SEMANA 50
PIREKUA 48 Ju je pauani pauani Jeoba jingoni jámani
Ju je májkueni kaxumbitiini eska Tata Jeoba
“Májkueni jáma je eska Tata Diosï jimbokajtsï chá imeeri uájpeeska enga ima xáni xénchaajka” (ÉFES. 5:1).
AMBE ENGACHI JORHENGUARHIAKA
Exeni jauakachi tʼámu ambe engajtsïni jarhuataaka májkueni kaxumbitiini eska Tata Jeoba.
1. ¿Andijtsïnisï ísku pakatajki míteni eska Tata Jeoba kaxumbitiiska?
ENGACHI exejka kʼuiripuni ma enga juramukua jatsika ka jatsikuarheriini, nóchi uandasïnga eska kaxumbitiiska. Joperu Tata Jeoba ima enga iámindu ambe újka úni, ima kʼóru kaxumbitiisti (Sal. 113:5-8). Tata Jeoba méntku no úsïndi jískani eska ima no kaxumbitiiska, ima no sáni kʼéramakuarhisïndi. Ísï jimbo, exenchi jauaka na enga Tata Jeoba jurajkujka eskaksï kʼuiripuecha andarhieraka, kurhangukuasïndi, tekaakuantasïndi ka exeasïndi imeechani engaksï kaxumbitiika. Ístuchi exeaka na enga Tata Jeoba xarhatajka kaxumbikua ini tʼámu ambe jimbo ka na enga Jesúsi májkueni újka eska Taati jémba. Iámindu i ambe, jarhuataatijtsïni parachi sánderu andarhierani Tata Jeobani ka jánguarhintanchi sánderu kaxumbitiini.
NO SÁNI ÚKUA JUKASÏNDI ANDARHIERANI TATA JEOBANI
2. ¿Ambechi jorhenguarhisïni Tata Diosï Jeobaeri ambe Salmo 62:8 jimbo? (Ístu exe je imajenini).
2 Jarhastiksï kʼuiripuecha engaksï kánikua kʼéramakuarhijka, jimbosï xáni úku jukajti imeecha jingoni uandontskuarheni. Joperu no májkueniisti Tata Jeoba jingoni, ima kánikua kaxumbitiisti, astajtsïni arhisïndi eskachi andarhieraaka ka aiangukuarhini ambe engachi eratsejka ka na engachi pʼikuarherajka (arhinta je Salmo 62:8). Ísï eska taati ma na jingontku kurhajchajka uájpani enga aiangukuarhini jarhajka ambe, ístu juchaari Taati auandarhu anapu jingontku kurhaasïndi enga imeeri marhuari ma kómarhini jarhajka. Ka Bibliarhu uánikua ejempluechaksï jarhasti na engaksï imeeri marhuariicha kómarhienga Tata Diosïni, inde ambe xarhatasïndi eska fásiliiska uandontskuarheni Tata Jeoba jingoni ka eskajtsïni ima uékasïnga kurhajchani (Jos. 10:12-14; 1 Sam. 1:10-18). Joperu, ¿ambejtsïni jarhuataa andarhierani Tata Diosïni engachi ísï pʼikuarherajka eskachi no jukanchaska para ísï úni?
Ísï eska Tata Jeoba na kaxumbitiika, taati ma májkueni úsïndi enga uájpa aianguni jaka eska chʼanaxapka ka tsïtsïki jatakuani kakani, ka taati no ikiasïndi. (Exe je párrafu 2).
3. ¿Chá andisï seguru jaki eskajtsï méntkisï uaaka kómarhini Tata Diosïni?
