Maayi

Abakristaayo ab’omu kyasa eky’okubanza nabo bakakwatwaho enjara ey’amaani obuyagwire “omu nsi zona.” Hataroho kugurukyagurukya abazaire bakeralikirra ha mulingo baratunga ebyokulya eby’amaka gaabo. Kandi ensinganto abaali nibagonza kwongera ha buheereza bwabo? Obundi bakehurra ngu babanze balindeho kuhikya enjara obw’erahwaho. N’obukiraaba ngu bakaba bali omu nyikara ey’egumire, Abakristaayo bakagumizaamu nibaheereza Yahwe. Bakagumizaamu nibatebeza kandi baabagana ebibakaba baine n’Abakristaayo bagenzi baabo omu Buyudaaya. (Ebik. 11:​29, 30) Abo abaahairwe ebyokulya bakakirora ngu Yahwe akaba n’abasagika. (Mat. 6:​31-33) Baine kuba bayeyongiire kwirra haihi n’Abakristaayo bagenzi baabo abaabakonyiire. Kandi abo abahaireyo rundi bayejumbira omu mulimo ogw’okukonyera bakatunga okusemererwa.—Ebik. 20:35. w23.04 16 ¶12-13

Obwire obumu Yahwe agarukamu esaara z’abaheereza be naleetera abantu abatarukumuramya kubakonyera. Ekyokurorraho, akaleetera Omukama Atakisakisi kwikiriza Nehemiya kugaruka Yerusalemu kukonyera omu kwongera kwombeka orubuga. (Neh. 2:​3-6) N’omu kasumi kanu, Yahwe n’asobora kuleetera abo abatarukumuramya kutukonyera obuturukuba tuli omu bwetaago. Obwire obumu esaara zaitu tizigarukwamu nk’oku twakugondeze. Baitu Yahwe azigarukamu omu omulingo oguratukonyera kwikara tuli besigwa haluwe. Nahabweki lengaho kumanya omulingo Yahwe agarukiremu esaara zaawe. Tusemeriire kutekerezaaho omulingo Yahwe arukugarukamu esaara zaitu. (Zab. 66:​19, 20) Twoleka okwikiriza obututagarukira ha kusaba Yahwe kyonka, baitu n’obutwikiriza omulingo agarukiremu esaara zaitu.—Baheb. 11:6. w23.05 11 ¶13; 12 ¶15-16

Obutwayehaireyo hali Yahwe tukamuraganiza kumuramya n’okukora eby’agonza ebiro n’ebiro. Tusemeriire kulinda omurago ogu. Kuhikiiriza omurago gunu buli kiro tikigumire. Yahwe akatuhanga nukwo tukole eby’agonza. (Kus. 4:11) Akatuhanga omu kisisani kye kandi yatuteekamu ekyetaago eky’okuhurra nitugonza kumuramya. Nahabweki, nitusobora kumwirra haihi kandi kitusemeza obutukora eby’agonza. Ekindi, obutukora Ruhanga eby’agonza kandi tukahondera Omwana we, tutunga “okuhumura.” (Mat. 11:​28-30) Nahabweki gumizaamu n’ogumya enkoragana yaawe na Yahwe kuraba omu kutekerezaaho ebirungi byona ebyakukoliire, n’emigisa ey’akuraganiize omu kasumi ak’omumaiso. Obworayeyongera kugonza Yahwe nikiija kukwanguhira kumworobera. (1 Yoh. 5:3) Yesu akasobora kwikara nakora Ruhanga eby’agonza, habwokuba yasabaga Yahwe kumukonyera kandi akateeka omutima ha mpeera ye. (Baheb. 5:7; 12:2) Nka Yesu, saba Yahwe akuhe amaani kandi oikale n’otekerezaaho okunihira kw’obwomeezi obutahwaho. w23.08 27-28 ¶4-5

Itwena tugonza abantu abooleka okugumiisiriza. Habwaki? Tuteekamu ekitiinisa abantu abalindirra ekintu batabiihirwe. Kitusemeza muno abantu abandi obubatugumiisiriza obutukora ensobi. Kandi nitusiima muno ngu ayatwegeseze Baibuli akatugumiisiriza obukyatugumiraga kwikiriza rundi kuteeka omu nkora enyegesa za Baibuli. Ekirukukirayo obukuru, nitusiima muno Yahwe habwokuba n’atugumiisiriza! N’obukiraaba ngu tugonza abantu abooleka okugumiisiriza, obwire obumu nikisobora kutatwanguhira kukwoleka. Ekyokurorraho, nikisobora kutatwanguhira kugumiisiriza obutuba tuli omu rukarra rw’abantu baingi kandi tukereriirwe. Nitusobora kwanguha kukwatwa ekiniga abantu abandi obubakora ebintu ebitutarukugonza. Kandi obwire obumu nikisobora kutugumira kwoleka okugumiisiriza obutuba tulindiriire ensi empyaka. Omu nyikara zinu zoona nikitwetaagisa kweyongera kugumiisiriza. w23.08 20 ¶1-2

