Kampania espesiali septiembriri para ueenani nemani jorhendani Biblieri ambe

Septiembrini, kánikuachi jánguarhintaaka parachi pʼímarhiani iámindu kʼuiripuechani eskachi xáni uaaka parachi jorhendaani Biblieri ambe foietuni jingoni Tsípikua jingoni ireka je. I mesi jimbo uaakajtsï prekursori auksiliarini ka 30 ora íntspintani. ¿Néna úkuarhia i kampania?

• Engajtsï ueenaaka uandontskuarheni. Úra je últimu pájina foietueri paraka kʼuiripu uékaaka sánderu ambe míteni ka jánguarhinta je exerani na engachi jorhentpijka Biblieri ambe. Ni je pʼorhembiantani imeechani engaksï uéjka sánderu ambe míteni, asta imeechani engaksï antesi no uékapka jorhenguarhini, jamberiksï iásï tsitiati jimbanhi foietuni ka na engachi jorhentpijkia. Nóchi jurajkuauaka foietuechani kʼumanchikuecharhu enga no nema jauaka nijtuchi karta jimbo axakuaua imeechani engaksï no uéjka kurhaani. Grupu enga Kúnguarhikueri ambe Exejka uaati máteru tánguarhikuechani uaani paraka sánderu uéranhaaka aianhpinhani ini mesi jimbo.

• Engajtsï máteru ambe úni jámani jauaka. Enga kúnguarhikua aianhpijka karrituecha jingoni, uaakajtsï jima peerani foietuni Tsípikua jingoni ireka je. Enga kʼuiripu ma uékaaka sánderu míteni foietueri ambe, ístu arhi je eska uaaka gratisi jorhenguarhini Biblieri ambe. Uaakajtsï arhini máru ambe néna engachi jorhentpijka Biblieri ambe o arhini eskachi máteru jurhiatikua jimbo uaaka aianguni. Orhejtsïkuti enga aianhpikueri ambe exejka uaati arhiani máru aianhpirichani engaksï sési jorhentpijka parakaksï negosiuecharhu ísï niuaka jirinhaani né enga uékaaka jorhenguarhini Biblieri ambe. Ka engajtsï aianguani jauaka Biblieri ambe chaari kompanierhuechani ánchikuarhitarhu anapuechani o máteru kʼuiripuechani, arhia je eskajtsï uaaka jorhendaani Biblieri ambe.

Jesúsijtsïni juramuchisti eskachi jatsiska para jorhentpini ka imeeri chúxapatichani uaani (Mt 28:19, 20). Uékasïngachi eska i kampania espesiali engachi úrani jauaka foietuni Tsípikua jingoni ireka je jarhuatakajtsïni ísï úni.