3 Juchachi uaaka kómarhini Tata Diosïni ka andarhierani nájkirukachi ísï pʼikuarheraaka eskachi no jukanchaska ísï úni. Ióntki Jesúsi uandantaspti ejemplu ma, taatiiri ma enga uájpani ma kámeenga enga no tekaani japka kʼuanhatsentani familiarhu jimboka kánikua no sési ambe niátaspka. Biblia uandasïndi eska taati jémba iauani uératini mítentaspka “uiriipaspti kúmuni, kamapchakuspti ka uékperakua jingoni putinharhikuspti” (Luk. 15:17-20). Tata Jeoba ísïisti komueska inde taati. Jimbokajtsïni jingontku kurhajchasïnga engachi kómarhini jarhajka jimbokachi uandanhiaxaka o jimbokachi no sési pʼikuarheraxaka pekadu ma jimbo (Lam. 3:19, 20). Ka jimbokajtsïni pʼamojkusïnga uinhaperantasïndijtsïni, xarhatachesïndijtsïni eskajtsïni xénchasïnga ka puáchentasïndijtsïni (Is. 57:15). Ka parajtsïni ini ambe xarhatacheni, Tata Jeoba úraasïndi orhejtsïkutiichani, erachiichani, familiariichani engaksï Testigueka, jimboka uékasïnga eskachi no méni jurajkuaka (Sant. 5:14, 15).
4. ¿Andisï no úkua jukapi para Jesúsini andarhierani?
4 Jesúsi májkueni kámpisïndi eska Taati jémba. Jesúsijtu kaxumbitiisti ísï eska Tata Diosï Jeoba. Jiáni enga Echerirhu jámani japka, uánikua kʼuiripuechaksï kánikua sési pʼikuarherasïreendi imani jingoni jarhani ka nóksï chésïreendi kurhamarhini ambe (Mar. 4:10, 11). Ka enga Jesúsi arhiauenga náksï exesïreeni ambe ma, imeechaksï arhisïreendi ambe engaksï eratseenga (Mat. 16:13-16). Ka engaksï ménisï no uékaparini uandeenga o úni ambe ma enga no sési japiringa, nóksï chéni jarhasïreendi jimbokaksï mítespka eska Jesúsi ambakiti kʼuiripu máespka, pʼamojpitiini ka tekaantstini (Mat. 17:24-27). Jesúsiiri chúxapatiichaksï niáraspti sési míteni Tata Jeobani jimboka Jesúsi sési xarhataspka na enga kámpijka Taati jémba (Juanu 14:9). Imeechaksï jorhenguarhispti eska Tata Jeoba no ísïispka eska ima relijioniiri orhejtsïkutiicha engaksï no xénchauenga kʼuiripuechani, kʼéramakuarhinksï ka nóksï kurhangutspini. Sánderu sési, Tata Jeoba kaxumbitiisti ka no sáni úkua jukasti para andarhierani.
5. ¿Nénajtsïni jarhuatasïni kaxumbikua parajtsïni máteruecha no chéni andarhierani ka uandontskuarhenksï juchantsïni jingoni?
5 ¿Nénachi uaa májkueni kámpini eska Tata Jeoba? Engachi kaxumbitiijka no úkua jukasïndi parajtsïni máteruecha andarhierani ka jarhuatasïndijtsïni parachi no jámani enbidia pʼikuarherani, níjtu kʼéramakuarhini o jatanhetspini. Ístu kaxumbikuajtsïni jarhuatasïndi parachi sési kaani máteruechani, tekaakuantani ka puákuantani (Kol. 3:12-14). Ka orhejtsïkutiichaksï sánderumindu jatsisti para úni eskaksï erachiicha ka pirenchiicha no chéaka imeecha jingoni uandontskuarheni. Jimboksïsï orhejtsïkutiicha sánderu sési exejti tánguarhikuecharhu nirani enbesi deksï interneti jimbo konektarikuarhini paraksï erachiicha ka pirenchiicha exeani. Ístu orhejtsïkutiichaksï jánguarhintasïndi nirani aianhpini erachiicha ka pirenchiicha jingoni paraksï iicha sánderu sési míteani ka nóksï chéni arhiani eskaksï jarhuatauaka.
