Israeli anapu uarhiperata ka paisiicha enga jima no iauani jaka | ¿Ambe uandasïni Biblia?

Uánikua kʼuiripuecha uandanhiaxati uarhiperata jimbo enga Estados Unidos, Israeli ka Iráni jatsika. ¿Niára sánderu kʼepani inde uarhiperata? Uaaksï juramutiicha úni eska no sánderu ikichakueni jánhaskuarhipaaka ka juánksï sési jimbo pínandikua iámu parhakpinirhu?

Imeecha engaksï mítejka ambe enga Biblieri profesiecha uandajka, jamberiksï kurhamarhikuarhijti eska ambe enga úkuarhini jaka Oriente Medio uaa úni eska ueenakuarhia Armajedoniiri uarhiperata enga Apokalipsisi uandajka.

¿Ambe uandasïni Biblia?

¿Uaaksï juramutiicha anhaxustani uarhiperakuani Oriente Medio?

Biblia uandasïndi: “Asï jáma je mintsikaani juramutiichani nijtu máteru kʼuiripuni, jimbokaksïni no uaaka pʼímutantani” (Salmo 146:3).

Nóchi míteska sinksï juramutiicha uaa juáni sánisï pínandikua indeni paisiicha jimbo, joperu Biblia uandasïndi eska no ma politiku, no ma kʼuiripueri juramukua, ni máru kʼuiripuecha kénditaa uarhiperateechani ka juáni sési jimbo pínandikua. Tata Diosïjkusï uaati “eskaksï guerrecha kʼamakurhiaka iámu parhakpinirhu” (Salmo 46:9).

• Para sánderu ambe míteni, arhinta je Aianhpiri enga arhinhajka “Niáraati ima jurhiatikua engaksï nóteru jauakia guerrecha.”

¿Ini uarhiperata jimbo kumplirikuarhixaki ma profesia?

Biblia uandasïndi: “Chájtsï kurhauaka eska uarhiperanhaxaka. [...] Jimboka ireta ma uarhiperaaka máteru ireta jingoni ka juramukua ma máteru juramukua jingoni ka kʼarhimakua ambe jauati ka uápurisï jencheati” (Mateu 24:6, 7).

Uarhiperata enga nitamani jaka Oriente Medio xarhatasïndi “eska nóteru ióni kuerataxakaia para kʼamajkunhani parhakpini” ka eskachi irekaxaka “últimu jurhiatikuechani jimbo” (Mateu 24:3; 2 Timoteu 3:1). I uarhiperateecha xarhatasïndi eska no ióni jimbo Tata Diosï kʼamajkuauaka guerrecha ka iámindu ambe engajtsïni xáni uandanhiatajka.

• Para sánderu míteni, arhinta je artikuluni “¿Cuál es la señal de “los últimos días” o “los tiempos finales”?”

¿Oriente Medio ueenakuarhia Armajedoni?

Biblia uandasïndi: “Ka jimaksï tánaantaspti juramutiichani enga ebreu jimbo arhinhajka Armajedoni” (Apokalipsisi 16:16).

Armajedoni no kʼuiripuecheeri uarhiperateesti ka ni Oriente Medio ueenakuarhia. Tata Diosï uarhiperateesti iámu parhakpinirhu anapu juramutiicha jingoni.

• Para sánderu ambe míteni, arhinta je artikuluni “¿Ambeeski Armajedoni?”

¿Ambejtsïni jarhuataa no xáni uandanhiani?

Biblia uandasïndi: “Asï jukari uandanhia je. Sánderu sési, kómarhi je Tata Diosïni parajtsï aianguni ambeksïnisï uandanhiatani jaki, kómatsïkuarhi je ka ístu diosmaiamukua arhi je” (Filipusï 4:6).

Jeobaa uékasïndi eskachi kómarhiaka. Ka jimboka Tata Diosï uandanhiasïndi juchantsïni jimbo, ima kurhauasïndi juchaari kómarhikuechani ka jarhuatasïndijtsïni parachi jamberi no jukari uandanhiani (1 Pedru 5:7). Ambe ma enga ima újka jindeesti aianguntsïni andiksïsï xáni uarhiperateecha jaki ka néna enga kʼamakurhia ka ambe enga uaaka para sési peentani imani no sési pʼikuarherakuani engachi nitamanchaka (Apokalipsisi 21:3, 4).

• Exe néna engajtsïni jarhuatajka Tata Diosï artikulurhu “¿Puedo encontrar consuelo en la Biblia?.”