SEMANA 17
PIREKUA 99 Uánikua erachichaksï jarhasti
Nóchi méni jandiajku jarhasïnga
“Jíkeni jarhuataaka” (IS. 41:10).
AMBE ENGACHI JORHENGUARHIAKA
Exeni jauakachi tʼámu ambe na engajtsïni kuidarijka Tata Diosï Jeoba.
1, 2. a) ¿Andichisï uandajki eskachi no méni jandiajku jauaka engachi uandanhiata ambe jatsiaka? b) ¿Ambechi exea ini jorhenguarhikua jimbo?
ENGACHI kʼéri uandanhiata ma jatsijka, jamberichi ísï pʼikuarherajka enajkichi kʼéri kauaru ma jimbo jarhajki ka jandiajku. Joperu nóchi jatsiska para ísï pʼikuarherani jimboka juchaari Taati auandarhu anapujtsïni arhisïnga eska ima juchantsïni jingoni jauaka. Ka ima mándani imeeri marhuarini kánikua xénchperakua jingoni arhisïndi: “Jíkeni jarhuataaka” (Is. 41:10).
2 Ini artikulu jimbochi exeaka tʼámu ambe na engajtsïni Tata Diosï Jeoba jarhuatajka: 1) arhisïndijtsïni ambe engachi jatsika para úni, 2) íntskusïndijtsïni ambe engachi uétarhinchajka 3) kuájchakusïndijtsïni ka 4) sésijtsïni pʼikuastantasïndi. Imajtsïni aiachisti eska ambe uéjkichi nitamakuarhini jarhani iásï, imajtsïni no méni jurajkuati ka méntkisïjtsïni jarhuataati. Ísï jimbo, ju je no mirikurhini eska ima méntkisï juchantsïni jingoni jauaka.
TATA DIOSÏ JEOBAJTSÏNI ARHISÏNDI AMBE ENGACHI JATSIKA PARA ÚNI
3, 4. ¿Ambe úrasïni Tata Diosï Jeoba parajtsïni arhini ambe engachi jatsika para úni? (Salmo 48:14).
3 (Arhinta je Salmo 48:14). Tata Diosï Jeoba mítesti eskachi jucha jandiajku no uaaka imani ambe úni enga sési jaka, jimbojtsïnisï jarhuatajti ka arhintsïni ambe engachi jatsika para úni. Ka úrasïndi Bibliani parajtsïni jarhuatani (Sal. 119:105). Indeni Karakata jimbo enga ima kararkuarhika, jarhuatasïndijtsïni imani ambe úni enga sési jaka ka imani kualidadichani jatsiani engajtsïni jarhuataaka sánderu tsípikua jingoni irekani ka mintsikani eskachi uaaka irekani para méntkisï.a Pori ejemplu, jorhendasïndijtsïni eskachi jatsiska para puátspentani, no jatanhetspini ka jurhimbitku jámani iámindu ambe jimbo ka ístu eskachi jatsiska para mintsita jingoni xénchperani (Sal. 37:8; Ebr. 13:18; 1 Ped. 1:22). Engachi úska ambe engajtsïni Tata Diosï Jeoba arhijka, niáraakachi sánderu ambakiti taati máeni, ambakiti uámba máeni ka ambakiti amigueni para máteruecha.
4 Tata Diosï Jeoba karakata pakatasti ambe engaksï nitamakuarhipka máru kʼuiripuecha ka nirasptiksï ísï p’ikuarherani eskachi jucha na pʼikuarherajka (1 Kor. 10:13; Sant. 5:17). Engachi jucha arhintajka ka ísïchi úni eskachi na jorhenguarhijka kánikuajtsïni marhuachesïndi. Orheta, jimbokachi kuenta íntskukuarhesïnga eskachi no juchajkueska engachi úkua jukanchajka. Jarhastiksï kʼuiripuecha engaksï májkueni ambe nitamakuarhipka eska jucha ka úsptiksï tekaantani jimboka Tata Diosï Jeoba jarhuataaspka (1 Ped. 5:9). Ka ístu, jorhenguarhisïngachi néna orhepani uérakuani uandanhiateechani (Rom. 15:4).
5. ¿Neechani úraasïni Tata Diosï Jeoba parajtsïni jarhuatani?
