¿Preparadujtsï jarhaskia enga no sési jásï ambe úkuarhiaka?

Enga na niárani jauakia jurhiatikua paraka i parhakpini kʼamajkunhaaka, sánderu no sési jánhaskuarhiati, no sési kámberanhaati ka uarhiperakua ambe jauati (Jaŋ 6:4). ¿Ambechi uaa úni parachi preparadu jarhani enga i ambe úkuarhiaka?

• Jánguarhinta je parajtsï no méni jurajkuni Tata Diosïni. Eratseanta je Biblieri prinsipiuechani ka máru ejempluechani engaksï Bibliarhu jaka engaksïni jarhuataaka sánderu mintsikani Tata Diosï Jeobani ka imeeri kúnguarhikuani ka engaksïni jarhuataaka parajtsï no inchamukuni politikarhisï (Pr 12:5; jr-S páj. 125, 126 párr. 23, 24). Desde iásïchi jatsiska para jánguarhintani sánderu sési pájperani kúnguarhikuarhu anapu erachicha jingoni (1Pe 4:7, 8).

• Listu jatsi je imani ambe engajtsï xáni uétarhinchaaka. Patsa je kánikua sáni tʼirekua ka eratsenta je nanijtsï uaa kuájchakukuarhini chaari kʼumanchikuarhu. Ístu eratsenta je nanijtsï uaa nirani enga no sési jánhaskuarhini jauaka. Exe je eska mochilarhu ma iámindu ambe jatarini jauaka engajtsï xáni uétarhinchaaka ka ístu jatsira je sentabu, uantichani, kubreboka ka máteru ambe. Listu jatsi je orhejtsïkuticheri informasioni ka asegurarikuarhi je eskaksï imeechajtu jatsiaka chaari informasioni ambe (Is 32:2; g17.5-S páj. 3-7).

Jiáni enga no sési ambe úkuarhini jauaka, seguiri je imani ambe úni engajtsï újka para kʼéri ambe arhini Tata Diosïni (Flp 1:10). Enga no uétarhiaka, asï xáni uéra je chaari kʼumanchikuarhu (Mt 10:16). Ka intsïmbia je máteruechani ambe engajtsï jatsiaka (Ro 12:13).

ENGAJTSÏ EXEAKIA BIDEUNI ¿NÉNACHI UÁ PREPARARIKUARHINI PARA JIÁNI ENGA NO SÉSI JÁSÏ AMBE ÚKUARHIAKA?, MÓKUANTA JE ARINI KURHAMARHIKUECHANI:

• ¿Nénajtsïni uaa jarhuatani Tata Diosï Jeoba jiáni enga no sési ambe úkuarhiaka?

• ¿Ambechi uaa úni parachi preparadu jarhani?

• ¿Nénachi uaa jarhuataani máteruechani?