ISOMO 3
Okumaraho Ebizibu
“Mugonzangane muno habwokuba engonzi ziswekerra ebibi bingi.”—1 Petero 4:8
Obu muba nimukyatandika obuswere, musobora kutunga ebizibu. Kinu kiijaho habwokuba muteekereza omu mulingo ogw’enyahukana, kandi buli omu agonza kutereekereza ebizibu omu mulingo uwe ogw’amanyire. Ebizibu bisobora kurugirra aheeru rundi hali inywe.
Baibuli egamba, kirungi kubazaho ebizibu ebiba bizireho kukira kwebihabiha ngu kubireka buleka nikiija kubimaraho. (Matayo 5:23, 24) Kuteeka omu nkora emisingi ya Baibuli nikiija kubakonyera kumaraho ebizibu byaanyu.
1 MUBAZEHO EBIZIBU BYAANYU
BAIBULI EGAMBA: ‘Haroho . . . akasumi akokubalizamu.’ (Omugambizi 3:1, 7) Murole ngu mwatunga obwire kubaza ha bizibu ebizireho. Mutahi waawe mugambire eky’orukuteekereza kandi omubalize amananu. (Abefeso 4:25) N’obu muraaba mutungire obutaikiraniza mwerinde kutabuka. Embaza enungi esobora kubakonyera kutarwana.—Enfumo 15:4; 26:20.
N’obumuraaba mutaikiraniize, buli omu aijuke kutamu mutahi we ekitiinisa. (Abakolosai 4:6) Ebizibu mulengeho kubimaraho bwangu. Tikiri kirungi buli omu kuleka kubaza na mutahi we.—Abefeso 4:26.
EKY’OKUKORA:
Muteho obwire kubazaho ebizibu byaanyu
Mutahi waawe obwaraaba n’abaza, huliriza kurungi otamucwa akalimi. Linda obwire bwawe buhike, nukwo obaze
2 KUSOBORA KWETEGEREZA OINA KUHULIRIZA
BAIBULI EGAMBA: “Mugonzangane. Mukuheereza abandi ekitiinisa, mube kyokuroraho.” (Abarumi 12:10, NW) Okuhuliriza kurungi kikuru muno. Okwebundaaza n’okugirra mutahi waawe embabazi biija kukukonyera kumwetegereza aine eky’arukukusoborra. (1 Petero 3:8; Yakobo 1:19) Huliriza kwe. Obu kiraaba nikisoboka, banza oleke eby’orukukora ohulirize mutahi waawe eky’arukukugambira rundi musabe mukibazeho obwire bundi. Kukiijuka ngu iwe na mutahi waawe mwine ekigenderererwa kimu, eky’okufoora amaka gaanyu amarungi, kiija kukukonyera ‘obutanguhiriza kubiihirwa’ mutahi waawe aine ensonga ey’arukusoborra.—Omugambizi 7:9.
EKY’OKUKORA:
N’obukiraaba ngu mutahi waawe eby’arukusoborra tibirukukusemeza, gumizaamu n’ohuliriza
Huliriza kurungi olengeho kwihamu eby’amakuru omu byarukubaza, amaiso ge n’iraka lye nabyo bisobora kukukonyera kumanya omulingo arukwehura
3 MUKO’RE HA NCWAMU YAANYU
BAIBULI EGAMBA: “Omulimo gwona gurumu omugaso baitu okubaza okweminwa kuleta amasege gonka.” (Enfumo 14:23) Kwikiraniza kyoonka tikirukumara. Mwine kuko’ra ha ncwamu yaanyu. Kisobora kubetaagisa kutamu amaani baitu nimwija kuhika ha kigenderererwa kyaanyu. (Enfumo 10:4) Obu murako’ra hamu nimwija kutunga ‘empeera nungi habw’okutalibana kwanyu.’—Omugambizi 4:9.
EKY’OKUKORA:
Mucwemu buli omu ekyaine kukora kusobora kumaraho ekizibu kyaanyu
Hanyuma y’obwire murole nambere mwahika omu kumaraho ekizibu kyaanyu