Apuli

Abaheereza ba Yahwe abaakara bakatunga emitalibaine eibakaba batarukunihira. Tekerezaaho Yakobo. Ise akamuragira kutunga omukazi omu bahara ba Labani, kandi yamugumya ngu Yahwe naija kumuha emigisa. (Kub. 28:​1-4) Yakobo akakora ise ekiyamugambiire. Akaruga Kanaani yagenda omu ka ya Labani ow’akaba aine abahara be babiri Leya na Rakeri. Yakobo akagonza muhara wa Labani omuto Rakeri, kandi yaikiriza kukorra ise kumara emyaka musanju atakamuswire. (Kub. 29:18) Yakobo ekyakaba nanihira tinukwo kyabaire. Labani akamubiihabiiha yamuha muhara we omukuru Leya nuwe yaswera. Labani akaikiriza Yakobo kuswera Rakeri hanyuma ya wiiki emu baitu yamugambira amukorre emyaka endi musanju. (Kub. 29: 26, 27) Ekindi, Labani akagobeza Yakobo omu by’itungo. Labani akamara emyaka 20 n’atwaza Yakobo omu mulingo ogutali gw’obwinganiza.—Kub. 31:​41, 42. w23.04 15 ¶5

Obutuba nitugonza okuhuumuzibwa n’obukonyezi tusaba oha? Tumanyire eky’okugarukamu eky’ekikaguzo eki. Nitusobora kuhikirra Yahwe kuraba omu kusaba. Yahwe naturaaliza kukora eki kyonyini. Nagonza ‘tumusabe butoosa.’ (1 Bas. 5:17) Nitusobora kumuhikirra obwire bwona nitumusaba oburagirizi obuturukwetaaga. (Nfu. 3:​5, 6) Habwokuba Yahwe agonza kutukonyera obwire bwona, tatuterireho emirundi eitusemeriire kumusaba. Yesu akaba akimanyire ngu esaara z’omuhendo hali Yahwe. Obwakaba atakaizire omu nsi, yaroraga Ise nagarukamu esaara z’abaheereza be abesigwa. Ekyokurorraho, Yesu akaba ali na Ise obuyagarukiremu esaara za Hana, Daudi, Eriya n’abandi. (1 Sam. 1:​10, 11, 20; 1 Bakam. 19:​4-6; Zab. 32:5) Egi niyo ensonga habwaki yayegeseze abegeswa be kusaba butoosa batarukugurukyagurukya.—Mat. 7:​7-11. w23.05 2 ¶1, 3

Nyakatagara Omukuru Yehoyada yatiinaga Yahwe. Kinu kikeyoleka Ataliya muhara wa Yezeberi obuyayefoire omukama wa Yuda. Akaba ali mukaali muno kandi n’agonza muno kulema, yalengaho n’okuhwerekereza abaijukuru be boona nambere hakurugire omukama. (2 Byom. 22:​10, 11) Omu ha baijukuru be arukwetwa Yoasi akakiraho habwokuba Yehosabeasi muka Yehoyada akamusereka. Yehosabeasi na Yehoyada bakamutwara baamukuza. Omu mulingo ogu bakalinda oruzaro rwa Daudi nambere hakurugire omukama. Yehoyada akaba ali mwesigwa hali Yahwe kandi atatiine Ataliya. Yoasi obwakaba aine emyaka musanju, Yehoyada akongera yayoleka ngu mwesigwa hali Yahwe. Akakora entekaniza. Obuzakugenzere kurungi Yoasi yakulemere nk’omukama. Kandi kakuba zalemerwe kuhikirra, Yehoyada yakwisirwe. Baitu habw’omugisa gwa Yahwe zikagenda kurungi. w23.06 17 ¶12-13