TATA JEOBA KURHANGUTSPISÏNDI
6, 7. ¿Náki ejempluechaksï xarhatasïni eska Tata Jeoba úsïnga ambe engaksï kurhakujka imeeri marhuariicha?
6 Kʼuiripuecha engaksï kʼéramakuarhijka nóksï kurhangutspisïndi níjtuksï uéjki úni ambe engaksï máteruecha arhiauaka. Joperu Tata Jeoba no xásïisti, ima kaxumbitiisti, jánhastiini ka úsïndi ambe engaksï máteruecha arhiaka. Ju je exeni ambe enga úkuarhipka ma uelta jiáni enga Míriami ka Aaróni ueenapka no sési ambe uandani Moisésiiri ambe, imeeri enga Tata Diosï erakupka. Tata Jeoba kánikua ikiaspti Míriami jingoni jimboka no Moisésiiri ambesï no sési uandani japka, sino Tata Diosïiri ambe, ísï jimbo úspti eska Míriami lepra pʼamenchapiringa. Tátsekua Aaróni arhispti Moisésini eska jarhuataapiringa ka Moisési kómarhispti Tata Jeobani paraka ambakerantapiringa Míriamini. Enga Tata Jeoba kʼéramakuarhipiringa, uandapirindi eska sési úspka enga ísï kastigaripka ka eska no ambakerantapiringa. Joperu Tata Jeoba kaxumbitiisti ka kurhajchaspti Moisésini jimbosï ambakerantapti Míriamini (Núm. 12:1-15).
7 Ju je exeni máteru ejemplu enga xarhatajka eska Tata Jeoba kaxumbitiiska. Ma uelta rei Esekíasi uinhamu pʼamenchaxapti ka Tata Jeoba úraspti profetani ma para arhini indeni reini eska uarhipiringia. Tátsekua rei ueparini kómarhispti Tata Jeobani paraka ambakerantapiringa. ¿Ambe úspi Tata Diosï? Pʼamojkuspti ka úspti eska Esekíasi máteru 15 uéxurhini irekapiringa (2 Rey. 20:1, 5, 6). ¿A no eska Tata Jeoba pʼamojpesïnga ka úni ambe engaksï máteruecha arhiaka jimboka kaxumbitiiska?
8. ¿Néna xarhatasïni Jesúsi eska kurhangutspisïnga? (Markusï 3:1-6).
8 Jesúsi májkueni kámpisïndi eska Taati jémba. Enga Echerirhu jámani japka Jesúsi jirinhakuntaspti para jarhuataani kʼuiripuechani ka kurhangukuani. Pori ejemplu, na uéjki sábaduepiringa ima ambakerantasïreendi kʼuiripuechani nájkirukaksï relijioniiri orhejtsïkutiicha ikiapiringa (arhinta je Markusï 3:1-6). Ka jimboka Jesúsi orhejtsïkuxaka Tata Jeobaeri kúnguarhikuani, seguiriixati kaxumbitiini jimbosï enga nema niárajka kʼéri pekadu ma úni, tekaakuntasïndi ka someni jarhuatasïndi para moántani (Apok. 2:2-5).
9. ¿Nénachi uaa májkueni kámpini ka kurhangutspini eska Tata Jeoba? (Ístu exea je imajeniichani).
