¿Listujtsï jarhaskia para ima jurhiatikua enga xáni jukaparhakueka mándani uéxurhini?

1. ¿Andisï kánikua jukaparhakue mándani uéxurhini miántani tata Jesukristueri uarhikuani? (Lukasï 22:​19, 20).

PARA imeecha engaksï Tata Diosï Jeobani marhuakujka, jurhiatikua enga sánderu jukaparhakuejka mándani uéxurhini jindeesti jiáni engaksï miántajka tata Jesukristueri uarhikuani. Tata Jesukristu indenkusï juramupti eskachi úntapiringa (arhinta je Lukasï 22:​19, 20). ¡Meruchi uékaxakaia eska niárakia inde jurhiatikua enga xáni jukaparhakueka! Ju je exeni andi.

2. ¿Andichisï uékani jakiia eska niáraka inde jurhiatikua engachi miántajka tata Jesukristueri uarhikuani?

² Miántani tata Jesukristueri uarhikuani jarhuatasïndijtsïni eratsentani na enga xáni juparhakueka engajtsïni tata Jesukristu euajpintaka. Ístujtsïni jarhuatasïndi exeni néna ka néna engachi uaaka xarhatani eskachi agradesidu jarhaska tata Jesukristueri uarhikuani jimbo (2 Kor. 5:​14, 15). Ístujtsïni jarhuatasïndi parachi juchaari erachiicha jingoni jarhani ka uinhaperperantanchi (Rom. 1:12). Mándani uéxurhini, uánikua erachiicha engaksï nóteru marhuakuni jakaia Tata Diosï Jeobani nirasïndiksï indeni tánguarhikuarhu ka máruksï kʼuanhatsentasïndi Tata Diosï Jeobani jingoni jimbokaksï erachiicha kánikua uékperakua xarhatakuasïnga jima. Ístu, uánikua kʼuiripuechaksï ísku pakarasïndi imani ambe jimbo engaksï jima kurhaajka ka exeni, ka uékasïndiksï jorhenguarhini Biblieri ambe. Jimbosï xáni jukaparhakueti para jucha miántani tata Jesukristueri uarhikuani.

3. Ima jurhiatikua engachi miántajka tata Jesukristueri uarhikuani, ¿nénajtsïni jarhuatasïni exeni na enga májku kʼéri jarhajka Tata Diosï Jeobaeri ireta? (Ístu exe je imajenini).

³ Ístuchi uékasïnga eska niárakia inde jurhiatikua jimbokachi úsïnga exeni eska Tata Diosï Jeobaeri ireta májku kʼéri jarhaska iámu parhakpinirhu. Jeobaeri testiguechachi tánguarhintasïnga seguni na enga jandora inchajtsïkuni jauakia jurhiata mándani lugari jimbo. Iáminduechachi kurhaasïnga arhijtsïkperata ma enga xarhatajka andijtsïnisï euajpinta Tata Diosï Jeoba, ístuchi pireasïnga tsimani pirekuechani, exesïngachi kurhinda ka binuni, ka iámu juchaari mintsita jingonchi uandasïnga “eska ísï úkuarhiaka” enga tʼámu xanhari kómarhinhajka. Ma 24 ora jimbojku iámindu kúnguarhikuechaksï májkueni úsïndi interu parhakpinirhu. Enga Tata Diosï Jeoba ka tata Jesukristu exejka eskachi iámu parhakpinirhu anapu erachiicha kʼéri ambe arhiaxaka, ¿a no eskaksï imeecha kánikua sési pʼikuarherajka?

4. ¿Ambechi exeni jauaka ini jorhenguarhikua jimbo?

⁴ Ini jorhenguarhikua jimbochi mókuantani jauaka arini kurhamarhikuechani: ¿nénachi uaa prepararini juchaari mintsitani para miántani tata Jesukristueri uarhikuani?, ¿ambechi uaa úni parakaksï máteruechajtu niuaka indeni tánguarhikuarhu? Ka ¿nénachi uaa jarhuataani imeechani engaksï nóteru marhuakuni jakaia Tata Diosï Jeobani? Míteni ini ambe jarhuataatijtsïni listu jarhani para inde jurhiatikua enga xáni jukaparhakueka.

