Juuni

Yahwe akaha Abakristaayo ab’omu kyasa eky’okubanza emigisa obubakaba nibamanyiira enyikara zaabo empyaka. Emirundi nyingi baahikwahoga okuhiiganizibwa, kandi obwire obumu tibaakunihiraga. Tekerezaaho ekyahikireho Baranaba n’omukwenda Paulo obubakaba nibatebeza omu Rusitura. Ha kubanza, abo abaali nibagonza kubahuliiriza bakabatangirra kurungi. Baitu, abarukubahakaniza bakasoonasoona bamu h’abantu banu kandi baateera Paulo amabaale bamusiga ali haihi kufa. (Ebik. 14:19) Baranaba na Paulo bakagenda baatebeza ahandi. Kiki ekyarugiremu? Bakafoora abantu abamu “abegeswa,” kandi ebigambo n’ekyokurorraho kyabo bikagarramu amaani Abakristaayo bagenzi baabo. (Ebik. 14:​21, 22.) Baingi bakagasirwa habwokuba Baranaba na Paulo batahwemu amaani n’obukiraaba ngu bakahikwaho okuhiiganizibwa okubakaba batarukunihira. Obutwikara nitukora omulimo gwa Yahwe tutarukujwaha, naija kutuha emigisa. w23.04 16-17 ¶13-14

Omukama Daudi akatunga abanyanzigwa baingi muno omu bwomeezi bwe, kandi yasabaga Yahwe kumukonyera. Daudi akaba nakigumya ngu Yahwe nahurra kandi n’agarukamu esaara ze. Naiwe n’osobora kukigumya. Baibuli n’etugumya ngu Yahwe n’asobora kutuha amagezi n’amaani ebiturukwetaaga kusobora kugumiisiriza. N’asobora n’okukozesa eka yaitu ey’eby’omwoyo rundi naabo abatarukumuramya kutukonyera. N’obukiraaba ngu obwire obumu Yahwe tagarukamu esaara zaitu nk’oku tubaire nitunihira, nitukimanya ngu naija kuzigarukamu. Naija kutuha ebiturukwetaaga omu bwire bwonyini. Nahabweki leka twikale nitusaba nitukigumya ngu Yahwe naija kutukonyera hati kandi omu nsi empyaka ‘aliigusa ekintu kyona ekyomiire ekikigonza.’—Zab. 145:16. w23.05 8 ¶4; 13 ¶17-18

Kirungi kuteeka omutima ha birungi ebirarugamu hanyuma y’okuhika ha kigendererwa kyawe. Birungi ki eby’osobora kuteekaho omutima? Obworaaba oine ekigendererwa eky’okusoma Baibuli rundi kusaba, tekerezaaho omulingo kiragumya enkoragana yaawe na Yahwe. (Zab. 145:​18, 19) Obworaaba n’ogonza kukurakuraniza omulingo gw’Ekikristaayo, tekerezaaho nk’oku kiragumya enkoragana yaawe n’abandi. (Bak. 3:14) N’osobora kuhandiika ensonga ezirukukuleetera kugonza kuhika ha kigendererwa kyawe. Hanyuma oikale nozeyijukyamu. Ekindi, mara obwire n’abantu abarukukwekambisa. (Nfu. 13:20) Amananu gali ngu, itwena haroho obutwehurra tuhoirwemu amaani. Kinu nikimanyisa ngu tuleke ekigendererwa kyaitu? Nangwa. Nitusobora kugumizamu nituteekamu amaani kuhika ha kigendererwa kyaitu n’obuturukuba tutakyaine ekihika. N’obukiraaba ngu tikyanguhire, amaani turateekamu tigarukwija kufa busa. w23.05 27-28 ¶5-8

Kukimanya ngu tukozere encwamu etahikire nikisobora kutwekambisa kwatura ekibi kyaitu, nituterekereza ensobi zaitu kandi nitwetantara kuzigarukamu. Kukora ebintu ebi nikisobora kutukonyera kwikara omu kaliitango k’obwomeezi. Obworaaba omazire kukora encwamu embi, ikiriza enyikara nk’oku eri hati. Otasiisa obwire bwawe n’amaani n’olengaho kwoleka ngu okaba ohikire rundi kujunana abandi. Oihireho, ikiriza ensobi zaawe kandi olengeho kukozesa kurungi enyikara ey’orumu hati. Obworaaba n’oyehurra kubi habw’ekibi ekiwakozere, saba Yahwe n’obwebundaazi, ikiriza ekibi kyawe kandi omusabe akuganyire. (Zab. 25:11; 51:​3, 4) Saba ekiganyiro abo ab’osobora kuba wakozere kubi, kandi obukiraaba nikyetaagisa serra obukonyezi kuruga omu bagurusi b’ekitebe. (Yak. 5:​14, 15) Yegera ha nsobi zaawe kandi wetantale kuzigarukamu. Kakuba okora ebi, n’osobora kukigumya ngu Yahwe naija kukuganyira kandi akuhe obukonyezi obworukwetaaga.—Zab. 103:​8-13. w23.08 28-29 ¶8-9

