¡MÉNTKISÏ JINGONTKU JA JE!

Uánikuechaksï sïpakuarhixati: uánikua kʼuiripuechaksï sïpakuarhixati Ucrania uératini

Jurhiatikua 24 de febreru de 2022, Rusia anapu ejersitu inchaakusti Ucrania. Ini ambe jimbo, uánikua kʼuiripuechaksï kánikua no sési nitamakuarhixati ka sóntkuksï uéakuxati paisirhu.a

“Uánikua bombechaksï charasïreendi. No jamberini úsïnga uandani na engani xáni chéni japka. Engachi mítepka eskaksï jarhaspka trenicha engaksï jarhuatani japka kʼuiripuechani paraksï sïpakuarhini, juchajtuchi niraspka. Iámu ambechi jurajkuska jimbokachi ma mochilajkusï ueenga páni. Soluchi úska páni juchaari sïrandecha, medisina ambe, itsï ka ambe ma para arhani. Bombechaksï juchaari uirhipandani charaxapti engachi nirani japka jima enga treni japka ka iámu ambechi jurajkuska” (Natalia, Járkov anapu, Ucrania).

“Nóchi méni eratsespka eska guerra japiringa asta jiáni enga ueenapkia. Ueenaspka kurhaani eskaksï bombecha charaxapka siudarirhu ka bentanechaksï no sési manakuarhisïreendi. Jimbosïni eratsepka uéakuni ka imani ambejkuni pákuarhini engani meru uétarhinchapiringa. Uéraspka kʼumanchikuarhu a las 8 tsípa anapu ka treni jimbo niraska Lviv, ka tátsekua autobusi jimbo Polonia” (Nadia, Járkov anapu).

Ini artikulu jimbochi exeaka i ambe:

¿Ambemindusï újki eskaksï xáni uánikua kʼuiripuecha sïpakuarhiaka?

Nájkirukaksï Ucrania anapu kʼuiripuecha ueenapka sïpakuarhini jiáni enga Rusieri ejersitu niárapka jima, Biblia uandasïndi eska jarhaska máteru ambe enga jimbo xáni uáni kʼuiripu sïpakuarhijka imeecheri paisicharhu.

Kʼuiripuecha engaksï juramujka nóksï úsïndi íntsaani kʼuiripuechani ambe engaksï meru uétarhinchajka. Enbesi de jarhuataani, úrasïndiksï juramukuani engaksï jatsika paraksï no sési kaani (Eclesiastés 4:1; 8:9).
Satanasi enga jindeeka Noambakiti, jindeesti “i parhakpini anapu juramuti” ka úsïndi eskaksï iámu parhakpini anapu kʼuiripuecha no sési ambe uaaka. Jimbosï Biblia uandajti “eskaksï iámindu parhakpini anapuecha Noambakitiri juramukua jimbo jarhaska” (Juanu 14:30; 1 Juanu 5:19).
Desde iónisïa, kʼuiripuechaksï uánikua uandanhiatechani jatsiasïndi; peru ístu iásïchi irekaxaka imani tiempu jimbo enga Biblia tʼuini uandapkia. Ixú 2 Timoteo 3:1 uandasïndi: “Últimu jurhiatikuechani jimbo, jaua[ti] peligru”. Ambe enga xarhatapiringa eskachi últimu jurhiatikuecha jimbo irekani japiringia, jindeepirindi: guerrecha, desastres naturales ambe, kʼarhingua ambe ka kʼérati pʼamenchakuecha. Ka i ambe úpirindi eskaksï kʼuiripuecha nipiringa sïpakuarhini máteru nanisï (Lukasʌ 21:10, 11).

¿Naniksï uaa exentani ambakiti erokuarhikua ma imeecha engaksï sïpakuarhini jámajka?

Biblia uandasïndi eska Jeobab juchaari Kuerajpiri kánikua xénchaasïnga imeechani engaksï sïpakuarhini jámani jarhajka ka ístu imeechani engaksï uéakupka imeecheri kʼumanchikuarhu ka eska kánikua pʼamojkuasïnga (Deuteronomio 10:18). Ima aiatspesïndi eska kénditaaka iámindu ambe enga újka eskaksï ini ambe nitamakuarhini jauaka. ¿Néna uaa ini ambe? Tata Diosïri Reinuni úraati. I Reinu jindeesti auandarhu anapu juramukua ma enga kénditauaka kʼuiripuechani engaksï iásï juramuni jaka (Daniel 2:44; Mateu 6:10). Tata Diosï Jeoba úraati imeeri Reinuni para Noambakitini kʼamajkuni (Roma 16:20). I Reinu, juramuati iámu parhakpinirhu ka kénditauati fronterechani paraksï iáminduecha májku kʼéri jarhani. Interu parhakpini anapu kʼuiripu, niáraati familia máeni enga májku kʼéri jauaka. Nóteru nema jatsiatia para sïpakuarhini, jimboka Biblia uandasïnga: “Mándani kʼuiripuechaksï uaxandukuati jima enga ubasï jukajka ka jima enga jígusï jukajka, ka no nema chérauati, jimboka ísï uandaska Jeoba enga orhekupaajka ejersituechani” (Miqueas 4:4).