¿NÉNACHI UAA PREPARARINI JUCHAARI MINTSITANI?

5. a) ¿Andichisï jatsi para eratsentani enga tata Jesukristu ísï íntspika imeeri tsípikuani? (Salmo 49:​7, 8). b) Uanda je ambe engajtsï jorhenguarhijka bideueri ¿Andisï uarhi Jesusi?

⁵ Ma ambe enga kánikua jukaparhakueka ka engajtsïni jarhuataka para prepararini juchaari mintsitani, jindeesti eratsentani na enga xáni jukaparhakueka miántani tata Jesukristueri uarhikua. Juchachi jandiajku no úpiringa kénditakuarhini pekaduni ka uarhikuani (arhinta je Salmo 49:​7, 8; ístu exe je bideuni ¿Andisï uarhi Jesusi?).a Jimbosï Tata Diosï Jeoba íntspipti imeeri Uájpeeri tsípikuani parajtsïni pʼímutantani ka tsimarhanksï kánikua maiampisti (Rom. 6:23). Engachi eratsentajka ambe enga Tata Diosï Jeoba ka tata Jesukristu úka juchantsïni jimbo, sánderuchi jukaparharaaka engajtsïni ísï euajpintaka. Iásïchi exeni jauaka máru ambe enga Tata Diosï Jeoba ka tata Jesukristu úka juchantsïni jimbo. Joperu orheta ju je exeni ambe engaksï xáni úka parajtsïni euajpintani.

6. ¿Ambe xáni úkuarhispi parachi euajpinhantani?

⁶ Para euajpintani o ménderu piántani ambe ma, uétarhisïndi maiampini. Jiáni enga Tata Diosï kueraapka Adánini, ima perfektuespti. Joperu enga na pekariipkia tsïtakuarhispti imani sésikuani para irekani para méntkisï ka niteruksï uájpeecha úpirinia irekani para méntkisï. Ísï jimbo, Jesúsi íntspispti imeeri tsípikuani enga perfektueka para ménderu piántani ambe enga Adáni tsïtapka. Iámu imani tiempu jimbo enga Jesúsi Echerirhu irekapka ‘no méni no sési ambe niátaspti ka no méni chkuanderaspti’ (1 Ped. 2:22). Jesúsi ísï uarhispti komueska kʼuiripu ma enga perfektuepka jimbosï imeeri tsípikua májkueni jukaparhapti komueska ima tsípikua enga Adáni tsitapka (1 Kor. 15:45; 1 Tim. 2:6).

7. Uandaa je máru tsʼéjkukuechani enga Jesúsi nitamakuarhiapka.

⁷ Jiáni enga Jesúsi Echerirhu japka méntkisï kurhajchaspti imeeri Taati jémbani enga auandarhu jaka nájkiruka uánikua tsʼéjkukuechani jatsiapka. Pori ejemplu enga sapichuepka, jatsispti para kurhajchani taati jémbeechani ixú parhakpinirhu nájkirukaksï imeecha no perfektuepka ka ima jo (Luk. 2:51). Ka enga tumbi sapichuepka, jamberiksï máteruecha uékeendi eska no kurhajchaapiringa taati jémbeechani ka nijtu Tata Diosï Jeobani. Ka enga na kʼériipkia, Satanási tsʼéjkuspti paraka no kurhajchapiringa Tata Diosï Jeobani ka jurajkuni (Mat. 4:​1-11). Satanási meru uékasïreendi eska Jesúsi pekariipiringa parakajtsïni no úpiringa euajpintani.

8. ¿Náki máteru tsʼéjkukuechani jatsiaspi Jesúsi?