Yehoyada akakonyera Yoasi kuba Omukama omurungi. Nahabweki omukama obwakaba akyali muto akekamba kusemeza Yahwe. Baitu hanyuma ya Yehoyada kufa, Yoasi akatandika kuhuliiriza abakuru abaali becwireho Yahwe. (2 Byom. 24:​4, 17, 18) N’obukiraaba ngu Yahwe akabiihirwa muno “akabatumira banabi babagarre . . . , baitu bayanga okuhurra.” Bakanga kuhuliiriza Zakaliya mutabani wa Yehoyada ow’akaba ali nabbi wa Yahwe, nyakatagara kandi omwihwa wa Yoasi. Omukama Yoasi akaita Zakaliya. (2 Byom. 22:11; 24:​19-22) Yoasi akaba atarukutiina Yahwe. Yahwe akagamba ati: “Nabangaya baliburwa ekitinisa.” (1 Sam. 2:30) Ihe ry’Abaaramu eritaito likasingura erya Yoasi “eringi” kandi bakamuhutaaza muno. (2 Byom. 24:​24, 25) Abaheereza ba Yoasi bakamwita habw’okwita Zakaliya. w23.06 18-19 ¶16-17

Omukwenda Paulo akaba amazire akasumi omu Efeso naatebeza kandi naayegesa abantu amakuru amarungi. (Ebik. 19:​1, 8-10; 20:​20, 21) Akaba naagonza Abakristaayo bagenzi be kandi naagonza kubakonyera baikale bali besigwa hali Yahwe. Abefeso Paulo abaayahandikiire baahonderaga enyegesa ez’ebisuba, kandi nibakora eby’oburaguzi. Abantu ab’omu Efeso bakaba bali basiihani muno kandi tibaaswaraga habw’engeso zaabo. Eby’okwesemeza ebyabaga omu bizaaniro n’omu mikoro ey’ediini, byabamuga obusiihani. (Bef. 5:3) Abantu abarukukira obwingi omu rubuga oru, bakaba balekere “okusalirwa,” ekirukumanyisa ngu omuntu wabo ow’omunda akaba atakyabarumiiriza habw’ebikorwa ebibi ebi baakoraga. (Bef. 4:​17-19) Abefeso obu baali batakeegere endengo za Yahwe ezirukukwata ha kihikire n’ekitahikire, omuntu wabo ow’omunda tiyabarumiirizaaga. Enu niyo ensonga habwaki Paulo yagambire ngu “namagezi gabu gaizirwemu omuirima, kandi baahukaniziibwe nobwomezi obwa Ruhanga.” Baitu Abefeso abamu bataikale omu ngeso ez’omwirima. w24.03 20 ¶2, 4; 21 ¶5-6

Obujunanizibwa bwa Gideoni obw’okukora nk’omucwi w’emisango bwali nibumwetaagisa kuteekamu amaani maingi. Abamidiani obubairukire omu bulemu obw’omu itumbi, Gideoni akabahambya kuruga omu kihanga kya Yezereri kuhikira kimu ha Kyambu Yorudani. (Bac. 7:22) Gideoni akagarukira ha kyambu Yorudani? Nangwa! N’obukiraaba ngu uwe n’abaserikale be 300 baali bajwahire, bakambuka baagumizaamu nibahambya. Kandi hanyuma bakahika h’Abamidiani baabasingura. (Bac. 8:​4-12) Gideoni akaba nakigumya ngu Yahwe yakumuhaire amaani, kandi mali akagamuha. (Bac. 6:​14, 34) Gideoni n’ihe rye bakairukira ha bigere nibahambya abakama babiri aba Midiani, kandi nikizooka ngu abakama banu baali nibagendera ha ngamiya. (Bac. 8:​12, 21) Baitu Ruhanga akakonyera Abasaleri kubakwata. Omu mulingo nugwo gumu, abagurusi nibasobora kwesiga ngu Yahwe naija kubaha amaani habwokuba “taruha kunu tajwaha.” Naija kubaha amaani omu kasumi barukugetaagiramu.—Is. 40:​28, 29. w23.06 6 ¶14, 16

Nitusobora kuba n’omutima ogurukwesiga Yahwe n’obutuhikwaho ebirengo bya mulingo ki. Nahabweki wesige Yahwe. Tekerezaaho obusinguzi Baraka yatungire habw’okwesiga Yahwe. N’obukiraaba ngu hali taharoho icumu lyona rundi engabu omu Isaleri, Yahwe akagambira Baraka kugenda kurwana na Sisera omukuru w’ihe ly’Abakanaani erikaba riine ebyokurwanisa bingi. (Bac. 5:8) Nabbi omukazi Debora akagambira Baraka kuruga omu nsozi agende ahaterekeriire kutangatangana Sisera hamu n’ebigaali bye 900. N’obukiraaba ngu Baraka akaba akimanyire ngu ebigaali binu byakubaire nibigenda kurungi omu kiikaro ekiterekeriire, akorobera oburagirizi bwa Yahwe. Abaserikale ba Baraka obubaali nibasirimuka Orusozi Tabora, Yahwe akanaga enjura ey’amaani. Ebigaali bya Sisera bikakwatira omu bisaabu kandi Yahwe yaha Baraka obusinguzi. (Bac. 4:​1-7, 10, 13-16) Omu mulingo nugwo gumu, Yahwe naija kutukonyera kusingura obuturamwesiga kandi tukesiga oburagirizi obwarukutuha kuraba omu kitebe kye. w23.07 18-19 ¶17-18

