Orhejtsïkutiichaksï néna xarhatakuasïni pʼamojperakua ka xénchperakua imeechani engaksï kʼéri pekadu ma niátajka

1. Enga nema kʼéri pekadu ma niátaska, ¿ambe uaa úni Tata Diosï Jeoba imani jimbo?

ESKACHI na exekia máteru jorhenguarhikua jimbo, apostoli Pablu arhiaspti Korintu anapuechani eskaksï petantapiringa kúnguarhikuarhu imani achamasïni enga kʼéri pekadu ma niátapka ka enga no móantapka. Joperu ísï eska na uandajka Roma 2:4, Tata Diosï uaati jarhuatani imani kʼuiripuni para móantani. Ini jurhiatikuecha jimbo, Tata Diosï Jeoba úraasïndi orhejtsïkutiichani para jarhuatani kʼuiripuni ma para móantani, ¿néna ísï úsïni?

2, 3. ¿Ambechi jatsiski para úni engachi míteska eska erachi ma kʼéri pekadu ma úska, ka andi?

² Ju je eranhaskani, eskachi míteska eska erachi ma kʼéri pekadu ma úska ka eska uaaka petanhantani kúnguarhikuarhu. ¿Ambechi jatsipirini para úni? Jatsipiringachi para arhini eska uandontskuarheaka orhejtsïkutiicha jingoni parakaksï imeecha míteaka ka exenksï nénaksï uaa jarhuatani (Is. 1:18; Úku. 20:28; 1 Ped. 5:2).

³ Ka enga erachi no uékaaka uandontskuarheni orhejtsïkutiicha jingoni, jatsiskachi para jucha aianguani orhejtsïkutiichani, jimbokachi xénchasïnga erachini ka nóchi uékasïnga eska jarhariaka Tata Diosï Jeobani. Enga no móantaska, úpirindi nóteru sési pájperania Tata Diosï Jeobani jingoni ka ístu úni eska no sési ambe uandanhapiringa kúnguarhikueri ambe. Ísï jimbo, nájkiruka úkua jukaaka, jatsiskachi para uandontskuarheni orhejtsïkutiicha jingoni, jimbokachi ísï xarhatani jauaka eskachi xénchasïnga Tata Diosï Jeobani ka ístu erachini (Sal. 27:14).

AMBE ENGAKSÏ ÚJKA ORHEJTSÏKUTIICHA PARA JARHUATANI IMANI ENGA KʼÉRI PEKADU MA ÚKA

4. ¿Andiksïsï orhejtsïkutiicha jatsi para imani jingoni uandontskuarheni enga no sési ambe úka?

⁴ Enga erachi ma kʼéri pekadu ma niátajka, kúnguarhikuarhu anapu orhejtsïkutiichaksï tanimu orhejtsïkutiichania erakuasïndi, para imani jingoni uandontskuarheni enga no sési ambe úka. Nájkirukaksï orhejtsïkutiicha jánguarhintajka jarhuatani imani kʼuiripuni enga no sési ambe niátaka, peru nóksï afuersa arhisïndi eska móantaaka, sánderu sési mítestiksï nani engaksï jamberi uaaka jarhuatani (Deut. 30:19). Orhejtsïkutiichaksï sési mítetixati eskaksï máru imeecha engaksï no sési ambe niátajka móantasïnga ísï eska rei Dabidi, joperu jarhastiksï máteruecha engaksï meru nóteru uéjkia kurhajchani Tata Diosï Jeobani (Gén. 4:6-8; 2 Sam. 12:13). Joperu orhejtsïkutiichaksï méntkisï jánguarhintasïndi jarhuatani imani kʼuiripuni para móantani. ¿Ambeksï jatsiski para miáni jarhani orhejtsïkutiicha jiáni engaksï uandontskuarheaka imani jingoni enga no sési úka?

5. Engaksï imani kʼuiripu jingoni uandontskuarheni jauaka enga no sési ambe niátaka, ¿náki konsejunksï jatsiski para miántani? (2 Timoteu 2:24-26; ístu exe je imajeni).