Omukama Nabukadeneza akaba n’asobora kutekereza ngu Danieri munyanzigwa we kandi akaba n’asobora n’okumwita. Baitu Danieri akooleka obumanzi, yamusoborra ekirooto. Kiki ekisobora kuba kyakonyiire Danieri kwoleka obumanzi omu bwomeezi bwe bwona? Hataroho kugurukyagurukya, bazaire be baine kuba baamuteriireho ekyokurorraho ekirungi. (Bir. 6:​6-9) Danieri akaba amanyire ebiragiro ikumi, hamu n’ebiragiro ebindi. Akaba amanyire Omunyaisaleri eky’akaba asemeriire kulya n’okutalya. (Lev. 11:​4-8; Dan. 1:​8, 11-13) Ekindi, Danieri akegesebwa ebyafaayo by’abaheereza ba Ruhanga kandi akaba amanyire ebyabahikireho obubaajemiire Ruhanga. (Dan. 9:​10, 11) Ebintu Danieri yarabiremu omu bwomeezi, bikamuleetera kukigumya ngu Yahwe n’abamalaika be ab’amaani nibamusagika.—Dan. 2:​19-24; 10:​12, 18, 19. w23.08 3 ¶5-6

Rebeka akaba ali mukazi ow’amagezi kandi omu bwomeezi bwe bwona akooleka obumanzi kandi yakora encwamu enungi. (Kub. 24:58; 27:​5-17) Kandi yaikaraga ayetekaniize kuhondera oburagirizi. (Kub. 24:​17, 18, 65) Kakuba n’obwebundaazi osagika entekaniza Yahwe ezataireho nk’oku Rebeka yakozere, noija kuteraho ab’omu ka yaawe n’ab’omu kitebe ekyokurorraho ekirungi. Obuculeezi guli mulingo Abakristaayo boona abakuzire omu by’omwoyo ogu barukwetaaga. Esiteri akaba ali muheereza wa Yahwe omwesigwa kandi omuculeezi. Obuculeezi bukamukonyera kutaba n’emyehembo. Akahuliiriza obuhabuzi bwa Morodekai kandi yabuhondera. (Es. 2:​10, 20, 22) Naiwe n’osobora kwoleka obuculeezi kuraba omu kuserra obuhabuzi kandi okabuhondera. (Tit. 2:​3-5) Esiteri akooleka obuculeezi omu mulingo ogundi. Akaba ali mwisiki “omurungi muno,” baitu ataleetere abandi kumuteekaho omutima.—Es. 2:​7, 15. w23.12 19-20 ¶6-8

Yahwe tarukugonza twikale nitwejunana ekihinguraine. N’agonza tweyiheho ekirukulemeera kinu. Obuturaaba twatwire ekibi kyaitu, twegarukiremu, kandi nituteekamu amaani kutongera kukikora, nitusobora kukigumya ngu Yahwe atuganyiire. (Ebik. 3:19) Hanyuma y’okukora ebi, Yahwe tarukugonza twikale nitwehurra kubi. Amanyire omulingo kinu kisobora kuba ky’akabi. (Zab. 31:10) Kakuba twikara nitwejunana ekihinguraine nikisobora kutumaramu amaani nitumalirra turugire omu kaliitango ak’obwomeezi. (2 Kol. 2:7) Kakuba otandika kutekerezaaho ekibi ekiwakozere, tekerezaaho ‘okuganyira’ kwa Ruhanga. (Zab. 130:4) Obwaganyira abo abegarukiremu kuruga ha mutima abaraganiza ati: “Nekibi kyabu ndireka okukiijuka.” (Yer. 31:34) Kinu nikimanyisa ngu Yahwe tarukwija kwikara nakujunana habw’ebibi ebiwakozere kara. Otejunaana kakuba ensobi eziwakozere kara zikulemesa kuheereza Yahwe nk’oku wakugondeze. Yahwe taikara natekerezaaho ebibi byawe kandi naiwe tosemeriire kwikara n’obitekerezaaho. w23.08 30-31 ¶14-15

