TUMBIICHAKSÏ KURHANGUARHISÏNDI
¿Andisï sési japirini nirani tánguarhikuecharhu K’umanchikua Reinueri jimbo?
Mándani semana, Jeobaeri testiguechaksï tánguarhisïndi tsimani uelta jimini engaksï arhijka K’umanchikuecha Reinueri. ¿Ambeksï úsïni jimini? ¿Neenakini marhuachepirini indeni tánguarhikuecharhu nirani?
¿Ambe úkuarhisïni K’umanchikua Reinueri ma jimbo?
K’umanchikua Reinueri lugari máesti nani enga Bibliaeri ambe jorhentpinhajka parachi úni sési irekani. Tánguarhikuecha engaksï jimini úkuarhijka, jarhuataatiksïni parari:
Jurhimbikua ambe jorhenguarhini Tata Diosïri ambe.
Kurhanguni andisï ísï jánhaskuarhini jaki parhakpinirhu.
Sánderu ambakiti k’uiripueni.
Ambakiti amiguechani jatsiani.
¿Mítespiri i ambe? Jimini engaksï Jeobaeri testiguecha tánguarhijka, arhiasïndiksï K’umanchikuecha Reinueri jimboka ambe enga sánderu uandanhajka jima, jindeesti Tata Diosïri Reinueri ambe (Mateu 6:9, 10; 24:14; Lukasʌ 4:43).
¿Andisï sési japirini eskari nipiringa?
Ambe enga jima jorhentpinhajka kánikuakeni jarhuataati. Biblieri konsejuecha engaksï Jeobaeri testiguecha jorhenguarhijka tánguarhikuecharhu, jarhuataatiksïni parari jánhastiini (Proverbios 4:5). I ambe arhikuekasïndi eskakini Biblia uaaka jarhuataani parari ambakiti ambe úni ka sésikeni nicheni. Ka ístu Biblia mókuantaasïndi máru kurhamarhikuechani engaksï kánikua jukaparhakueka, komu ariicha:
Íksï jindeesti máru arhijtsïkperatecha engaksï nitamakuarhijka tánguarhikuecharhu fini de semana jimbo:
¿Andichisï jatsi para úni ambe enga Biblia uandajka?
¿Néjtsïni uaa jarhuatani engachi kúmu nitamakuarhini jauaka?
¿Ambe úxaki iásï juchantsïni jimbo Tata Diosïri Reinu?
“Eskuelarhu anapu kompanieru ma tánguarhikuarhu ma jurhaspti. Juchiiti familia jingoni uaxakaspti ka exeraspkachi libruechani engachi úraani japka. Tátsekuarini arhispti eska ísku pakaraspka exeni na engaksï kʼuiripuecha mókuantenga imani kurhamarhikuechani engaksï uáuenga. Ístu uandaspti eska imeeri iglesiarhu nóksï jatsiaspka xárhati publikasionichani engachi jucha úraajka para jorhenguarhini” (Brenda).
¿Mítespiri i ambe? Nóksïni ma sentabu euaati parari K’umanchikua Reinuerirhu inchani ka ni engari incharhini jauakia.
Ima k’uiripuecha engari jima míteaka, uinhaperantaatiksïni. Biblia uandasïndi eska ma ambe engachi jimbo kristianuecha jatsika para tánguarhini jindeeska parachi uinhaperpentani máteru ka máteruni jingoni (Ebreu 10:24, 25). Ini parhakpinirhu no nema pendienti pásïndi máteruechani jimbo, joperu kánikua sési p’ikuarherakuarhesïndi imani k’uiripuecha jingoni jarhani engaksï tsitijka jorhenguarhini Tata Diosïri ambe ka engaksï pendienti pájka máteruechani jimbo.
“Engani na uánikua ambe úkia eskuelarhu, ménisï kómu p’ikuarherani jarhasïnga ka kuataratini, peru imeecha engaksï K’umanchikua Reinuerirhu nirajka, méntkisïjtsïni jarhuatasïndi parani sánderuni sési p’ikuarherani. Engani na niántajkia tánguarhikuarhu uératini, kánikua sési p’ikuarherasïnga ka lista jarhasïngia para pauandikua” (Elisa).
¿Mítespiri i ambe? Iámu parhakpinirhu jarhastiksï jukari 120,000 Jeobaeri testiguecheri kúnguarhikuecha ka jukari 60,000 lugaricha para tánguarhini. Mándani uéxurhini, ma 1,500 K’umanchikuecha Reinueri únhasïndi jimboka sánderu uánikua k’uiripuecha niraxakaia juchaari tánguarhikuecharhu.a
a Parari míteni nani úkuarhisïni tánguarhikua ma, incha pájinarhu “Jeobaeri testiguecheri tánguarhikuecha” ka jaiasku jimini enga arhijka “Jirinha je nani nirani”.