9 ¿Nénachi uaa májkueni kámpini eska Tata Jeoba? Uétarhisïndi jánguarhintani kaxumbitiini para ísï eratseni ka jámani eska Tata Jeoba (Sant. 3:17). Ima taatiicha engaksï no jukari ambe kurhakuajka sapiichani nijtuksï jurajkuani eskaksï uaaka ambe engaksï uékaaka, xarhatasïndiksï eskaksï kurhangukuasïnga. Génesis 33:12-14 uandasïndi eska Jakobu ísï úspka imeeri uájpeecha jingoni. Ístuksï ima taatiicha engaksï kaxumbitiika ka kurhangukuani uájpeechani, nóksï erokuarhisïndi eskaksï iámindu uájpeecha májkueni ambe uaaka o májkueni jámani. Ístu, orhejtsïkutiichaksï jatsisti para kurhangutspini. Pori ejemplu, orhejtsïkuti ma no afuersa uékasïndi eska ísï úkuarhiaka eska ima na uéjka, sánderu sési, apoiariuasïndi orhejtsïkutiichani enga exejka eskaksï no ma prinsipiuni uanajchakuxaka (1 Tim. 3:2, 3). Ka iáminduechachi jatsiska para jánguarhintani kurhangukuani máteruechani nájkirukaksï no májkueni eratseaka eska jucha (Rom. 14:1). Ísï jimbo, ju je ísï úni eska ari konseju na uandajka: “Eskaksï iámindu kʼuiripuecha exeaka eskajtsï chá kurhangusïnga ka eskajtsï méntku no inchandimesïnga” (Filip. 4:5).
Taatiichaksï kurhangukuasïndi sapiicha ambe engajkuksï újka úni aianhpikuarhu. (Exe je párrafu 9).
TATA JEOBA TEKAANTASÏNDI
10. ¿Néna xarhatasïni Tata Jeoba eska tekaantasïnga?
10 Jamberichi exekia eska kʼuiripu ma enga kʼéramakuarhijka méntku no sáni uékasïnga erokuarhini, no sáni tekaantstiisti. Joperu Tata Diosï Jeoba kánikua ménderueniisti. No nema jarhasti parhakpinirhu enga xáni tekaantajka komueska ima. Pori ejemplu, jiáni enga Noé irekani japka uandaspti eska 120 uéxurhini erokuarhipiringa para kʼamajkuani no sési úriichani (Gén. 6:3). Jimbosï Noé andajkuarhipti kʼuiriperaani uájpeechani ka arkani úni imeeri familia jingoni. Ísï tátsekua, Tata Jeoba tekaantskua jingoni kurhajchaspti Abraánini enga ima kurhamarhini japka andisï kʼamajkupirini Sodomani ka Gomorrani. Enga Abraáni kʼuiripuni ma kurhamarhipiringa, jamberi ima arhipirindi: “¿Ka tʼu neeskia parareni ísï arhini jarhani? ¿Andi ji no uaa ísï úni eskani na eratseni jaka?”. Joperu Tata Jeoba no ísï arhispti, ima kaxumbitiisti ka tekaantasïndi (Gén. 18:20-33).
11. Ísï eska na arhijka 2 Pedru 3:9, ¿andisï Tata Jeoba xáni tekaakuantani jaki iásï kʼuiripuechani?
11 Tata Jeoba seguiriixati májkueni úni iásï. Ima erokuarhixati para kʼamajkuani no sési úrichani jiáni enga ima uandarini jakaia. ¿Andisï Tata Jeoba xáni tekaakuantajki kʼuiripuechani? “Jimboka no uékasïnga eska nema kʼamajkunhaaka, sino eskaksï iámindu kʼuiripuecha móantaaka” (arhinta je 2 Pedru 3:9). ¿Marhuaxaki enga Tata Jeoba ísï erokuarhini jaka? Jo, jimboka uánikua kʼuiripuechaksï niáraskia míteni imani ka uékasïngachi eskaksï sánderu uánikuecha míteaka. Tata Diosï kánikua xénchaasïndi kʼuiripuechani, ka nájkiruka tekaantani jaka no arhikuekasïndi eska jurajkuaka eskaksï no sési úriicha irekaaka para méntkisï (Hab. 2:3).
12. ¿Andichisï uandajki eska Jesúsijtu májkueni tekaantaxaka eska Tata Jeoba?