Nitwetaaga kwoleka okugumiisiriza kusobora kujunwa. Kusisanaho abaheereza ba Yahwe abesigwa abaakara, tusemeriire kulindirra n’okugumiisiriza kuhikya Ruhanga obwarahikiiriza emirago ye yoona. (Baheb. 6:​11, 12) Baibuli erengesaniza enyikara eiturumu kasumi kanu n’ey’omulimi. (Yak. 5:​7, 8) Omulimi akora n’amaani kubyara embibo n’okugiseserra amaizi, baitu tamanyire nidi obwerimera. Nahabweki alindirra n’okugumiisiriza namanya ngu ebyalimire nibiija kwera. Omulingo nugwo gumu, twikara nitwejumbira omu bintu eby’omwoyo, n’obukiraaba ngu ‘titumanyire ekiro Mukama waitu ekyaliiziramu.’ (Mat. 24:42) Nitulindirra n’okugumiisiriza nitukigumya ngu omu kasumi akahikire, Yahwe naija kuhikiriza byona ebyaturaganiize. Kakuba tujwaha kugumiisiriza, nitusobora kuhwamu amaani kandi tumalirre turugire omu mananu. Ekindi, nitusobora kutandika kuserra ebintu ebiturukutekereza ngu nibiija kutuleetera okusemererwa. Baitu obuturagumiisiriza kuhikya ha mpero, nitwija kujunwa.—Mik. 7:7. w23.08 22 ¶7

Kakuba tulengesaniza obunabbi obuli omu Danieri 2:​41-43 n’obundi oburukusangwa omu kitabu kya Danieri hamu n’obuli omu Kusuku’rwa, nitusobora kugamba ngu ebigere binu nibikikirra obulemi kirimaani obwa Bungereeza n’Amerika oburukukorra hamu kasumi kanu. Danieri akabazaaho obukama bunu kirimaani ati: “Obukama buliba bwamani ekicweka, kandi bwokwatika ekicweka.” Habwaki bwakubaire bwokwatika ekicweka? Habwokuba abantu abarukukikirra ibumba ery’esaabu babulemeseze kukozesa amaani g’ekyoma nk’oku bwakugondeze. Nitwega bingi ha mulingo Danieri yasoboroire ekisisani ekikooto. Eky’okubanza, obulemi kirimaani obwa Bungereeza n’Amerika bwolekere ngu bw’amaani omu bintu ebimu. Ekyokurorraho, amahanga ganu gakakora omulimo gw’amaani omu kusingura Obulemu obw’Ensi Yoona, obw’Okubanza n‘Obwakabiri. Baitu obulemi bunu kirimaani bweyongiire kuceka kandi nibwija kwenyongerra kimu kuceka habwokuba abantu babwo nibarwanisangana kandi nibarwanisa na gavumenti. Ekyakabiri, obulemi bunu kirimaani nubwo burukwija kuba bw’okumalirra, Obukama bwa Ruhanga butakahwerekeriize gavumenti zoona ez’abantu. w23.08 10-11 ¶12-13

Obwire obumu, Daudi yahurraga ayetuntwire habw’ebizibu byona eby’akaba narabamu. (Zab. 18:​4, 5) Baitu, okugonza Yahwe okwakaba namwoleka hamu n’okumufaaho bikamuhuumuza. Yahwe yayebemberaga munywani we ow’akaba ajwahire hali ‘obunyansi obuto’ na hali “amaizi agokuhumura.” Eki kikakonyera Daudi kugarukwamu amaani n’okugumizaamu n’aheereza Yahwe asemeriirwe. (Zab. 18:​28-32; 23:2) N’omu kasumi kanu, okugonza kwa Yahwe okutalekera kutukonyera kugumira ebizibu ebitutunga. (Emp. 3:22; Bak. 1:11) Obwomeezi bwa Daudi bwaikaraga omu kabi, kandi akaba aine abanyanzigwa baingi ab’amaani. Baitu okugonza Yahwe okw’akaba amwiniire kwamuleeteraga kwehurra aine obulinzi. Daudi akaikara atarukutiina habwokuba akaba nakigumya ngu Yahwe naija kumukonyera omu buli nyikara. Nahabweki akagamba ati omu kizina: “[Yahwe] yanjuna omu kutina kwange kwona.” (Zab. 34:4) N’obukiraaba ngu obwire obumu Daudi yatiinaga, akasingura okutiina oku habwokuba akaba nakigumya ngu Yahwe namugonza. w24.01 30 ¶15-17