Yahwe nuwe yagambiire Gideoni kukehya ihe ery’akaba aine. N’asobora kuba yayekagwize ati: ‘Empindahinduka enu neyetaagisa? Y’amagezi?’ Baitu nabwo, Gideoni akoorobera Yahwe. Abagurusi kasumi kanu beegera ha kyokurorraho kya Gideoni obubateeka omu nkora obuhabuzi obubatungire kuruga omu kitebe kya Yahwe. (Baheb. 13:17) Gideoni akaikara nayorobera Yahwe n’obukiraaba ngu akaba natiina kandi obujunanizibwa obuyahairwe bwali nibusobora kumurugirramu akabi. (Bac. 9:17) Hanyuma ya Yahwe kugumya Gideoni, akakigumiza kimu ngu yakumukonyiire kulinda abantu be. Abagurusi abarukwikara omu biikaro nambere omulimo gwaitu gutangirwe, nibasobora kwegera ha kyokurorraho kya Gideoni. N’obumanzi, nibebembera ensorrokano kandi nibekamba omu buheereza n’obukiraaba ngu nibatiinisirizibwa kuteekwa omu nkomo, ab’obusobozi kubakaguliiriza, kufeerwa emirimo yabo rundi kuteerwa. Omu kasumi ak’omuhito omwingi abagurusi nibaija kwetaaga obumanzi kworobera oburagirizi obubaratunga n’obukiraaba nikiteeka obwomeezi bwabo omu kabi. w23.06 5-6 ¶12-13

Yahwe akateeka Nyakatagara Omukuru Yehoyada omu Baibuli nukwo tumwegereho. (Bar. 15:4) Kandi Yehoyada obuyafiire akatunga omugisa ogw’embaganiza ogw’okuzikwa “omu rubuga rwa Daudi omukama, baitu akakora kurungi omu Isareri, na hali Ruhanga nenjuye.” (2 Byom. 24:​15, 16) Ekyokurorraho kya Yehoyada nikitwegesa kukurakuraniza kutiina Ruhanga. Abagurusi nibasobora kwegera ha kyokurorraho kya Yehoyada kuraba omu kwikara bali besigwa n’okwikara betekaniize kulinda igana lya Ruhanga. (Ebik. 20:28) Ekindi, nikyegesa abakuzire omu myaka ngu obubaraikara nibatiina Yahwe kandi bali besigwa haluwe, n’asobora kubakozesa kuhikiiriza ekigendererwa kye. Abato nibasobora kwegera ha mulingo Yahwe yatwaizeemu Yehoyada, kuraba omu kutwaza kurungi abakuzire omu myaka n’okubateekamu ekitiinisa, kukira muno abo abaheeriize Yahwe n’obwesigwa kumara emyaka nyingi. (Nfu. 16:31) N’obwesigwa leka tusagike abo abatwebembera kandi tuborobere.—Baheb. 13:17. w23.06 17 ¶14-15

Omu nsorrokano, kozesa amagezi obworaaba n’ocwamu emirundi ey’oragarukamu. Kakuba tuhanika muno omukono gwaitu, nitusobora kuleetera ow’arukwebembera kuhambirizibwa kwikara natukoma, n’obukiraaba ngu abandi tibakahaire eby’okugarukamu. Kinu nikisobora kumaramu abandi amaani nibaleka kuhanika emikono. (Mug. 3:7) Abatebezi baingi obubaikara nibahanika emikono, nitusobora kutatunga omugisa ogw’okugarukamu emirundi nyingi nk’oku twakugondeze. Obwire obumu, arukwebembera n’asobora kutatukoma. Nitusobora kusaasamu kake, baitu twetantale kubiihirwa. (Mug. 7:9) Obworaaba otasoboire kugarukamu nk’oku wakugondeze, habwaki otahuliiriza kurungi eby’okugarukamu by’abandi nukwo hanyuma y’orusorrokano okabasiima? Kusiima ab’oruganda na banyaanya itwe nikisobora kubagarramu amaani nk’eky’okugarukamu eky’obaire n’ogonza kuha. w23.04 23-24 ¶14-16

Wesomese Ekigambo kya Ruhanga kandi okyecumiitirizeeho. Nk’omuti ogwine emihama ey’ehamire gusobora kwemerra kurungi, naitwe kakuba tuba n’okwikiriza okugumire, nikiija kutukonyera kwesiga Yahwe. Omuti obugweyongera kukura, n’emihama eyeyongera kuhama. Obuturayesomesa kandi tukecumiitirizaaho ebitusomere, nitwija kugumya okwikiriza kwaitu kandi tukigumye ngu emihanda ya Ruhanga niyo erukukirayo oburungi. (Bak. 2:​6, 7) Tekerezaaho omulingo obuhabuzi, oburagirizi n’obulinzi bwa Yahwe byakonyiire abaheereza be ab’omu kasumi akaakara. Ekyokurorraho, Ezekyeri akateeka omutima ha bipimo bya yekaru eyiyarozere omu kwolekwa. Okwolekwa kunu kukamugumya kandi nikutwoleka omulingo tusobora kuhondera endengo za Yahwe obukirukuhika ha kuramya okw’amananu. (Ez. 40:​1-4; 43:​10-12) Naitwe tugasirwa obututunga obwire bwokesomesa n’okwecumiitirizaaho ebintu ebihamire ebirukusangwa omu Kigambo kya Ruhanga. Nitusobora kutunga omutima ogugumire, tukesigira kimu Yahwe.—Zab. 112:7. w23.07 18 ¶15-16

