Иманнары өчен төрмәдә. Көньяк Корея
2020 елның 26 октябрендә Көньяк Корея хөкүмәте үз тарихында беренче тапкыр альтернатив граждан хезмәтен гамәлгә кертте. Бу хезмәтне үз карашлары аркасында кулына сугыш коралы алырга ризалашмаган кешеләр үтә ала. Ләкин кеше хокукларын яклый торган оешмалар шунсына игътибар иткән: Корея хөкүмәте гамәлгә керткән шул хезмәт күбрәк җәза итеп кулланыла. Мәсәлән, аны үткәндә кеше, армия сафларында хезмәт итүгә караганда, ике тапкыр озынрак вакыт — өч ел хезмәт итә һәм күпкә кырысрак шартларда яши. Бу халыкара стандартларга каршы килә. Халыкара стандартлар буенча, альтернатив хезмәт хәрби хезмәттән бер ярым тапкыр гына озынрак була ала (озынрак булыр өчен җитди һәм объектив сәбәпләр булырга тиеш).
Корея альтернатив хезмәтнең андый кырыс төрен тәкъдим иткәнгә, кайбер Шаһитләр андый хезмәттән баш тарткан. Ә кайберләре судка шикаять биргән. 2024 елның 30 маенда Көньяк Кореяның Конституцион суды альтернатив хезмәткә кагылышлы бар шикаятьләрне кире каккан. Карарны судьялар коллегиясе кабул иткән (5 се кире каккан, 4 се шикаять белән ризалашкан). Суд альтернатив хезмәтнең җәза итеп кулланылуын таныган һәм болай дип язган: «Андый альтернатив хезмәт — җәза бирүнең башка формасы гына. Ул карашлары нигезендә хәрби хезмәттән баш тарткан гражданнарның дини ирекләрен боза».
29 яшьлек Пён У Чжин мисалына игътибар итик. Гаиләле бу Шаһит, үз карашлары нигезендә, хәрби хезмәттән баш тарткан һәм аны төрмәгә утыртканнар, чөнки ул кырыс шартлы альтернатив хезмәтне үтәргә ризалашмаган. Көньяк Кореядә андый очракларның әле булганы булмаган. Барысын исәпкә алып, ул альтернатив хезмәттән баш тартырга булган. Шул ук вакыт ул башка төрле альтернатив хезмәт үтәргә әзер. 2024 елның 24 июлендә суд аны ел ярым төрмәгә хөкем иткән.
Бу көннәрдә 14 Шаһит, шул исәптән Пён У Чжин, андый альтернатив хезмәттән баш тарткан. 11 кардәшнең эше әле карала. Суд аларны да төрмәгә утыртырга мөмкин. Шулай да үз карашлары нигезендә, хәрби хезмәттән баш тарткан күп кенә кеше, альтернатив хезмәт кырыс шартларда үтсә дә, аны үтәргә булган.
Кайбер саннар һәм вакыйгалар
2024 ел, 24 июль
Пён У Чжинны, альтернатив хезмәттән баш тартканга, ел ярымга хөкем итәләр.
2022 ел, 10 ноябрь
Повестка алгач, Пён У Чжин Эш ресурсларының хәрби идарәсенә мондый хәбәр җиткерә: ул, үз дини карашлары аркасында, хәрби һәм альтернатив хезмәттән баш тарта.
2020 ел, 26 октябрь
Көньяк Корея хөкүмәте альтернатив хезмәт турында закон кабул итә. Аны, үз карашлары аркасында, кулына сугыш коралы алырга ризалашмаган кешеләр куллана ала.
2018 ел, 1 ноябрь
Көньяк Корея Югары суды мондый карар чыгара: үз карашларың аркасында хәрби хезмәттән баш тарту — җинаять түгел. Карарны 13 судья кабул итә (9 риза, ә 4 каршы булган).
2018 ел, 28 июнь
Көньяк Корея Конституцион суды шуны таный: «Хәрби хезмәт турындагы законның» бер пункты Конституциягә каршы килә, чөнки анда үз карашлары аркасында, хәрби хезмәттән баш тартучы кешеләр өчен альтернатив хезмәт каралмаган.
2016 ел, 18 октябрь
Кванджу шәһәре Өлкәсе судының апелляция палатасы үз карашлары аркасында, хәрби хезмәттән баш тартучы өч яшь кешене тулысынча гаепсез дип таба.
2011 ел, 30 август
Конституция суды кабат карар чыгара: үз карашлары аркасында, хәрби хезмәттән баш тартучыларны җавапка тарту турындагы закон ил конституциясенә туры килә.
2004 ел, 26 август
Конституция суды мондый карар чыгара: үз карашлары аркасында, хәрби хезмәттән баш тартучыларны җавапка тарту турындагы закон ил конституциясенә туры килә.
1975 ел
Хөкүмәт хәрби хезмәтне һәр ир кеше үтәргә тиеш дигән закон чыгара.
1973 ел
Хакимлеккә ия кешеләр төрмәдә утыручы Шаһитләргә каршы көч куллана, кыйный. Бу хәл 1990 елларның урталарына кадәр саклана.
1953 ел
Үз карашлары аркасында, хәрби хезмәттән баш тарткан беренче Шаһит төрмәгә утыртыла.