Yegera ha ncwamu za Yoasi embi. Hanyuma ya Nyakatagara Omukuru Yehoyada kufa, Yoasi akatunga abanywani ababi. (2 Byom. 24:​17, 18) Akacwamu kuhuliiriza abakuru ba Yuda abaali batarukugonza Yahwe. Naiwe n’osobora kuba noikiriza ngu Yoasi akaba asemeriire kwetantara abanywani abo ababi. Baitu uwe akagumizaamu n’abahuliiriza. Zakaliya ow’akaba ali mwana wa isento obuyalengereho kumuhabura, Yoasi akacwamu kumwita. (2 Byom. 24:​20, 21; Mat. 23:35) Mali egi ekaba eri ncwamu mbi kandi ey’obudoma! Yoasi akatandika kurungi obwomeezi bwe, baitu eky’obusaasi akecwaho Yahwe kandi yafooka mwisi. Hakumalirra, abaheereza be bonyini nubo baamwisire. (2 Byom. 24:​22-25) Mali obwomeezi bwe bwakugumizeemu buli burungi kakuba yahuliirize Yahwe naabo abarukumugonza! w23.09 9 ¶6

Yesu akaba akimanyire ngu omukwenda Petero akaba n’asobora kwikara ali mwesigwa. Nahabweki, omu mulingo ogw’embabazi akamugambira ati: “Otatina.” Petero akakwatwaho obwomeezi bwe bwona Yesu obuyamwolekere ngu namwesiga. Hanyuma, Petero na mugenzi we Andereya bakasigaho omulimo gwabo ogw’okusoha baayeteranizaaho Yesu. Kandi Yahwe akabaha emigisa nyingi habw’encwamu egi. (Mar. 1:​16-18) Petero akatunga ebirungi bingi nk’omuhondezi wa Kristo. Akarora Yesu nakiza abarwaire, nabinga daimoni kandi nahumbuura abafu. (Mat. 8:​14-17; Mar. 5:​37, 41, 42) Ekindi, Petero akarora okwolekwa okurukuhuniiriza okurukwoleka ekitiinisa Yesu ekiyakubaire nakyo hanyuma y’okufooka Omukama w’Obukama bwa Ruhanga. (Mar. 9:​1-8; 2 Pet. 1:​16-18) Kandi Petero akaikara naijuka okwolekwa kunu. Akarora ebintu ebyataakurozere kakuba atarafookere muhondezi wa Yesu. Hataroho kugurukyagurukya, kikamusemeza muno kukimanya ngu ataikirize obuceke bwe kumumaramu amaani, ekyamusobozeseze kutunga emigisa enu. w23.09 21 ¶4-5

Omu bbaruha ye ey’okubanza omukwenda Petero akagamba ngu twine kwoleka “okugonza kwingi muno.” Okugonza nk’oku tikugarukira ha kuswekerra ebibi bitaito baitu “nukuswekerra ebibi bingi.” (1 Pet. 4:8) Petero n’asobora kuba yaijukire isomo erirukukwata ha kuganyira Yesu eriyamwegeseze emyaka ey’enyuma. Kasumi ako Petero n’asobora kuba yatekeriize ngu kintu ky’amaani muno kuganyira mugenzi we “okuhikya emirundi musanju.” Baitu Yesu akamwegesa, otwaliremu naitwe kuganyira kuhikya ‘emirundi 77,’ ekirukumanyisa ngu kuganyira tikwine bugarukiro. (Mat. 18:21) Obukiraaba nikikugumira kuteeka omu nkora obuhabuzi bunu otahwamu amaani. Habwokuba abantu ba Yahwe boona tibahikiriire, obwire obumu kibagumira kuganyira. Baitu ekintu ekikuru ekyoine kukora hati nukwo kuganyira ow’oruganda kandi okole ekirukwetaagisa kugarraho obusinge. w23.09 29 ¶12

Yona akegarukamu obwakaba ali munda y’encu kandi akaba nakigumya ngu Yahwe naija kuhurra esaara ye amukonyere. Hanyuma, encu ekatanaka Yona ha musa gw’enyanja kandi akaba ayetekaniize kuhikiiriza obujunanizibwa Yahwe obwakaba amuhaire. (Yon. 2:10–3:4) Obwoba oine ekizibu, kikugumira kusaba Yahwe okamugambira nk’oku orukwehurra? Rundi, ohurra otaine maani n’ekihika eky’okwesomesa? Ijuka ngu Yahwe nayetegereza kurungi enyikara ey’orukurabamu. Nahabweki kigumye ngu n’obworasaba esaara engufu, Yahwe naija kukuha kyonyini ekyorukwetaaga. (Bef. 3:20) Kakuba kiba nikikugumira kwesomesa habwokuba torukwehurra kurungi rundi oli muceke omu mubiri, n’osobora kuhuliiriza Baibuli rundi ebitabu byaitu ebikwasirwe omu maraka. Nikisobora n’okukukonyera kakuba ohuliiriza ebizina byaitu, rundi okarora vidiyo ha jw.org. Obworasaba Yahwe kandi okarora omulingo arukugarukamu esaara zaawe nakozesa Baibuli n’ebintu ebituheebwa ekitebe kye, noija kutunga amaani agaturukwetaaga. w23.10 13 ¶6; 14 ¶9