Baibuli erumu ebyokurorraho bingi ebirungi ab’oruganda abato ebi basobora kwegeraho. Ebyokurorraho binu nibyo eby’abasaija abaakara abaagonzaaga Ruhanga kandi baahikiirizaga obujunanizibwa oburukwahukana omu kurolerra abantu be. Ekindi, n’osobora kutunga ebyokurorraho ebindi ebirungi kuruga omu b’oruganda abakuzire omu by’omwoyo abali omu ka yanyu rundi omu kitebe. (Baheb. 13:7) Kandi n’osobora n’okwegera ha kyokurorraho ekirukukirayo oburungi ekya Yesu Kristo. (1 Pet. 2:21) Obu oraaba n’oyesomesaaho ebyokurorraho binu, wecumiitirizeeho emiringo yabo enungi. (Baheb. 12:​1, 2) Kandi orole omulingo osobora kubeegeraho. Omuntu omwekengi atekerezaaho encwamu atakagikozere. Nahabweki lengaho kukurakuraniza obwekengi. Eky’okubanza, lengaho kumanya emisingi ya Baibuli kandi otekerezeeho omulingo esobora kukugasira. Hanyuma, okozese emisingi egi kukora encwamu azirasemeza Yahwe. (Zab. 119:9) Eki nikiija kukukonyera kufooka Omukristaayo ow’akuzire omu by’omwoyo.—Nfu. 2:​11, 12; Baheb. 5:14. w23.12 24-25 ¶4-5

Abazaire nibasobora kwegesa abaana baabo kugarukamu n’obuculeezi kakuba bahakanizibwa. (Yak. 3:13) Abazaire abamu berengesamu n’abaana omu kuramya okw’eka. Batekerezaaho enyikara ezisobora kubaho ha isomero, babazaaho omulingo basobora kugarukamu kandi beegesa abaana kugarukamu omu mulingo gw’obuculeezi n’embabazi. Kwerengesamu nikisobora kukonyera Abakristaayo kugarukamu abandi omu mulingo ogurukunanura, n’okugumiza kimu ngu ebibarukwikiririzaamu bihikire. Ha jw.org hansi y’ekicweka “Young People Ask” haroho ebicweka ebisobora kukonyera ensinganto kugumya okwikiriza kwabo n’okwega omulingo basobora kugarukamu omu bigambo byabo. Kakuba twesomesaaho ebicweka binu nk’eka, nitwija kwega kugarukamu omu mulingo gw’obuculeezi kandi ogurukusikiiriza. w23.09 17 ¶10; 18 ¶15-16

Waketerahoga ekigendererwa eky’omwoyo baitu kikakugumira kukihikaho? Obukiraaba nukwo kiri toli wenka. Ekyokurorraho, Philip akaba n’agonza kwongera ha mirundi arukusaba n’okusemezaamu esaara ze, baitu kyamugumiraga kutunga obwire obw’okusaba. Munyaanya itwe Erika aketeraho ekigendererwa eky’okuhika ha buli rusorrkano rw’obuheereza omu bwire, baitu akaikara nakerererwa. Obworaaba oine ekigendererwa eky’oyeterireho baitu kikyakulemere kukihikaho otahwamu amaani. N’okuhika ha kigendererwa ekitaito, kyetaagisa kuteekamu obwire n’amaani. Habwokuba n’okyagonza kuhika ha kigendererwa kyawe nikyoleka ngu notwara enkoragana yawe na Yahwe nk’ey’omuhendo kandi n’ogonza kumuha ekirukukirayo oburungi. Yahwe nasiima habw’amaani orukuteekamu. Ekindi, tarukukunihirramu kukora ekyotarukusobora. (Zab. 103:14; Mik. 6:8) Nahabweki wetereho ebigendererwa eby’osobora kuhikaho, kandi ebirukuhikaana n’enyikara yaawe. w23.05 26 ¶1-2

Abantu abamanzi nabo haroho obubatiina, baitu tibaikiriza okutiina kubalemesa kukora ekihikire. Danieri akaba ali musigazi omumanzi. Danieri akesomesa ebintu ebyahandiikirwe banabbi, otwaliiremu n’obunabbi bwa Yeremiya. Omu kwesomesa oku, akakyetegereza ngu Abayudaaya bakaba bali haihi kuruga omu bunyagwa. (Dan. 9:2) Kurora obunabbi obu nibuhikirra kikaleetera Danieri kweyongera kwesiga Yahwe, kandi abo abamwesiga nibasobora kutunga obumanzi oburukirrayo kimu. (Lengesaniza na Abarumi 8: 32, 37-39.) Ekirukukira obukuru, Danieri yasabaga hali Yahwe. (Dan. 6:10) Yasabaga Yahwe ekiganyiro kandi namugambira omulingo arukwehurramu. Ekindi, Danieri yasabaga obukonyezi. (Dan. 9:​4, 5, 19) Nauwe akaba ali muntu nkaitwe kandi atazaarwe ali mumanzi. Oihireho, akakurakuraniza obumanzi kuraba omu kwesomesa, kusaba, n’okwesiga Yahwe. w23.08 3 ¶4; 4 ¶7

