Йәһвә исемен горурлык белән игълан итәбез

Индонезиядә эшчәнлегебез тыелган вакытта кардәшләр Гайсәнең мондый киңәшен тоткан: «Еланнар кебек сакланучан һәм күгәрченнәр кебек мәкерсез булыгыз» (Мат. 10:16). Ләкин эшебез рөхсәт ителгәч, күпләргә «кыюлык белән» вәгазьләргә өйрәнергә кирәк булган (Рәс. 4:31).

Мәсәлән, кайбер кардәшләр өйдән-өйгә вәгазьләргә курыккан, шуңа күрә күбрәк кабат килеп китүләргә йөргән һәм өйрәнүләр үткәргән. Башкалар мөселманнарга вәгазьләмәгән. Күпләр үзләрен Йәһвә Шаһите дип атар урынына мәсихчеләр дип атаган һәм индонезия телендәге «Яңа дөнья тәрҗемәсе»н кулланмыйча христиан дөньясында чыгарылган тәрҗемәләрне кулланганa. Ә кемдер Изге Язмаларга нигезләнгән басмаларны теләр-теләмәс кенә тәкъдим иткән.

Кардәшләрнең андый кайбер гадәтләре хөкүмәтнең оешмабызны тыюы вакытларыннан калган. Ә кайчак кардәшләр культуралары аркасында шулай эшләгән. Алар бәхәсләшер урынына юл куючан булган һәм үзләрен артык сак тоткан. Кардәшләргә үзгәрергә ничек булышканнар?

Йәһвә рухи яктан җитлеккән кардәшләр аша йомшак кына киңәш биргән (Эфес. 4:11, 12). Мәсәлән, 2010 елда Җитәкче советның әгъзасы Стивен Летт кардәшләрне, вәгазьдә «Яңа дөнья тәрҗемәсе»н кулланып, Аллаһы исемен югарыларга дәртләндергән. «Летт кардәшнең нотыгы вәгазьчеләргә бик тәэсир итте. Алар үзләренең Йәһвә Шаһитләре булулары турында әйтергә куркырга тиеш түгел икәнен һәм Аллаһы Сүзен горурлык белән якларга кирәк икәнен аңлады»,— дип сөйләгән Миша Биренс.

Еш кына Индонезиядәге мөселманнар безне христианнар дип уйлый. Шуңа күрә индонезия телендә чыккан «Безнең изге хезмәтебез»дә мондый киңәш бирелгән булган: «Сөйләшүнең башыннан ук үзегезнең Йәһвә Шаһите булуыгыз турында ачык итеп әйтү бик файдалы булыр иде... Без территориябездә Йәһвә турында горурлык белән сөйләргә һәм аның исеме белән нияте турында хәбәр итәргә телибез!» Индонезиядәге филиалда хезмәт итүче Синсукэ Кавамото болай дип сөйли: «Әдәплелек белән, әмма шул ук вакыт туры итеп бирелгән бу киңәш яхшы нәтиҗәләргә китерә. Күп кенә мөселманнарның Йәһвә Шаһитләре турында күбрәк беләселәре килә. Алар безнең башка кешеләрдән нәрсә белән аерылып торуыбызны белергә тели. Аларның кызыксынулары безгә яхшы шаһитлек бирергә мөмкинлек ача».

Вәгазьчеләрне шулай ук «Күзәтү манарасы» һәм «Уяныгыз!» журналларын күбрәк таратырга дәртләндергәннәр. Филиал комитетының координаторы Лотар Миханк болай ди: «Кешеләр безнең турында белсен өчен, аларга журналларыбызны укырга кирәк. Кеше журналлар укып, аның йөрәге йомшара һәм бу аңа хакыйкатьне кабул итәргә булыша. Журналларны бар җирдә дә таратып, без күбрәк кешегә Йәһвә турында белем алырга мөмкинлек бирәбез».

Иҗтимагый урыннарда вәгазьләүнең файдасы

2013 елда Индонезиядәге филиал Җитәкче совет хуплаган ике яңа программаны гамәлгә керткән: зур шәһәрләрдәге иҗтимагый урыннардагы вәгазь һәм җыелышларның иҗтимагый урыннарда вәгазьләүләре. Моның ярдәмендә Индонезиядә күбрәк кеше яхшы хәбәрне ишетә ала.