5 Ístu Tata Diosï Jeoba úraasïndi erachiichani parajtsïni arhini ambe engachi jatsika para úni.b Pori ejemplu, sirkuitueri orhejtsïkutiichaksï someni pʼorhembiasïndi kúnguarhikuechani ka nitamataraasïndiksï arhijtsïkperateechani engajtsïni jarhuatajka sánderu mintsikani Tata Diosïni ka ístujtsïni jarhuatasïndi májku kʼéri jarhani kúnguarhikuarhu (Úku. 15:40–16:5). Ka kúnguarhikuarhu anapu orhejtsïkutiichaksï mintsita jingoni uandanhiasïndi aianhpiricha jimbo ka uékasïndiksï eskaksï sési jauaka (1 Ped. 5:2, 3). Ka taatiichaksï arhistakuasïndi uájpeechani paraksï xénchani Tata Diosï Jeobani, paraksï imani ambe úni enga sési jaka, paraksï pʼindeni aianhpini, tánguarhikuecharhu nirani ka kómarhini (Prov. 22:6). Ka ima pirenchiicha engaksï eratsekua jukariika, sésiksï jámasïndi paraksï jarhuataani imeechani engaksï sánderu sapichku jaka ka intsaasïndiksï konseju ka xénchperakua jingonksï jarhuataasïndi (Titu 2:3-5).
6. ¿Ambechi jatsiski para úni parajtsïni marhuacheni ima jarhuajperata engajtsïni Tata Diosï Jeoba íntskujka?
6 Tata Diosï Jeobajtsïni jarhuataxatiia, ¿ambechi jatsiski para úni parajtsïni marhuacheni imeeri jarhuajperata? ¿nénachi uaa xarhakuni eskachi jukaparharasïnga ambe enga ima úni jaka? Proverbios 3:5, 6 arhisïndi: “Mintsika Jeobani iámindu chiiti mintsitani jingoni, ka asï mintsika chiiti eratsekuani”. Engachi ísï úska, ¿nénajtsïni marhuachea? “Ima jurhimberauati chiiti xanharuechani”. I ambe arhikuekasïndi eskajtsïni ima jarhuataaka parachi no ísku jatini jirinhakuarhiani uandanhiateechani ka parachi sánderu tsípikua jingoni irekani. ¡Kánikuachi jukaparharasïnga míteni eskajtsïni Tata Diosï Jeoba kánikua xénchasïnga ka eskajtsïni íntskusïnga imani konsejuni engachi mándani arhini uétarhinchani jarhajka! (Sal. 32:8).
TATA DIOSÏ JEOBAJTSÏNI ÍNTSKUSÏNDI AMBE ENGACHI UÉTARHINCHAJKA
7. Eska Filipusï 4:19 na uandajka, ¿nénajtsïni jarhuatasïni Tata Diosï Jeoba?
7 (Arhinta je Filipusï 4:19). Tata Diosï Jeobajtsïni no solu arhisïndi ambe engachi jatsika para úni, ístujtsïni újchakurasïndi engachi jánguarhintajka jatsini ambe engachi uétarhinchajka, komu tʼirekua, xukuparhakua ka kʼumanchikua ma (Mat. 6:33; 2 Tes. 3:12). Ka nájkirukachi iáminduecha uandanhiajka indeni ambe jimbo, Tata Diosï Jeobajtsïni arhisïndi eskachi no jatsiska para uandanhiani (exe je primeru notani para sánderu ambe jorhenguarhini Mateo 6:25 enga Biblia de estudio jimbo jaka). ¿Andijtsïnisï ísï arhijki? Jimbokajtsïni juchaari Taati aiachiskia eska ima no méni jurajkuauaka imeeri marhuariichani (Mat. 6:8; Ebr. 13:5). Ísï jimbo, uaakachi seguru jarhani eska ísï uaaka eska na uandarini jakaia ka íntskuatijtsïni ambe engachi uétarhinchaaka.
8. ¿Néna jarhuataspi Tata Diosï Jeoba Dabidini?