Obu tworobera ab’obusobozi, tugasirwa kandi kigasira n’abandi. Omu mulingo ki? Twetantara kuhikwaho ebifubiro ebiheebwa abo abanga kworobera ebiragiro. (Bar. 13:​1, 4) Ekindi, nikisobora kuleetera ab’obusobozi kukirora ngu Abakaiso ba Yahwe baikazi barungi. Ekyokurorraho, omu Nigeria, emyaka nyingi enyuma orusorrokano oburwali nirugenda omu maiso, abaserikale bakaija bataaha omu Kyombeko ky’Obukama nibaserra abantu abaali bangire kusasura omusoro. Baitu omukuru akabagambira kurugayo, yagamba ati: “Abakaiso ba Yahwe tibanyaga emisoro.” Obutworobera ebiragiro, kirinda ibara ly’Abakaiso ba Yahwe erirungi kandi akasumi nikasobora kuhika ibara eri erirungi, niririnda ab’oruganda na banyaanya itwe. w23.10 9 ¶13

Bamu h’abaheereza ba Yahwe baikaire balindiriire empero y’obusinge bunu kumara akasumi karaihire. Abantu baingi batekereza ngu empero ikaireho muno kwija. Eki Yahwe akakibazaaho obuyagambiire nabbi Habakuki ati: “Baitu okwolekwa kuikaire habwakasumi akatairweho, kandi nukurahuka empero, tukulibiha: nobukuliba nukuikaraho, okulinde; baitu kuliija mazima, tikuliikaraho.” (Hab. 2:3) Ruhanga akabaza ebigambo binu kugumya Habakuki wenka? Rundi naitwe ebigambo ebi nibitukwataho? Yahwe akaterekereza omukwenda Paulo kukozesa ebigambo binu nabazaaho Abakristaayo abalindiriire ensi empyaka. (Baheb. 10:37.) Nahabweki n’obuturaaba nitutekereza ngu omurago gwa Yahwe ogw’okutujuna gwikaireho kuhikirra, ‘guliija mazima, tiguliikaraho.’ w23.04 30 ¶16

Abaisaleri bakaba bakimanyire ngu Yahwe akaba nakozesa Musa kubebembera, baitu bakanga kumuhuliiriza. (Kubar. 14:​10, 11) Kandi emirundi nyingi, bakanga kwikiriza ngu Yahwe akaba nakozesa Musa. Ekyarugiremu, Yahwe atabaikirize kutaaha omu nsi ey’Ekaba Eraganiziibwe. (Kubar. 14:30) Baitu, Abaisaleri abamu bakahondera oburagirizi bwa Yahwe. Ekyokurorraho, Yahwe akakirora ngu: ‘Kalebu akamukuratirra kimu.’ (Kubar. 14:24.) Ruhanga akaha Kalebu emigisa, yamwikiriza kwekomeramu nambere akaba nagonza kwikara omu Nsi ey’Ekaba Eraganiziibwe. (Yos. 14:​12-14) Abaisaleri abaataahire omu Nsi ey’Ekaba Eraganiziibwe, nabo bakateekaho ekyokurorraho ekirungi eky’okuhondera oburagirizi bwa Yahwe. Yosuha obuyagarukire omu bigere bya Musa kwebembera Abaisaleri, “bakamutina . . . ebiro byona ebyobwomezi bwe.” (Yos. 4:14) Ekyarugiremu, Yahwe akabaha emigisa yabataahya omu Nsi ey’Ekaba Eraganiziibwe.—Yos. 21:​43, 44. w24.02 21 ¶6-7

Nk’oku dakitaali asobora kumanya enyikara y’omutima kuraba omu kukwata ha binywa, okugonza okutwiniire abantu abandi nikusobora kutukonyera kumanya obuturaaba nitugonza Ruhanga rundi nangwa. Kakuba tukyetegereza ngu okugonza okutwiniire ab’oruganda na banyaanya itwe kutandikire kukeeha, kanu kasobora kuba kokurorraho akarukwoleka ngu n’okugonza okutwiniire Ruhanga kuliyo nikukeeha. Baitu obutwikara nitubagonza muno, ako kaba kokurorraho akarukwoleka ngu okugonza okutwiniire Ruhanga kw’amaani. Habwaki tusemeriire kugira ekitwakoraho kakuba tukyetegereza ngu okugonza okutwiniire ab’oruganda n’abanyaanya itwe kutandikire kukeeha? Habwokuba kanu kasobora kuba kokurorraho akarukwoleka ngu tutandikire kuceka omu by’omwoyo. Omukwenda Yohana atukonyera kwetegereza ensonga enu obuyagambire ati: “Ogu atarukugonza mugenziwe ouyaboine, tasobora okugonza Ruhanga owataraboine.” (1 Yoh. 4:20) Isomo ki eriturukwega? Kusobora kugonza Yahwe, tusemeriire “okugonzangana.”— 1 Yoh. 4:​7-9, 11. w23.11 8 ¶3; 9 ¶5-6

