Jirinhakunta néna pauani pauani arhintani Bibliani

Pauani pauani uánikua úkua ambechi jatsisïnga jimbochisï ménisï no jamberi andajkuarhijka arhintani Bibliani (Jos. 1:8). Ísï jimbo, ¿andiresï no újki arini ambe?

• Jatsiku alarma. Chiiti selularirhu, jatsiku parakeni pauani pauani miátantani eska jandoreeskia para Bibliani arhintani.

• Jima peera Bibliani engari uaaka exeni. Engari sïranda jimbo arhintajka, jima jatsi Bibliani nani engari uaaka exeni pauani pauani (Deut. 11:18).

• Kurhaua grabasioniichani. Uaakari grabasionichani jatsikuantani engari jamberi úni jauaka ambe. Tara, pirenchi ma enga sapiichani kaajka, prekursoreeni ka chúrikuechani ánchikuarhini, uandasïndi: “Bibliani jatsikuntani audiu jimbo, jarhuatasïndirini parani méntkisï arhintani Bibliani nájkirukani úni jauaka ambe”.

• Eska no nitamaaka ma jurhiatikua engari no arhintaaka. Engari no uaaka arhintani ísï eskari na eratsetini japka, arhinta sikiera máru bersikulu ante deri kʼuíni. Sánderu sésiisti sanititu ka eska no ma, ka exeakari eskakeni kánikua marhuacheaka (1 Ped. 2:2).