Көнбатыш Джакартада зур шәһәрләрдәге иҗтимагый урыннардагы вәгазь өчен беренче җыелма өстәлләр электроника сатыла торган зур кибеттә урнаштырылган булган. Аннары җыелышлар үз территорияләрендә күчмә стендларны һәм җыелма өстәлләрне куеп вәгазьли башлаган. Бер ел эчендә бөтен Индонезиядә 400 дән артык күчмә стенд белән җыелма өстәлләрне куллана башлаганнар. Бу нинди җимешләр китергән?

Джакартадагы өлкән Юсак Униплайта болай ди: «Иҗтимагый урыннарда вәгазьләүне башлар алдыннан, җыелышларыбыз һәр ай 1 200 журналга заказ бирә иде. Ә инде алты ай узгач, без һәр ай 6 000 журналга заказ бирә башладык. Бүгенге заказыбыз: 8 000 журнал. Моннан тыш, без күп китаплар һәм брошюралар таратабыз». Медан шәһәрендә (Төньяк Суматра) пионерлар күчмә стендлар белән өч урында тора. Беренче айда алар 115 китап һәм якынча 1 800 журнал тараткан. Ике айдан соң якынча 60 пионер җиде урында 1 200 дән артык китап һәм 12 400 дән артык журнал тараткан. «Бу яңа вәгазь ысуллары кардәшләрне бик шатландыра һәм Индонезиядә эчкерсез кешеләр әле бар икәнен күрсәтә,— дип әйтә Джесси Кларк.— Иҗтимагый урыннарда вәгазьләү чыннан да файда китерә!»

Кешеләрнең туган телләрендә вәгазьләү

Индонезия урнашкан регионда иң күп телләрдә сөйләшәләрb. Кешеләрнең күбесе гомум кабул ителгән телдә — индонезия телендә сөйләшсә дә, күпләр шулай ук җирле телләрдә — туган телләрендә сөйләшә.

2012 елда филиал басмаларны бу телләргә тәрҗемә итәргә кирәкме, юкмы икәнен билгеләргә тырышкан. «Без басмаларны тагын 12 телгә тәрҗемә итә башладык. Бу телләрдә 120 миллион кеше сөйләшә,— дип әйтә Том Ван Лемпюттен.— Ява теленә тәрҗемә итүчеләр, үз телләрендә беренче буклетны күргәч, аларның шатлыктан күз яшьләре чыкты. Ниһаять, аларның туган телләрендә дә рухи ризык булды!»

Ләкин җыелышларның күбесе, кешеләр җирле телләрдә сөйләшсә дә, үз очрашуларын индонезия телендә үткәрергә дәвам иткән. Лотар Миханк болай дип сөйли: «2013 елда без хатыным Кармен белән Төньяк Суматрада Ниас утравында ике көнлек конгресска бардык. Килгән 400 кешенең күбесе ниас телендә сөйләште, ләкин нотыклар индонезия телендә яңгырады. Нотыкчылар белән киңәшләшеп алгач, без тыңлаучыларга киләсе көнне программа ниас телендә үткәреләчәк дип белдерү ясадык. Икенче көнне зал 600 дән артык кеше белән тулды». Кармен болай дип өсти: «Кешеләр программаны ниас телендә тыңлаганга, аны, беренче көнгә караганда, зуррак игътибар белән тыңлады. Аларга Изге Язмалардагы хәбәрне туган телләрендә ишетү һәм ишеткәнне тулысынча аңлау бик ошый иде».

Хәтта саңгырау кешеләр Индонезиядә хакыйкатьне туган телләрендә «тыңлый» ала. 2010 елдан бирле индонезия ишарә теленә тәрҗемә итүче төркем 7 брошюра һәм 8 буклет чыгарган. Өстәвенә, филиал ишарә телен өйрәнү өчен 24 курс оештырган һәм аннан соң 750 дән артык кардәш ишарә телендәге җыелышларга ярдәм итә башлаган. Бүген ишарә телендәге җыелышлар белән төркемнәр — барлыгы 23 — Индонезиядәге өч миллион саңгырау кешегә рухи яктан ярдәм итә һәм юаныч бирә.

Хәзер Тәрҗемә итү бүлегендә 37 тәрҗемә итү төркеме бар. Бөтен Индонезиядә 19 урында 117 тәрҗемәче һәм 50 башка кардәш хезмәт итә.