkuarhini jauaka (Prov. 22:19). w23.11 14, 15 párr. 2, 3

¿Nénachi uaa xarhatani eskachi sánderu xénchasïnga juchaari erachiichani? Ma ambe engachi uaaka úni jindeesti sési pʼikuastantani ka parachi seguiriini ísï úni jatsiskachi para pʼamojpitiini (1 Tes. 4:18). ¿Peru nénachi uaa seguiriini kánikua xénchperani? Jánguarhintaparini puákuantani máteruechani imani ambe jimbo engaksï no sési újka. ¿Andisï xáni jukaparhakue eskachi xénchperaaka ini jurhiatikuechani jimbo? Pedru i ambe uandaspti: “No ióni jimbo, iámindu ambe kʼamakurhiatia. Ísï jimbo, [...] kánikua xénchpera [je]” (1 Ped. 4:7, 8). Nóteru ióni kuerataxatiia paraka k’amajkunhaaka i parhakpini ka ¿ambechi úkuarhinchaa juchaia? Jesúsi i ambe uandaspti: “Iámindu ireteechaksïni kurhunhiati jíndeni jimbo” (Mat. 24:9). Jatsiskachi para májku k’éri jarhani parachi úni seguiriini marhuakuni Tata Diosï Jeobani nájkirukajtsïni ikiachiaka. Engachi sési jimbo xénchajka juchaari erachiichani, Satanási nójtsïni méni uaati jarharitani jimboka uékperakuasï újka eskachi “iáminduecha uaaka sési pájperani” (Filip. 2:1, 2). w23.11 13 párr. 18, 19

Jurhimbikua ambe enga Bibliarhu jaka, kánikua uinhapikua jatsisti. Engachi jorhendaajka kʼuiripuechani neeski Tata Diosï Jeoba ka na jásïiski, ambakiti ambe niárasïndi úkuarhini. Engaksï kʼuiripuecha sánhani arhijka nóteru jakajkunia chkuanderakua ambe enga Noambakiti jorhentpijka ka enga pápkʼanhastaani japka, ísïisti enajkiksï éskantajki ka ueenasïndiksï ísï exeni juchaari Taatini eskachi jucha na exejka, ísku pakataasïndi engaksï eratsentajka na enga xáni uinhapitiika Tata Diosï (Is. 40:26). Engaksï jorhenguarhijka eska ima jurhimbikua jingoni úsïnga iámindu ambe, jarhuataasïndi kʼuiripuechani paraksï sánderu seguru pʼikuarherani (Deut. 32:4). Ískuksï pakarasïndi engaksï mítejka na enga xáni jánhaskatiika (Is. 55:9; Rom. 11:33). Ka sésiksï pʼikuarhenhisïndi míteni eska ima xénchperakueska (1 Juanu 4:8). Engaksï andarhierajka Tata Diosï Jeobani, seguruksï jarhasïndi eskaksï uaaka irekani para méntkisï ka niárani imeeri uájpeeni. ¿A no eska jarhuataani kʼuiripuechani paraksï andarhierani juchaari Taatini auandarhu anapuni kʼéri kóntperata máeska? Ístu, engachi ísï úni jarhajka, Tata Diosï Jeoba ísï exesïndi eskachi imanisï jarhuatani jaka (1 Kor. 3:5). w24.02 12 párr. 15

¿Chá jorhenguarhixaki Biblieri ambe? ¿Oksï chiiti taatiicha Testigueski ka imeechaksïni jorhendani jarhani? Jiájkani jamberijtsï eratseni jakaia ísï atakuarhini. ¡Ka inde ambe kánikua sési jarhasti! Joperujtsï orheta jatsiska para aiakukuarheni Tata Diosï Jeobani ante dejtsï itsï atakuarhini. ¿Néna aiakukuarhesïni nema Tata Diosï Jeobani? Kómarhikua ma úkusïndi ka aiakusïndi eska imantkusï kómarhiaka ka eska orheta peeraaka imeeri ambe. I ambe arhikuekasïndi eska ima kʼuiripu aiakuskia Tata Diosï Jeobani eska méntkisï xénchaaka iámu mintsita jingoni, alma jingoni, eratsekua jingoni ka uinhapikua jingoni (Mar. 12:30). Enga ma aiakukuarhejka Tata Diosï Jeobani, tsimarhantuksïsï mítejti. Joperu enga itsï atakuarhijka, kʼuiripuni japarini ísï úsïndi. Kánikua jukaparhakua ambeesti aiakukuarheni Tata Diosï Jeobani. Ka chájtsï meru uékapiringa ísï úni, ka ima erokuarhisïndi eska chá ísï uaaka (Ecl. 5:4, 5). w24.03 2 párr. 2; 3, 4 párr. 5

Bibliarhu arhisïndi eskaksï temungurhiriicha “uandanhiateechani jatsiauaka” (1 Kor. 7:28). ¿Andi? Jimbokaksï tsimarhani no perfektueska. Ístu, jimbokaksï táchani járhaska ka nóksï májkueni ambe tsitini. Jamberiksï no májku ireta jimbo anapueti ka ménderuenksï tʼarhexeranhani. Ka engaksï na tembuperajkia, ménichanksï niárasïndi imani ambe exeni engaksï no exepka jiáni engaksï nobiuepka. Ka iámindu inde ambe úsïndi eskaksï nóteru xáni sési pájperaakia. Joperu nóksï jiókuarhisïndi eskaksï tsimarhanisï no sési úka nijtuksï májku kʼéri ánchikuarhijki paraksï sési peentani uandanhiatani, sánderuksï arhisïndi arhirperani ka astaksï niárasïndi eratseni eska sánderu sési jauaka eskaksï jurajperaaka oksï diborsiarikuarhini. ¿Ambe sánderu sési jaua eskaksï uaaka? Seguruchi jarhaska eska Tata Diosï kánikua sési pʼikuarherajka exeni na engaksï temungurhiriicha jánguarhintajka sési peentani uandanhiateechani ka xénchperakua jingoni ka janhanharhikua jingonksï kámberani. w24.03 16 párr. 8; 17 párr. 11

