SEMANA 10
PIREKUA 31 ¡Méntkisï Jeoba jingoni jáma!
Ju je májkueni eratseni eska Tata Diosï Jeoba ka Jesúsi
“Jimboka Kristu no sési nitamakuarhispka enga kʼuiripu máepka, jiájkani chájtu jánguarhinta je májkueni eratseni eska ima” (1 PED. 4:1).
AMBE ENGACHI JORHENGUARHIAKA
Exeakachi ambe enga jorhenguarhipka Pedru imeeri ambe enga Jesúsi eratseenga ka ambechi uaa jorhenguarhini jucha.
1, 2 a) ¿Ambe arhikuekasïni xénchani Tata Diosï Jeobani? b) ¿Néna xarhataspi Jesúsi eska xénchasïnga Tata Diosïni?
ENGA Jesúsi uandapka: “Xéncha chiiti Tata Diosï Jeobani iámu chiiti mintsita jingoni, iámu chiiti alma jingoni, iámu chiiti eratsekua jingoni ka iámu chiiti uinhapikua jingoni”, xarhataspti eska inde Lei sánderu jukaparhakuespka (Mar. 12:30). Ísï jimbo, jatsiskachi para xénchani Tata Diosï Jeobani iámu juchaari mintsita jingoni ka ambe engachi jatsika. Pori ejemplu, juchaari uinhapikua jingoni, ambe engachi uéjka ka ambe engachi p’ikuarherajka. Ístu na engachi úrajka juchaari eratsekuani o ambe engachi xáni eratsejka. Jimbokachi xénchasïnga Tata Diosï Jeobani, uékasïngachi májkueni eratseni eska ima. Ísïisti, nóchi uaaka sési kurhanguni na enga eratsejka Tata Diosï, joperu ambe engajtsïni jarhuataaka, jindeesti jorhenguarhini ‘májkueni eratseni eska Kristu’, jimboka ima kʼóru sési xarhataspka na enga eratsejka imeeri Taati (1 Kor. 2:16).
2 Na enga eratsejka Jesúsi xarhatasïndi eska xénchasïnga Tata Diosï Jeobani. Ima mítetixapti ambe enga uékeenga Tata Diosï Jeoba eska ima úpiringa ka Jesúsi uékaspti ísï úni nájkiruka no sési nitamakuarhipiringa. No jurajkuspti eska ambe ma ójkutapiringa jimboka eratsetixapka jaiapanherantani Taati jémbani.
3. ¿Ambe jorhenguarhispi apostoli Pedru Jesúsiiri ambe, ka ambe arhiaspi kristianuechani? (1 Pedru 4:1).
3 Pedru ka máteru apostoliichaksï Jesúsi jingoni jámaspti ka úsptiksï jorhenguarhini na enga eratseenga ima. Enga apostoli Pedru karapka imeeri orheta kartani espiritu santu jimbo, arhiaspti kristianuechani eskaksï jánguarhintapiringa májkueni eratseni eska Kristu (arhinta je 1 Pedru 4:1). Enga Pedru ísï karapka, úraspti uandakua ma enga sondaduechani arhikuekajka engaksï jupikaajka armeechani paraksï uarhipeni. Ísï jimbo, májkueni eratseni eska Jesúsi, arhikuekasïndi armeechani jupikaani para uarhipeni no sési jásï ambe jingoni engachi uéjka úni ka ístu Noambakitiiri parhakpini jingoni (2 Kor. 10:3-5; Éfes. 6:12).
4. ¿Ambechi exea ini jorhenguarhikua jimbo?
4 Ini jorhenguarhikua jimbochi exeni jauaka na enga eratsejka Jesúsi ka nénachi uaa májkueni úni. Exeni jauakachi nénachi uaa 1) jorhenguarhini ísï eratseni eska Tata Diosï Jeoba, 2) kaxumbitiini ka 3) sési eratseni.