8 Ju je eratsentani na enga Tata Diosï Jeoba jarhuatapka Dabidini jiáni enga ima rei Saúlini jámani japka sïpakuarhikuni. Imani tiempu jimbo, Tata Diosï Jeoba íntskuspti Dabidini ka imani achamasïichani engaksï imani jingoni jámani japka ambe engaksï uétarhinchani japka paraksï no uarhini. Ma xanhari Dabidi miántaspti ambe enga nitamakuarhipka ka karaspti: “Tumbi máespka ka iásï jatiriskia, peru no méni exeska eska kaxumbiti ma jurajkunhaaka, nijtu uájpeechani kómuksï jámani jarhani tʼirekua jirinhani” (Sal. 37:25). Ka jamberijtsï chájtu exekuarhikia na engaksïni Tata Diosï Jeoba xénchperakua jingoni íntskuka ambe engajtsï uétarhinchani japka o ístu na enga jarhuataaka erachiichani.
9. ¿Néna jarhuataasïni iasï Tata Diosï Jeoba imeeri marhuariichani paraksï jatsini ambe engaksï uétarhinchaaka? (Ístu exea je imajeniichani).
9 Tata Diosï Jeoba jarhuataasïndi erachiichani engaksï no sési ambe úkuarhinchajka. Pori ejemplu, primeru siglurhu Jerusaléni anapu erachiichaksï no sési ambe nitamakuarhixapti jimboka kʼarhingua jarhaspka, ka uápurisï anapu kristianuechaksï axakuaspti imani erachiichani ambe engaksï uétarhinchani japka (Úku. 11:27-30; Rom. 15:25, 26). Ka Tata Diosï Jeobaeri ireta seguirixati májkueni úni, seguirixati intsïmpitiini. Jiáni enga no sési ambe úkuarhijka, Tata Diosï Jeoba úsïndi eskaksï uánikua erachiicha uékperakua jimbo íntspiaka tʼirekua, itsï, xukuparhakua ka sïpiata ambe. Ístuksï jarhasti erachiicha engaksï jarhuajpeni paraksï ménderu uaantani kʼumanchikuechani ka ístu Kʼumanchikuechani Reinueri. Ka jirejiresïksï úsïndi ambe ma paraksï sési pʼikuastaantani imani erachiichani engaksï nóteru jatsikuarhekia kʼumanchikua ma, óksï uarhiranchani nemani ka jarhuatasïndiksï paraksï seguiriini jarhani sési marhuakuni Tata Diosïni.c
¿Nénajtsïni sési pʼikuastantasïni Tata Diosï Jeoba jiáni enga no sési ambe úkuarhijka? (Exe je párrafu 9).f
10, 11. ¿Ambeksïni jorhendasïni Borisiiri ejemplu?
10 Tata Diosï Jeoba kánikua sési kámpisïndi ka jarhuataasïndi imeechani engaksï nótki marhuakuni jaka ka juchajtuchi uékasïnga májkueni úni jimbochisï jarhuataajka imeechani engaksï nótki Jeobaeri testiguejka (Gal. 6:10). Engachi ísï újka, uánikuechaksï sési ambe uandasïndi Tata Diosïiri ambe. Ju je exeni ambe enga uandajka Boris, eskuelarhu anapu direktori ma enga Ucrania irekani jaka. Nájkiruka ima no Jeobaeri testigueka, ima méntkisï sési kaasïndi alumnuechani engaksï Testigueka. Ka jiáni enga guerra ueenakuarhipka, Boris niraspti sïpakuarhini para no ma ambe úkuarhinchani ka erachiichaksï jarhuataspti. Tátsekua, Boris niraspti tánguarhini para miántani tata Jesukristueri uarhikuani. Ka enga eratsentapka ambe engaksï xáni úpka erachiicha imani jimbo, uandaspti: “Jeobaeri testiguechaksï méntkisï pendienti jarhaspti jindeeni jimbo ka kánikuajtsïni kuidariispti. Ji kánikua agradesidu jarhaska imeecha jingoni”.
11 Iáminduechachi uaaka májkueni pʼamojpeni eska juchaari Taati auandarhu anapu ka jarhuataani imeechani engaksï uétarhinchani jaka nájkirukaksï no Testigueka (Luk. 6:31, 36). Ka jimbokachi xénchaasïnga kʼuiripuechani, mintsikasïngachi eskaksï ma jurhiani uékaaka sánderu ambe jorhenguarhini Tata Diosï Jeobaeri ambe ka niáranksï marhuakuni juchantsïni jingoni (1 Ped. 2:12). Ka na uéjkiksï no niárani marhuakuni, juchachi kánikua sési pʼikuarherasïnga jimbokachi mítetixaka eskachi sánderu tsípikua jingoni irekasïnga engachi jarhuajpejka (Úku. 20:35).