Ísï tátsekua engajtsï na itsï atakuarhijkia, niárasïngajtsï sánderu mintsikani indeni erokuarhikueri ambe, jimbokajtsï sánderu jorhenguarhisïnga ka sánderujtsï mítesïnga Tata Diosïiri ambe (Ebr. 5:13–6:1). Seguru eskajtsï ísï úkuarhinchaka eska na uandajka Roma 5:2-4, jimbokajtsï niáraska uandanhiateechani jatsiani joperujtsï exeska eskaksïni Tata Diosï Jeoba jaiapanhentasïnga. Ka jimbokajtsï míteska eska ima tsípini pʼikuarherasïnga chánksïni jingoni, inde ambeksïni jarhuatasïndi parajtsï sánderu seguru jarhani eska Tata Diosï Jeoba ísï uaaka eska na aiatspeka. Sánderujtsï jakajkusïnga indeni erokuarhikuani eska antesi. Exesïngajtsï eska meru ísïiuaka, eska chaariuaka, ka uékaxakajtsïa eska niáraaka. Jarhuatasïndiksïni parajtsï úni sánderu sési kámani chaari familiani, sánderu sési erakuni úni ambe ma ka sánderu sési úrani chaari tiempuni. Enga apostoli Pablu na uandapkia eska sési jarhani Tata Diosïni jingoni úsïnga eska ma erokuarhikua ma jatsiaka, ístu uandaspti ambe ma enga kánikua jukaparhakueka: eskachi uaaka seguru jarhani eska inde erokuarhikua meru ísï úkuarhiaka (Rom. 5:13). w23.12 12, 13 párr. 16-19

Engachi no sési nitamakuarhini jarhajka, nóchi jamberi úsïnga sési eratseni, no nani máruchi pʼikuarherasïnga ka nóchi sési erakusïnga ambe ma jimbokajtsïni uandanhiateecha manamatantasïnga komueskaksï oleecha na kántajka barkuni ma enga marirhu terumikua jarhajka ka enga kʼéri janini jarhajka. ¿Nénajtsïni jarhuatasïni Tata Diosï Jeoba engachi ísï pʼikuarherajka enajkichi uarhiaia ka nóteruchi únia orhepani uérani? Imajtsïni aiachisti eskajtsïni jarhuataaka sési anhaxurhitini jarhani. Pori ejemplu, enga barku ma jimeesïsï jarhajka nani enga kʼéri janini jarhajka, úndasïndi kánikua no sési manakuarhini. Ka paraka barku no jiniani ka jiniani niuaka, mándani jájtakurhini aleteni jarhatiichani jukaasïndi enga jarhuatajka no xáni no sési manakuarhini. Ka i ambe úsïndi eskaksï iáminduecha engaksï jima nirani jarhajka sánderuksï seguru pʼikuarheraaka. Joperuksï aleteecha sánderu marhuasïndi enga barku xanharani jarhajka. Májkueni, engachi uéjka eskajtsïni Tata Diosï Jeoba jarhuataaka engachi kánikua no sési nitamakuarhini jauaka, jatsiskachi para orhepani ísï xanharani, i ambe arhikuekasïndi eskachi jatsiska para seguiriini jarhani sési marhuakuni Tata Diosï Jeobani. w24.01 22 párr. 7, 8

Engajtsï chéni jauaka kurhamarhikuarhi je: “¿Ambe úskia Tata Diosï Jeoba ióntki?”. Ístujtsï uaaka eratsentani ambe xáni kueraaka. Pori ejemplu engachi exejka na enga Tata Diosï Jeoba kuidariuajka pájaruechani ka tsïtsïkiichani engaksï no ísï úkata eska ima ka nóksï úni marhuakuni, inde ambejtsïni jarhuatasïndi parachi sánderu mintsikani eskajtsïni juchantsïntu kuidariuaka (Mat. 6:25-32). Ístujtsï uaaka eratsentani ambe enga xáni úkia Tata Diosï Jeoba imeeri marhuariicha jimbo. Pori ejemplu úpiringajtsï jorhenguarhini Tata Diosï Jeobaeri marhuariiri ma enga Biblia uandajka o iásï anapu eksperiensiani ma arhiantani. Ka ístu eratsenta je néna engaksïni Tata Diosï Jeoba jarhuatakia asta iásï jamberi. ¿Nénaksïni jarhuataski míteni jurhimbikua ambe? (Juanu 6:44). ¿Nénaksïni mókuchiantaskia chaari kómarhikuechani? (1 Juanu 5:14). ¿Nénaksïni marhuachesïni pauani pauani enga Tata Diosï ísï íntspika imeeri Uájpani? (Éfes. 1:7; Ebr. 4:14-16). w24.01 4 párr. 6; 7 párr. 17