Tata Diosïri Reinujkusï uaati eska nóteru ma kʼuiripu jatsiaaka para sïpakuarhini jámani ísï eska na úkuarhini jaka iásï. Tata Diosï Jeoba úraati imeeri Reinuni para kʼamajkuani problemechani engaksï újka eskaksï kʼuiripuecha sïpakuarhiaka máteru nanisï. Ju je exeni máru ambe enga kʼamajkuaka:

Guerrecha. Jeoba “úsïndi eskaksï guerrecha kʼamakurhiaka” (Salmo 46:9). Para míteni néna uaa Tata Diosï paraka nóteru jauakia atajperakua ambe, arhinta je artikuluni “¿Cómo llegará a haber paz en la Tierra?”.
No sési kámberakua ka kómu nitamakua ambe. “Uaati eskaksï nóteru kómu nitamakuarhiakia ni no sési kánhani” (Salmo 72:14). Para úni kurhanguni na engaksï kʼuiripuecha uaaka mójtakurhini ka nóteruksï únia imani ambe engaksï desde iónisï ueenga, arhinta je rebistani “¡Uaakachi nóteru kurhunhpinia!”.
No ma ambe jatsikuarheni. Biblia uandasïndi: “Jimboka ima [Tata Diosï Jeoba] jarhuataaka imani enga no jatsikuarheka ka enga jarhuajperata kurhajkuarhini jaka” (Salmo 72:12). Parajtsï míteni ambe enga uaaka Tata Diosï paraka nóteru jauakia kʼuiripu pobri, arhinta je artikuluni “¿Es realista esperar un sistema económico justo?”.
Kʼarhingua ambe. “Kánikua tʼirekua jauati echerirhu” (Salmo 72:16). Parajtsï jorhenguarhini néna uaa Tata Diosï eskaksï iámindu kʼuiripuecha jatsikuarheaka tʼirekua, arhinta je artikuluni “¿Un mundo sin hambre?”.

¿Uaa Biblia jarhuataani imeechani engaksï sïpakuarhini jarhajka?

Jo. Biblia no solu erokuarhikua ma íntsaasïndi para sánderu orhepani, ístu ambakiti konsejuechani íntsaasïndi paraksï úni orhepani uérakuani uandanhiatechani engaksï iásï jatsiaka.

Biblieri konseju: “Kʼuiripu no jánhaskati ma iámindu ambe jakajkusïndi, peru ima enga jánhaskatiika jingontku exesïndi ambe” (Proverbios 14:15).

Ambe enga arhikuekajka: Eratsi je ambe úpirini úkuarhini ka ambe engajtsï uaaka úni parajtsï kuájchakukuarhini. Xéparini jáma je imeecha jingoni engaksï no sési útspijka. Imeechaksï jirinhaasïndi ima kʼuiripuechani engaksï máteru nanisï anapueka paraksï no sési úkuani, jimbokaksï míteska eskaksï imeecha no miiuska jimeesïsï ka eskaksï mámaru ambe jimbo chésïnga.

Biblieri konseju: “Engachi jatsiaka tʼirekua ka xukuparhakua, jaue tsípini jarhani xáni ambe jingontku” (1 Timoteo 6:8).

Ambe enga arhikuekajka: Asï xáni uandanhia je jatsikuarhekua ambe jimbo. Sánderujtsï sési pʼikuarheraaka engajtsï tsípini jauaka imani ambe jingontku engajtsï jatsika.

Biblieri konseju: “Eska chá na uékajka eskaksïni kámaaka kʼuiripuecha, chájtu ísï kaa je imeechani iámindu ambe jimbo” (Mateu 7:12).

Ambe enga arhikuekajka: Sési uandajpaa je iáminduechani ka sési kámpi je. Engajtsï ísï úska, máteruechaksïni janhanharhiati ka sésiksïni jiókaati nani engajtsï niáraaka.

Biblieri konseju: “Ka asï jáma je no sési úkuntani imani engaksïni no sési úchiaka” (Roma 12:17).

Ambe enga arhikuekajka: Engaksïni no sési kámaaka, asï jurajku eska ikiatapu uaaka eskajtsï chájtu no sési úkuantauaka. Inde ambe úpirindi úni eskaksïni sánderu no sési kámaaka.

Biblieri konseju: “Iámindu ambe úsïnga úni [imani] jimbo engareni uinhaperantajka” (Filipusʌ 4:13).

Ambe enga arhikuekajka: Méntkisï mintsinharhi je Tata Diosïni. Engajtsï kómarhiaka, kurhaku je eskaksïni íntskuaka uinhapikua parajtsï úni tekaantani, ka ima ísï uaati.

Biblieri konseju: “Ka asï pendienti jatsi je ni ma ambe jimbo, sino Diosïni kómarhi je, ka kurhakuntsï ambe engajtsï uétarhinchajka, diosmaiamu arhiparini Diosïni iámindu ambe jimbo, ka ísï Diosïri pínandikua enga no nema újka jánhaskani, kuájpiauati chaari mintsitechani ka chaari eratsekuechani” (Filipusʌ 4:6, 7).

Ambe enga arhikuekajka: Ambe uéjkijtsï nitamakuarhini jarhani, kurhaku je Tata Diosïni eskaksïni íntskuaka imeeri pínandikua. Exe je artikuluni “Filipenses 4:6, 7 | ‘No se inquieten por nada’”.

a Enga Rusia anapu ejersitu niárapka Ucrania, pauandikua Alto Comisionado de las Naciones Unidas para los Refugiados (ACNUR) uandasti eska sánderu no sési jánhaskuarhixaka Ucrania eska nani uéjkisï. Ma 12 jurhiatikua jimbojku, jukari 2 miioni kʼuiripuechaksï sïpakuarhispti Ucrania uératini ka ma miioni mótsistiksï máteru naniisï peru mismu paisirhu.

b Tata Diosï arhinhasïndi Jeoba (Salmo 83:18). Exe je artikuluni “¿Neeski Jeoba?”.