Tata Diosï Jeoba újchakurasïndi ambe engachi xáni újka parachi tata Jesukristueri uarhikuani Miántani

1, 2. ¿Andichisï mándani uéxurhini nirajki Miántskuarhu?

SÁNO 2,000 uéxurhini ísïistia enga Jesúsi íntspika imeeri tsípikuani juchantsïni jimbo ka enga ísï úka juchachi sésikua intsïnhaska parachi úni irekani para méntkisï. Ima chúrikua ante de uarhini, uaxastaspti tánguarhikua ma enga no úkua jukaka para úntani ka jima úraspti kurhinda ka binu. Juramukuaspti imeeri chúxapatiichani eskaksï seguiriipiringa úntani parakaksï miántapiringa ambe enga ima úpka uékperakua jimbo (1 Cor. 11:23-26, TNM).

² Kristianuechachi kurhajchasïnga tata Jesukristueri juramukuani jimbokachi kánikua xénchasïnga (Juanu 14:15). Imani mesiicha jimbo enga Miántskua úkuarhijka, xarhatasïngachi na engachi xáni jukaparharajka tata Jesukristueri uarhikuani. Pori ejemplu, arhutasïngachi tiempu para kómarhini ka eratsentani ambe enga arhikuekajka tata Jesukristueri uarhikua. Ístuchi sánderu tiempu arhutasïnga parachi úni uánikua kʼuiripuechani pʼímarhiani parajtsïni pámbetani ini xáni ambakiti tánguarhikuarhu. Ka juchajtuchi kánikua jánguarhintasïnga parachi úni jarhani ini tánguarhikua jimbo.

3. ¿Ambechi exeni jaua ini jorhenguarhikua jimbo?

³ Tata Diosï Jeobaeri marhuariichachi kánikua jánguarhintasïnga para miántani Kristueri uarhikuani. Ini jorhenguarhikua jimbo exeni jauakachi tanimu ambe engaksï xarhatajka eska ísïiska: 1) úntasïngachi Miántskuani ísï eska Jesúsi na uandapka, 2) pʼímarhiasïngachi máteruechantu parakaksï niuaka ka 3) úntasïngachi Miántskuani nájkiruka no fásiliuaka para ísï úni.

ÚNTASÏNGACHI MIÁNTSKUANI ÍSÏ ESKA JESÚSI NA UANDAPKA

4. a) ¿Náki kurhamarhikuechaksï mókunhantasïni mándani uéxurhini Miántskuarhu? (Lucas 22:19, 20, TNM). b) ¿Ka andisï xáni jukaparhakue míteni indeni ambe?

⁴ Mándani uéxurhini engachi nirajka Miántskuarhu, kurhaasïngachi arhijtsïkperata ma enga Bibliarhu pʼitakata jaka ka enga sési mókuantajka máru kurhamarhikuechani. Pori ejemplu, andichisï uétarhinchajki eskachi pʼímutanhantaaka ka néna jimbo ma achamasïiri uarhikua úsïni eska uánikua kʼuiripuecha puáminhantaaka pekaduechani. Ístuchi miátanhantasïnga ambe enga arhikuekajka kurhinda ka binu ka neechaksï arhasïndi ini ambe (arhinta je Lucas 22:19, 20, TNM). Enga nitamataranhani jarhajka arhijtsïkperata, eratseantasïngachi imani kóntperateechani engaksï jatsiauaka imeecha engaksï erokuarhini jaka Echerirhu irekani (Is. 35:5, 6; 65:17, 21-23). Kánikua jukaparhakuesti sési kurhanguni ini ambe. Uánikua kʼuiripuechaksï jarhasti engaksï no jukaparharajka Jesúsiiri uarhikuani jimbokaksï no kurhangusïnga ambe enga arhikuekajka. Ístuksï no ísï miántasïndi Jesúsiiri uarhikuani ísï eska ima na uandapka. ¿Andi?