⁵ Orhejtsïkutiichaksï ísï exesïndi erachini enga kʼéri pekadu ma úka komueska Tata Diosïiri karichi ma enga tsïnchetini jaka (Luk. 15:4, 6). Orhejtsïkutiichaksï no xukasïndi, sánderu sési uékperakua jingonksï uandontskuarhesïndi imani erachini jingoni. Ísïksï úsïndi eska na arhijka 2 Timoteu 2:24-26 (arhinta je). Kánikua xénchperakua jingoni kámasïndiksï ka pʼamojperakua jingoni ka ístuksï jánguarhintasïndi sési uandontskuarhekuni paraksï úni mintsitarhu niárakuni.

6. ¿Ambeksï úsïni orhejtsïkutiicha ante deksï tánguarhini imani jingoni enga no sési ambe úka? (Roma 2:4).

⁶ Orhejtsïkutiichaksï arhutasïndi tiempu para exeni na enga eratsejka Tata Diosï Jeoba. Ante deksï komité orhejtsïkutiicheeri ma tánguarhintani imani jingoni enga kʼéri pekadu ma úka, kómarhisïndiksï Tata Diosï Jeobani ka kurhakusïndiksï eska jarhuataaka imani kʼuiripuni móantani. Exesïndiksï ambe enga uandajka Biblia ka publikasionicha ka ménderuksï kurhakusïndi Tata Diosï eska jarhuatauaka paraksï úni kurhangukuni imani kʼuiripuni ka ístu ambe enga ima úka. Ístuksï exesïndi andisï ima kʼuiripu imani ambe úpi (Prov. 20:5). I orhejtsïkutiichaksï mítesti ambe enga apostoli Pablu arhiapka kristianuechani: ‘Tata Diosï sési jimbo jarhuataaxati paraksï móantani’ (arhinta je Roma 2:4). Ísï jimbo jánguarhintasïndiksï sési kaani imeechani engaksï no sési ambe niátapka ísï eska Tata Diosï na kaajka. Orhejtsïkutiichaksï jatsisti para májkueni jámani eska Jesúsi ka ísïksï úni eska ima na arhiauaka jimboka imeecheeri sánderu kʼéri ánchikuarhita jindeeska, kuidariuani kúnguarhikuarhu anapu erachiichani (Is. 11:3, 4; Mat. 18:18-20).

7, 8. Orhejtsïkutiichaksï, ¿nénaksï májkueni xarhatasïni tekaantskua ísï eska Tata Diosï Jeoba jiáni engaksï uandontskuarhejka imani jingoni enga kʼéri pekadu ma úka?

⁷ Orhejtsïkutiichaksï jatsisti para májkueni tekaantani ísï eska Tata Diosï Jeoba. Imeechaksï miásïndi na enga Tata Diosï Jeoba kaapka ióntki imeechani engaksï kʼéri pekadu ma úpka. Ju je exeni ambe enga úkuarhipka Kaíni jingoni. Tata Diosï iatsitakuarhu uandontskuarhespti Kaínini jingoni ka arhispti eska ménderu úpiringa sési pájperantani imani jingoni (Gén. 4:6, 7). Ka ma xanhari, Tata Diosï profeta Natánini axaspti para Dabidini jurhimberantani, ka Natáni ejemplu ma úraspti paraka úpiringa mintsitarhu niárakuni rei Dabidini (2 Sam. 12:1-7). Ístu Tata Diosï Jeoba méntku úndaspti axaani imeeri profeteechani para jarhuatani ireta israelini moántani (Jer. 7:24, 25). Tata Diosï Jeoba no erokuarhispti astakaksï imeecha moántapiringa para ima jarhuataani, sánderu sési, Tata Diosïsï ueenapti arhiani eskaksï jatsispka para móantani nájkirukaksï imeecha útasï no sési ambe niátani japka.

⁸ Ísï eska na arhijka 2 Timoteu 4:2 orhejtsïkutiichaksï jatsisti para iatsitakuarhu uandontskuarheni imani kʼuiripuni jingoni enga no sési ambe niátaka. Nóksï jatsisti para ikiani o paraksï uinhamarhikuni, sánderu sési, jatsistiksï paraksï pʼíngukuarhini paraka ima kʼuiripu uékaaka kurhajchaani ka jiókuarhiani konsejuechani ka ísïksï úni jarhuatani paraka móantaaka. Ísï jimbo, orhejtsïkutiichaksï májkueni úni jarhasïndi eska Tata Diosï Jeoba, engaksï uandontskuarhejka imani kʼuiripuni jingoni enga no sési ambe niátaka.