JU JE MÁJKUENI ERATSENI ESKA TATA DIOSÏ JEOBA
5. Ma xanhari, ¿néna xarhataspi Pedru eska no májkueni eratsexapka eska Tata Diosï Jeoba?
5 Ma xanhari, Jesúsi arhiaspti imeeri apostoliichani eskaksï Jerusaléni nipiringa, eskaksï relijioniiri orhejtsïkutiicha jupikapiringa Jesúsini, no sésiksï kámani ka uándikunksï (Mat. 16:21). Joperu Pedru mítespti eska Jesúsi jindeespka Mesíasi enga pʼímutantapiringa Tata Diosïiri iretani, jamberi inde ambe úpti eska úkua jukanchapiringa kurhanguni andisï Tata Diosï Jeoba jurajkupirini eska Jesúsi uándikunhapiringa (Mat. 16:16). Jimbosï támu pápti Jesúsini ka arhini: “¡Tata, pʼamojkukuarhi sáni! Tʼuri no méni ísï nitamakuarhiaka” (Mat. 16:22). Jimboka Pedru no xarhataxapka eska májkueni eratsesïreenga eska Tata Diosï Jeoba, ístu no májkueni eratsexapti eska Jesúsi.
6. ¿Néna xarhataspi Jesúsi eska májkueni eratsesïreenga eska Tata Diosï Jeoba?
6 Jesúsi májkueni eratsesïreendi eska imeeri Taati auandarhu anapu. Jimbosï arhipti Pedruni: “¡Kéndikucherini Satanási! Jimbokarini ójkutaxaka parani úni ambe engani jatsika para úni. Jimbokari no ísï eratsesïnga eska Tata Diosï sino ísï eskaksï kʼuiripuecha” (Mat. 16:23). Jesúsi sési mítetixapti eska no fásiliipiringa jimboka jatsispka para no sési nitamakuarhini ka uarhini para úni imani ambe enga Tata Diosï Jeoba uékeenga. Jimbosï Jesúsi no jiókuarhipti Pedrueri konsejuni nájkiruka ima uékeenga jarhuatani. Pedru niáraspti kurhanguni eska jatsispka para jorhenguarhini májkueni eratseni eska Tata Diosï Jeoba. ¡Xáni ambakiti ambe engachi jorhenguarhijka!
7. ¿Néna xarhataspi Pedru eska jánguarhintaxapka ísï eratseni eska Tata Diosï Jeoba? (Ístu exe je imajenini enga jaka).
7 Ísï tátsekua, Pedru xarhataspti eska jánguarhintaxapka májkueni eratseni eska Tata Diosï Jeoba. Tata Diosï uandaspti eska uékasïreenga eskaksï máteru iretarhu anapuechajtu niárapiringa imeeri iretarhu jarhani. Ísï jimbo, arhispti Pedruni eska nipiringa jorhendani Korneliuni, ka i achamasï niárapirindi jindeeni primeru kristianu enga no judiuepka. Pedru sáni úkua jukanchapirindi úni ambe enga Tata Diosï arhipka jimbokaksï judiuecha no pájperasïreenga imani kʼuiripuecha jingoni engaksï no judiuepka. Joperu enga na sési kurhangupkia ambe enga uékeenga Tata Diosï Jeoba, mójtakuspti imeeri eratsekuani. Ísï jimbo, enga Korneliu uandakua axakupka Pedruni eska nipiringa pʼorhembini, ima jirejiresï niraspti (Úku. 10:28, 29). Aianguspti Korneliuni Tata Diosï Jeobaeri ambe ka ístu iámu imeeri kʼumanchikuarhu anapuechani ka imeechaksï itsï atakuarhispti (Úku. 10:21-23, 34, 35, 44-48).
Pedru Korneliu inchaakuxati. (Exe je párrafu 7).
8. ¿Nénachi xarhatasïni eskachi májkueni eratsesïnga eska Tata Diosï Jeoba? (1 Pedru 3:8 ka nota).