5. Engaksï sáno iámindu apostoliicha uarhipkia, ¿kʼuiripuechaksï néna úndaspi miántani Jesúsiiri uarhikuani?

⁵ Sánisï tátsekua engaksï sáno iámindu Jesúsiiri apostoliicha uarhipkia, kúnguarhikuarhu ueenasptiksï jarhani no jurhimbiti kristianuecha (Mat. 13:24-27, 37-39). Íchaksï, úndaspti “nánterkueni jorhentpini paraksï támu paani jorhenguarhiriichani imeechani jingoni” (Uku. 20:29, 30). Tiempu jingoni, ma ambe engaksï ueenapka “nánterkueni jorhentpini” o imani ambe enga no ísïika, jindeespti eska Jesúsi no íntspispka imeeri kuerpuni “ma ueltajku [...] para késtataani uánikuecheeri pekaduechani”. Imeechaksï jorhentpisïreendi eska Kristu mémindu jatsiska para íntspini imeeri kuerpu, peru Biblia no ísï jórhentpesïndi (Ebr. 9:27, 28). Iásï uánikua kʼuiripuecha engaksï ambakiti mintsita ma jataka, jakajkusïndiksï ini jorhenguarhikuani enga no ísïika. Ka mándani semanaksï nirasïndi iglesiarhu o asta pauani pauani paraksï imani ambe úntani enga ísï mítekateka komueska tata diosïni pʼirani.b Ístuksï jarhasti relijionicha engaksï no someni miántajka Jesúsiiri uarhikuani, peru uánikuecha engaksï ini relijionicharhu jámajka, nóksï kurhangusïndi ambe enga arhikuekajka Jesúsiiri uarhikua. Jamberiksï máru kurhamarhikuarhijti: “¿Meru uaa puáminhantani juchiiti pekaduechani Jesúsiiri uarhikua jimbo?”. Máruksï i ambe kurhamarhikuarhisïndi, jimbokaksï arhinhaska eska Jesúsiiri uarhikua no marhuasïnga parachi pekaduechani puáminhantani. Ka jurhimbiti Kristueri chúxapatiicha, ¿ambeksï úxaki paraksï jarhuataani kʼuiripuechani míteni jurhimbikua ambe?

6. Uéxurhini 1872 jimbo, ¿ambeksï úspi kurhanguni máru Biblieri jorhenguarhiriicha?

⁶ Uéxurhini 1870 jimbo ísï, máru Biblieri jorhenguarhiriicha enga Charles Russell orhejtsïkuauenga, ueenasptiksï sési jorhenguarhini Tata Diosïiri Karakatani. Imeechaksï uékasïreendi míteni ambemindusï arhikuekeeni Jesúsiiri uarhikua ka míteni nénaksï jatsispi para miántani imeeri uarhikuani. Ka uéxurhini 1872 jimbo, Biblieri jarhuajperata jingoni, kurhangusptiksï eska Jesúsi uarhiska iámindu kʼuiripuechani jimbo para pʼímutantaani. Ka nóksï jískaspti ambe engaksï jorhenguarhipka. Sánderu sési, úraasptiksï libruechani, periodikuechani ka rebistechani paraksï iáminduechani aianguani ambe engaksï jorhenguarhipka. Sánisï tátsekua, ueenasptiksï Miántskuani úntani mándani uéxurhini ísï eskaksï na ueenga primeru siglurhu anapu kristianuecha.

7. ¿Nénajtsïni marhuachesïni iásï juchantsïni iámindu ambe engaksï jorhenguarhipka primeru Biblieri jorhenguarhiriicha?

⁷ ¿Nénajtsïni marhuachesïni iásï juchantsïni iámindu ambe engaksï ima kristianuecha jorhenguarhipka ióntki? Tata Diosï Jeoba újchakuraspti ambe engaksï imeecha úpka ka indeni ambe jimbochi úsïnga sési kurhanguni ambe enga arhikuekajka Jesúsiiri uarhikua ka néna engajtsïni marhuacheaka sánderu orhepani (1 Juanu 2:1, 2). Ístuchi jorhenguarhiska eska Biblia tsimani ambe aiakuasïnga imeechani engaksï kurhajchajka Tata Diosïni: máruksï auandarhu irekaati para méntkisï ka uánikua máteruechaksï Echerirhu irekaati para méntkisï. Ka sánderuchi andarhierasïnga Tata Diosï Jeobani engachi eratsentajka na engajtsïni xáni xénchajka ka na engajtsïni xáni marhuachejka mándani juchantsïni Jesúsiiri uarhikua (1 Ped. 3:18; 1 Juanu 4:9). Ísï jimbo, májkueni eskaksï na úpka ióntki anapu erachiicha, juchajtuchi pʼímarhiasïnga máteru kʼuiripuechani paraksï juchantsïni jingoni Miántani Jesúsiiri uarhikuani ísï eska Jesúsi na uandapka eskachi úpiringa.