⁸ Enga Jesúsi aianhpini jámapka ístu jatsispti para tekaantani máteru jásï tsʼéjkukuechani. Pori ejemplu, imeeri enemiguechaksï no sési kámaspti ka arhisptiksï eskaksï uándikupiringa (Luk. 4:​28, 29; 13:31). Ka jatsispti para tekaakuantani imeeri chúxapatiichani engaksï no ueenga sési ambe úni jimbokaksï no perfektuespka (Mar. 9:33, 34). Ístu jiáni engaksï jusgariini japka ka arhinksï eskaksï uándikupiringa, no sésiksï kámaspti ka teresmarhuni. Tátsekua, ísïksï uándikuspti enajki ima no sési úri máepi (Ebr. 121-3). Ka enga na uarhini japkia Tata Diosï Jeoba nóteru kuájchakusptia, jimbosï ima jatsipti para jandiajku orhepani uérakuni indeni tsʼéjkukuani (Mat. 27:46).b

9. ¿Nénchi pʼikuarherasïni engachi eratsentajka eska Jesúsi uarhiska juchantsïni jimbo? (1 Pedru 1:8).

⁹ Tata Jesukristu kánikua maiampisti parajtsïni juchantsïni euajpintani. Engachi eratsentajka ambe enga xáni úka Jesúsi juchantsïni jimbo, úsïndi eskachi iámu mintsita jingoni xénchaaka (arhinta je 1 Pedru 1:8).

10. ¿Ambe jatsispi para úni Tata Diosï Jeoba parajtsïni pʼímutantani?

¹⁰ ¿Ambe jatsispi para úni Tata Diosï Jeoba parakajtsïni Jesúsi úpiringa euajpintani? Eskachi na mítetini jaka, no nema sánderu sési pájperasïndi Tata Diosï Jeoba jingoni eska imeeri Uájpa (Prov. 8:30). Ísï jimbo, ju je eratsentani na enga pʼikuarherapka Tata Diosï Jeoba enga exepka imeeri Uájpa Jesúsini xáni no sési nitamakuarhini ixú Echerirhu. Ima meru kánikua no sési pʼikuarherani japti enga exeni japka na engaksï no sési kámani japka Uájpani ka na engaksï no xéncheenga.

11. ¿Náki ejemplujtsini jarhuatasïni kurhanguni na enga pʼikuarherapka Tata Diosï Jeoba engaksï uándikupka Uájpani?

¹¹ Imeecha engaksï uarhiranchaka uájpani ma, mítestiksï na enga xáni no sési pʼikuarherakuarhijka. Ka nájkirukachi mintsikajka eskaksï uarhiriicha tsíntaaka, inde ambe no úsïndi eskachi no no sési pʼikuarheraaka engachi uarhiranchajka nemani. I ejemplujtsïni jarhuatasïndi kurhanguni na enga xáni no sési pʼikuarherapka Tata Diosï Jeoba ima uéxurhini 33 jimbo enga exepka imeeri Uájpani na engaksï xáni no sési kámani japka ka uándikunksï (Mat. 3:17).c

12. ¿Nénachi uaa sési úrani juchaari tiempuni enga jamberi niáraaka ima jurhiatikua para miántani tata Jesukristueri uarhikuani?

¹² Enga jamberi niáraaka ima jurhiatikua para miántani tata Jesukristueri uarhikuani, ¿andijtsïsï no jorhenguarhijki na engajtsïni euajpintaka tata Jesukristu? Uaakajtsï ini ambe úni jiáni engajtsï jandiajku jorhenguarhiaka Biblieri ambe o engajtsï familieri jorhenguarhikua jatsiaka. Uaakajtsï úrani Jarhuajperata paraksï Jeobaeri testiguecha estudiarini o máteru publikasionichani parajtsï sánderu ambe míteni iiri ambe.d Ístu Programarhu para ánchikuarhini tánguarhikuarhu Kristianuecheri Irekua ka Aianhpikua jarhasti Biblieri arhintskua para tata Jesukristueri uarhikuani miántani ka jimintsï uaaka arhiantani indeni tekstuechani. Ka asï mirikurhi je exeni tsípa anapu jorhenguarhikuani enga jindeeka para ima jurhiatikua engachi miántaaka tata Jesukristueri uarhikuani. Engachi iásï uératini preparariiska juchaari mintsitani para inde jurhiatikua, uaakachi jarhuataani máteruechantu májkueni úni (Esd. 7:10).

