¿Uaaksï kʼuiripuecha úni eskaksï nóteru jauakia guerrecha ni atajperakuecha?

GOBIERNUECHAKSÏ JÁNGUARHINTASÏNDI SÁNDERU SENTABU JATSINI

Ambe engaksï uéjka úni: Uékasïndiksï eska kʼuiripu sánderu sési irekaaka. Eskaksï iáminduecha májkueni o sáno májkueni jatsikuarheni, ka ísïksï kʼóru nóteru jupiperaatia.

Andiksïsï no újki ísï úni: Engaksï juramutiicha sentabueri ambe exeni jarhajka, jatsipirindiksï para exeni nani enga sánderu uétarhijka. Uéxurhini 2022 jimbo iámu parhakpinirhu 34.100 miioni dolari úrakuarhesti para úni eskaksï kʼuiripuecha úpiringa pínandikua jatsini. Joperu inde jukari sánitituesti, jimboka solu jindeeska 0,4% iámu sentabueri enga ejersiturhu úrakuarhejka.

“Sánderuchi atarasïnga para sési peentani iámu ambe enga na kʼamakurhijkia guerra ma ka eska jarhuajpeni ante de ísï úkuarhini” (António Guterres, secretario general de las Naciones Unidas).

Ambe enga uandajka Biblia: Ma parhakpini anapu juramutiicha ka organisasioniichaksï úsïndi jarhuataani pobrichani, joperuksï no méni uaati meru kénditani indeni ambe (Deuteronomio 15:11; Mateu 26:11).

UANDONTSKUARHENHANI KA PAKATPERAKUA AMBE ÚNHANI

Ambe engaksï uéjka úni: Gobiernuechaksï uékasïndi sési uandontskuarheni ka pakatperani ambe ma paraksï sési peentani arhirperata ma paraksï no niárani uarhiperani. I ambe uaati eskaksï iáminduecha konforme pakaraaka.

Andiksïsï no újki ísï úni: Jimbokaksï máru kʼuiripuecha no uékasïnga uandontskuarheni, pakatperani o de akuerdu jarhani ambe engaksï máteruecha uandajka. Ka nájkirukaksï pakatperajkia eskaksï no ma ambe útsperaaka, sáno méntkisïksï no úsïndi ísï úni.

“No méntkisï sési uérasïndi engaksï gobiernuecha uandontskuarhejka. Engaksï pakatperajkia ambe engaksï uaaka paraka nóteru jauakia guerra ma, inde ambe masi úsïndi eska problema sánderu kʼéaka” (Raymond Smith, American Diplomacy).

Ambe enga uandajka Biblia: Kʼuiripuechaksï jatsipirindi para kurhajchani ini konsejuni: “Jánguarhi pínandikua jatsini” (Salmo 34:14). Joperu uánikuechaksï no úsïndi ambe engaksï aiatspejka, ‘nóksï mintsinharikueni’, ka ‘nóksï nani máru uékasïndi kurhanguni’ (2 Timoteu 3:1-4). Jimboksïsï juramutiicha no uaati kénditaani guerrechani nájkirukaksï jánguarhintani jauaka.

NÓTERU JATSIANIA ARMEECHANI

Ambe engaksï uéjka úni: Gobiernuechaksï jánguarhintaxati paraksï nóteru jauakia mámaru járhati bombeecha.

Andiksïsï no újki ísï úni: Sáno méntksï, paisiichaksï no uékasïndi jurajkuani armeechani jimbokaksï eratsesïnga eskaksï nóteru jatsiakia uinhapikua ni juramukua. Kʼamajkuani armeechani no uaati úni eska nóteru jupiperanhaakia.

“Enga na kʼamarapkia Guerra Fría, gobiernuechaksï uánikua ambe pakatperaspti paraksï kʼamajkuani armeechani joperuksï no úspti ísï úni. Uandasptiksï eskaksï mámaru ambe úpiringa paraksï paisiicha úni sési pájperani ka tátsekua iámindu kʼuiripuecha úni sési irekani ka seguru” (Securing Our Common Future: An Agenda for Disarmament [Asegurar nuestro futuro común: una agenda para el desarme]).

Ambe enga uandajka Biblia: Kʼuiripu jatsipirindi para jurajkuani armeechani ka, pori ísï arhini, tarheratarakua ambe uaantani (Isaías 2:4). Joperu no inde ambejkusï uétarhijti jimboka atajperakua ambe mintsitarhusï uérajka (Mateu 15:19).

GOBIERNUECHAKSÏ KÚNGUARHINTASÏNDI PARAKSÏ NÓTERU JARHANIA GUERRECHA

Ambe engaksï uéjka úni: Gobiernuechaksï kúnguarhintasïndi paraksï úni kuájperani enga paisi ma uékaaka máteru paisini no sési úkuni. I ambe arhikuekasïndi eskaksï uánikua paisiicha márku úkuarhintasïnga paraksï sánderu uinhapikua jatsini, ka ísï no xáni fasiliini para guerra ma jarhani.

Andiksïsï no újki ísï úni: Nájkiruka gobiernu ma chéaka no sési úkuani gobiernuechani, no arhikuekasïndi eska no jauaka guerra ma. Paisiichaksï no méntkisï ísï úsïndi eskaksï na pakatperajka jimbokaksï no úsïnga uandani néna o na jatini kuájpikuarhini.

“Nájkiruka ima gobiernuecha engaksï kúnguarhintapka kʼéri ánchikuarhita ma úka para Pacto de la Sociedad de Naciones ka ístu karakata pakarani Carta de las Naciones Unidas jimbo, méntku no marhuasti paraksï nóteru jarhania guerrecha” (Encyclopedia Britannica).

Ambe enga uandajka Biblia: Ni gobiernuecha ni organisasioniichaksï uaa úni eska jauaka pínandikua ka sési irenhani, na uéjkiksï márku úkuarhintani kʼuiripuecha (Eclesiastés 4:12). Biblia arhisïndi: “Asï jáma je mintsikaani juramutiichani nijtu máteru kʼuiripuni, jimbokaksïni no uaaka pʼímutantani. Imeri uinhapikua kʼamakurhisïndi, ima echeri úkuarhintasïndi; imani mismu jurhiatikua jimbo nóteru ambe ma eratsesïndia” (Salmo 146:3, 4).