PʼÍMARHIASÏNGACHI MÁTERUECHANI MIÁNTSKUARHU

8. ¿Ambeksï úskia Tata Diosï Jeobaeri marhuariicha paraksï pʼímarhiani máteruechani Miántskuarhu? (Exea je imajeniichani).

⁸ Ióniistia engaksï Tata Diosï Jeobaeri marhuariicha ueenaka pʼímarhiani kʼuiripuechani paraksï Miántskuarhu nirani. Ka uéxurhini 1881 jimbo, i rebista pʼímarhiaspti Estados Unidos anapu erachiichani, paraksï tánguarhini kʼumanchikuarhu ma Allegheny (Pensilvania) paraksï Miántskuani úntani. Tátsekua mándani kúnguarhikua ueenaspti úntani i tánguarhikuani. Ka marsuni 1940 jimbo, aianhpiriichaksï arhinhaspti eskaksï úpiringa pʼímarhiani náki uéjki kʼuiripuni engaksï uékapiringa nirani ka engaksï jimeesïsï irekapka engaksï imeecha aianhpienga. Ka 1960 jimbo, Beteli ueenaspti axakuani kúnguarhikuechani pʼímarperakuechani sïranda jimbo. Desde jiáni uératini Jeobaeri testiguechachi uánikua pʼímarperakuechani etsakuaskia. ¿Andichisï xáni tiempu úrajki ka andichisï xáni jánguarhintajki para ini ambe úni?

9, 10. Engachi jánguarhintajka pʼímarpini Miántskuarhu, ¿ístu neechani marhuakuasïni? (Juanu 3:16).

⁹ Ma ambe jimbo engachi pʼímarhiajka máteruechani Miántskuarhu, jindeesti jimbokachi uékasïnga eskaksï míteaka ambe enga Tata Diosï Jeoba ka Jesúsi úkia juchantsïni jimbo (arhinta je Juanu 3:16). Uékasïngachi eska ambe engaksï exeaka ka kurhaani Miántskuarhu, uaaka eskaksï uékaaka sánderu sési míteni Tata Diosï Jeobani ka imanksï marhuakuni. Peru no imeechantku marhuakuasïndi ambe engachi xáni újka para pʼímarhiani máteruechani.

¹⁰ Ístuchi pʼímarhiasïnga imeechani engaksï nóteru marhuakuni jakaia Tata Diosïni ka ísïchi úsïnga para miátantaani eska Tata Diosï útasï xénchaasïnga. Kánikuachi sési pʼikuarherasïnga engachi exejka eskaksï uánikuecha uékasïnga nirani. Miántskua, miátantaasïndi imeechani na engaksï xáni tsípikua jingoni irekapka engaksï marhuakuni japka Tata Diosï Jeobani. Ju je exeni ambe enga úkuarhinchapka Monika.c Pandemia COVID-19 jimbo, ueenaspti ménderu aianhpini. Ísï tátsekua enga na kʼamakurhipkia Miántskua 2021 anapu, ima uandaspti: “No méni mirikurhiaka ini Miántskuani, 20 uéxurhini ísï tátsekua ménderuni ueenaska aianguani Tata Diosïiri ambe kʼuiripuechani ka pʼímarhiani Miántskuarhu. Ka iámindu mintsita jingoni ísï úska, jimbokani kánikua agradesida jarhaska Tata Diosï Jeoba ka Jesúsi jingoni jimbokaksï uánikua ambe úskia jíndeni jimbo” (Sal. 103:1-4). No arhiparini engaksï kʼuiripuecha jiókuarhiaka pʼímarperakuani o nómbe, kánikuachi jánguarhintasïnga parachi pʼímarhiani jimbokachi míteska eska Tata Diosï Jeoba jukaparharasïnga na engachi xáni jánguarhintajka.