8 Máru uéxurhini tátsekua, Pedru ini konsejuni íntsaaspti kristianuechani: “Májku eratsekua káma je” (arhinta je 1 Pedru 3:8 ka nota). Parachi iámindu Jeobaeri testiguecha májku eratsekua kámani eska Tata Diosï, ¿ambechi jatsiski para úni? Arhintani Bibliani nani enga uandajka na enga ima eratsejka. Pori ejemplu, Jesúsi arhiaspti imeeri chúxapatiichani eskaksï seguiriipiringa orhetku peerani Tata Diosïiri Reinuni. Ísï jimbo, enga kúnguarhikuarhu anapu erachi ma ueenapiringa tiempu kompletueri marhuani, ¿a no eskachi no májkueni arhipiringa eska Pedru na arhipka Jesúsini? Sánderu sési, felisitaripiringachi jimboka ambakiti ambe erakuska úni ka jarhuatanchi (Mat. 6:33).
JU JE KAXUMBITIINI
9, 10. ¿Ambejtsïni jorhendaski Jesúsi kaxumbikueri ambe?
9 Ima chúri ante de uándikunhani, Jesúsi jorhendaspti Pedruni ka ístu máteru apostoliichani eska jukaparhakueska kaxumbitiini. Jesúsi arhispti Pedruni ka Juanuni eskaksï iámu ambe listu jatsipiringa para ima últimu xanhari tʼireni imeeri chúxapatiicha jingoni ante de uarhini. Jamberi Pedru ka Juanu peeraptiksï batea ma ka takusï ma paraksï jupandukuani imeecha engaksï nipiringa t’irekuarhu. ¿Joperu né xarhatapirini kaxumbikua para jupandukpini?
10 Sáno méntkisï jántspiri úsïreendi indeni ambe. Joperu jiáni, Jesúsi no jarhaspti eratsentani sini jupandukuapirini o nómbe. Apostoliichaksï ísku pakarapti engaksï exepka Jesúsini pʼíntani imani takusïni enga pʼandonhipka, pʼíkuni takusï ma ka jónguarhini, ka jatsirani itsï batearhu ka ueenani jupandukuani (Juanu 13:4, 5). Ka Jesúsi ióndapti kʼamarani jimboka 12 apostoliichani jupandukuaspti, asta Judasïni jamberi enga traisionariipiringa. Kánikua kaxumbitiispti Jesúsi ka tekaantskua jingoni arhiaspti: “¿Kurhanguskijtsï ambe engaksïni úchika? Chájtsïni jíndeni arhisïnga Jorhentpiri ka Tata, ka sésijtsï uandasïnga jimboka ísïiska. Ísï jimbo, engaksïni ji jupandukuka engani jindeeka Tata ka Jorhentpiri, jiájkani chájtujtsï jatsiska para jupandukperani” (Juanu 13:12-14).
Kaxumbikua no solu jindeesti ambe engachi uandajka sino ístu ambe engachi pʼikuarhinhejka
11. ¿Néna xarhataspi Pedru eska kaxumbitiispkia? (1 Pedru 5:5; ístu exe je imajenini).
11 Ísï tátsekua enga Jesúsi na karhanchentapkia auandarhu, Pedru ambakerantaspti milagru ma jimbo acheetini ma enga no ueenga xanharani jimboka ísï andajpenuspka (Úku. 1:8, 9; 3:2, 6-8). Ka engaksï uánikua kʼuiripuecha exepka ini ambe, nirasptiksï andarhierani (Úku. 3:11). Joperu Pedru no uékaspti eskaksï kʼéri ambe arhipiringa asipueriksï jima anapuecha pʼindepka ísï úni. Ima kaxumbikua xarhataspti ka úspti eska Tata Diosï Jeoba ka Jesúsi k’éri ambe arhinhapiringa. Uandaspti: “I acheeti engajtsï chá ixú exeni jaka ka engajtsï sési míteka, uinhaptarhantastia Jesúsiiri nombri jimbo ka ístu jimbokachi jucha mintsikasïnga imeeri nombrini” (Úku. 3:12-16). Tátsekua Pedru karakuaspti kristianuechani na enga xáni jukaparhakueka kaxumbitiini. Ka ambe enga arhiapka, jamberijtsïni miátantajti Jesúsini enga jónguarhipka takusï ma ka jupandukuani imeeri apostoliichani (arhinta je 1 Pedru 5:5 ka nota). Jesúsi kánikua jorhendaspti Pedruni para kaxumbitiini.
