Ebikorwa by’Abakwenda
10 Omu Kaisaliya hakaba haliyo omusaija arukwetwa Koroneeriyo omukuru w’ekitebe ky’abaserikale* ekirukwetwa eky’Abaitale.* 2 Uwe hamu n’ab’omu nju ye boona bakaba nibatiina Ruhanga kandi yakorraga abantu ebikorwa bingi ebirungi kandi yaikaraga naayesengereza Ruhanga. 3 Nka saaha mwenda eza nyamusana, akarora omu kwolekwa malaika wa Ruhanga naija nambere ali, yamugambira ati: “Koroneeriyo!” 4 Koroneeriyo yamutunurra atiinire, yamukaguza ati: “Kiki Mukama wange?” Malaika yamugambira ati: “Okusaba kwawe n’ebikorwa byawe eby’embabazi, bitembere hali Ruhanga nk’ekiijukyo. 5 Tuma abasaija bagende Yopa beete Simooni, arukwetwa Petero. 6 Omusaija onu mugenyi* omu ka ya Simooni omuhazi w’empu, anyakwine enju haihi n’enyanja.” 7 Ahonaaho malaika obu yamazire kugenda, yayeta abaheereza be babiri n’omuserikale arukutiina Ruhanga kuruga omuli abo abaamuheerezaaga, 8 yabagambira buli kimu hanyuma yabatuma Yopa.
9 Ekiro ekyahondiireho obu bakaba nibakyagumizaamu n’orugendo, kandi bali haihi kuhika omu rubuga, Petero yagenda haiguru y’enju nka saaha mukaaga* kusaba. 10 Baitu yarumwa muno enjara kandi yagonza kulya. Obu bakaba nibateekaniza ekihuuro, yatunga okwolekwa, 11 yarora iguru likingwire kandi ekintu ekirukusisana nk’esuuka enkooto nikisirimuka hansi kikwasirwe ensonda zaakyo ina, kyayarwa ha nsi; 12 kandi kikaba kirumu ebisoro eby’amaguru ana ebya buli mulingo, n’ebyekurra ha itaka, n’ebinyonyi eby’omu mwanya. 13 Nubwo iraka kuruga omu iguru lyamugambira liti: “Petero, imuka obaage kandi olye!” 14 Baitu Petero yagamba ati: “Mukama wange, tinsobora habwokuba tinkalyaga ekintu kyona ekitangirwe n’ekitasemiire.” 15 Iraka lyayongera lyamugambira omurundi ogwa kabiri liti: “Ebintu Ruhanga ebi ayereze leka kubyeta ebitasemiire.” 16 Kinu kyabaho omurundi ogwa kasatu kandi hanyuma kyatwarwa omu iguru.
17 Petero obu akaba naakyayekaguza amakuru ag’okwolekwa oku akaba atungire, abasaija abatumirwe Koroneeriyo bakaba nibakaguza enju ya Simooni eri nkaha, beemeriire ha mulyango. 18 Baayeta kandi baakaguza, Simooni arukwetwa Petero obu araaba aliyo. 19 Petero obu akaba naakyateekerezaaho okwolekwa, omwoyo gwamugambira guti: “Dora! Abasaija basatu, nibakuserra. 20 Nahabweki imuka osirimuke hansi, ogende na bo kandi otagurukyagurukya habwokuba niinyowe mbatumire.” 21 Nubwo Petero yasirimuka hansi yahika hali abasaija, yabagambira ati: “Niinyowe ou murukuserra. Mbakoonyere nta?” 22 Baamugarukamu bati: “Koroneeriyo mukuru w’ihe, omusaija ow’okuhikirra kandi arukutiina Ruhanga, kandi arukubazibwaho kurungi omu ihanga lyona ery’Abayudaaya, akaheebwa oburagirizi kuruga hali Ruhanga kuraba omu malaika arukwera kukweta oije omu nju ye nukwo ahurre ebi oraagamba.” 23 Nubwo yabataahya omu nju, baafooka bagenyi be.