AMBECHI UAA ÚNI PARAKAKSÏ MÁTERUECHAJTU MIÁNTAAKA TATA JESUKRISTUERI UARHIKUANI

13. ¿Ambechi jatsiski para orheta úni parakaksï máteruechajtu niuaka miántani tata Jesukristueri uarhikuani?

¹³ ¿Ambechi uaa úni parakaksï máteruechajtu miántaaka tata Jesukristueri uarhikuani? Orhetachi jatsiska para pʼímarhiani. Aparte de etsakuani pʼímarperakuecha aianhpikuarhu, úpiringachi eratseni neechanchi uékasïni pʼímarhiani, pori ejemplu juchaari parientiichani, imeechani engachi jingoni ánchikuarhijka o eskuelarhu anapuechani o ístu máteru kʼuiripuechani engachi míteaka. Engachi kʼamajkuauakia pʼímarperakuechani, uaakachi enlasi ma jimbo axakuani. Nóchi míteska namunksï uékaa nirani (Ecl. 11:6).

14. ¿Náki ejemplu jarhaski enga xarhatajka na enga xáni sésiika pʼímarhini nemani?

¹⁴ Ju je exeni na enga xáni sésiika pʼímarpini. Ma xanhari pirenchi ma ísku pakaraspti, enga uámba enga no Testigueka, arhipka eska nipiringa imani jingoni. ¿Andisï ísku pakarapi pirenchi? Jimboka uánikua xanhari pʼímarhispkia ka uámba no méni uékaspti nirani. ¿Andisï iásï uékapia nirani? Uámba aianguspti pirenchini eska orhejtsïkuti ma enga ima mítepka íntskuspka pʼímarperata ma. Ísï jimbo, niraspti indeni uéxurhini ka máteru uéxurhiniichani jimbo.

15. ¿Ambechi jatsiski para miántani engachi pʼímarhiaka nemani para nirani tata Jesukristueri uarhikuani miántani?

¹⁵ Ju je miáni eska jamberi no iámindu ambe kurhanguaka ima kʼuiripu engachi pʼímarhiaka ka sánderia enga no méni nirani jaka juchaari tánguarhikuecharhu. Ísï jimbo, sési japirindi eskachi eratsentaaka ambe no úpirini kurhanguni ka nénachi uaa jarhuatani (Kol. 4:6). Jamberi kurhamarhikuarhiati: “¿Ambe únhajki jima? ¿Na xáni durariisïni? ¿Néna jatsiski parani xukuparhani? ¿Jatsia parani maiampini engani niuaka? ¿Kurhacheajtsïni sentabu incharini?”. Ísï jimbo úpiringachi kurhamarhini imani engachi pʼímarhini jaka ambe uékapirini míteni ka aianguni. Ístuchi uaa úraani bideuechani Ju je miántani tata Jesukristueri uarhikuani ka ¿Nénaksï úkuarhisïni juchari tánguarhikuecha? Ka jorhenguarhikua 28 librueri Méntkisï tsípikua jingoni ireka je jukanharhisti máru ambe engachi uaaka uandontskuarheni kʼuiripuni jingoni.

16. ¿Ambe máteru ambe úpirini kurhamarhikuani ima enga niuaka tata Jesukristueri uarhikuani miántani?

¹⁶ Enga kʼuiripu na niuakia tata Jesukristueri uarhikuani miántani, jamberi uékaati sánderu ambe míteni. Pori ejemplu andisï no nema (o kási no nema) aki kurhinda ka binuni. O ménderu káni úkuarhia i tánguarhikua, o sinksï iámindu juchaari tánguarhikuecha méntkisï májkueni úkuarhisïni. Nájkiruka imani arhijtsïkperata jimbo enga jiáni nitamataranhajka uandanhajka indeeri ambe, jamberi uékaati eskachi sánderu sési aianguaka. Parachi úni aianguni, uaakachi úrani artikuluni “¿Andiksïsï Jeobaeri testiguecha no májkueni úntajki Tateeri Senani eska máteru relijionicha?” enga jw.org jimbo jaka. Uékasïngachi iámindu ambe úni ante de niárani inde jurhiatikua, ka enga na niáraakia ka ístu ísï tátsekua enga na nitamaakia para jarhuataani imeecha engaksï ambakiti mintsita ma jataka (Úku. 13:48).

