Anhaxurhisptiksï para jarhuajpini

Kánikua tsirakuarhixapti ima jurhiatikua ka no sési tarhiani jini Alberta (Canadá). Acheeti ma enga Bob arhinhajka, sáni uinhamu xanhatataxapti imeri karruni, 100 kilometru por ora (60 millas), enga jamberi tátsepani anapu ianta ma charapka imeri karrueri. Jimboka Bob no mítespka ambe enga úkuarhipka, útasï xanhatataxapti para imecho niántani enga 5 kilometru (3 millas) iauani japka.

Kʼumanchikua Reinuerirhu enga imani ireta jimbo jaka nani enga Bob irekaka, ima karta ma axaspti para uandantani ambe enga úkuarhipka. Karaspti: “Karru ma nani engaksï iúmu tumbiicha nirani japka, andangusptirini ka maekanda niáraspti. Késkusptiksï bentanani ka aiangusptijtsïni eska máechakua ianta no sési jarhaspka. Uérhukuspkachi karreterarhu ka arhisptijtsïni eskajtsïni jarhuatapiringa. Ji no mítespka sini kámaxapi máteru ianta ka ambe enga xáni uétarhipiringa para úni mójtakuntani. Ískuni pakaraspka juchiti siia de ruedarhu engaksï imecha iámindu ambe úni japka paraksï mójtakuntani iantani. Iauaxapti ka kánikua tsirakuarhini. Peru, nájkirukaksï xáni sési morhekuarhetini japka, jarhuatasptijtsïni parani ji úni niántani juchiniu. No míteska ambe úpirini engajtsïni imecha no jarhuatapiringa”.

Bob ístu arini ambe karaspti imeri kartarhu: “Kánikua diosmeiamukua arhiasïnga imani iúmu Testiguechani engajtsïni jarhuatapka. Imechaksï jimesïsï jámaxapti jimbokaksï Tata Diosïri ambe jámaxapka uandantani. Íksï tumbiicha sési jimbo xarhatasïndi ambe engaksï aianhpijka. Jarhuatasptijtsïni ambe ma jingoni engani ji kánikua úkua jukanchapiringa úni. Kánikua diosmeiamukua je. ¡Né uandapirini eskaksï i ambakiti kʼuiripuecha jimesïsï jámani japiringa ima jurhiatikua karretera jimbo!”.