Omu kasumi ak’oburwaire bwa Korona, Abakaiso ba Yahwe abahondiire oburagirizi obutwatungire kuruga omu kitebe kya Yahwe, baketantara okwetuntura okurukuleetwa amakuru ag’ebisuba. (Mat. 24:45) Titusemeriire kunagiiriza ebintu “ebirukukira obukuru.” (Baf. 1:​9, 10, NWT) Ebintu ebitali bikuru nibisobora kutuhugura nibitwara obwire n’amaani gaitu ebitwakukozeseze kukora ebintu ebindi ebikuru. Ebintu ebya buli kiro nk’okulya, okunywa, eby’okwesemeza n’emirimo nibisobora kutuhugura kakuba nibyo twebembeza omu bwomeezi bwaitu. (Luk. 21:​34, 35) Ekindi, buli kiro tuhurra rundi tusoma amakuru agarukukwata ha by’obulemi rundi ha bintu ebindi. Titusemeriire kwikiriza ebintu binu kutuhugura. Kitali eki nitusobora kutandika kugwera orubaju omu bitekerezo n’omu mitima yaitu. Sitaani akozesa emitego ey’erukwahukana kutulemesa kukora ebihikire. w23.07 16-17 ¶12-13

Hali abantu ba Yahwe, ekiro eky’okwijuka okufa kwa Kristo nikyo kiro ekirukukirayo obukuru omu mwaka. Nugwo omukoro gwonka Yesu Kristo oguyaragiire abahondezi be kwijuka. (Luk. 22:​19, 20) Kitwijukya emiringo tusobora kwoleka okusiima habw’ekicunguro. (2 Kol. 5:​14, 15) Ekindi, kituha omugisa ogw’okuhuumuzangana nk’ab’oruganda na banyaanya itwe. (Bar. 1:12) Kandi baingi abaija habw’omurundi gwabo ogw’okubanza, kibekambisa kutandika kwega Baibuli. Tekerezaaho omulingo Ekiijukyo kituteraniza hamu nk’oruganda orw’ensi yoona. Mali ebintu binu byona biretera Ekiijukyo kuba ky’omuhendo haliitwe! w24.01 8 ¶1-3

Obutwikara nitwecumiitirizaaho Yahwe na Yesu ekibaatukoliire, tweyongera kukyetegereza ngu nibagonza buli omu haliitwe. (Bag. 2:20) Ekicunguro kikaba kikorwa ekirukwoleka okugonza. Yahwe ayolekere okugonza okwingi okw’atwiniire kuraba omu kuhayo Omwana we Yesu ow’omuhendo. Yahwe akaikiriza Omwana we kubonabona kandi hanyuma yafa habwaitu. Yahwe tagarukira ha kwehurra ngu n’atugonza baitu atugambira nk’oku n’atugonza. (Yer. 31:3) Atucunzire yatuleeta nambere ali habwokuba n’atugonza. (Lengesaniza na Ekyebiragiro 7:​7, 8.) Busaho kintu rundi omuntu wena asobora kutwahukaniza ha kugonza okw’atwiniire. (Bar. 8:​38, 39) Okugonza kunu, iwe nikukuleetera kwehurra ota? w24.01 28 ¶10-11

Abaseserweho amagita batwara okunihira okubaine nk’okw’omuhendo. Ow’oruganda Frederick Franz nauwe ow’akaba abaseserweho amagita akagamba ati: “Okunihira kwaitu nikwija kuhikirra, itwena 144,000, nitwija kutunga byona Yahwe ebyaturaganiize kandi empeera yaitu niija kuba nungi muno kukira nk’oku turukutekereza.” Omu 1991, Ow’oruganda Franz akongera yagamba ati: “Okunihira kwaitu tukyakutwara kuba kw’omuhendo mwingi. . . . Obutweyongera kulindirra, tweyongera kusiima Yahwe habw’okutuha okunihira kunu. Twikara tukulindiriire n’ekihika . . . Nyeyongiire kutwara okunihira kunu nk’ekintu eky’omuhendo kukira na kara.” Katube twine okunihira okw’okutunga obwomeezi obutahwaho omu nsi rundi omu iguru, itwena twine okunihira okw’ekitiinisa kandi eki kisemeriire kutuleetera kusemererwa. Kandi nitusobora kweyongera kugumiza kimu okunihira kwaitu. w23.12 9 ¶6; 10 ¶8

