Marhuataa je kóntperateechani engachi jatsiaka tata Jesukristueri uarhikuani jimbo
Mándani uéxurhini, Jeobaeri testiguecha ka uánikua kʼuiripuecha engaksï imeecha pʼímarhiajka, tánguarhintasïndiksï para tata Jesukristueri uarhikuani miántani ísï eska ima na juramupka (Lukasʌ 22:19). I tánguarhikua, jarhuatasïndijtsïni kurhanguni na enga xáni jukaparhakueka enga tata Jesukristu ísï íntspipka imeeri tsípikuani kʼuiripuecha jimbo. Ístujtsïni jarhuatasïndi kurhanguni na engajtsïni imeeri uarhikua uaaka marhuacheni iásï ka ístu sánderu orhepatini (Juanu 3:16).
Engajtsï i uéxurhini úska nirani o nómbe para tata Jesukristueri uarhikuani miántani, ¿nénajtsï uaa marhuataani kóntperateecha engachi jatsiaka tata Jesukristueri uarhikuani jimbo? Tata Jesukristu jorhentpispti eskachi jatsiska para tsimani ambe úni:
1. Jorhenguarhini Tata Diosïiri ka tata Jesukristueri ambe. Kómarhikua jimbo, tata Jesukristu arhispti imeeri Taati auandarhu anapuni: “I jindeesti tsípikua para méntkisï, eskaksïni míteaka tʼun[gini] engari tʼujku jindeeka [Tata] Diosï engari sési jimboeka, ka ístu Jesukristuni engari tʼu axaka” (Juanu 17:3).
2. Úni eskachi na jorhenguarhiaka. Tata Jesukristu uandaspti eskachi jatsiska para ísï irekani eska ima na jorhentpipka. Pori ejemplu enga na kʼamarapkia Juátarhu arhijtsïkpini, sési ambe arhiaspti iámindu imeechani engaksï kurhandiauenga imeeri uandakuechani ka ísï úni eska ima na arhiauenga (Lukasʌ 6:46-48). Ka ístu, máteru jurhiatikua jimbo uandaspti: “Ka engajtsï chá jánhaskajka ini ambe, ka úntsï eskaksïni ji na arhijka, tsípintsï jauaka” (Juanu 13:17).
¿Tsitipirintsï sánderu ambe jorhenguarhini Tata Diosïiri ka tata Jesukristueri ambe? ¿Uékapirintsï míteni néna ísï úni ambe engajtsï jorhenguarhiaka? Ixúksï jarhasti máru ambe engaksïni uaaka jarhuatani.
Biblieri jorhenguarhikua
Biblieri jorhenguarhikua engachi gratisi íntspijka, uánikua kʼuiripuechani jarhuataastia paraksï míteni ambe enga Biblia uandajka ka néna ísï irekani eskaksï na jorhenguarhijka.
Exe je sitiurhu “Programa parajtsï Biblieri ambe Jorhenguarhini” parakajtsï uaaka sánderu ambe míteni i jorhenguarhikueri ambe.
Exe je bideuni Tsípi je Biblieri ambe jorhenguarhini parakajtsï exeaka néneeski Biblieri ambe jorhenguarhini Jeobaeri testiguecha jingoni.
Tánguarhikuecha engaksï Jeobaeri testiguecha jatsiajka
Jeobaeri testiguechaksï tsimani xanhari tánguarhisïndi mándani semana Kʼumanchikua Reinueriicha jimbo. Ini tánguarhikuecharhuchi jorhenguarhisïnga Biblieri ambe ka néna ísï úni eskachi na jorhenguarhijka.
Iáminduechaksï úsïndi nirani ini tánguarhikuecharhu. Nójtsï jatsiska para Jeobaeri testigu máeni parajtsï úni nirani tánguarhikuecharhu. Seguni na enga jánhaskuarhini jauaka jima engajtsï chá irekaka, uaakajtsï nirani tánguarhikuecharhu o bideokonferensia jimbo exeni.
Exe je bideuni ¿Nénaksï úkuarhisïni juchari tánguarhikuecha? parakajtsï míteaka ambe ka ambe úkuarhisïndi juchaari tánguarhikuecharhu.
Incha je juchaari pájinarhu ka jirinha je jima enga arhijka “Jeobaeri testiguecheri tánguarhikuecha” parajtsï exentani nani engajtsï uaaka nirani engaksïni no iauani pakaracheaka.
Artikuluecha ka bideuecha Internetirhu
Uánikua artikuluecha ka bideuecha engaksï juchaari pájinarhu jaka, uaatiksïni jarhuatani parajtsï sánderu ambe míteni ima ambeeri enga tata Jesukristu jorhentpipka ka andisï xáni jukaparhakue imeeri uarhikua.
Pori ejemplu parajtsï míteni nénaksï uaa uánikua kʼuiripuecha jatsiani kóntperateechani ma kʼuiripueri uarhikua jimbojku, arhianta je artikuluechani “¿Nénajtsïni pʼímutantasïni Jesúsi?” ka “¿Por qué sufrió y murió Jesús?”, o exe je bideuni ¿Andisï uarhi Jesusi?