12 Jesúsi májkueni kámpisïndi eska Taati jémba. Desde iónisïa imajtu májkueni tekaantaxati eska Tata Jeoba. Jesúsi desde iónisï exestia na enga Noambakiti chkuanderakua ambe etsakuka Tata Diosïiri ambe ka kʼuiripuecheeri engaksï sési marhuakuni jaka Tata Diosïni (Gén. 3:4, 5; Job 1:11; Apok. 12:10). Ka ístu, jimboka Jesúsi desde iónisï exeskia na engaksï kʼuiripuecha kómu nitamakuarhini jaka, úsïngachi eranhaskani eska ima uékaxakaia “kʼamajkuni ambe enga xáni úka Noambakiti” (1 Juanu 3:8). Ka nájkiruka uékani jakaia ísï úni, Jesúsi kaxumbitiisti ka sési mítetixati eska Tata Jeoba exerixakaia na jatini ísï úni (Úku. 1:7).
13. ¿Káni tekaakuantaspi Jesúsi imeeri apostoliichani, ka andi?
13 Ixú Echerirhu Jesúsi kánikua tekaakuantasti apostoliichani. Méni enga exeauenga arhirperanksï jarhani né sánderu kʼéri ambeespi, Jesúsi no ikiasïreendi níjtu kuatantani, sánderu sési, someni tekaakuantaspti (Luk. 9:46; 22:24-27). Ima seguru jarhaspti eskaksï tátsekua apostoliicha niárapiringa kaxumbitiini. Engachi ini ambe exejka, kánikuachi sési pʼikuarherasïnga enga juchaari Rei xáni kaxumbitiika ka tekaantstiini, jimbokachi juchajtu someni ísï jámasïnga eska apostoliicha.
14. ¿Ambejtsïni jarhuataa tekaantstiini?
14 ¿Nénachi uaa májkueni kámpini eska Tata Jeoba? Juchachi uaaka májkueni kámpini engachi jánguarhintaska ‘májkueni eratseni eska Kristu’ (1 Kor. 2:16). Joperu nóchi nani máru uaaka ísï úni engachi no arhiantaska arini tʼámu karakateechani: Mateu, Markusï, Lukasï ka Juanu, ka ístu tiempu arhutani parachi eratsentani ambe enga xáni úka Jesúsi ka andisï ísï úpi. Ístu uétarhisïndi eskachi kurhakuaka Tata Jeobani eskajtsïni jarhuataaka májkueni kaxumbitiini eska Uájpa. Engachi jucha sánhani arhini jauaka ísï eratseni eska Kristu sánderuchi májkueni kámpiaka eska Tata Diosï, sánderuchi tekaakuarhintaaka ka ístu tekaakuantani erachiichani (Mat. 18:26-30, 35).
TATA JEOBA EXEASÏNDI KAXUMBITIICHANI
15. ¿Tata Jeoba néna ísï úsïni eska Salmo 138:6 na uandajka?
15 (Arhinta je Salmo 138:6). Ískuchi pakarasïnga engachi mítejka eska Tata Jeoba enga xáni kʼéri ambeeka, exeasïnga imani kʼuiripuechani engaksï kaxumbitiika. Nájkirukachi no uánikua ambe míteka máru kʼuiripuecheeri, Tata Jeoba úspti eska karakata pakarapiringa imeecheeri ambe Bibliarhu. Pori ejemplu, uandasïndi Déborani, ambakiti uarhiiti ma enga 125 uéxurhini jántspikupka Isaakiiri ka Jakobueri familiani. Nóchi uánikua ambe míteska indeeri ambe, joperu Tata Jeoba úspti eska Moisési karapiringa Déboraeri nombrini ka eska Jakobueri familia kánikua xénchasïreenga (Gén. 24:59; 35:8, nota). Ísï ióni jimbo Tata Jeoba erakuspti Dabidini, tumbi sapichu ma enga karichiichani jámeenga eranguani paraka reipiringa Israeli (2 Sam. 22:1, 36). Ka jiáni enga Jesúsi andajpenupka, Tata Diosï ánjelini ma úraspti para aianguani máru karichi erangutiichani engaksï kaxumbitiipka eska Beléni andajpenuspka ima enga Mesíasipiringa; íksï achamasïicha ueenaspti míteni ini ambe (Luk. 2:8-11). Ka enga José ka María templurhu pápka Jesúsini, Tata Jeoba kánikua janhanharhispti Simeónini ka Anani jimboka úspka eskaksï mítepiringa Uájpani (Luk. 2:25-30, 36-38). I ambe xarhatasïndi eska “nájkiruka Jeoba kʼéri ambeeka”, exesïnga imani enga kaxumbitiika.
