PARHAKPINIRHU KÁNIKUA NO SÉSI JÁNHASKUARHIXATI

3 Seguiri je sési pájperani imeecha jingoni engajtsï xénchaajka

¿ANDISÏ XÁNI JUKAPARHAKUE?

Jimboka parhakpinirhu sánderu no sési jánhaskuarhixakaia, no kuenta íntskukuarheparini uánikua kʼuiripuechaksï nóteru kuidarixatia imeecheri familiani.

Nóteruksï kúrhiasïndia imeecheri amigu jémbeechani.
Temungurhirichaksï sánderu arhirperasïndi.
Taatichaksï no xáni uandanhiasïndi oksï meru no pendienti pásïndi imani ambe jimbo engaksï uájpeecha uandanhiajka.

¿Mítespijtsï?

Engachi no sési nitamakuarhini jarhajka juchaari amiguechajtsïni kánikua jarhuatasïndi parachi no jukari uandanhiani jarhani ka parachi sési pʼikuarherantani.
Jukari uandanhiani imani ambe jimbo enga parhakpinirhu úkuarhini jaka, uaati úni eska chaari familia sánderu uandanhiatechani jatsiauaka.
No sési járhati notisiecha uaati kánikua no sési úkuani chaari sapiichani.

¿Ambejtsï uaa úni?

Biblia uandasïndi: “Ambakiti amigu ma méntkisï uékpisïndi, ka ermanu máesti enga andajpenuka para jiáni enga uandanhiata jauaka” (Proverbios 17:17).

Uandontskuarhi je nema jingoni engaksïni uaaka kurhanguchini ka ambakiti konsejuechanksïni íntsaani. Míteni eskaksïni nema xénchasïnga, uaatiksïni uinhapikua íntskuni ka jarhuataatiksïni parajtsï orhepani uérakuani uandanhiatechani.

AMBE ENGAJTSÏ UAAKA ÚNI PARAJTSÏ SEGUIRINI SÉSI PÁJPERANI IMEECHA JINGONI ENGAJTSÏ XÉNCHAAJKA: Máru konsejuecha

Parajtsï úni kuidariuani imeechani engajtsï xénchaajka jiáni enga no sési úkuarhini jauaka, uaakajtsï arini ambe úni

SÁNDERU SÉSI PÁJPERA JE TEMUNGURHIRI

Temungurhiri ma enga jatirikia kamajchakperaxatiksï.

Biblia uandasïndi: “Sánderuksï sésisti tsimani ka eska máechakuajku [...]. Jimboka enga ma kuarhatseaka, máteru uaati jauatantani imeeri kompanieruni” (Eclesiastés 4:9, 10). Acheeti ka uarhiiti jatsistiksï para ísïini eska chʼanaricha engaksï mismu ekipurhu chʼanajka ka engaksï jarhuajperajka paraksï andani.

Engajtsï jukari uandanhiani jauaka problemecha jimbo, jánguarhinta je no no sési arhirperani. Sánderu sési, tekaantstii je ka asï sóntku ikia je.
Ma semana jimbo, sikiera ma xanhari uandontskuarhi je ima amberi engaksïni uandanhiatani jaka. Ka enbesi de arhirperani, jánguarhinta je sési peentani problemani.
Arhuta je tiempu parajtsï imani ambe úni engajtsï tsimarhani tsitijka.
Miá je imani ambe engajtsï tsimarhani úpka ka engajtsï kánikua sési nitamakuarhipka. Jamberijtsï uaaka exeani fotuechani chaari bodaeri, o imani amberi engajtsï máteru ambe úpka.

“Jamberi temungurhiri ma no méntkisï májkueni eratseati, peru inde ambe no arhikuekasïndi eskaksï no uaaka jarhuajperani. Uaatiksï tsimarhani exeni ambe engaksï uaaka úni paraka iámu ambe sési uéraaka” (David).

ASÏ JARHARIA JE CHAARI AMIGUECHANI

Asï jarharia je chaari amiguechani

Asï solu erokuarhi je eskaksïni chaari amiguecha uinhaperantaaka chánksïni, ístujtsï chá uaaka uinhaperantaani imeechani. Engajtsï jarhuataaska máteruechani chájtsï mismu sési pʼikuarheraaka.
Pauani pauani, uandontskuarhi je ma chaari amigu jingoni parajtsï míteni na jarhaski.
Kurhamarhia je chaari amiguechani ambeksï úspi paraksï orhepani uérani engaksï sáno májkueni ambe nitamakuarhini japka eska chá.

“Engari kʼérati uandanhiatechani jatsiajka, chiiti amiguechaksïni arhisïndi ambe engari uaaka úni parari úni orhepani uérani. Ménichani solu uétarhisïndi eskaksï miátantaaka ambe ma engari mítekia. Chiiti amiguechaksïni xénchasïndi ka ístuksï mítesti eskari tʼujtu xénchaasïnga” (Norma).

KURHANGUKUA JE CHAARI SAPIICHANI

Kurhangukua je chaari sapiichani

Biblia uandasïndi: “Jorhenguarhi je iáminduecha sóntku kurhandini, peru ióndantsï mókukuarhini” (Santiagu 1:19). Jamberiksïni chaari sapiicha no uékaati aianguni ambe engaksï jimbo uandanhiani jaka. Peru engajtsï chá jingontku kurhajchaaska sánderu fásiliuati eskaksïni aiangukuarhiaka na engaksï pʼikuarherani jaka.

Ú je ambe ma paraksï chaari sapiicha uékani uandontskuarheni. Jamberiksï imeecha sánderu tsitiati uandontskuarheni chánksïni jingoni engajtsï márku úni jauaka ambe ma, komu jiáni engajtsï xanharani niuaka, o engajtsï karrurhu jámani jauaka ka eska jiáni engajtsï uaxakaaka imeecha jingoni uandontskuarheni.
Asï jurajku je eskaksï chaari sapiicha jukari no sési járhati notisiechani kurhauaka.
Aiangua je ambe engajtsï úni jaka paraka familia sési jauaka.
Eratsi je ambe engajtsï uaaka úni jiáni enga no sési ambe úkuarhiaka ka ensaiari je ini ambe chaari sapiicha jingoni.

“Uandontskuarhi je chaari sapiicha jingoni ka jurajku je eskaksï imeecha uandaaka na engaksï pʼikuarherajka. Jamberiksï imeecha chéni jati, uandanhiani oksï ikiani jarhani ka chá no míteni. Arhia je eskajtsï chájtu májkueni pʼikuarherasïnga ka ambe engajtsï úkia parajtsï sési pʼikuarherantani” (Bertha).