9, 10. ¿Ambeksï jatsiski para úni orhejtsïkutiicha paraksï jarhuatani kurhanguni imani kʼuiripuni enga no sési ambe niátaka eska no sési úska?

⁹ Orhejtsïkutiichaksï kánikua jánguarhintasïndi míteni andisï erachi ma no sési ambe ú. Imeechaksï exesïndi andisï erachi nóteru xáni mintsikajkia Tata Diosï Jeobani. Pori ejemplu ¿sánhani arhispi nóteru estudiarini Bibliani o uérani aianhpini? ¿Nóteru xáni kómarhisïrenia Tata Diosïni ka níjtu mintsitani jingoni ísï úni? ¿Sánhani arhispi tsitini imani ambe enga no sési jaka? ¿O no sési ambe úski jimboka imeechani kúrhiasïreenga engaksï no sési ambe újka o imani ambe jingoni tsípikuarhisïreni enga no sési jaka? Orhejtsïkutiichaksï ístu exesïndi sini erachi kurhangusïni na enga xáni no sési jaka ima ambe enga úka ka ístu na enga xáni no sési pʼikuastajka Tata Diosï Jeobani.

¹⁰ Orhejtsïkutiichaksï iátsitakuarhu uandontskuarhesïndi imani jingoni enga no sési ambe niátaka, paraka ima uénhekuarhiaka ka ístu paraka kurhanguaka andisï no sési jaki ambe úka. Orhejtsïkutiichaksï nóteru kurhamarhisïndia imani ambe enga nóteru uétarhiakia (Prov. 20:5). Ístu orhejtsïkutiichaksï uaati májkueni úni eska Natáni na úpka Dabidini jingoni, uaatiksï ejempluechani úraani paraksï jarhuatani kurhanguni imani erachini eska no sési jarhaska ambe úka. Engaksï orhejtsïkutiicha ini ambe úska, jamberi ima kʼuiripu enga kʼéri pekadu ma úka, niárati no sési pʼikuarherani o jamberi móantani. Nájkiruka primeru xanhariuaka engaksï orhejtsïkutiicha tánguarhintaaka imani jingoni.

11. ¿Néna kaaspi Jesúsi imani kʼuiripuechani engaksï no sési ambe niátapka?

¹¹ Orhejtsïkutiichaksï jánguarhintasïndi májkueni úni eska Jesúsi. Pori ejemplu, Jesúsi kurhamarhispti Sauluni enga Tarsu anapuepka: “Saulu, Saulu, ¿andirenisï xáni no sési kámani jaki?”. Ini ambe kurhamarhispti para jarhuatani kurhanguni eska no sési ambe úxapka (Úku. 9:3-6). Ka Apokalipsisi 2:20, 21 uarhiitini ma uandasïndi enga “Jesabeli” arhinhajka ka arhispti: “Ji tiempu íntskuska paraka móantapiringa”.

12, 13. ¿Andiksïsï orhejtsïkutiicha méntku úndajki tánguarhintani erachini jingoni paraksï jarhuatani móantani? (Ístu exea je imajeniichani).

¹² Orhejtsïkutiichaksï májkueni úni jarhasïndi eska Jesúsi engaksï no jirejiresï uandajka eska ima erachi no uaaka móantani. Máru erachiichaksï jirejiresï móantasïndi engaksï na primeru xanhari tánguarhintajka orhejtsïkutiicha jingoni, joperu ístuksï jarhasti máru engaksï uétarhinchajka sánderu tiempu. Jamberi ima erachi enga primeru xanhari uandontskuarhepka orhejtsïkutiicha jingoni, eratsentani pakarapti ambe engaksï uandontskuarhepka ka tátsekua kurhakupti Tata Diosï Jeobani iámu mintsita jingoni eska puákuntapiringa (Sal. 32:5; 38:18). Ka enga na ménderu tánguarhintapkia orhejtsïkutiicha jingoni, jiókuarhiptia paraksï jarhuatani, ísï jimbo orhejtsïkutiichaksï úpirindi exeni paraksï ménderu tánguarhintani imani jingoni.

