Ebbaruha ya Paulo eya Kabiri Hali Abakolinso
6 Obu nitukorra hamu na uwe, nitubeekambisa kwikiriza embabazi za Ruhanga enyingi muno* baitu muteebwa ekigendererwa kyazo. 2 Habwokuba naagamba ati: “Omu kasumi ak’okwikirizibwamu nkakuhurra, kandi omu kiro eky’okujunwa nkakukoonyera.” Dora! Kanu nuko akasumi ak’okwikirizibwamu. Dora! Kinu nikyo ekiro eky’okujunwa.
3 Titurukugonza kukora ekintu kyona ekirukuleetaho okutabaijuka, nukwo obuheereza bwaitu butabazibwaho kubi; 4 baitu omu bintu byona, tukyolekere kimu ngu tuli baheereza ba Ruhanga, omu kugumiisiriza kwingi, omu mihito, omu kasumi ak’obwetaago, n’omu kugumanganirwa, 5 omu kuteerwa, omu kuteekwa omu nkomo, omu bwimukirro, omu kukora n’amaani, omu kuraara niturora, omu busumi obw’okutaba n’ebyokulya; 6 omu kusemera, omu kumanya, omu kuba bagumiisiriza, omu kwoleka embabazi, omu kuba n’omwoyo ogurukwera, omu kwoleka okugonza okutarumu bugobya, 7 omu kubaza amananu, omu maani ga Ruhanga; kuraba omu by’okurwanisa eby’okuhikirra omu mukono gw’obulyo* n’ogw’emoso,* 8 kuraba omu kuheebwa ekitiinisa n’omu kugaywa, omu kubazibwaho kubi n’omu kubazibwaho kurungi. Turorwa nk’abarukubaza ebisuba kandi kunu tubaza amananu, 9 nk’abatamanyirwe kandi kunu tumanyirwe, nk’abarukufa* kandi dora! tuli boomeezi, nk’abafubiirwe* baitu tutarukuheebwayo kwitwa, 10 nk’abaine obujune, baitu twikara tusemeriirwe, nk’abanaku baitu nitufoora baingi abaguuda, nk’abataine kintu kyona kandi kunu twine ebintu byona.
11 Twesamize akanwa kaitu kubaza* na inywe Abakolinso, kandi tugalihize emitima yaitu. 12 Titufunzire omu kugonza kwaitu hali inywe, baitu inywe mufunzire omu kugonza kwanyu hali itwe. 13 Nahabweki mukole ekintu nikyo kimu hali itwe—nimbabaliza nk’ow’arukubaza n’abaana bange—na inywe mugalihye emitima yanyu.
14 Muteeteeraniza n’abatarukwikiriza.* Kakwate ki akali hagati y’okuhikirra n’obwemi? Rundi ekyererezi nikikwatagana kita n’omwirima? 15 Ekindi, kakwate ki akali hagati ya Kristo na Beriyali?* Rundi omwikiriza* aine kakwate ki n’ow’atarukwikiriza? 16 Kandi yekaru ya Ruhanga ine kakwate ki n’ebisisani? Habwokuba itwe tuli yekaru ya Ruhanga omwomeezi; nkooku Ruhanga yagambire ati: “Ndaikaraga omuli bo, ngenderege omuli bo, ndiba Ruhanga wabo, kandi baliba bantu bange.” 17 “‘Nahabweki, muruge omuli bo, kandi mubeecweho,’ agambire Yahwe,* ‘kandi muleke kukwata ha kintu kyona ekitasemiire’”; “‘kandi na nyowe ndibatangirra.’” 18 “‘Kandi ndifooka isiinywe, kandi muliba batabani bange na bahara bange,’ agambire Yahwe,* Ow’obusobozi Bwona.”