Pedru xarhataspti eska kaxumbitiispka, ka imani milagru jimbo enga úpka, kʼéri ambe arhispti Tata Diosï Jeobani ka Jesúsini. Juchajtuchi uaaka xarhatani eskachi kaxumbitiiska engachi jarhuatauaka máteruechani ka no erokuarhini eskachi kʼéri ambe exenhaaka. (Exea je párrafuechani 11 ka 12).
12. Májkueni eska Pedru, ¿nénachi uaa kaxumbitiini?
12 Májkueni eska Pedru, juchajtu uaaka kaxumbitiini. Ka ma ambe engajtsïni jarhuataaka, jindeesti miántani eska kaxumbikua no solu jindeeska ambe engachi uandajka sino ístu ambe engachi pʼikuarhinhejka. Ka ini ambesï arhikuekani japti Pedru enga uandakua grieguni ísï tradusiripka komu “kaxumbikua” ixú 1 Pedru 5:5 jimbo. ísï jimbo, jarhuajpesïngachi jimbokachi xénchasïnga Tata Diosï Jeobani ka ístu kʼuiripuechani ka no jimbokachi uékasïnga eskachi k’éri ambe exenhaaka. Ka xarhatanchi jauaka eskachi kaxumbitiiska engachi tsípikua jingoni marhuakuska Tata Diosï Jeobani ka erachiichani no arhiparini sintsïni máteruecha exeni jaua o nómbe (Mat. 6:1-4).
JU JE MÉNTKISÏ SÉSI ERATSENTANI
13. ¿Ambe arhikuekasïni ʻméntkisï sési eratsentani’?
13 ¿Ambe arhikuekasïni ʻméntkisï sési eratsentani’? (1 Ped. 4:7). Arhikuekasïndi imani ambe erakuni úni enga xarhatajka na enga eratsejka Tata Diosï Jeoba. Ístu, arhikuekasïndi miáni eska sánderu jukaparhakueska sési pájperani Tata Diosï Jeoba jingoni. Engachi sési eratsentaaka ambe úni, nóchi juchajkumindu k’éri ambe exekuarhiaka ka eratseni eskachi iámu ambe míteskia, sánderu sési, somenchi kómarhiaka Tata Diosï Jeobani kaxumbikua jingoni parajtsïni jarhuatani.a
14. ¿Káni no mintsikaspi Pedru Tata Diosï Jeobani?
14 Ima chúrikua ante de uarhini, Jesúsi arhiaspti imeeri chúxapatiichani: “I chúri, iáminduechajtsïni jurajkuaka imani ambe jimbo engani nitamakuarhiaka”. Joperu Pedru jukari mintsinharhikuarhispti ka arhispti: “Nájkirukaksïni iáminduecha jurajkuaka jimbokari ísï nitamakuarhiaka, ¡jíkeni no méni jurajkuaka!”. Ima chúrikua, Jesúsi arhiaspti máru chúxapatiichani: “Jingontku ja je ka méntku únda je kómarhini” (Mat. 26:31, 33, 41). Enga Pedru úpiringa ambe enga Jesúsi uandapka, jamberi balori jukapirindi para uandani eska ima Jesúsiiri chúxapatiispka. Joperu no ísï úspti ka uandaspti eska no mítespka Jesúsini ka tátsekua kánikua no sési pʼikuarheraspti (Mat. 26:69-75).
15. Ima chúri ante de uarhini, ¿ambe jarhuataspi Jesúsini méntkisï sési eratseni?
15 Nájkiruka Jesúsi perfektuepka, méntkisï mintsikaspti Tata Diosï Jeobani. Ima chúri ante de uarhini, méntku úndaspti kómarhini ka inde ambe jarhuataspti para balori jukani ka úni ambe enga Taati jémba uékeenga (Mat. 26:39, 42, 44; Juanu 18:4, 5). Pedru exespti na enga Jesúsi méntku úndapka kómarhini Tata Diosï Jeobani ka seguruchi jarhaska eska no méni mirikurhipka indeni ambe.