Eheema yokutangatanganiramu na yekaru ezayombekerwe omu Yerusalemu zikaba zitekaniziibwe omu mulingo ogurukusisana omunda. Omunda hakaba haliyo ebisiika bibiri kandi ebyo nibyo ‘Ekiikaro Ekirukwera’ hamu ‘n’Ekiikaro Ekirukukira Okwera’ ebyabaganizibwamuga enyigamo rundi orutimbi. (Baheb. 9:​2-5; Kurug. 26:​31-33) Omu Kiikaro Ekirukwera hakaba harumu etaara y’ezaabbu, ekyoto eky’okwokezaaho emigaju, n’emeeza ey’eroho omugati gw’okwoleka. “Banyakatagara abaseserweho amagita” nubo bonka abaikirizibwaga kugenda omu Kiikaro Ekirukwera kukora emirimo y’obwanyakatagara. (Kubar. 3:​3, 7, 10) Ekiikaro Ekirukukira Okwera kikaba kirumu esanduuko ey’ekiragaano ey’ekozerwe omu zaabbu kandi yakikirraga kubaho kwa Yahwe. (Kurug. 25:​21, 22) Nyakatagara omukuru wenka nuwe yaikirizibwaga kuhingura ha rutimbi akagenda omu Kiikaro Ekirukukira Okwera omurundi gumu omu mwaka, ha Kiro eky’Okulihirra. (Lev. 16:​2, 17) Yagendayoga aine esagama ey’ebisoro kulihirra ebibi bye n’ebiihanga lyona. Hanyuma, Yahwe akooleka ebintu binu ekibikaba nibikikirra.—Baheb. 9:​6, 7. w23.10 27 ¶12

Emirundi nyingi, Ekigambo kya Ruhanga kituragira ‘kugonzangana.’ (Yoh. 15:12; Bar. 13:8; 1 Bas. 4:9; 1 Pet. 1:22; 1 Yoh. 4:11) Baitu okugonza eri nyehurra ey’eruga omu mutima kandi tesobora kurorwa n’amaiso. Hati, nitusobora tuta kwoleka abandi okugonza okutubainiire? Kuraba omu bigambo n’omu bikorwa byaitu. Haroho emiringo nyingi eitusobora kwolekamu ab’oruganda na banyaanya itwe ngu nitubagonza. Enu eri emu haliyo. Baibuli n’etutererra eti: “Mubazege omuntu wena amazima nomutahiwe.” (Zak. 8:16) “Mwikale omu businge hagati yanyu.” (Mar. 9:50) “Omu kutekamungana ekitiinisa, ninywe mubanze.” (Bar. 12:​10, NWT) “Muirizanganege inywenka nainywenka.” (Bar. 15:7) ‘Muganyiranganege.’ (Bak. 3:13) “Mujunangane enketo zanyu.” (Bag. 6:2) “Muhumuzanganege inywenka.” (1 Bas. 4:18) “Mwombekege inywena, omuntu wena omutahiwe.” (1 Bas. 5:11) “Musabiranganege.”—Yak. 5:16. w23.11 9 ¶7-8

Buli kiro, tukora encwamu ezirukutwetaagisa kuba n’okwikiriza okw’amaani. Ekyokurorraho, tukora encwamu ezirukukwata ha banywani, eby’okwesemeza, eby’obwegese, obuswere, abaana, n’emirimo. Tusemeriire kwekaguza, ‘Encwamu zange nizooleka ngu ninkigumya ngu obusinge bunu buli haihi kuhwaho kandi ngu Yahwe ali haihi kuleetaho ensi empyaka? Rundi nanyowe ninyetwaza nk’abo abataine okunihira okw’okwomeera ebiro n’ebiro?’ (Mat. 6:​19, 20; Luk. 12:​16-21) Nitwija kukora encwamu enungi obuturagumya okwikiriza kwaitu ngu ensi empyaka eri haihi kwija. Tutunga ebirengo ebirukutwetaagisa kuba n’okwikiriza okw’amaani. Nitusobora kuhiiganizibwa, kutunga oburwaire obw’amaani, rundi ebintu ebindi ebisobora kutuleetera kuhwamu amaani. Ha kubanza nitusobora kulengaho kubigumira. Baitu kakuba biikaraho kumara akasumi akaraihire, nikyetaagisa okwikiriza okw’amaani kusobora kubigumiisiriza n’okugumizaamu nituheereza Yahwe n’okusemererwa.—1 Pet. 1:​6, 7. w23.04 27 ¶4-5

