Ju je úraani bideuechani para jorhentpini

Dibujuecha ka bideuechaksï kánikua marhuasïndi parachi kurhanguni ambe ma ka parachi miáni ambe engachi jorhenguarhika. Jeoba, juchari Ambakiti Jorhentpiri, exeraaspti ambe ma imeri marhuarichani para jukaparhakua ambe jorhendaani (Gé 15:5; Jer 18:1-6). Jesusijtu, Ambakiti Jorhentpiri, májkueni úspti (Mt 18:2-6; 22:19-21). Ini últimu uéxurhinicha jimbo, bideuechaksï kánikua marhuaxati. ¿Úraaxakichi parachi arhistakuani imechani engaksï Bibliaeri ambe jorhenguarhini jaka?

Iásï, 10 bideuechaksï jarhasti engajtsïni jarhuatajka eksplikarini mándani jorhenguarhikua foietueri Ambakiti ambe enga Tata Diosïrika. Sáno méntkisï, bideu ísï arhinhasïndi eska kurhamarhikua ma enga negrita jimbo jaka. Foietu enga juchari pájinarhu jaka, arhisïndijtsïni kánchi jatsiski para úrani mándani bideuni. Ístu, jarhastiksï máteru bideuecha engaksï úaka úrakuarheni publikasionicha jingoni engaksï jindeka para jorhentpini ka engachi úraajka para estudiu íntspini.

¿Úkua jukanchasïni kʼuiripu kurhanguni ambe ma enga Biblia jorhentpijka o no sési ambe niramaxaki? Jirinhanta je bideu ma enga úaka jarhuatani, ia sea pájinarhu jw.org® o JW Broadcasting®. Jamberijtsï úpiringa márku exeni ka jorhenguarhini máru ambe bideueri.

Mándani kutsï, uéraxatiksï jimbanhi bideuecha. Engajtsï exeani jauaka, eratsinta je nénajtsï uá úraani para jorhendaani máteruechani.