¹³ Orhejtsïkutiichaksï kurhangukuasïndi erachini ka sésiksï arhiasïndi paraksï úni jarhuataani móantani. Orhejtsïkutiichaksï erokuarhisïndi eska erachi kurhanguaka eska no sési ambe niátaska ka eska móantaaka. Ka ístuksï kurhakusïndiksï Tata Diosï Jeobani eska újchakurauaka (2 Tim. 2:25, 26).

14. ¿Né jarhuatasïni paraka erachini ma móantaaka?

¹⁴ Kánikuachi tsípisïnga enga nema niárajka móantani (Luk. 15:7, 10). Joperu, ¿úpirinchi uandani eskaksï solu orhejtsïkutiicha jarhuataska? Ju je exeni ambe enga uandapka apostoli Pablu, ima uandaspti “Tata Diosï jarhuatauati parakaksï móantaaka” imeecha engaksï no sési ambe niátaka (2 Tim. 2:25). Ísï jimbo no kʼuiripusï ma újti eska ima erachi niáraaka ménderueni eratseni ka mójtakurhini, sánderu sési Tata Diosï Jeobasï jarhuatajti paraka ima uaaka móantani. Ka ístu tátsekua apostoli Pablu uandaspti, eska kánikua sésisïnga enga nema niárajka móantani, jimboka jarhuatasïnga paraka sánderu sési kurhanguaka jurhimbikuani ka sési eratsentani ka para no uaaka imani ambe enga Noambakiti uéjka (2 Tim. 2:26).

15. ¿Nénaksï uaa orhejtsïkutiicha seguiriini jarhani jarhuatani imani erachi enga móantakia?

¹⁵ Enga erachi ma niáraaka móantani orhejtsïkutiichaksï no jatsisti para jandiajku jurajkuni. Sánderu sési jatsistiksï paraksï seguiriini jarhani jarhuataani para ima sánderu mintsikaaka Tata Diosïni ka paraka ima no niáraka imani ambe úni enga Noambakiti uéjka, sánderu sési paraka imani ambe uaaka enga sési jaka (Ebr. 12:12, 13). Ka nájkirukaksï orhejtsïkutiicha no jatsika para iámu ambe aianguani jarhani máteruechani ambe niátaka, ¿ambeksï kʼóru úpirini aianguani?

‘IÁMINDUECHANI JAPARINI XUKA’

16. ¿Neechanisï arhikuekani japi apostoli Pablu enga uandapka “iáminduechani japarini”? (1 Timoteu 5:20).

¹⁶ (Arhinta je 1 Timoteu 5:20). Pablu arhispti Timoteuni enga ístu orhejtsïkutiipka eska “iáminduechani japarini” xukaapiringa imeechani engaksï no sési ambe niátani japka. Enga apostoli Pablu uandapka iáminduechani no iámu kúnguarhikuanisï arhikuekani japti, imani erachiichanisï arhikuekaani japti engaksï exekuarhipka ambe enga ima kʼuiripu úpka o imani erachiichani enga ima kʼuiripu aiangukuarhiapka. Ísï jimbo, orhejtsïkutiichaksï imani erachiichantkusï aianguajti engaksï mítepka ambe enga no sési ambe niátapka ima kʼuiripu, ka aianguasïndiksï eskaksï uandontskuarheskia imani kʼuiripuni jingoni ka eskaksï xukaskia.

17. Engaksï sáno iámindu kúnguarhikuarhu anapuecha mítejka o engaksï niáraka míteni ambe enga újka erachi ma, ¿ambeksï úsïni orhejtsïkutiicha ka andi?

¹⁷ Joperu ménichani sáno iámu kúnguarhikuarhu niárasïndi mítekuarhini ambe enga úka ima kʼuiripu ka ménisï niárasïndi mítekuarhini ambe enga no sési úka. Ísï jimbo enga niárajka i ambe úkuarhini, uandakua iáminduecha, iásï kʼóru iámu kúnguarhikuanisï arhikuekani jarhajtia. Ka ísï jimbo, orhejtsïkuti ma aianguasïndi iámu kúnguarhikuarhu anapuechani eska erachi xukanhaskia. Ka i ambe marhuasïndi “parakaksï máteruecha no jámaaka májkueni úni” ka nóksï niárani kʼéri pekadu ma niátani.