Obwakaba akyali muto, Omukama Yoasi akakora encwamu ey’amagezi. Habwokuba akakura ataine ise, akahondera ekyokurorraho ekirungi ekya Nyakatagara Omukuru Yehoyada. Nyakatagara onu akatwaza Yoasi nka mutabani we. Ekyarugiremu, Yoasi akebembeza kuramya Yahwe kandi yakonyera n’abantu kukora nikyo kimu. Yoasi akakora n’entekaniza ez’okudabiriza yekaru ya Yahwe. (2 Byom. 24:​1, 2, 4, 13, 14) Bazaire baawe obubaraaba nibakwegesa kugendera ha ndengo za Yahwe, eki kisembo eky’omuhendo ekibarukukuha. (Nfu. 2:​1, 10-12) Abazaire nibasobora kutendeka abaana baabo omu miringo nyingi. Obworateeka omu nkora obuhabuzi kuruga omu Baibuli, bazaire baawe nibaija kusemererwa. Ekirukukirayo obukuru, noija kusemeza Ruhanga kandi enkoragana yaawe nauwe niija kuguma. (Nfu. 22:6; 23:​15, 24) Mali zinu ziri nsonga enungi ezisemeriire kutuleetera kwegera ha kyokurorraho kya Yoasi obwakaba akyali muto! w23.09 8-9 ¶3-5

Yahwe n’araganiza kuhuliiriza esaara zaitu. Ruhanga agonza abaheereza be abesigwa, nahabweki naija kuhuliiriza esaara zaabo. (Zab. 10:17; 37:28) Baitu kinu tikirukumanyisa ngu naija kugarukamu esaara zaitu zoona. Nikisobora kutwetaagisa kulinda kuhikya tuhikire omu nsi empyaka nukwo zimu ha saara zaitu zigarukwemu. Yahwe agarukamu esaara zaitu nasigikirra ha kigendererwa kye. (Is. 55:​8, 9) Ekigendererwa kinu nikitwarramu ensi kwijura abantu abasemeriirwe kandi abarukworobera obulemi bwe. Baitu Sitaani agamba ngu abantu nibaija kuba kurungi muno kakuba berema bonka. (Kub. 3:​1-5) Kwoleka ngu Sitaani mubiihi w’ebisuba, Yahwe aikiriize abantu kwerema. Baitu nabwo obulemi bw’abantu bweyongiire kuleetaho ebizibu kasumi kanu. (Mug. 8:9) Tukimanyire ngu Yahwe tarukwija kwihaho ebizibu byona kasumi kanu. w23.11 21 ¶4-5

Yahwe akaraganiza ngu kuraba omu Iburahimu, “amahanga maingi” galihabwa omugisa. N’obukiraaba ngu Iburahimu akaba aine emyaka 100, kandi Sara aine emyaka 90, bakaba batakatungire omwana Yahwe ow’akaba abaraganiize. Kusigikirra ha ndora y’abantu, kyali nikizooka nk’ekitarukusoboka Iburahimu na Sara kuzaara omwana. Eki kiine kuba kyalengere okwikiriza kwa Iburahimu. Baitu “akaikiriza nanihira ngu alifoka isenkuru wamahanga maingi.” (Bar. 4:​18, 19) Kandi hanyuma, eky’akaba nanihira kikahikirra. Akatunga omwana ow’akaba alindiriire kumara emyaka nyingi. (Bar. 4:​20-22) Nka Iburahimu, naitwe nitusobora kusiimwa Ruhanga kandi naturora nk’abanywani be ab’okuhikirra. Eki Paulo akakibazaaho obuyahandiikire ati: “Kitahandikwe [habwa Iburahimu] wenka ngu okuhikirra kukamutekerezebwaho, baitu habwaitu naitwe, abalitekerezebwaho okuhikirra, itwe abarukuikiriza ogu ayahumbuire Yesu.” (Bar. 4:​23, 24) Nka Iburahimu, naitwe tusemeriire kuba n’okwikiriza, tukwoleke omu bikorwa kandi tube n’okunihira. w23.12 7 ¶16-17