TATA DIOSÏ JEOBAJTSÏNI KUÁJCHAKUSÏNDI
12. ¿Ambe uandarixakiia Tata Diosï Jeoba eska uaaka imeeri iretani jimbo? (Salmo 91:1, 2, 14).
12 (Arhinta je Salmo 91:1, 2, 14). Tata Diosï Jeoba uandarixatiia eska kuájchakuaka imeeri iretani paraka seguiriini jauaka sési marhuakuni ka ísï eska ima na uéjka. Tata Diosï Jeoba no méni jurajkuati eskajtsïni Satanási ójkutaaka (Juanu 17:15). Ka enga na ueenakuarhiakia ima jurhiatikua enga kánikua no sési nitamakuarhinhaaka, uaakachi seguru jarhani eska Tata Diosï kuájchakuaka imeeri iretani paraka no ma ambe úkuarhinchaaka ka parachi seguiriini jarhani mintsikani imani (Apok. 7:9, 14).
13. ¿Néna kuájchakusïni Tata Diosï Jeoba mándani erachini ka pirenchini?
13 ¿Ka néna kuájchakusïni Tata Diosï Jeoba mándani erachini ka pirenchini? Imajtsïni íntskusti Bibliani parajtsïni jarhuatani exeni ambesï sési jaki ka ambe nómbe (Ebr. 5:14). Ka engachi úrajka Biblieri prinsipiuechani kuájchakukuarhisïngachi parachi no ma ambe úkuarhinchani ka parachi seguiriini jarhani mintsikani Tata Diosïni (Sal. 91:4). Joperu ístu Tata Diosï úrasïndi kúnguarhikuani parajtsïni kuájchakuni (Is. 32:1, 2). Engachi erachiicha ka pirenchiicha jingoni jarhajka engaksï xénchajka ka kurhajchani Tata Diosï Jeobani, imeechajtsïni sési pʼikuastantasïndi ka jarhuatasïndijtsïni parachi no imani ambe úni enga no sési jaka (Prov. 13:20).
14. a) ¿Andisï ménisï Tata Diosï no kénditajki tsʼéjkukuani? b) ¿Ambejtsïni arhisïni Salmo 9:10? (Ístu exe je notani).
14 Ióntki, Tata Diosï Jeoba kuájchakuaspti imeeri marhuariichani joperu no méntkisï ísï úspti. Biblia uandasïndi eskachi ménisï iáminduecha niáraaka imani ambe úkuarhinchani engachi no erokuarhini jarhajka (Ecl. 9:11). Joperu ístu desde iónisï asta iásï jamberi, Tata Diosï Jeoba ménisï jurajkusïndi eskaksï imeeri marhuariicha no sési kánhaaka o astaksï niárani uarhini. ¿Andi? Jimboka uékasïnga xarhatani eska Noambakiti chkuandera máeska (Job 2:4-6; Mat. 23:34). Ménisï Tata Diosï no kénditaati imani ambe engachi nitamakuarhini jauaka, joperu uaakachi seguru jarhani eska ima no méni jurajkuaka imani kʼuiripuni enga xénchajka Tata Diosï Jeobani (Sal. 9:10).d
TATA DIOSÏ JEOBAJTSÏNI SÉSI PʼIKUASTANTASÏNDI
15. ¿Néna úrasïni Tata Diosï kómarhikuani, Bibliani ka erachiichani parajtsïni sési pʼikuastantani? (2 Korintu 1:3, 4).