11. ¿Nénajtsïni újchakuraskia Tata Diosï Jeoba na engachi xáni jánguarhintajka para pʼímarhiani kʼuiripuechani Miántskuarhu? (Ageo 2:7).

¹¹ Tata Diosï Jeobajtsïni kánikua újchakurasïndi na engachi xáni jánguarhintajka pʼímarhiani kʼuiripuechani Miántskuarhu. Pori ejemplu, 2021 jimbo, nájkirukachi no uánikua ambe ueenga úni COVID-19 jimbo, 21,367,603 kʼuiripuechaksï niraspti Miántskuarhu. Nóchi méni xáni tánguarhixapka, i jukari tsimani uelta sánderuesti eska na engachi xániika Jeobaeri testiguecha iámu parhakpinirhu. Ísïisti, Tata Diosï Jeoba sánderu jukaparharasïndi mándani kʼuiripuni enga nirajka ka no na engaksï xáni nirajka (Luk. 15:7; 1 Tim. 2:3, 4). Seguruchi jarhaska eska engachi nirajka pʼímarpini para Miántskuarhu nirani, Tata Diosï Jeobajtsïni jarhuatani jarhasïnga parachi imani kʼuiripuechani exeantani engaksï ambakiti mintsita ma jataka (arhinta je Ageo 2:7).

ÚNTASÏNGACHI MIÁNTSKUANI NÁJKIRUKA NO FÁSILIUAKA PARA ÍSÏ ÚNI

12. ¿Ambejtsïni úpirini ójkutani parachi no úntani Miántskuani? (Exe je imajenini).

¹² Jesúsi uandaspti eska últimu jurhiatikuecha jimbo, mámaru járhati uandanhiateechanchi jatsiapiringa: familiajtsïni no jurajkupirindi parachi marhuakuni Tata Diosïni, no sésichi kánhapiringa, eskaksï guerrecha japiringa ka epidemiecha... (Mat. 10:36; Mar. 13:9; Luk. 21:10, 11). Jamberi i ambejtsïni úpirindi ójkutani parachi no úntani Miántskuani. ¿Ambeksï úskia juchaari erachiicha engaksï i jásï ambe nitamakuarhini jarhajka ka néna jarhuataaskia Tata Diosï Jeoba?

13. Tata Diosï Jeoba, ¿néna újchakuraspi Artiomini jimboka balori xarhataspka para miántskuani úntani nájkiruka ónhakuarhetini japka?

¹³ Ónhakuarhetini jarhani. Erachiicha engaksï ónhakuarhetini jaka imeecheri jakajkua jimbo, kánikuaksï jánguarhintasïndi paraksï miántani Kristueri uarhikuani. Ju je exeni ambe enga úkuarhinchapka Artiom. Uéxurhini 2020 jimbo ima mesiicha jimbo enga Miántskua úkuarhijka, ónhakuarhetixapti selda sapichurhu ma, nani engaksï asta sinko kʼuiripuechani jamberi ónhauenga. Nájkiruka ísï nitamakuarhini japka, úspti jirinhani ambe enga úrapiringa para Miántskuani úntani ka prepararikuarhispti para imajku nitamatarakuarhini arhijtsïkperatani. Joperu problema ma jatsispti, imeecha enga jingoni ónhakuarhetini japka itsutasïreendiksï ka no sési ambeksï uandasïreendi. ¿Ambe úspi Artiom? Kurhamarhiaspti sinksï úpirini ma ora no itsutani níjtu no sési járhati uandakuechani úraani. Artiom ísku pakaraspti engaksï imeecha arhipka eska jo. Ima uandantasïndi: “Arhiaspka eskani úpiringa aianguani néna enga úkuarhijka Miántskua”. Nájkirukaksï orheta arhipka eskaksï no uékasïreenga míteni, tátsekua engaksï exepkia néna enga úkuarhijka Miántskua, sánderu ambeksï kurhamarhispti Miántskueri ambe.