Kakuba otunga ekizibu kandi okahurra otiinire, ijuka ngu Yahwe amanyire ekizibu eki, n’omulingo kirukukuleetera kwehurra. Ekyokurorraho, Yahwe atagarukire ha kurora omulingo Abaisaleri baali nibabonabona omu ihanga lya Misiri, baitu akarora ‘n’obujune’ bwabo. (Kurug. 3:7) Obwoba oli omu nyikara erukutiinisa, nikisobora kukugumira kukirora ngu Yahwe nakusagika. Nahabweki, musabe akukonyere kurora omulingo arukukusagika. (2 Bakam. 6:​15-17) Hanyuma otekerezeeho ebikaguzo binu: Ogarukirwemu amaani hanyuma y’okuhurra orubazo rundi eky’okugarukamu omu nsorrokano? Ogarukirwemu amaani hanyuma y’okusoma ekicweka ekiri omu bitabu byaitu, kurora vidiyo rundi kuhurra kimu ha bizina byaitu? Omuntu akugambiire ekintu rundi yakusomera ekyahandiikirwe kyakugarramu amaani? Nikisobora kutugumira kurora ngu Yahwe natukonyera kuraba omu b’oruganda na banyaanya itwe hamu n’ebyokulya eby’omwoyo ebitutunga. Baitu ebintu binu, biri bisembo eby’omuhendo kuruga hali Yahwe. (Is. 65:13; Mar. 10:​29, 30) Byoleka ngu natufaaho. (Is. 49:​14-16) Kandi byoleka ngu tusemeriire kumwesiga. w24.01 4-5 ¶9-10

Yesu obwakaba nagenda kugaruka omu iguru, akaijukya abegeswa be obujunanizibwa obukuru muno obw’okuha obwakaiso oburukumukwataho omu “Yerusalemu, na Buyudaya bwona, nomu Samaliya, nokuhikya empero zensi.” (Ebik. 1:8; Luk. 24:​46-48) Hanyuma y’akacu kake, abebembezi b’Abayudaaya bakakwata omukwenda Petero na Yohana baabatwara omu maiso g’orukurato baabaragira kuleka kutebeza kandi baabatiinisiriza. (Ebik. 4:​18, 21) Petero na Yohana bakabagarukamu bati: “Obukiraba kiri kirungi omu maiso ga Ruhanga okuhurra inywe okukira Ruhanga mutekereze: baitu itwe titurukusobora okuleka okugamba ebitwaboine nebitwahuliire.” (Ebik. 4:​19, 20) Petero na Yohana obubaalekiirwe, bakaimukiza hamu iraka baasaba esaara erukuhikaana n’ekigendererwa kya Ruhanga. Yahwe akagarukamu esaara yabo erukuruga ha mutima.—Ebik. 4:31. w23.05 5 ¶11-12

Yahwe na Yesu bamazire emyaka nyingi nibagonzangana. Enkoragana yabo emazire obuhumbi n’obuhumbi bw’emyaka. Yahwe akooleka kurungi okugonza okwainiire Yesu omu kyahandiikirwe kya kiro kinu. Yahwe akaba n’asobora kugamba ati: ‘Ogu nuwe nkyanganukiire.’ Baitu akaba n’agonza tumanye okugonza okwainiire Yesu, nahabweki akagamba ngu “ogu nuwe Mwana wange oungonza.” Yahwe akaba nayesiimisa Yesu kandi Yesu ekyakaba ali haihi kukora kikamusemeza. (Bef. 1:7) Kandi Yesu akaba nakigumya ngu Ise namugonza muno. Egi niyo ensonga habwaki yaikaire n’agamba ngu Ise namugonza.—Yoh. 3:35; 10:17; 17:24. w24.01 28 ¶8

Teekerezaaho kinu: Omuntu ow’orukugonza akubazaaho kubi. Okimanyire ngu bisuba baitu abantu abamu, nibabiikiriza. Eky’obusaasi, nabo batandika kubigambiraho abandi. Wakwehuliire ota? Obwire oburukukira obwingi, ebisuba ebi bikuleetera kwehurra kubi. Ekyokurorraho kinu nikisobora kutukonyera kwetegereza omulingo Yahwe ayehurramu abantu obubamubazaaho ebisuba. Omu ha bamalaika akagambira Hawa ebisuba ebirukukwata hali Yahwe. Hawa akaikiriza ebisuba ebi. Kandi kyaleetera abazaire baitu ab’okubanza kujeemera Yahwe. Ekyarugiremu, abantu boona bakasiisa kandi baatandika kufa. (Kub. 3:​1-6; Bar. 5:12) Ebizibu byona ebiturora omu nsi, nk’okufa, obulemu, n’okubonabona, biroho habw’ebisuba Sitaani ebyajanjaize. Mali Yahwe asaasa muno habw’ebisuba Sitaani yabalize n’ebintu ebibi ebirugiremu. Baitu kinu kiretiire Yahwe kwikara aine ekiniga? Nangwa. Oihireho, Baibuli egamba ngu aikara ali “Ruhanga ow’asemeriirwe.”—1 Tim. 1:​11, NWT. w24.02 8 ¶1-2