Yahwe n’agonza tukorre ha saara zaitu. Ekyokurorraho, ow’oruganda n’asobora kusaba Yahwe amukonyere mukama we ha mulimo amwikirize kugenda ha rusorrokano orukooto. Yahwe n’asobora kugarukamu ata esaara egi? N’asobora kuha ow’oruganda ogu obumanzi obwarukwetaaga kugambira mukama we. Ow’oruganda n’asobora kukorra ha saara ye obu nagenda kusaba mukama we amwikirize kugenda. Nikisobora nokumwetaagisa kukikora emirundi yingi. N’asobora n’okusaba omukozi mutaahi we kumukonyeraho ha biro ebyataroho, rundi kugambira mukama we kutamusasura ha biro ebi ebyataroho. Yahwe n’agonza twikale nitumusaba. Yesu akagamba ngu esaara ezimu Yahwe tazigarukamu ahonaaho. (Luk. 11:9) Nahabweki tutajwaha! Saba kuruga ha mutima kandi oikale nomugambira ebyorukugonza. (Luk. 18:​1-7) Eki obutukikora, twoleka Yahwe ngu ebiturukusaba bikuru muno haliitwe. Ekindi, twoleka ngu twine okwikiriza ngu naija kutukonyera. w23.11 22-23 ¶10-11

Yahwe akaraganiza munywani we Iburahimu ngu amahanga goona gaakutungire omugisa kuraba omu ruzaaro rwe. (Kub. 15:5; 22:18) Habwokuba Iburahimu akaba aine okwikiriza okw’amaani, akaba nakigumiza kimu ngu byona Ruhanga ebiyaraganiize nibiija kuhikirra. Baitu nabwo, Iburahimu obwakaba aine emyaka 100 kandi mukazi we aine emyaka 90, bakaba batakatungire mwana. (Kub. 21:​1-7) Baibuli egamba ngu Iburahimu “[akaikiriza] nanihira ekitarukunihirwa, afoke isenkuru wamahanga maingi, nkokukyagambirwe.” (Bar. 4:18) Tukimanyire ngu Iburahimu ekyaba nanihira kikahikirra. Akazaara Isaka, omwana ow’akaba alindiriire kumara akasumi. Habwaki Iburahimu akaba nakigumya ngu Yahwe naija kuhikiiriza ekiyamuraganiize? Habwokuba Iburahimu akaba aine enkoragana enungi na Yahwe, akaba “amanyiire kimu ati [Ruhanga] ekiyaragire” nikiija kuhikirra. (Bar. 4:21) Yahwe akasiima Iburahimu kandi yamweta omuntu ow’ahikiriire habw’okwikiriza kwe.—Yak. 2:23. w23.12 8 ¶1-2

Ow’oruganda omuto ow’arukwesigwa ahikiiriza kurungi obujunanizibwa obu muhairwe. Tekerezaaho ekyokurorraho kya Yesu. Tiyanagiirizaaga obujunanizibwa obu akaba aine. Oihireho, akahikiiriza obujunanizibwa bwona Yahwe obu akaba amuhaire n’obu kiraaba ngu kyali kitanguhire. Akaba n’agonza abantu, kukira muno abegeswa be kandi akehayo kubafeera. (Yoh. 13:1) Yegera ha kyokurorraho kya Yesu obu noyekamba kuhikiiriza obujunanizibwa bwona obu barakuha. Obu oraaba otamanyire omulingo orabuhikiirizaamu, ba mwebundaazi kandi osabe obukonyezi kuruga omu b’oruganda abakuzire omu by’omwoyo. Otabukora binkwatiire ki. (Bar. 12:11) Oihireho, obuhikiirize n’omutima gumu kandi okikole “[habwa Yahwe], kunu tihali habwa abantu.” (Bak. 3:23) Ky’amananu ngu tohikiriire, nahabweki obu orakora ensobi ogiikirize.—Nfu. 11:2. w23.12 26 ¶8

Kitusemeza obu tubatizibwa tukafooka kicweka ky’eka ya Yahwe. Kuba n’enkoragana enungi na Yahwe mugisa gw’amaani kandi boona abaine omugisa gunu baikiranganiza na Daudi ayagambire ati: “Ayina omugisa omuntu owokoma, owoiriza holi, aikalege omu zigati zawe.” (Zab. 65:4) Yahwe tamara gaikiriza buli muntu wena kuba n’enkoragana enungi na uwe. Akomamu abo abooleka ngu nibagonza kuba n’enkoragana enungi na uwe. (Yak. 4:8) Obu oyehayo hali Yahwe kandi okabatizibwa, n’osobora kukigumya ngu Yahwe naija kukuha “omugisa, kunu tihalibaho omwanya” ahokuguteeka.” (Mara. 3:10; Yer. 17:8) Kubatizibwa eba eri ntandikwa y’okuheereza Yahwe. Noija kukora kyona eki orukusobora kugumira ha kweraga kwawe obu orayohebwa rundi obu oratunga ebizibu. (Mug. 5:​4, 5) Nk’omu h’abegeswa ba Yesu, noija kuhondera ekyokurorraho kye kandi oyorobere ebiragiro bye.—Mat. 28:​19, 20; 1 Pet. 2:21. w24.03 8 ¶1-3