JU JE JARHUATANI IMEECHANI ENGAKSÏ NÓTERU MARHUAKUNI JAKAIA TATA DIOSÏNI

17. ¿Nénaksï uaa orhejtsïkutiicha jarhuataani imeechani engaksï nóteru marhuakuni jakaia Tata Diosïni? (Ezequiel 34:​12, 16).

¹⁷ ¿Nénaksï uaa jarhuataani orhejtsïkutiicha imeechani engaksï nóteru marhuakuni jakaia Tata Diosïni? Xarhatakupariani eskaksï pendienti jarhaska imeecha jimbo ka eskaksï xénchaasïnga (arhinta je Ezequiel 34:​12, 16). Orhejtsïkutiicha, uandajpaa je iámindu imeechani engajtsï xáni uaaka ante de niárani ima jurhiatikua para miántani tata Jesukristueri uarhikuani. Arhia je eskaksï uandanhiasïnga imeecha jimbo ka eskajtsï uékasïnga jarhuataani. Pʼímarhia je tata Jesukristueri uarhikuani miántani, ka engaksï niuaka, kánikua sési eroa je. Enga na nitamakia, seguirii je uandajpaani ka jarhuataa je parakaksï andarhientaaka Tata Diosï Jeobani (1 Ped. 2:25).

18. ¿Nénachi uaa iáminduecha jarhuataani imeechani engaksï nóteru marhuakuni jakaia Tata Diosïni? (Roma 12:10).

¹⁸ Iámindu kúnguarhikuarhu anapuechachi uaaka jarhuataani imeechani engaksï nóteru marhuakuni jakaia Tata Diosï Jeobani parakaksï niuaka miántani tata Jesukristueri uarhikuani. ¿Ambechi uaa úni? Sési kaani, janhanharhiani ka xénchaani (arhinta je Roma 12:10). Ju je miáni eskaksï inde Tata Diosï Jeobaeri karichiicha jamberi úkua jukanchani japti ménderu nirani tánguarhikuarhu ma. Jamberiksï eratseendi nénaksï erokaapirini erachiicha.e Ísï jimbo, ju je no kurhamarhiani ni arhiani imani ambe enga úpiringa no sési pʼikuastaani (1 Tes. 5:11). Imeechaksï útasï juchaari erachiicheesti ka juchachi kánikua tsípisïnga ménderu májku kʼéri kómarhini Tata Diosï Jeobani (Sal. 119:176; Úku. 20:35).

19. ¿Nénajtsïni marhuachesïni miántani tata Jesukristueri uarhikuani?

¹⁹ Exeskachia andijtsïnisï Jesúsi juramuchi eskachi miántani imeeri uarhikuani mándani uéxurhini. Ísï úni, kánikuajtsïni marhuachesïndi juchantsïni ka ístu máteru kʼuiripuechani (Is. 48:​17, 18). Jarhuatasïndijtsïni parachi sánderu xénchani Tata Diosï Jeobani ka tata Jesukristuni. Ístuchi úsïnga xarhatani na engachi xáni agradesidu jaka indeni ambe jimbo engaksï imeecha úka juchantsïni jimbo. Ka úsïndi eskachi sánderu májku kʼéri jauaka iámindu erachiicha jingoni ka eskachi jarhuatauaka máteru kʼuiripuechani míteni ambe engaksï jatsika para úni paraksï pʼiuani kóntperatechani engajtsïni Tata Diosï íntsauaka tata Jesukristueri uarhikua jimbo. Ísï jimbo, ju je jánguarhintani listu jarhani parachi miántani tata Jesukristueri uarhikuani jimboka inde jindeeska jurhiatikua enga sánderu jukaparhakueka ini uéxurhini.