¿Jakajkusïnksï Jeobaeri testiguecha Antiguo Testamentuni?

Jo. Para Jeobaeri testiguecha iámu Biblia “Diosïni jimboesti, ka marhuasïndi” (2 Timoteo 3:16). Ka iámu Biblia úkata jarhasti Antiguo Testamentu ka Nuebu Testamentu jimbo. Para no ísï kurhangukuarhini eska Antiguo Testamentu nóteru marhuasïngia iásï, Jeobaeri testiguechachi mejori arhisïnga Karakata Ebreaecha. Ka Nuebu Testamentuni arhisïngachi Karakata Griegaecha.

¿Andiksïsï kristianuecha uétarhinchajki Nuebu Testamentuni ka Antiguo Testamentuni?

Tata Diosï úspti eska apostuli Pablu karapiringa: “Jimboka iámindu ambe enga ióntki karakata jaka, karakata jarhaska parajtsïni jorhendani” (Roma 15:4). Ísï jimbo, uákachi seguru jarhani eskaksï Karakata Ebreaecha jukaska informasioni enga kánikua jukaparhakueka. Exentasïngachi ambakiti arhistakuechani ka ambe enga úkuarhipka ióntki enga kánikua jukaparhakueka para jucha.

• Ambe enga úkuarhipka ióntki.Karakata Ebreaechaksï sési uandantasïndi na enga Tata Diosï prepararipka Echerini ka na enga kʼuiripu jántspiri úkuarhipka pekaduni jimbo. I ambe engajtsïni eiangujka jarhuatasïndijtsïni kurhanguni nanichi uératini jurhasïni ka andichisï uarhijki (Génesis 2:7, 17). Ístu, ini parti Bibliarhu exesïngachi na enga Tata Diosï jarhuatapka ióntki anapu kʼuiripuni engaksï májkueni jásï ambe nitamakuarhipka eska jucha (Santiagu 5:17).

• Konsejuecha engajtsïni marhuachijka iásï. Karakata Ebreaechaksï jukasti libruechani Proverbios ka Eclesiastés, engaksï jukaaka konsejuechani engajtsïni marhuachijka iásï. Ejemplu ma, arhisïndijtsïni nénachi uá jatsini familiani ma enga tsípikua jingoni irekaaka (Proverbios 15:17), nénachi jatsiski para exeni ánchikuarhitani (Proverbios 10:4; Eclesiastés 4:6) ka néna uá tumbi ma o uátsï ma sánderu sési úrani tsípikuani (Eclesiastés 11:9–12:1).

Ístu uátijtsïni kánikua marhuachini estudiarini Moisesiri Leini ísï eska na jaka Torá, o Pentateukurhu (orheta sinku libruecha Bibliaeri). Nájkirukachi kristianuecha no jatsiska para afuersa úni ambe enga arhijka i Lei, prinsipiuecha engaksï jukaka uátijtsïni jarhuatani parachi sési irekani (Levítico 19:18; Deuteronomio 6:5-7).