Omu maiso g’eheema y’okutangatanganiramu hakaba haroho ekyoto ky’omulinga nambere ebihongwa by’ebisoro byahebwayoga hali Yahwe. (Kurug. 27:​1, 2; 40:29) Baitu ebihongwa ebi tibyaihirahoga kimu ebibi by’abantu. (Baheb. 10:​1-3) Abaisaleri kugumizaamu nibahayo ebihongwa by’ebisoro ha yekaru, kikaba nikikikirra ekihongwa kimu ekikaba nikigenda kwihiraho kimu ebibi by’abantu. Yesu akaba akimanyire ngu Yahwe akamusindika omu nsi nk’ekihongwa ekiracungura abantu. (Mat. 20:28) Nahabweki ha kubatizibwa kwe, Yesu akehayo kukora Yahwe ekyakaba n’agonza akole. (Yoh. 6:38; Bag. 1:4) Yesu akahayo obwomeezi bwe “omurundi gumu gwonka” kuliihirra rundi kwihiraho kimu ebibi bya buli muntu anyakumwikiririzaamu.—Baheb. 10:​5-7, 10. w23.10 26-27 ¶10-11

Busaho ekitukaba nitusobora kukora kwecungura kuruga omu kibi n‘okufa. (Zab. 49:​7, 8) Nahabweki Yahwe akakora entekaniza kusindika Yesu nukwo aheyo obwomeezi bwe ha bwaitu. Yahwe na Yesu, bakooleka okwefeereza okw’amaani. Obutwikara nitwecumiitirizaaho okwefeereza oku, tweyongera kusiima ekicunguro. Adamu obuyasiisire, uwe n’abaana be bakafeerwa ekisembo eky’obwomeezi obutahwaho. Kusobora kutugarurra Adamu ekiyatufeeriize, Yesu akahayo obwomeezi bwe obuhikiriire nk’ekihongwa. Omu bwomeezi bwe bwona omu nsi, Yesu atakole kibi “nobubwakuba obugobya butazoke omu kanwake.” (1 Pet. 2:22) Yesu obuyafiire, obwomeezi bwe bukaba buhikiriire nk’obwa Adamu. Nahabweki, bukaba nibusobora kusasurra Adamu ekiyatufeeriize.—1 Kol. 15:45; 1 Tim. 2:6. w24.01 10 ¶5-6

Hanyuma ya Yesu kuhumbuuka, akataaha omu Kiikaro Ekirukukira Okwera omu yekaru. Hati nitukirorra kimu ngu entekaniza ya Yahwe ey’okuramya eyerukusigikirra ha kicunguro kya Yesu n’obwanyakatagara bwe, mali niyo erukukirrayo kimu obukuru. Omu Isaleri, nyakatagara omukuru yataahaga omu Kiikaro Ekirukukira Okwera ekikozerwe abantu aine esagama ey’ebisoro, baitu Yesu akataaha “omu iguru honyini,” ekiikaro ekirukukirrayo kimu okwera, yagenda omu maiso ga Yahwe. Kandi akahayo omuhendo gw’obwomeezi bwe obuhikiriire nk’omuntu habwaitu “okuihaho ebibi, nayehonga wenka nkekyonzira.” (Baheb. 9:​24-26) Katube twine okunihira okw’okwikara omu iguru rundi omu nsi, itwena nitusobora kuramya Yahwe omu yekaru ye ey’eby’omwoyo. w23.10 28 ¶13-14