16. Enga Jesúsi Echerirhu jámani japka, ¿néna májkueni kámpispi eska Taati jémba?
16 Jesúsi májkueni kámpisïndi eska Taati jémba. Jesúsijtu janhanharhiasïndi kʼuiripuechani ka úsïndi eskaksï sési pʼikuarheraaka. Pori ejemplu, jorhendaaspti Tata Diosïiri Reinueri ambe imeechani engaksï “ísïipka eska náki uéjki kʼuiripu ma” ka engaksï no ióni jámapka eskuela (Úku. 4:13; Mat. 11:25). Ístu enga ambakerantaapka kʼuiripuechani xarhatakuaspti eska xénchaasïreenga ka janhanharhiani (Luk. 5:13). Ka ima chúri ante de uarhini, ísï jámaspti komueska jántspiri ma jimboka jupandukuaspka apostoliichani (Juanu 13:5). Ka ante de karhanchentani auandarhu, arhiaspti imeeri chúxapatiichani eskaksï jarhuataapiringa kʼuiripuechani paraksï jatsini tsípikua para méntkisï ka i ánchikuarhita ístu jindeesti para jucha (Mat. 28:19, 20).
17. ¿Nénachi uaa májkueni kámpini eska Tata Jeoba? (Ístu exe je imajenini).
17 ¿Nénachi uaa májkueni kámpini eska Tata Jeoba? Uaakachi ísï úni engachi aianguaska Biblieri ambe iámindu jásï kʼuiripuechani, no arhiparini imeecheeri kolori, nani uéjkiksï anapueni, o sinksï niraski eskuela o nómbe. Ka engachi jánguarhintajka sánderu kʼéri ambe exeani erachiichani, no arhiparini ambe uéjkichi jorhenani úni o náki uéjki responsabilidadichi ma jatsini, xarhatanchi jarhasïnga eskachi májkueni kámpisïnga eska Tata Jeoba (Filip. 2:3). Tata Jeoba kánikua sési pʼikuarherasïndi enga exejka eskachi kaxumbitiiska ka engachi jucha ueenajka sési kámpini ka janhanharpini (Sof. 3:12; Rom. 12:10).
Juchajtuchi májkueni kaxumbitiisïnga eska Tata Jeoba engachi iámindu jásï kʼuiripuechani aianguajka Biblieri ambe. (Exe je párrafu 17).a
18. ¿Chá andisï uékapirini májkueni kaxumbitiini eska Tata Jeoba?
18 Engachi jánguarhintaska májkueni kaxumbitiini eska juchaari Taati auandarhu anapu, uaakachi kurhangukuani máteru kʼuiripuechani, tekaakuantani ka úni eskajtsïni no chérhiaka andarhierani. Ka ísï eska Tata Jeoba na újka, juchajtuchi jánguarhintaaka sési pʼikuastaani ka janhanharhiani máteruechani. Ísï jimbo, ju je miáni arini ambe: Tata Jeobajtsïni sánderu jukaparharaati engachi jánguarhintaska májkueni kaxumbitiini eska ima (Is. 43:4).
PIREKUA 159 Ju je kʼéri ambe arhini Tata Diosï Jeobani
a AMBE ENGA XARHATAJKA IMAJENI: Máru pirenchiichaksï xarhataxati eskaksï májkueni kaxumbitiiska eska Tata Jeoba jimbokaksï kárselirhu jorhendaxaka Biblieri ambe máru uarhiitiichani.