N’osobora ota kwegera ha kyokurorraho kya Yusufu? N’osobora kucwamu hati ekyorakora obworayohebwa. Ahonaaho oyangire kimu ebintu Yahwe anoba kandi otaikara nobitekerezaaho. (Zab. 97:10; 119:165) Obworakora eki, torukwija kukora ekibi habwokuba noija kuba omanyire ekyokukora obu orayohebwa. Eki, nikiija kukukonyera kwikara nokora ebirukusemeza Yahwe. Obundi n’osobora kuba okimanyire ngu ozoire amananu, kandi n’ogonza kuramya Yahwe n’omutima gwawe gwona, baitu nabwo oyehurra ngu tokahikire kwehayo n’okubatizibwa. N’osobora kukora Omukama Daudi eki yakozere. N’osobora kwesengereza Yahwe oti: “Ndora muno, ai Ruhanga, omanye omutima gwange: ondenge, omanye ebitekerezo byange: Kandi orole, rundi haroho omuhanda gwona ogwobubi omuli nyowe, kandi onterekereze omu muhanda ogutahwaho.” (Zab. 139:​23, 24) Yahwe aha emigisa abo boona “abanyakumuserra.” Obu oyekamba kuhika ha kigendererwa kyawe eky’okwehayo n’okubatizibwa oba noyoleka ngu n’oserra Yahwe.—Baheb. 11:6. w24.03 6 ¶13-15

Nyakatagara omukuru akaheebwa obusobozi obw’okukikirra abantu hali Ruhanga. Nyakatagara omukuru ow’okubanza omu Isaleri akaba Aroni kandi Yahwe nuwe yamukomere eheema eyokutangatanganiramu obw’ekaba n’etongozebwa. Baitu nk’oku omukwenda Paulo yasoboroire, “abo bakaforwa banyakatagara baingi, baitu okufa kukabatanga okuikaraho.” (Baheb. 7:​23-26) Kandi nk’oku banyakatagara abo baali batahikiriire, nabo baali baine kuhayo ebihongwa habw’ebibi byabo. Baitu haroho embaganiza y’amaani hagati ya banyakatagara ab’omu Isaleri na Nyakatagara Omukuru arukukirayo Yesu Kristo. Nka Nyakatagara Omukuru, Yesu Kristo, ali ‘muheereza . . . ha heema ey’amazima, Yahwe eyiyasimbire, hatali omuntu.’ (Baheb. 8:​1, 2) Paulo akasoborra ngu habwokuba Yesu “[aikaraho] obusinge bwona, anyina obwanyakatagara obutahwaho.” Paulo akongera yasoborra ngu Yesu ‘taine kamogo, abaganiziibwe n’abasiisi.’ Nahabweki kwahukanaho na banyakatagara abakuru ab’omu Isaleri, Yesu tikirukumwetaagisa “okuhongaga ebyonzira obukyabukya” habw’ebibi bye. w23.10 25 ¶4-5

“Iguru eryokubanza” nirimanyisa gavumenti ez’ensi ezirukulemwa Sitaani na badaimoni be. (Mat. 4:​8, 9; 1 Yoh. 5:19) Ekigambo “ensi” obukikozesebwa omu Baibuli, nikisobora kumanyisa abantu abarukwikaramu. (Kub. 11:1; Zab. 96:1) Nahabweki, ‘ensi ey’okubanza’ nemanyisa abantu ababi ab’omu kasumi kanu. Yahwe tarukwija kusemeza ‘ensi n’iguru’ ebiroho kasumi kanu, oihireho naija kubihwerekereza kandi omu kiikaro kyabyo ateekeho “iguru erihyaka nensi empyaka”—ekirukumanyisa gavumenti empyaka hamu n’abantu abahikiriire. Yahwe alifoora ensi orugonjo orurungi kandi n’abantu abafoole abahikiriire. Nk’oku Isaya yarangire, ensi yoona erifooka nk’orugonjo rwa Adeni. Kandi alitufoora bahyaka kuraba omu kukiriza kimu endwaire zaitu zoona. Abalema, abafu b’amaiso, n’abafu b’amatu alibakiriza kimu kandi n’abafu balihumbuurwa.—Is. 25:8; 35:​1-7. w23.11 4 ¶9-10

“Omuhito omwingi” gulitandika ahonaaho. (Mat. 24:21) Baitu kwahukanaho n’ebigwererezi ebindi, abantu abamu baliba bakimanyire ngu nigwija. Nk’emyaka 2,000 enyuma, Yesu akagambira abahondezi be kwetekaniriza ekiro eki. Obuturayetekaniza kara, nikiija kutwanguhira kuraba omu kasumi ako akagumangaine n’okukonyera abandi. (Luk. 21:36) Nitwija kwetaaga okugumiisiriza kusobora kworobera Yahwe n’okukigumya ngu naija kutulinda. Tulikora ki kakuba ab’oruganda bafeerwa bimu ha bintu byabo rundi byona? (Hab. 3:​17, 18) Embabazi niziija kutukonyera kubaha ebibarukwetaaga. Tulikora ki amahanga ageteraniize hamu obugalitutahirra kandi kikatwetaagisa kwikara hamu omu kiikaro kimu n’ab’oruganda na banyaanya itwe? (Ez. 38:​10-12) Nitwija kwetaaga kwolekangana okugonza okw’amaani kusobora kuraba omu kasumi ako akagumire. w23.07 2 ¶2-3

