Néna eianhpini úrapariani exibidorichani para publikasionichani exerpiani

Eianhpini úraparini karrituni ma o mesa ma para exerpiani publikasionichani, marhuaxati para kʼuiripu enga ambakiti mintsita jukaka, mítini jurhimbikuani (Juanu 6:44). Jimboksïsï orhejtsïkuticha pʼímarhinhati uáni arregluechani para eianhpikua xanharuecha jimbo, para kúnguarhikueri territoriurhu enga uánikua kʼuiripu jámajka. Engaksï exibidoricha para publikasionichani exerpiani, no méntkisï mápurujku péranhajka, no uétarhisïndi permisu kurhakuani juramutichani. ¿Néksï uá eianhpini exibidoricharhu? Eianhpiricha engaksï ambakiti eratsikua xarhatajka, engaksï sési jámajka ka engaksï jorhenaka ambakiti uandontskuarhita ma jatsini kʼuiripu jingoni. Ambe enga ixú kétsekua uandajka xarhatasïndi ambe úni ka ambe nómbe ka jarhuatauati eianhpirichani para sánderu sési nikuani i jásï eianhpikuarhu.

Ambe úni:

Sési uandajpa je ka jánguarhi je tsípikuni kʼuiripuni enga jimesï nitamajka. Enga nema enga jimesï nitamani jauaka exeaka exibidorini, úpiringajtsï arhini: “Engajtsï uékajka uákajtsï pʼíkuni publikasioni ma”.
Séskueni iauani anhaxurhi je exibidoriri. Eianhpirichani nani sési nikuasïndi engaksï karriturhu o mesarhu no iauani anhaxurhijka. Máruksï exestia eska kʼuiripu anhaxurhisïnga engaksï eianhpiricha sánderu sáni iauani jauaka exibidorirhu. Enga nema andarheraaka exeani publikasionichani, jánguarhi je uénani uandontskuarhikuni, jamberijtsï uáka kurhamarhini: “¿Ménisïjtsï úkuarhiski indeni kurhamarhikuani?”.
Úra je Bibliani méntkisï engajtsï uáka.
Enga kʼuiripu erakuaka publikasioni ma para estudiuechani uáni, komueska libru Enseña, arhi je nénaeski Bibliaeri estudiu ma. Arhi je eskajtsï uékasïnga imani jingoni exeni selularirhu o tabletarhu bideuni ¿Andisï uétarhijki jorhenguarhini Bibliaeri ambe?
Engajtsï uáka, kurhakua je datuechani imechani engaksï uékajka sánderu mítini.

Ambe no úni:

No no sési uandajpani kʼuiripuni, afuersa uékani íntspini ambe ma, ikiani o jima ma ladu jarhani komueska sondadu ma.
No ísï exeni i jásï eianhpikuani eska nomasi jindeska para publikasionichani etsakuani. Ambe engachi uékajka jindesti estudiuechani uénani, jimbosï jukaparhakueti eskachi jánguarhintaaka uandontskuarhini kʼuiripu jingoni.
No jámani iámu óndakuni exibidorini o jukari uandontskuarhini kompanieruni jingoni. Engajtsï uétarhinchaaka úrani selularini, sési jauati engajtsï jarhariaka ma ratu exibidorini.
No jámani no sési arhijperani imecha jingoni engaksï no uékajka Jeobaeri ambe mítini. Engajtsïni i jásï kʼuiripu ma úndaka no sési arhini, sánderu sésiuati eskachi jirinhaaka nani mótsini.