Exestiksï na engaksï xáni xénchperajka kúnguarhikuarhu

YOMARA, Marcelo ka Hiver ermanuestiksï ka taniperanksï no úsïndi exeni, Guatemalaksï irekasti ireta sapichurhu ma. Yomara ueenaspti jorhenguarhini Jeobaeri testiguecha jingoni, ka tátsekua imeeri ermanu jémbeechaksï ístu ueenaspti jorhenguarhini. Joperuksï taniperani no jorhenaspti braille jimbo arhintani. Ísï jimbo, ima enga jorhendaani japka Biblieri ambe, jatsispti para arhikuantani párrafuechani ka ístu Biblieri tekstuechani.

Ístuksï kánikua úkua jukanchasïreendi tánguarhikuecharhu nirani. Kʼumanchikua Reinueri enga no xáni iauani japka, 40 minutu iauani pakarakuasïreendi ka imeechaksï no úsïreendi jandiajku nirani. Ísï jimbo, erachiichaksï paasïreendi tánguarhikuecharhu. Ka engaksï taniperani ueenapka partisiparini tánguarhikuarhu enga entre semana jimbo úkuarhijka, erachiichaksï jarhuataasïreendi paraksï memoria jimbo jorhenguarhini ambe engaksï uandapiringa.

Maiuni 2019 jimbo, Jeobaeri testiguechaksï ueenaspti tánguarhikuechani uaani imeecheri ireta jimbo, ka temungurhiri ma engaksï prekursori regulariipka mótsisptiksï indeni ireta jimbo. I temungurhiri uandaspti eska jorhendaapiringa ini tanimu ermanuechani braille jimbo arhintani ka karani nájkirukaksï imeechajtu no jorhenapka. Ísï jimbo, nirasptiksï bibliotekarhu paraksï jorhenguarhini braille jimbo arhintani ka ístu nénaksï úpirini jorhendaani máteruechani.

Máru mesiicha jimbojku, i tanimu ermanuechaksï úsïreendia sési arhintani braille jimbo ka inde ambe jarhuataaspti paraksï sánderu sési pájperani Tata Diosï Jeoba jingoni.a Iásï, Yomara, Marcelo ka Hiver prekursori regulariistiksïa, ka Marcelo orhejtsïkutiiri jarhuajpiriisti. Mándani semana, kánikuaksï tiempu arhutasïndi paraksï marhuakuni Tata Diosï Jeobani. Kánikuaksï tsípikua jingoni ísï úsïndi ka inde ambe úsïndi eskaksï máteruechajtu májkueni uaaka.

I tanimu ermanuechaksï kánikua agradesidu jarhasti imani ambe jimbo enga xáni úkia kúnguarhikua imeecha jimbo ka ístu jimbokaksï kánikua xénchaasïnga. Yomara uandasïndi: “Desde engachi míteaka erachiichani, xarhatachestijtsïni eskajtsïni sési jimbo xénchasïnga”. Ka ístu Marcelo uandasïndi: “Ambakiti amiguechanchi jatsiaska kúnguarhikuarhu ka familiarhuchi ma jarhaska enga interu parhakpinirhu jaka, enga májku kʼéri jaka ka enga kánikua xénchperajka”. Yomara ka imeeri ermanu jémbeechaksï uékaxatiia eska niáraaka ima jurhiatikua engaksï uaaka exeni Echerini enga paraisu máeuakia (Sal. 37:10, 11; Is. 35:5).