15 (Arhinta je 2 Korintu 1:3, 4). Iáminduechachi niárasïnga kómu pʼikuarherani ka puru uandanhiata ambe eratseni jarhani. Ka jamberichi no sési nitamakuarhini jaka ka ísïchi pʼikuarherani enajkichi jandiajku jaki. Ka nájkirukachi eratsejka eskajtsïni no nema kurhanguchisïnga, Tata Diosï Jeoba kʼórujtsïni sési kurhanguchisïndi ka méntkisïjtsïni sési pʼikuastantasïndi ambe uéjkichi nitamakuarhini jarhani. Imajtsïni sési pʼikuastantasïndi kómarhikua jimbo, Bibliani úraparini ka erachiichani. Engachi kómarhijka, imajtsïni mókuchintasïndi ka íntskusïndijtsïni pínandikua, “indeni pínandikua enga no ma kʼuiripu újka jánhaskani” (Filip. 4:6, 7). Ka engachi arhintajka imeeri Karakatani, exesïngachi na engajtsïni xáni xénchajka ka exeantasïngachi ambarhati konsejuechani ka sésichi pʼikuarherantasïnga jimbokajtsïni ima ambakiti ambe aiachixaka. Ka engachi tánguarhikuecharhu jarhajka erachiichani jingoni, imajtsïni xarhatachesïndi eskajtsïni xénchasïnga ka sésijtsïni pʼikuastantasïndi Biblia jingoni.
16. ¿Ambejtsïni jorhendasïni Natániiri ka Prisileeri ejemplu?
16 Parachi exeni na engajtsïni uinhaperantaajka ka sési pʼikuastantani Tata Diosï Jeoba imeeri Karakata jingoni, ju je exeni Estados Unidos anapu temungurhiriiri ejemplu ma enga Natáni ka Prisila arhinhajka. Máru uéxurhiniistia engaksï nípka aianhpini jima enga sánderu uétarhini japka. Natáni uandantasïndi: “Jucha mintsikaxapka eskajtsïni Tata Diosï Jeoba újchakurapiringa”. Joperu engaksï na niárapkia jimbanhi kúnguarhikuarhu, ueenasptiksï pʼamenchani ka úkua jukanchani sentabu jimbo. Tátsekuaksï kʼuanhatsentaspti imeo, joperuksï jimajtu no jatsispti sentabu. Natáni uandantasïndi: “Ji eratsesïreenga, ¿andijtsïnisï Tata Diosï Jeoba no újchakurapi? Asta ueenaspka eratseni sinchi no sési ambe niátaspi”. Joperuksï tátsekua exespti eska Tata Diosï imeecha jingoni jarhaspka, eska no jurajkuaxapka. Natáni uandantasïndi: “Nájkirukachi no sési nitamakuarhini japka arhintasïreengachi Bibliani ka exesïreengachi na engajtsïni Tata Diosï Jeoba sési pʼikuastanteenga ka ambakiti konsejuechantsïni íntsaani ísï eska amigu ma. Iásïchi jánguarhintaxakaia nóteru xáni eratseani uandanhiateechani sino exeni na engajtsïni jarhuatajka tekaantani. Ka inde ambejtsïni jarhuatasti sánderu preparadu jarhani para jiáni enga ima ambe úkuarhiaka engachi no erokuarhini jauaka”.
17. ¿Tata Diosï Jeoba néna sési pʼikuastantaspi pirenchi Emmani? (Ístu exea je imajeniichani).
17 Eskachi na exekia juchaari erachiichajtsïni úsïndi uinhaperantani. Ju je exeni Hungría anapu pirenchiiri ejemplu ma enga Emma arhinhajka.e Ima, uánikua uéxurhini no sési nitamakuarhispti, ka ísï pʼikuarherasïreendi enajki nóteru úpirinia orhepani uérani ka enajki no ma ambe marhuaueni. Joperu enga miántajka ambe enga xáni nitamakuarhipka, exesti na enga Tata Diosï Jeoba sési pʼikuastantapka úraparini kúnguarhikuani. Pirenchi karaspti: “Jiáni enga Tata Diosï Jeoba exeenga enajkini nóteru úpirinia, méntkisïrini jarhuataspti. Jarhuatasptireni ánchikuarhita jingoni, kuidarini juchiiti sapini enga pʼamenchani japka ka máteru uandanhiateecha jingoni. Arini 30 uéxurhini jimbo, úska exeni eska Tata Diosï Jeoba úsïnga ambe engajtsïni aiachijka, jimbokarini méntkisï uinhaperantaska, nóreni méni jandiajku jurajkusti. Uánikua xanhari úraaspti erachiichani, imeechajtsïni sési arhisïreendi, xénchantsïni ka kurhanguchintsïni. Jiáni engani meru uétarhinchani jarheenga imeechajtsïni mensajichani ma axachesïreendi, nota ma, ójtsïni sési jásï ambe arhini”.
