Aianhperakuecha engaksï mintsinharhikueka ka engajtsïni sési pʼikuastajka

Jeobaeri testiguechachi pendienti jarhasïnga na engaksï nitamakuarhini jaka juchaari erachiicha iámu parhakpinirhu anapu (1 Pedru 2:17). Uánikua jucha, májkuenchi eratsesïnga eska Tannis, Kenia anapu pirenchi ma. Ima uandasïndi: “Kánikuani tsitisïnga míteni ambe engaksï nitamakuarhini jarhajka iámu parhakpinirhu anapu erachiicha”. ¿Nénachi mítesïni Jeobaeri testiguecha ambe enga úkuarhini jarhajka máteru nanisï? Imani parti jimbo enga jw.org jimbo jaka enga arhijka “Prensa”, ka enga ueenaka jarhani uéxurhini 2013 jimbo.

Ini parti jimbo, uaakachi míteni ambe enga xáni úkuarhini jaka konstruksioniiri ambe, na enga ánchikuarhinhajka para jarhuajpeni jiáni enga no sési ambe úkuarhijka ka máteru jukaparhakua ambe, komu jiáni enga uérajka jimbanhi Biblia máteru idioma jimbo. Ístu, jimintsïni aiangusïndi ima erachiicheeri ambe engaksï ónhakata jaka imeecheeri jakajkukuecha jimbo. Ka ístu, jiminchi úsïnga exeni ambakiti ambe engaksï nitamakuarhika imeecha engaksï jarhuajpejka kampaniecharhu para aianhpini o jiáni engachi pʼímarpini jámajka para Tata Jesukristueri uarhikuani miántani. Joperu, ¿neechaksï inbestigariuajki i notisiechani ka ambe xáni únhasïni ante deksï uérani?

Neechaksï inbestigarijki

Ofisina enga Informasioni Públika íntspijka, exesïndi ambe enga uéraaka partirhu “Prensa”. I departamentu ánchikuarhisïndi Grupu jingoni enga Jarhuajperata Íntspijka ka ístuksï jarhuajpesïndi máteru jukari 100 erachiicha ka pirenchiicha, máruksï imeecheeri kʼumanchikuecharhu uératini. I erachiichaksï karasïndi, inbestigarini, tradusirini ka ístuksï exesïndi náki fotuechaksï uéraa. Máteruechaksï nirasïndi uandontskuarheni juramutiicha jingoni, unibersidadirhu anapu maestruecha jingoni ka imeecha jingoni engaksï ístu notisia ambe aianhpijka. Ístu, iámu parhakpini anapu beteliicharhuksï jarhasti jukari 80 grupuecha Informasioni Públikeeri engaksï ini departamentu jingoni ánchikuarhijka.

Ofisina enga Informasioni Públika íntspijka, májku kʼéri ánchikuarhisïndi grupuecha jingoni Informasioni Públikeeri paraksï erakuni náki notisia aianhpini. Engaksï na erakujkia, inbestigarisïndiksï ka imani informasioninksï jirinhantasïndi enga meru ísïiuaka. Ka para ini ambe úni, jamberiksï jatsijti para uandontskuarheni ka kurhamarhiani imeechani engaksï kánikua mítekuka indeeri ambe. Engaksï na jatsijkia iámu informasioni, karasïndiksï ka exesïndiksï ambe mójtakuni o ambe máteru ambe jatsikuni. Tátsekuaksï jatsikuasïndi fotuecha paraka ísï xarharaaka eska na uéraaka artikulu ka axakusïndiksï Grupuni enga Jarhuajperata Íntspijka para imeecha exeni sini sési jarhaski.

Jukaparharasïndiksï i ambe

¿Ambeksï uandasïni erachiicha engaksï arhintajka i parti “Prensa”? Cheryl, pirenchi ma enga irekaka Filipinas, uandasïndi: “Kánikuani tsitisïnga tsípeechani arhiantani aianhperakuecha juchaari kúnguarhikueri ka juchaari erachiicheeri ambe”.

Uánikuaksï tsitisïndi arhiantani notisiecha engaksï jw.org jimbo uérajka jimbokaksï ménderueniiska imani notisiecha jingoni engaksï máteru nanisï uérajka. Tatiana enga Kazajistán anapueka, uandasïndi: “Kánikuani jukaparharaasïnga notisiecha engaksï jw.org jimbo uérajka jimbokaksï mintsinharhikueska. Imani ambejkuksï uandasïndi enga meru ísïika”. Pirenchi Alma enga México anapueka, uandasïndi: “Iápurisï uandanhasïndi no sési jásï ambe enga úkuarhini jaka, joperu aianhperakuecha engaksï uérajka juchaari pájinarhu Internetiiri, sésijtsïni pʼikuastantasïndi”.

Partirhu “Prensa”, no solujtsïni aiangusïndi jurhimbikua ambe, ístujtsïni uinhaperantasïndi parachi sánderu mintsikani Tata Diosïni. Bernard enga Kenia anapueka, uandasïndi: “Ini notisiecha jimbo engaksï ixú uérajka, iásï ísï exeasïngia erachiichani komu juchiiti familia, nani uéjkiksï jarhani. Iásï úsïnga kómarhijpikuani imani ambe jimbo engaksï nitamakuarhinchani jaka ka imeecheeri nombriichani úraani”. Kenia anapu pirenchi ma enga Bybron arhinhajka, uandasïndi: “¡Kánikuani sési pʼikuarherasïnga engani arhintajka eska uéraskia jimbanhi Biblia ma máteru idioma jimbo! I amberini miátantasïndi eskajtsïni Tata Diosï Jeoba kánikuajtsïni xénchasïnga iáminduechani”.

Asta notisiecha ima erachiicheeri engaksï no sési kánhani jaka, uaatijtsïni uinhaperantani. Exe je ambe enga uandajka Jackline, máteru pirenchi Kenia anapu: “Eratsentani na engaksï erachiicha xáni balori jukajka, úsïndi eskani jíjtuni sánderu mintsikaaka. Méntkisï jánguarhintasïnga míteni ambesï jarhuataajki paraksï úni tekaantani; ka exeskia eska imani ambe úni enga kʼuiripu ísï exejka enajki no káni marhuajki komu kómarhini, Bibliani arhintani ka asta pireni, inde ambesï sánderu uinhapikua íntsaajti juchaari erachiichani”.

Costa Rica anapu pirenchi ma enga Beatriz arhinhajka, kánikua jukaparharasïndi engaksï uérajka notisiecha jiáni enga desastre naturali ambe úkuarhijka: “No úsïnga jakajkuni na enga Jeobaeri kúnguarhikua xáni sóntku nirajka erachiichani jarhuataani. Kánikuaksï sési úsïndi i ambe ka uékperakua jingoni. I ambe úsïndi eskani seguru jauaka eska meru i jindeeska Tata Diosï Jeobaeri kúnguarhikua”.

¡Kánikuachi jukaparharasïnga enga jaka i parti “Prensa” juchaari pájinarhu Internetiiri! I notisiecha jimbo engaksï uérajka, úsïngachi míteni ambe enga nitamakuarhinchani jarhajka juchaari iámu parhakpinirhu anapu familia. Joperu no úpirindi iámindu i ambe úkuarhini engajtsï chá no íntspipiringa donasioniicha, ménichani úraparini pájinani donate.jw.org. Kánikua diosmaiamu je jimbokajtsï xáni intsïmpitiika.