Jarhuataa je chári sapiichani paraksï no chérakuarhini no sési járhati notisiecha jingoni

Méntkisïksï uérani jarhasïndi no sési járhati notisiecha ka úsïngachi exeani telebisionirhu, selularirhu, tabletarhu o komputadora ma jimbo. Ka sáno méntkisïksï xarharasïndi bideuecha ka imajenicha engaksï no sési jásï ambe xarharajka.

Ka sapiichajtuksï exeasïndi.

¿Ambejtsï uá úni parakaksï inde notisiecha no no sési úkuauaka chári sapiichani?

• ¿Nénaksï pʼikuarherasïni sapiicha engaksï notisiechani exeajka?

• ¿Nénajtsï uá jarhuataani chári sapiichani paraksï no xáni uandanhiani?

• ¿Nénajtsï uá jarhuatani chári sapini enga niáraska no sési jásï ambe nitamakuarhini?

¿Nénaksï pʼikuarherasïni sapiicha engaksï exeajka notisiecha?

• No sési járhati notisiechaksï ísku pakataasïndi máru sapiichani. Nájkirukaksï máru sapiicha no uandaaka na engaksï pʼikuarherajka, no sési járhati notisiechaksï uáti kánikua no sési úkuani. a Ka engaksï exejka eskaksï imeri táticha kánikua uandanhiaxaka, imechajtuksï sánderu uandanhiasïndi.

• Sapiichaksï uáti támisï kurhanguni ambe enga xarharajka notisiecharhu. Máru sapiicha eratsesïndi eska ambe engaksï exejka notisiecharhu, ístu uáti májkueni úkuarhinchani imeri familia. Ka engaksï someni xarharani jauaka bideuecha ima no sési jásï amberi enga úkuarhika, sapi ma úpirindi eratseni eska inde ambe méntku úndaxati úkuarhini.

• Sapiichaksï no úsïndi míteni sini meru ísï úkuarhiski eska na uandanhajka notisiecharhu. Sapiichaksï no mítesti eska imecha engaksï notisiecha aianhpijka, ménisï jukari ambeksï uandasïndi paraksï sánderu uánikua kʼuiripuecha exeni imecheri kanalini ka ísïksï sánderu sentabu andani.

¿Nénajtsï uá jarhuataani chári sapiichani paraksï no xáni uandanhiani?

• Asï jáma je xáni no sési járhati notisiechani exeani. I ambe no arhikuekasïndi eskaksï chári sapiicha no jatsiska para míteni ambe enga xáni úkuarhini jaka parhakpinirhu. Joperu no ma ambe marhuakuasïndi méntku exeani jarhani no sési járhati notisiecha.

  “Enga juchiti acheeti ka ji uandontskuarheni jarhajka ambe enga xáni uandanhajka notisieri ma ka juchari sapiichaksï kurhaani jarhani, exesïngachi eska inde ambe kánikua no sési úkuasïnga” (María).

  Bibliaeri konseju: “Uandanhiata ambe no sési pʼikuastasïndi kʼuiripueri mintsitani” (Proverbios 12:25)

• Tekaantskua jingoni kurhajchaa je ka kurhangukua je. Enga chári sapi úkua jukanchani jauaka uandantani ambe enga xáni uandanhiatani jaka, arhi je eskaksïni dibuju ma jingoni aianguaka. Engajtsï uandontskuarheni jauaka imani jingoni, úraa je uandakuecha enga ima uáka kurhanguni ka asï sánderu ambe ma arhi je ima notisieri enga ima exeka.

  “Juchari nanaka sapichu sánderu sési pʼikuarherasïndi engachi uaxakajka imani jingoni ka kurhajchani. Joperu no sáni marhuasïndi engachi arhiska ‘Iásï ísï jánhaskuarhixatiia ka jatsiskachi para pʼindeni’” (Sarahi).

  Bibliaeri konseju: “Jorhenguarhi je [...] sóntku kurhandini, peru ióndantsï mókukuarhini” (Santiagu 1:19).

• Jarhuataa je chári sapiichani paraksï kurhanguni ambe enga meru úkuarhini jaka. Por ejemplu, enga chári sapi notisiercharhu kurhaauka eskaksï sekuestrariska nemani, ima úpirindi eratseni eskaksï uánikuecha sekuestrarinhaxaka. Ísï jimbo, aiangu je chári sapini ambe engajtsï xáni úni jaka paraka ima sési jauaka. Miá je eska enga jukari aianhpinhajka ambe ma, jindeesti jimboka inde ambe kasi no méni úkuarhisïnga.

  “Jatsiskachi para jarhuataani juchari sapiichani paraksï orhepani uérakuni imani ambeni enga no sési pʼikuastani jaka. Sáno méntkisï, nema niárasïndi pʼikuarherani ambe ma imani ambe jimbo enga eratseni japka, jimbochisï jatsika para jarhuataani juchari sapiichani ambakiti ambe eratseni ka ísïksï no xáni chéati” (Lourdes).

  Bibliaeri konseju: “Ima enga jánhaskatiika sési eratsentasïndi ambe enga uandaaka ka úsïndi eskaksï máteruecha jakajkukuaka” (Proverbios 16:23).