Baitu kakuba iwe n’owoli nauwe omu buswere mutarukwegondeza omu kumara hamu obwire? Kiki ekimusobora kukora? Tekerezaaho kinu. Obwoba okyahembere omurro, tigutandika guli gw’amaani. Nikyetaaga kwikara noteekamu enku enkooto mporampora. Omu mulingo nugwo gumu, nimusobora kutandika nimumara hamu obwire buke buli kiro. Mulengeho kukora ekintu inywena ekimurukugonza. (Yak. 3:18) Mporampora nimusobora kutandika kugumya enkoragana yanyu. Kuteekamungana ekitiinisa kikuru muno omu buswere. Nikisisana nk’orwoya rwa Oxygen orusobozesa omurro kwikara nigwaka. Orwoya runu oburuhwaho omurro guzima ahonaaho. Omu mulingo nugwo gumu, kakuba abali omu buswere batateekamungana ekitiinisa nibaija kukirora ngu okugonza okubainiirengana nikwija kugenda nikukeeha. Baitu, obubateekamungana ekitiinisa, okugonza kwabo kweyongera. Kutekereza ngu noteekamu omugonzebwa waawe ekitiinisa tikirukumara, asemeriire kuba nakirora ngu mali nokimuteekamu. w23.05 22 ¶9; 24 ¶14-15

Omu Baibuli, abaheereza ba Ruhanga abesigwa bakabazaaho akasumi obubayeralikiriire kandi baatiina habw’abanyanzigwa baabo rundi habw’ebizibu ebindi. (Zab. 18:4; 55:​1, 5) Naitwe nitusobora kuba nituhikwaho okuhakanizibwa omu ka, ha isomero, ha mulimo rundi gavumenti n’etuhiiganiza. Nitusobora kuba twine oburwaire obw’amaani kandi nitutiina ngu nitwija kufa. Obutwesanga omu nyikara nka zinu, nitusobora kwehurra nk’omwana omuto ow’ataine bukonyezi. Baitu Yahwe atukonyera ata? Atuhuumuza. Nahabweki, tunga obwire obaze na Yahwe kuraba omu kusaba kandi osome Ekigambo kye. (Zab. 77:​1, 12-14) Hanyuma, obworatunga ekizibu, ekintu ekyorabanza kutekerezaaho nukwo kugambira Sso ow’omu iguru. Gambira Yahwe ebirukukuleetera kutiina, n’omulingo orukwehurra. Ikiriza abaze naiwe kandi akuhuumuze kuraba omu Byahandiikirwe.—Zab. 119:28. w24.01 24-25 ¶14-16

Kikuru muno kuba n’okugonza okw’okuhika ha kigendererwa kyawe. Omuntu owarukugonza kuhika ha kigendererwa kye ateekamu amaani maingi kukihikaho. Kandi obutuba n’okugonza okw’okuhika ha bigendererwa byaitu, kitukonyera kubihikiiriza. Baitu, kiki eky’osobora kukora kweyongera kuba n’okugonza? Saba Yahwe. Yahwe naija kukuha omwoyo ogurukwera ogurakwekambisa kugonza kuhika ha kigendererwa kyawe. Obwire obumu tweteraho ekigendererwa habwokuba tukimanyire ngu nikyetaagisa, kandi mali eki kirungi. Baitu nitusobora kuhurra tutarukugonza kukihikiiriza. Wecumiitirizeeho Yahwe ebyakukoliire. (Zab. 143:5) Omukwenda Paulo akecumiitirizaaho embabazi Yahwe eziyamwolekere kandi kyamwekambisa kweyongera kuteekamu amaani kumuheereza. (1 Kol. 15:​9, 10; 1 Tim. 1:​12-14) Nikyo kimu naiwe, obworaikara notekerezaaho ebintu Yahwe akukoliire, nikiija kukwekambisa kuteekamu amaani kuhika ha kigendererwa kyawe.—Zab. 116:12. w23.05 27 ¶3-5

Tusemeza Isiitwe ow’omu iguru obutukugiza ibara lye. (Zab. 119:108) Baitu eki nikimanyisa ngu Ruhanga Ow’obusobozi bwona ali nk’abantu abatahikiriire abagonza kukugizibwa? Nangwa. Obutukugiza Isiitwe ow’omu iguru, twoleka ngu Sitaani ekiyabalizeeho buli omu haliitwe kisuba. Sitaani agamba ngu busaho muntu wena asobora kuteekamu amaani kweza ibara lya Ruhanga. Kandi ngu busaho muntu wena asobora kwikara ali mwesigwa hali Ruhanga obw’atunga ebizibu. Agamba ngu itwena nitwija kuleka kuheereza Ruhanga kakuba tukirora ngu kutamuheereza nikiija kutugasira. (Yob. 1:​9-11; 2:4) Baitu Yobu akaikara ali mwesigwa kandi yayoleka ngu Sitaani ebiyabalize bisuba. Naiwe oraikara oli mwesigwa hali Ruhanga? Buli omu haliitwe n’asobora kwekamba kweza ibara lya Isiitwe n’okumusemeza kuraba omu kumuheereza n’obwesigwa. (Nfu. 27:11) Kandi mali gunu tugutwara nk’omugisa ogw’amaani. w24.02 8-9 ¶3-5

