Jorhenguarhikua 11
Jakajkukuecha ka pʼindekuecha enga Tatá Diosï no jaiapanhiantajka
¿Ná jásï jakajkukuecha ka pʼindekuecha nóksï sési jarhaski? (1)
¿Sési jaki para kristianuecha jakajkuni eska Tatá Diosï tanimueska? (2)
¿Andisïksï kristianuecha no úntajki Nabidadini, ni Semana Santani, níjtu enga nema uéxurhini andangutajka? (3, 4)
¿Uarhirichajtsïni úsïni no sési úcheni? (5)
¿Uarhispi Jesúsi krúsi ma jimbo? (6)
¿Ná xáni jukaparhakueski para Tatá Diosïni jaiapanherantani? (7)
1. Nóksï iámindu jakajkukuecha ka pʼindekuecha no sési jarhasti. Joperu Tatá Diosï no jaiapanhiantasïndi imechani engaksï no jurhimbiti religiónirhu anapueka o enga no terokuntajka Bibliani jingoni (Mateu 15:6).
2. Trinidad: ¿Tatá Jeobá tanimu Diosïski? Nómbe. Jeobá, enga Tátika, imajku jindesti Tatá Diosïni enga sési jimboeka (Juanu 17:3; Markusʌ 12:29). Jesúsi, Imeri orheta Uájpesti ka úsïndi ambe enga ima arhiaka (1 Korintu 11:3). Táti jémba sánderu kʼéri ambesti ka eska Uájpa (Juanu 14:28). Espíritu santu no kʼuiripu máesti; Tatá Diosïri uinhapikuesti (Génesis 1:2; Ukuecha 2:18).
3. Nabidadi ka Semana Santa: Jesúsi, no 25 de disiembrini andajpinuspti, sino septiembrini kʼamarani ísï o oktubreni inchamani ísï, imani jurhiatikuechani jimbo engaksï karichi eranguticha uérakuarhu pakarenga chúrikuechani paraksï kuáni imeri karichichani (Lukasʌ 2:8-12). Jesúsi no méni juramukuaspti imeri chúxapatichani eskaksï kʼuínchikua úntapiringa imeri andajpinukuani. Ambe enga kʼóru arhiapka jindesti, eskaksï miántapiringa imeri uarhikuani (Lukasʌ 22:19, 20). Kʼuínchikua Nabidadiri ka jima anapu pʼindekuecha, jurhasïndiksï ióntki anapu no jurhimbiti religiónicharhu, ka ístu inde pʼindekuecha enga Semana Santa jimbo únhantajka, komueska uanopini ka no kʼuiripita arhani. Orheta anapu Jesúkristueri chúxapaticha nóksï úntasïremti Nabidadini, níjtu Semana Santani, níjtuksï úntajki iásï anapu sési jimbo Jesúkristueri chúxapaticha.
4. Uéxurhinichani andangutani: Biblia tsimani kʼuinchikuechantku uandasïndi engaksï kʼuiripuecha uéxurhinichani andangutani jápka, joperu ima kʼuiripuecherispti engaksï no kómarhianga Tatá Jeobáni (Génesis 40:20-22; Markusʌ 6:21, 22, 24-27). Orheta anapu Jesúkristueri chúxapaticha nóksï úntasïremdi kʼuínchikua enga nema uéxurhinichani andangutapiringa. Inde pʼindekuecha jurhasïndiksï ióntki anapu no jurhimbiti religiónicharhu. Sési jimbo Jesúkristueri chúxapaticha intsïkuarperasïndiksï ambe ma, ka tánguarhintasïndiksï para sési nitamakuarheni joperu máteru jurhiatikuechani jimbo.
5. Uarhirichani chérhiani: Uarhirichaksï nóteru ambe ma pʼikuarherasïndia, níteruksï ambe ma úni. Jucha no úsïnga jarhoatani ka imechajtujtsïni no úsïndi no sési úcheni (Santiagu 2:26; Eclesiastés 9:5, 10). Alma uarhisïndi; nóteru tsípiti jarhasïndia (Ezequiel 18:4). Joperu ménichani ísï, ánjili no sési úricha engaksï arhinhajka demoniuecha, kʼuiripuechani ísï jakajkutarasïndi eskaksï imecheska engaksï uarhikia. Iámindu jásï pʼindekuecha enga jindeka para chérhiani o kómarhiani uarhirichani no sési jarhasti (Isaías 8:19).
6. Krúsi: Jesúsi, no uarhispti krúsi ma jimbo, ima uarhispti chikari jurhimbiti ma jimbo. Uandakua griegu «staurus» engaksï uánikua Bibliauechani jimbo jatsinharikuntaka «krúsi», arhikuekasïndi chikari jurhimbiti ma. Krúsi jurhasïndi ióntki anapu religióni no jurhimbiticharhu. Orheta anapu Jesúkristueri chúxapaticha nóksï kómarhisïremti ka níjtuksï marhoatani krúsini. ¿Jimajkani sési jaki marhoatani krúsini, juchari kómarhikuarhu? (Deuteronomio 7:26; 1 Korintu 10:14.)
7. Úpirindi kánikua úkua jukani, jurajkuani indeni jakajkukuechani ka pʼindekuechani. Jamberi chári kʼumanchikuarhu anapuecha o pʼíchpirichaksïni arhiati eskajtsï no jatsiska para mójtakuani chári jakajkukuechani. Joperu sánderu jukaparhakuesti Tatá Diosïni jaiapanherantani ka eska kʼuiripuechani (Proverbios 29:25; Mateu 10:36, 37).
[Ilustrasioni pájina 22 anapu]
Tatá Diosï no tanimuesti
[Ilustrasioni pájina 23 anapu]
Nabidadiri kʼuínchikua ka Semana Santeri jurhasïndiksï ióntki anapu religióni no jurhimbiticharhu
[Ilustrasioni pájina 23 anapu]
Jucha no jatsiska para uarhirichani chérhiani, níjtu kómarhiani