14. ¿Ambe úspi Tata Diosïiri ireta para úni Miántskuani úntani nájkiruka pandemia COVID-19 japka?

¹⁴ Pandemia COVID-19 jimbo. I pandemieri kulpa jimbo, Tata Diosï Jeobaeri ireta no úspti májku kʼéri tánguarhintani para Miántskuani úntani. Peru nájkiruka ísïipka, úspkachi Miántskuarhu jarhani.d Kúnguarhikuecha engaksï interneti jatsipka, úsptiksï Miántskuani úntani bideokonferensia jimbo. Peru, ¿ambeksï úspi ima xáni uánikua erachiicha engaksï no jatsipka interneti? Máru paisicharhu telebisioni o radio jimboksï nitamataraspti arhijtsïkperatani. Ístu, Beteliichaksï grabarispti arhijtsïkperatani jukari 500 idiomecha jimbo, parakaksï imeecha jamberi engaksï iauani ísï irekaka úpiringaksï Miántskuani úntani. Ka jarhasptiksï máru erachiicha engaksï pákuapka ini grabasionicha.

15. ¿Ambechi jorhenguarhisïni Biblieri jorhenguarhiiri ma enga Sue arhinhajka?

¹⁵ Engajtsïni familia no jurajkujka. Máruksï kánikua úkua jukanchasïndi Miántskuani úntani, jimbokaksï imeecheeri familiecha no jurajkuasïnga. Inde ambesï úkuarhinchapti Biblieri jorhenguarhiri ma enga Sue arhinhajka. Uéxurhini 2021 jimbo, ma jurhiatikua ante de Miántskua úkuarhini, Sue arhispti imani enga Biblieri ambe jorhendeega eska no úpiringa Miántskuarhu jarhani jimboka imeeri familia no jurajkupiringa. Pirenchi arhikuntaspti Lukasʌ 22:44. Ka arhispti eska engachi uandanhiateechani jatsiajka, sánderu ambakiti ambe engachi uaaka úni jindeesti, májkueni úni eska Jesúsi ka kómarhini Tata Diosï Jeobani mintsikaparini eskajtsïni ima jarhuataaka. Pauandikua Sue listu jatsisptia kurhindani ka binuni ka jw.org jimbo exespti tsípa anapu jorhenguarhikua enga jindeeka para Miántskua. Inchatiru, ima imeeri kuarturhu minhakuarhispti ka telefonu jimbo kurhaaspti Miántskueri arhijtsïkperatani. Tátsekua arini ambe karakuspti pirenchini: “Uitsindekua, kánikuarini uinhaperantaska. Úska ambe engani xáni úka parani Miántskuarhu jarhani ka ístureni Tata Diosï Jeoba kánikua jarhuatasti. Kánikua sési pʼikuarherasïnga ka ístuni agradesida jarhaska Tata Diosï jingoni”. Engajtsï chá májkueni ambe nitamakuarhini jaka, ¿exesïntsï eskaksïni Tata Diosï uaaka jarhuatani?

16. ¿Andichisï seguru jaki eska Tata Diosï Jeoba újchakuraaka iámindu ambe engachi uaaka para Miántskuarhu jarhani? (Roma 8:31, 32).

¹⁶ Tata Diosï Jeoba kánikua jukaparharasïndi iámindu ambe engachi újka para miántani imeeri Uájpeeri uarhikuani. Uaakachi seguru jarhani eskajtsïni Tata Diosï újchakuraaka engachi xarhatakuska eskachi agradesidu jarhaska iámindu imani ambe jimbo enga ima úka juchantsïni jimbo (arhinta je Roma 8:31, 32). Jimajkani, ju je jánguarhintani parachi Miántskuarhu jarhani ini uéxurhini jimbo. Ka ju je sánderu ambe úni para Tata Diosïni marhuakuni ini mesiicha jimbo enga Miántskua úkuarhijka.