18. ¿Ambeksï úsïni orhejtsïkutiicha enga tumbi ma o uátsï ma enga nótki 18 jatiriijka kʼéri pekadu ma újka? (Ístu exe je imajenini).

¹⁸ ¿Ambeksï úsïni orhejtsïkutiicha imani erachini jingoni enga nótki 18 uéxurhini jatiriijka? Kúnguarhikuarhu anapu orhejtsïkutiichaksï erakuauati tsimani orhejtsïkutiichani paraksï tánguarhintani imani tumbi o uátsïni jingoni ka ístu taati jémbeecha jingoni engaksï Jeobaeri testiguecheeka.b Íksï tsimani orhejtsïkutiicha exeati ambeksï úxaki taati jémbeecha paraksï jarhuatani imeeri uájpani para nóteru ísï jámania ka móantani. I tsimani orhejtsïkutiichaksï uaati uandani eska nóteru uétarhisïngia komité orhejtsïkutiicheri ma paraksï exeni eska uátsï o tumbi sapichu móantaxaka ka eska kurhajchaxaka taati jémbeechani. Ka ísïksï uaati jimbokaksï orhejtsïkutiicha míteska eska Tata Diosï íntsaaska taatiicha sésikua paraksï xénchperakua jingoni jurhimberantani sapiichani (Deut. 6:6, 7; Prov. 6:20; 22:6; Éfes. 6:2-4). Tátsekua, orhejtsïkutiichaksï jatsisti para tánguarhintani taati jémbeecha jingoni paraksï exeni sini ima uátsï o tumbi, intsïnhaxaki jarhuajperata. Joperu enga ima tumbi o uátsï no uékaska mójtakurhini ka móantani nájkiruka itsï atakuarhikia, ¿ambeksï jatsiski para úni orhejtsïkutiicha? Iásï kʼóruksï jatsisti para komité orhejtsïkutiicheri ma tánguarhintani para imani jingoni ka ístu imeeri taatiicha jingoni engaksï testigueka.

TATA DIOSÏ JEOBA KÁNIKUA XÉNCHPESÏNDI KA KÁNIKUA PʼAMOJPENI

19. ¿Nénaksï uaa májkueni úni orhejtsïkutiicha ísï eska Tata Diosï Jeoba jiáni engaksï uandontskuarheaka imani jingoni enga kʼéri pekadu ma úka?

¹⁹ Tata Diosï Jeoba indeni ánchikuarhitani íntsaasti komité orhejtsïkutiicherini paraksï kuájchakuni kúnguarhikuani (1 Kor. 5:7). Joperu Tata Diosï Jeoba ístu uékasïndi eskaksï orhejtsïkutiicha jarhuataaka imani kʼuiripuni enga no sési ambe niátaka paraka niáraaka móantani. Ísï jimbo, orhejtsïkutiichaksï jatsisti para sési uandontskuarhekuni imani kʼuiripuni ka erokuarhini eska niáraaka móantani. Engaksï ísï úska, májkuenksï úni jauati eska Tata Diosï Jeoba enga kánikua xénchpejka ka kánikua pʼamojpeni (Sant. 5:11). Enga apostoli Juanu na jatiripkia ini ambe karaspti kánikua xénchperakua jingoni: “Juchiiti sapiicha, jíksïni ini ambe karachixaka parakajtsï no jámaaka pekadu ambe niátani. Joperu enga nema pekadu ambe niátaska, jatsiskachi nemani engajtsïni jarhuatajka ka enga Taatiiri máekandu jaka: tata Jesukristu, ima enga iámindu ambe sési újka” (1 Juanu 2:1).

20. ¿Ambechi exeni jaua últimu artikulu jimbo?

²⁰ Jarhastiksï máru erachiicha engaksï no sési ambe niátajka, joperu engaksï no uékajka móantani. Ka enga i ambe úkuarhijka, petanhantasïndiksï kúnguarhikuarhu. Joperu, ¿ambeksï úsïni orhejtsïkutiicha inde erachiichani jingoni? Ini ambechi exeni jauaka últimu artikulu jimbo.