No nani nirasïrenga engani no peenga juchiiti armani

NA ENGANI IREKAPKA IÓNTKI:

Roma andajpenuska nani enga no kánikua jatsikuarhinhenga ka ístu jima tʼarhexeska. Kánikua no sési nitamakuarhispka. No méni mítespka juchiiti nándini ka no méni úspka sési pájperani juchiiti taati jingoni. Sánderu xanharu jimbo kʼuiripespka.

Engani 10 uéxurhini jatiripka, ueenaspka sïpani jámani ka engani 12 jatiripkia, primeru ueltespti engani sïpakuarhipka juchiniu. Juchiiti taatirini someni nirasïrendi petantani engani ónhakuarhetini jarheenga. Méntkisï arhijperani jarhasïrenga kʼuiripuecha jingoni ka puru uarhipeni jámasïreenga. Engani 14 jatiripkia, uéakuspka juchiniu ka nóteruni méni kʼuanhatsentaspka. Xanharu jimbo irekaspka ka droga ambe úrasïreenga. Chúrikuechani, náki uéjki troka ma mítasïrenga para jima kʼuíni asta antede erandeni. Tátsekua jimeesïsï nirasïrenga nani enga itsï sáni japiringa parani kutsukutsutakuarhini.

Sési jorhenguarhispka sïpani jámani. Euakuarpini jámasïreenga xanharuecha jimbo ka chúrikuechani, inchatspini jámasïreenga kʼumanchikuecharhu para sïpani. Kánikua sési jorhenaspka sïpani jámani jimbosïni pandiia ma jingoni úkuarhipka enga kánikua mítekatepka ka ueenaspka bankuecharhu sïpani jámani. Ka jimbokani xáni uarhipeni jámeenga, pandiiarhu anapuechajtsïni janhanharhisïreendi. No nani nirasïreenga engani no peenga juchiiti armani. Asta iájchakuarhu kétsekua peerasïrenga parani úni kʼuíni. Uarhipeni jámani, droga ambe úrani, sïpani, ísku jándikua ambe úni ka no sési járhati uandakuechani úraani, inde jásï kʼuiripuespka ji. Jimbojtsïnisï polisiecha méntku jámani jarhendi jirinhantani ka somentsïni ónhaspti. Ísï jimbo, engani no xanharu jarheenga, karselirhu jarhasïrenga.

NA ENGARENI BIBLIA MÓJTAKUCHEKA IREKUA:

Ma uelta engani uéntapka karselirhu, niraspka juchiiti tiani pʼorhembini. Ji no mítespka eska ima ka juchiiti tsimani primuechaksï Jeobaeri testigu úkuarhispkia. Pʼímarhisptijtsïni parani nirani imeecheri tánguarhikuarhu ma ka niraspka nomasi para exeni. Engachi niárapkia Kʼumanchikua Reinuerirhu, afuersa uékaspka puertarkisï uaxakani para exeni né inchapirini ka uéntani, ka ji kámaxapka pistola.

Nirani ima tánguarhikuarhu, mójtakuspti juchiiti irekua. Miásïnga eska no méni exeaxapka xárhati kʼuiripuechani eska imeecha engaksï jima japka. Iáminduechaksï tsípixapti ka sésiksï kámberani; útasïni miáxaka na engajtsïni sési exepka ka sési kámani Jeobaeri testiguecha. Ima ambe méntku ménderuenisti eska ima irekua enga ji páni japka.

Ueenaspka Biblieri ambe jorhenguarhini Jeobaeri testiguecha jingoni. Engani na jorhenguarhipani japka, exespka eskani jatsispka para mójtakuni juchiiti irekua. Pori ejemplu, mintsitarhurini niárachesti ambe enga arhijka Proverbios 13:20: “Ima enga mímixetichani jingoni jámani jaka, mímixeti úkuarhiati, peru ima enga no ambarhatichani jingoni jámajka no sési nikuati”. Kurhanguspka eskani nóteru jatsispkia para kúrhiani pandiiarhu anapuechani. Kánikua úkua jukaspti, perurini Tata Diosï Jeoba jarhuatasti para ísï úni.

Ístu, uánikua máteru ambe jatsispka para jurajkuni. Kánikua jánguarhintaspka para nóteru itsutania ka ístu para nóteru úrani droga ambe. Pʼikuspka ima jauiri xáni iórhati engani jukapka, ístu pʼínderantaspka tirhindikua ka nóteru no sési járhati uandakuechani uandaasïrengia. Jiájkani niáraspka pʼikuarherani eskani úxapkia pʼíngukuarhini.

Ji no méni tsitispka arhintani ni estudiarini, ísï jimbo, kánikua úkua jukanchasïreenga Bibliani estudiarini. Peru sánhani arispka sánderu xénchani Tata Diosï Jeobani ka ueenaspka no sési pʼikuarherani imani ambe jimbo engani no sési úpka. Someni no sési pʼikuarherasïrenga imani ambe jimbo engani úpka ka eratsesïrenga eskarini Tata Diosï Jeoba no méni puáchintapiringa. Peru jiáni engani ísï pʼikuarherani jarheenga, arhintasïreenga na enga Tata Diosï Jeoba puákuntapka rei Dabidini kʼérati pekaduechani enga uaapka ka inde amberini sési pʼikuastantasïreendi (2 Samuel 11:1–12:13).

Máteru ambe engani úkua jukanchapka, jindeespti kʼumanchikuecharhisï aianhpini (Mateu 28:19, 20). Kánikua chésïreenga exentani nemani engani antesi no sési úkupka, peru sánhani arispka nóteruni chénia ka ueenaspka tsípikua jingoni aianguani kʼuiripuechani na enga sési kámpijka juchaari Taati auandarhu anapu, ima enga meru puátspintajka.

NÁKI KÓNTPERATECHANI INTSÏNHAASKIA:

Iásï tsípiti jarhaska jimbokani niáraska míteni Tata Diosï Jeobani. Sáno iámindu juchiiti amiguecha engani antesi jatsiapka, uarhistiksïa oksï ónhakata jarhasti. Peruni ji tsípikua jingoni irekaxaka ka ambakiti erokuarhikua ma jatsiska para sánderu orhepani. Iásï kaxumbitiskia ka kurhandisïnga, nóteruni xáni sóntkuni ikiasïnga ka indeni ambe jimbo sánderuni sési pájperasïngia máteruecha jingoni. Ístu, sési jásï ma uarhiiti jingoni tembuchatixaka enga Carmen arhinhajka ka kánikuachi tsípikua jingoni irekaxaka. Márkuchi jarhuataasïnga juchaari besinuechani paraksï sánderu sési míteni Biblieri ambe.

Ah, ka iásï nóteruni sïpani jámasïngia. Ménichani útasï nirasïnga bankurhu ánchikuarhini, peru nóteru para sïpani jámani sino para limpiarini.