Hanyuma ya Musa na Yosuha kufa, Yahwe akakoma abacwi b’emisango kwebembera abantu be. Hanyuma, omu kasumi ak’abakama, Yahwe akakoma banabbi kwebembera abantu be. Abakama abesigwa, baahonderaga obuhabuzi bwa banabbi. Ekyokurorraho, n’obwebundaazi, Omukama Daudi akaikiriza obuhabuzi obwamuhairwe nabbi Nasani. (2 Sam. 12:​7, 13; 1 Byom. 17:​3, 4) Omukama Yehosafati akahondera oburagirizi nabbi Yahazyeri obuyamuhaire kandi yayekambisa abantu ba Yuda ‘kwikiriza banabbi ba Ruhanga.’ (2 Byom. 20:​14, 15) Omukama Hezekiya obwakaba ayetuntwire akasaba nabbi Isaya oburagirizi. (Is. 37:​1-6) Buli murundi abakama baahonderaga oburagirizi bwa Yahwe, yabahaga emigisa kandi yalindaga ihanga lyona. (2 Byom. 20:​29, 30; 32:22) Kikaba nikyeyolekera kimu ngu Yahwe akaba nakozesa banabbi be kwebembera abantu be. w24.02 21 ¶8

Sitaani naagonza tukoragane n’abantu abatahondera endengo za Yahwe. Tusemeriire kukiijuka ngu abantu abaturukwikara nabo maiso h’amaiso tibali nubo bonka abasobora kutusiisa. Tusemeriire kwerinda n’abantu abatubaza nabo ha mikura y’okubalizaaho. Tusemeriire kwangira kimu entekereza y’ensi erukugamba ngu tikiri kibi kwejumbira omu bikorwa by’obusiihani. Tukimanyire ngu entekereza egi tehikire. (Bef. 4:​19, 20) Tusemeriire kwekaguza: ‘Omu nyikara nambere kitarukwetaagisa, nyetantara kumara obwire bwingi ndi hamu n’abakozi rundi abeegi bataahi bange rundi abantu abandi abatateekamu endengo za Yahwe ekitiinisa? N’obumanzi ngumira ha ndengo za Yahwe, abandi n’obu bandora nk’omuntu arukwefoora omuhikiriire ekihinguraine?’ Nk’oku kyolekerwe omu 2 Timoseo 2:​20-22, tusemeriire kwegendereza obu turukuba nitukomamu abanywani omu kitebe. Tusemeriire kukiijuka ngu abamu nibasobora kutatukonyera kwikara nituheereza Yahwe n’obwesigwa. w24.03 22-23 ¶11-12

Wakalengahoga kutekerezaaho Yahwe muntu wa mulingo ki? N’obuturaaba tutasobora kurora Yahwe, Baibuli emubazaaho omu miringo erukwahukana. Baibuli eyeta Yahwe ‘izooba, engabu’ kandi ‘omurro ogurukwokya.’ (Zab. 84:11; Baheb. 12:29) Omu kwolekwa, Ezekyeri akabazaaho Yahwe nk’ow’arukusisana ibaale safiro, ekyoma ekirukumulinkana, hamu n’omuhangaizima ogurukwangasana. (Ez. 1:​26-28) Habwokuba titusobora kurora Yahwe, nikisobora kutugumira kukiikiriza ngu n’atugonza. Abantu abamu nibasobora kutekereza ngu Yahwe tasobora kubagonza habw’ebintu ebibi ebibaakozere kara. Yahwe amanyire habwaki obwire obumu nikisobora kutugumira kwikiriza ngu n’atugonza. Baitu akozesa Baibuli kutukonyera kumanya muntu wa mulingo ki. Baibuli egamba ngu Yahwe kugonza. (1 Yoh. 4:8) Byona ebyakora bisigikirra ha kugonza. Habwokuba Ruhanga aine okugonza kwingi kandi okw’amaani, akwoleka naabo abatarukumugonza.—Mat. 5:​44, 45. w24.01 26 ¶1-3

Yahwe akakoma Musa kwebembera Abaisaleri kuruga Misiri, kandi kusobora kukozesa obwakaiso oburukurorwa, Yahwe akabateraho enyomyo y’ekicu nyamusana, n’enyomyo y’omurro ekiro. (Kurug. 13:21) Musa hamu n’Abaisaleri bakahondera enyomyo kandi yabahikya ha Nyanja Erukutukura. Abantu obubaarozere ihe ly’Abamisiri niribahambya kandi omu maiso gaabo haliyo enyanja, bakatiina muno. Baitu ekaba etali nsobi. Yahwe akakozesa Musa kubarabya omu muhanda ogu akigenderiire. (Kurug. 14:2) Kandi hanyuma Ruhanga akabajuna omu mulingo ogurukuhuniiriza. (Kurug. 14:​26-28) Kumara emyaka 40, Musa akebembera abantu ba Ruhanga omu irungu obu nahondera enyomyo y’ekicu. (Kurug. 33:​7, 9, 10) Yahwe yabazaaga na Musa kuraba omu kicu eki, kandi hanyuma Musa yagambiraga Abaisaleri oburagirizi obw’amuhaire. Abaisaleri baakirorraga kimu ngu Yahwe akaba nakozesa Musa kubebembera. w24.02 21 ¶4-5