Ekiro ekyahondiireho yaimuka yagenda na bo, kandi n’ab’oruganda abamu kuruga Yopa baagenda na uwe. 24 Ekiro ekyahondiireho yahika Kaisaliya, Koroneeriyo akaba naabanihira kandi akaba ayesere abanyabuzaale be, n’abanywani be nfenanfe. 25 Petero obu akaba naagenda kutaahamu, Koroneeriyo yamutangaana, yateeza amaju* omu maiso ge kandi yainama yagwa ha bigere bye. 26 Baitu Petero yamwimukyaho naagamba ati: “Imuka na nyowe ndi muntu nka iwe.” 27 Yataahamu naabaza na uwe kandi yasanga abantu baingi beesoroize hamu. 28 Yabagambira ati: “Mukimanyire kurungi nkooku kitarukwikirizibwa omu biragiro by’Abayudaaya, Omuyudaaya kukoragana n’omuntu ow’ihanga erindi, rundi kumwirra haihi, baitu Ruhanga anyolekere ngu tinsemeriire kweta omuntu weena atasemiire. 29 Nahabweki obu nyeserwe, tinyangire kwija. Kandi hati ngambira habwaki onyesere.”
30 Nubwo Koroneeriyo yagamba ati: “Ebiro bbina enyuma obu nkaba ninsaba omu nju yange omu saaha mwenda,* ahonaaho omusaija ow’ajwaire orugoye orurukwangasana yayemerra omu maiso gange, 31 yangambira ati: ‘Koroneeriyo okusaba kwawe kuhuliirwe kandi n’ebikorwa byawe eby’embabazi biijukirwe omu maiso ga Ruhanga. 32 Nahabweki tuma omu Yopa, beete Simooni arukwetwa Petero. Omusaija ogu ali mugenyi omu nju ya Simooni omuhazi w’empu arukwikara haihi n’enyanja.’ 33 Kandi ahonaaho natuma bakwete kandi na iwe, waikiriza waija. Nahabweki, itwena tuli hanu omu maiso ga Ruhanga, kuhurra ebintu byona Yahwe* ebi akuragiire kutugambira.”
34 Nubwo Petero yatandika kugamba ati: “Mananu kwo hati nkyetegeriize ngu Ruhanga tasoroora, 35 baitu omu ihanga lyona omuntu ow’amutiina kandi akakora ebihikire, nuwe asiimwa omu maiso ge. 36 Akamanyisa abaana ba Isaleeri ekigambo kye obu naabamanyisa amakuru amarungi ag’obusinge kuraba omuli Yesu Kristo kandi ogu nuwe Mukama wa boona. 37 Mumanyire byona ebyabaziibwe omu Buyudaaya yoona, kutandikira Galiraaya hanyuma y’okubatiza Yohaana oku yatebiize; 38 okurukukwata hali Yesu ow’akaba naaruga Nazaleesi, omulingo Ruhanga yamuseesereho omwoyo ogurukwera kandi yamuha n’amaani yagenda omu ihanga lyona naakora ebikorwa ebirungi kandi naakiza abo boona Sitaani* aba akaba naabonabonesa, habwokuba Ruhanga akaba ali hamu na uwe. 39 Kandi tuli bakaiso b’ebintu byona ebi yakozere omu ihanga ly’Abayudaaya n’omu Yerusaalemu, baitu bakamwita kuraba omu kumuhanika ha muti. 40 Ruhanga yamuhumbuura ha kiro ekya kasatu kandi yaikiriza arorwe, 41 hatali abantu boona, baitu abakaiso Ruhanga abaayakomere kara, itwe abaaliire kandi twanywa na uwe hanyuma y’okuhumbuuka kuruga omu bafu. 42 Ekindi, akaturagira kutebeza abantu, n’okubaha obwakaiso omu bwijwire kandi ogu nuwe Ruhanga yataireho kuba mucwi w’emisango hali abantu aboomiire n’abafu. 43 Kandi banabbi boona bakamuheera obwakaiso ngu, ogu weena anyakumwikiririzaamu aganyirwa ebibi bye kuraba omu ibara lye.”
44 Petero obu akaba naakyabaza ebintu ebi, omwoyo ogurukwera gwaija hali abo boona abakaba nibahurra ekigambo. 45 Kandi abaikiriza* abasazirwe abakaba baizire na Petero, baahunirra habwokuba ekisembo ekya busa eky’omwoyo ogurukwera, gukaseeswa na hali abantu ab’amahanga. 46 Bakabahurra nibabaza omu ndimi ezirukwahukana kandi nibakugiza Ruhanga. Nubwo Petero yakaguza ati: 47 “Haroho omuntu weena asobora kutanga abantu banu kubatizibwa omu maizi kandi kunu bamazire kutunga omwoyo ogurukwera, nka itwe?” 48 Yaragira babatizibwe omu ibara lya Yesu Kristo. Hanyuma baamusaba kwikara na bo habw’ebiro bike.