Abali omu buswere nibasobora kwegera ha kyokurorraho kya Akura na Pirisikira abaagonzebwaga Abakristaayo abaakara. (Bar. 16:​3, 4) Baakorraga hamu, nibatebeza hamu kandi baakonyeraga abandi bali hamu. (Ebik. 18:​2, 3, 24-26) Baibuli obw’eba n’ebazaaho Akura na Pirisikira ebabazaaho hamu. Abali omu buswere nibasobora bata kwegera ha kyokurorraho kyabo? Tekerezaaho ebintu ebimusobora kukora hamu. Omu kiikaro ky’okukora ebintu ebi oli wenka, nimusobora kubikorra hamu. Ekyokurorraho, Akura na Pirisikira baatebezaaga hamu. Nainywe mukira kukora entekaniza ez’okutebeza hamu? Akura na Pirisikira baakorraga hamu emirimo. Iwe n’owoli nauwe omu buswere nimusobora kuba mutarukukora omulimo nugwo gumu, baitu nimusobora kukora hamu emirimo ey’omuka. (Mug. 4:9) Kinu kibaleetera kwehurra nk’abarukukwataniza kandi mutunga obwire bw’okubaza. w23.05 22-23 ¶10-12

Itwena haroho obututiina. Ekyokurorraho, Omukama Saulo obwakaba naserra Daudi kumwita, Daudi akatiina yairukira omu rubuga rw’Abafirisiti orwa Gasi. Akisi, omukama wa Gasi akakimanya ngu Daudi nuwe omurwani ow’amaani ow’akaba nabazibwaho omu kizina ngu aisire ‘obukumi n’obukumi’ bw’Abafirisiti. Daudi ‘akatiina muno.’ (1 Sam. 21:​10-12) Akatiina habwokuba akaba atamanyire Akisi ekiyakumukozere. Kiki ekyakonyiire Daudi kusingura okutiina? Omu Zabuli 56, Daudi akabazaaho omulingo akaba nayehurramu obw’akaba ali Gasi. Omu zabuli egi, abazaaho ekyamuletiire kutiina, n’ekyamukonyiire kuleka kutiina. Daudi obuyahurraga atiinire, yayesigaga Yahwe. (Zab. 56:​1-3, 11) Akaba nakigumya ngu Yahwe naija kumukonyera. Yahwe akamukonyera kumanya ekyokukora. Akefoora nk’ow’agwire iraru. Omu kiikaro ky’okurora Daudi nk’omunyanzigwa, Akisi akamubinga. Nahabweki Daudi akakira kwitwa.—1 Sam. 21:13–22:1. w24.01 2 ¶1-3

Abantu abarukubazibwaho omu ekyahandiikirwe ekya kiro kinu nubo baha? Nubo abaseserweho amagita abahumbwirwe baatwarwa omu iguru! Nahabweki abaseserweho amagita abali omu nsi obubalitwarwa omu iguru haihi n’okumalirra okw’omuhito omwingi, obujunanizibwa obw’okubanza obubaliheebwa nubwo obw’okurwana. Hanyuma y’okutwarwa omu iguru, nibaija kukwataniza na Kristo hamu na bamalaika be kurwanisa abanyanzigwa ba Yahwe omu bulemu obw’okumalirra. Kitekerezeeho! Abaseserweho amagita abakyali omu nsi, bamu halibo bakuzire omu myaka, kandi abandi baceke muno. Baitu obubarahumbuurwa bakatwarwa omu iguru, nibaija kufooka b’amaani kandi batunge obwomeezi obutafa. Ekindi, nibaija kuheebwa obujunanizibwa obw’okurwana bali hamu n’Omukama wabo kandi Omurwani ow’amaani, Yesu Kristo. Hanyuma y’okurwana obulemu bwa Haramagedoni, nibaija kukorra hamu na Yesu omu kukonyera abantu kufooka abahikiriire. Hataroho kugurukyagurukya, balikorra abaheereza ba Ruhanga ebintu ebirukukira hali ebi ebibaabakoliire obubakaba bakyali omu nsi kandi bali bantu abatahikiriire. w24.02 6-7 ¶15-16

N’obu kiraaba ngu abamu bahikire kwehayo n’okubatizibwa, batiina kukikora. Nibasobora kweralikirra ngu hanyuma y’okubatizibwa nibaija kukora ekibi ky’amaani babingwe omu kitebe. Kakuba oba oine okutiina nk’oku, kigumye ngu Yahwe naija kukuha buli kimu kyona eki orukwetaaga ‘kugenda kurungi nk’oku kisemeriire Mukama waitu obw’okusiimwa kwona.’ (Bak. 1:10) Ekindi, naija kukuha amaani kukora ebihikire. Habwokuba haroho baingi abaakonyiire. (1 Kol. 10:13) Egi niyo ensonga habwaki abantu bataito muno nubo babingwa omu kitebe. Yahwe akonyera abantu be kwikara bali besigwa. Buli muntu wena atahikiriire ayohebwa kukora ekibi. (Yak. 1:14) Baitu n’osobora kucwamu kuhondera okwohebwa oku rundi kukora ekihikire. Niiwe oine obusobozi obwokucwamu omulingo oratwazaamu obwomeezi bwawe. Abantu abamu bagamba ngu eki tikirukusoboka, baitu ago tigali mananu. N’osobora kwega kulema enyehurra zaawe embi. w24.03 5 ¶11-12