¿Ambe arhikuekasïni kristianu máeni? | ¿Ambe uandasïni Biblia?

Iámu parhakpinirhu, uánikua kʼuiripuechaksï uandasïndi eskaksï kristianueska. Joperu, imani ambe jimbo engaksï újka nóksï sési pʼikuastaasïndi máteruechani. Máruksï jandiajkuerakuarhesïndi ambe, no jurhimbitku úni ambe óksï no sési kámpini. Máteruechaksï ísku jándikua ambe niátasïndi ka jurajkusïndiksï témbani o uámbani. Ka ini ambe jimbo kʼuiripuechaksï kurhamarhikuarhisïndi ambe xáni arhikuekasïni kristianu máeni.

Ambe enga xáni arhikuekajka kristianu máeni

Para kʼuiripu ma fásiliisti uandani eska kristianu máeska, joperu para ma kristianu máeni no solu uétarhisïndi uandani eska kristianueska. Biblia xarhatasïndi eska kristianu máeni arhikuekasïnga Jesúsiiri chúxapatiini (Úkuecha 11:26). Jesúsi mismu uandaspti: “Engajtsï chá méntkisï úska ambe engani ji jorhentpijka, chájtsï sési jimbo juchiiti chúxapatiuaka” (Juanu 8:31). Ísïisti, no nema úsïndi ísïmindu úni eska Jesúsi na uandaka. Joperu, kristianu ma jánguarhintasïndi pauani pauani imani ambe úni enga Jesúsi jorhentpika. Ju je exeani máru ejempluechani.

Kristianuechaksï xénchaasïndi máteruechani

Ambe enga Jesúsi uandapka: “Jíksïni jimbanhi mandamientu ma íntskuxaka: eskajtsï xénchperaaka máteru ka máteruni jingoni; ka ísï eskaksïni ji na xénchajka, chájtujtsï jatsiska para májkueni xénchperani. Engajtsï ísï úska, iáminduechaksï míteati eskajtsï juchiiti chúxapatiiska: engajtsï xénchperaaka máteru ka máteruni jingoni” (Juanu 13:34, 35).

Ambe enga Jesúsi úpka: Jesúsi meru xénchaaspti kʼuiripuechani, no arhiparini sinksï jatsikuarhespi sentabu o nómbe ni nani engaksï anapuepka. Tsinaaspti pʼamenchatiichani, tʼireraaspti imeechani engaksï kʼarimani japka ka asta íntspispti imeeri tsípikuani (Mateu 14:14-21; 20:28).

Ambe engaksï újka kristianuecha: Xarhatasïndiksï eskaksï meru xénchaasïnga kʼuiripuechani jimbokaksï intsïmpitiiska, no nemani jingonksï kʼuetsapesïndi ka jimbokaksï tekaakuantasïnga máteruechani. Ístuksï mintsita jingoni jarhuataasïndi imeechani engaksï uétarhinchani jarhajka (1 Juanu 3:16).

Kristianuechaksï jurhimbitku úsïndi ambe

Ambe enga Jesúsi uandapka: “Ji jindeeska [...] jurhimbikua” (Juanu 14:6).

Ambe enga Jesúsi úpka: Jesúsi méntkisï jurhimbitku ambe úspti ka uandani. No méni mójtakuspti nemani ni imani ambe uandapi enga úpiringa úni eskaksï máteruecha niárapiringa máteru ambe eratseni. Ima niáraspti mítekateeni jimboka méntkisï jurhimbitku uandasïreenga, nájkiruka indeni ambe jimbo problemechani jatsiapiringa (Mateu 22:16; 26:63-67).

Ambe engaksï újka kristianuecha: Nóksï chkuanderasïndi ni sïpani. Maianhpesïndiksï impuestu, sésiksï ánchikuarhisïndi ka xáni eskaksï na xáni arhinhaaka (Roma 13:5-7; Éfesu 4:28). Nóksï euakuarhiasïndi máteruechani, nóksï trampa úsïndi eksameniicharhu, ka jurhimbitkuksï uandantasïndi engaksï ánchikuarhita jirinhani jauaka ka ístu engaksï sïrandeechani uininharhitaajka (Ebreu 13:18).

Kristianuechaksï iáminduechani sési kaasïndi

Ambe enga Jesúsi uandapka: “Jújtsïni je andarhierani iámindu chá engajtsï uinhamu ánchikuarhijka ka engajtsï jukari kʼuetsapeti ambe páni jaka ka ji uaaka eskajtsï mintsikuarhiaka. Juchiiti uananchatarakua jimbo niára je ka juchiiti ambe jorhenguarhi je, jimbokani ji sési pʼikuastpesïnga ka mintsita jingoni kaxumbitiini. Ji uaaka eskajtsï mintsikuarhiaka. Jimboka juchiiti uananchatarakua no úkua jukasti para páni ka no kʼuetsapesti ima ambe engaksïni íntskujka parajtsï páni” (Mateu 11:28-30).

Ambe enga Jesúsi úpka: Jesúsi sési kámpisïreendi ka sési pʼikuastaasïrendi máteruechani. Jurajkusïreendi eskaksï sapiicha andarhierapiringa, sési pʼikuastantaasïrendi imeechani engaksï no sési pʼikuarherani jarheenga ka iáminduechani respetariasïrendi (Markusï 10:13-15; Lukasï 9:11).

Ambe engaksï újka kristianuecha: Sésiksï uandajpaasïndi máteruechani; sésiksï kámpisïndi ka no ikiaparini (Éfesu 4:29, 31, 32). Uandanhiasïndiksï máteruechani jimbo ka jánguarhisïndiksï jarhuataani (Galasia 6:10).

Kristianuechaksï no jurajkusïndi témbani o uámbani

Ambe enga Jesúsi uandapka: “Ambe enga Tata Diosï kúndaka, eska no ma kʼuiripu niáraaka jarharitani” (Markusï 10:9).

Ambe enga Jesúsi úpka: Nájkiruka Jesúsi no méni tembuchapka, arhiasïreendi temungurhiriichani eskaksï no méni jurajperapiringa (Mateu 19:9). Ka ístu arhiaspti ambe engaksï jingoni xéparini japiringa jimboka inde ambe úpiringa úni eskaksï jurajperapiringa (Mateu 5:28).

Ambe engaksï újka kristianuecha: Jánguarhisïndiksï para no imani ambe úni enga no sési úkuauaka imeecheeri temungurhirikuani (Ebreu 13:4). Acheeti ka uarhiiti xénchperakuaksï xarhatatsperasïndi ka respetu (Éfesu 5:28, 33).