16. ¿Néna xarhataspi Pedru eska jorhenguarhispkia sési eratseni ambe úni? (1 Pedru 4:7).
16 Pedru niáraspti sánderu mintsikani Tata Diosï Jeobani jimboka kómarhisïreenga. Ísï tátsekua enga Jesúsi na tsíntapkia, arhispti Pedruni ka máteru apostoliichani eskaksï intsïnhapiringa espiritu santu paraksï úni aianhpini ambakiti aianhperakuani, joperu arhiaspti eskaksï Jerusaléni erokuarhipiringa enga jamberi inde ambe úkuarhipiringa (Luk. 24:49; Úku. 1:4, 5). ¿Ambe úspi Pedru enga jamberi erokuarhini japka? Biblia uandasïndi eska ima ka máteru kristianuechaksï ‘méntku úndaxapka kómarhini Tata Diosïni’ (Úku. 1:13, 14). Ísï tátsekua enga Pedru na karapkia imeeri orheta kartani, arhiaspti kristianuechani eskaksï jánguarhintapiringa sési eratseni ambe ma ka kómarhini Tata Diosï Jeobani eska jarhuataapiringa (arhinta je 1 Pedru 4:7). Pedru jorhenguarhispti mintsikani Tata Diosï Jeobani ka úspti jarhuataani ka uinhaperaantani kúnguarhikuarhu anapu erachiichani ka pirenchiichani (Gal. 2:9).
17. Na uéjkichi jorhenani úni ambe ma, ¿ambechi jatsiski para úni méntkisï? (Ístu exe je imajenini).
17 Parachi sési erakuni ambe ma, jatsiskachi para méntkisï kómarhini Tata Diosï Jeobani. Míteskachi eskachi méntkisï jatsiska para kurhakuni eskajtsïni arhistachiaka ambe úni nájkiruka ísï xarharaaka eska no úkua jukaaka. Ka jiáni engachi kʼéri ambe eratseni jauaka úni, jatsiskachi para ístu kómarhini parajtsïni jarhuatani jimbokachi seguru jarhaska eska ima sési míteska ambe sánderu sésiiua para jucha.
Pedru niáraspti sánderu mintsikani Tata Diosï Jeobani jimboka kómarhisïreenga. Juchajtuchi uaaka sési eratseni ambe úni engachi kómarhiska Tata Diosï Jeobani eskajtsïni jarhuataaka, sánderia jiáni enga kʼéri ambeuaka. (Exe je párrafu 17).b
18. Májkueni eska Pedru, ¿ambechi uaa úni?
18 Kánikuachi sési pʼikuarherasïnga ka agradesiduchi jarhaska Tata Diosï Jeoba jingoni engajtsïni ísï kueraaka parachi xarhataani imeeri kualidadiichani (Gén. 1:26). Ísïisti, míteskachi eskachi no uaaka iámu ambe sési úni (Is. 55:9). Joperu májkueni eska Pedru, uaakachi jorhenguarhini ísï eratseni eska Tata Diosï Jeoba, kaxumbitiini ka sési eratseni ambe úni.
PIREKUA 30 Juchiti Amigu, Tata Diosï ka Táti
a Pájinarhu jw.org jimbo o aplikasionirhu JW Library®, sánderu ambejtsï míteaka ambe enga arhikuekajka ‘méntkisï sési eratsentani’. Ní je partirhu “Textos bíblicos explicados”, jirinhanta je “2 Timoteo 1:7: ‘Dios no nos ha dado un espíritu de temor’” ka arhinta je partini “Buen juicio”.
b AMBE ENGA XARHATAJKA IMAJENI: Pirenchi ma kómarhixati Tata Diosïni enga jamberi erokuarhini jaka jimboka ánchikuarhita jámaxaka jirinhani.