¿Nénaksïni uaa úrani Tata Diosï Jeoba chánksïni parajtsï uinhaperaantani máteruechani? (Exe je párrafu 17).
18. ¿Nénachi uaa uinhaperaantani máteruechani?
18 Juchajtuchi uaaka májkueni úni eska Tata Diosï Jeoba engachi sési pʼikuastaantaska máteruechani. Ka uaakachi ísï úni engachi tekaantskua jingoni kurhajchauaka, imani ambe arhiani enga sési pʼikuastantauaka ka materu ambe úni para jarhuataani (Prov. 3:27). Ka no soluchi juchaari erachiichani jarhuataasïnga, sino asta imeechani jamberi engaksï no marhuakuni jaka Tata Diosï Jeobani. Juchachi nirasïnga pʼorhembiani, jingontkuchi kurhajchaasïnga ka Biblia jingonchi uinhaperaantasïnga imani kʼuiripuechani engaksï no sési nitamakuarhini jaka. Engachi ísï újka eska Tata Diosï Jeoba enga iámindu ambe jimbo sési pʼikuastpentajka, nóchi solu jarhuataasïnga erachiichani paraksï tékaantani sino ístuchi jarhuataasïnga máteru kʼuiripuechani paraksï míteni Tata Diosï Jeobani (Mat. 5:16).
TATA DIOSÏ JEOBA MÉNTKISÏ JUCHANTSÏNI JINGONI JAUATI
19. ¿Ambe úsïni Tata Diosï Jeoba juchantsïni jimbo, ka nénachi uaa májkueni úni eska ima?
19 Tata Diosï Jeoba kánikua uandanhiasïndi juchantsïni jimbo jimbokachi xénchasïnga. Ka nójtsïni méni jurajkusïndi engachi no sési nitamakuarhini jarhajka, imajtsïni uékasïndi ka ísïjtsïni kuidarisïndi komueska taati ma na kuidarijka imeeri sapini. Arhisïndijtsïni ambechi jatsiski para úni, íntskusïndijtsïni ambe engachi uétarhinchani jarhajka, kuájchakusïndijtsïni ka ístujtsïni sési pʼikuastantasïndi. Ka juchajtuchi uaaka májkueni úni imeechani jimbo engaksï no sési nitamakuarhini jaka ka jarhuataanchi. Ísï jimbo, ambe uéjkichi nitamakuarhini, uaakachi mintsikani eskajtsïni Tata Diosï Jeoba no méni jurajkuaka, jimbokajtsïni ima aiachiska ini ambe: “Asï ché, jimbokani ji tʼungini jingoni jarhaska” (Is. 41:10). ¿A no eskachi kánikua sési pʼikuarherasïnga míte eskajtsïni Tata Diosï Jeoba no méni jandiajku jurajkusïnga?
PIREKUA 100 Ju je sési kámpini
a Exe je artikuluni “Tomemos decisiones que honren a Dios” rebistarhu Aianhpiri 15 de abrili de 2011, utusï jimbo.
b Exe je jorhenguarhikuani “Ú je méntkisï ambe engaksïni Tata Diosï Jeoba arhijka” rebistarhu Aianhpiri, febreru 2024 anapu, párrafuecha 11 a 14.
c Exeantauakajtsï uánikua ejempluecha engaksï apenasi uéraka ixú jw.org jimbo. ka jaiasku je jimini enga arhijka PUBLIKASIONICHA > TEMECHA ENGAKSÏ XÁNI JAKA > NÉNACHI ÚRAASÏNI DONASIONICHANI > AMBE ENGA JAKA > ÁNCHIKUARHITA PARA JARHUAJPINI.
d Exe je partini “Ambe enga kurhanguarhijka ima enga arhintajka” rebistarhu Aianhpiri, febreru de 2017 anapu, utusï jimbo.
e Máru nombriichaksï mójtakurhisti.
f AMBE ENGAKSÏ XARHATAJKA IMAJENIICHA: Máru erachiichaksï jarhuataaxati Malaui anapu erachiichani engaksï no sési ambe nitamakuarhika, ka ístuksï uinhaperaantaxati paraksï seguiriini jarhani mintsikani Tata Diosïni.