Tekerezaaho obujunanizibwa bwa Yesu nk’Omukama kandi Nyakatagara Omukuru ow’atugirra embabazi. Kuraba omuluwe nitusobora kwirra haihi ‘n’ekitebe eky’embabazi’ ekya Ruhanga, nitusaba okuganyirwa n’obukonyezi obuturukwetaaga. (Baheb. 4:​14, 15) Tusemeriire kutekerezaahoga ebintu Yahwe na Yesu batukoliire. Okugonza okubatwiniire kusemeriire kutuleetera kwekamba omu kuheereza Yahwe. (2 Kol. 5:​14, 15) Gumu ha miringo ey’erukukirayo ogw’okwoleka okusiima kwaitu nukwo kukonyera abantu kufooka abaheereza be kandi abahondezi ba Yesu. (Mat. 28:​19, 20) Eki nikyo omukwenda Paulo yakozere. Akaba akimanyire ngu Yahwe nagonza “abantu bona okujunwa, nokuhika omu kumanyira kimu amazima.”—1 Tim. 2:​3, 4. w23.10 22-23 ¶13-14

Baingi omuliitwe, obutuba nitutebeza tukozesa enkarra zinu kwoleka abantu omulingo obwomeezi buliba omu nsi empyaka. Nitusobora tuta kukonyera abandi kukigumya ngu omurago oguli omu Okusuku’rwa 21:​3, 4 nigwija kuhikirra? Kandi nitusobora tuta kweyongera kwesiga Yahwe ngu naija kuguhikiiriza? Yahwe atagarukire ha kutuha omurago gunu ogurukusemeza, baitu akatuha n’ensonga habwaki tusemeriire kukigumya ngu nigwija kuhikirra. Enkarra ezirukuhonderaho nizitukonyera kukigumya ngu Yahwe naija kuhikiiriza omurago gwe ogw’okufoora ensi orugonjo orurungi. Nitusoma ngu: “Nogu akaba aikaliire ha kitebe kyobukama yagamba ati Dora, ninfora byona ebihyaka. Yagamba ati handika: baitu ebigambo binu byokwesiga, byamazima. Yangambira ati [bihikiriziibwe]. Ninyowe Alufa na Omega, okubanza nempero.”—Kus. 21:​5, 6a. w23.11 3 ¶3-5

Ow’oruganda omuto ayoleka obwekengi obu akora encwamu ez’amagezi obu kirukuhika ha kujwara n’okwekoraho. Obwire oburukukira obwingi, abantu abarukukora engoye tibarukuteekamu endengo za Yahwe ekitiinisa. Kandi eki nitukirorra ha ngoye ezirukukwatira ha mubiri rundi ezirukuleetera abasaija kuzooka nk’abakazi. Ow’oruganda omuto arukugonza kuba Mukristaayo ow’akuzire omu by’omwoyo asemeriire kuhondera emisingi ya Baibuli n’ebyokurorraho ebirungi omu kitebe obu kirukuhika ha kujwara n’okwekoraho. N’asobora kwekaguza ati: ‘Ebinkomamu kujwara byoleka ngu nfaaho abandi kandi mbateekamu ekitiinisa? Enjwara yange eyoleka ngu ndi muheereza wa Ruhanga?’ (1 Kol. 10:​31-33) Ow’oruganda omwekengi naija kusiimwa ab’oruganda omu kitebe hamu na Ise ow’omu iguru. w23.12 26 ¶7

Omu busumi obw’enyuma, “omukama wobukizi bwobulyo” akahiiganiza abantu ba Ruhanga. (Dan. 11:40) Ekyokurorraho, omu Bulemu obw’Ensi Yoona obw’Okubanza n’Obwakabiri, ab’oruganda baingi bakateekwa omu nkomo, n’abaana abamu ab’Abakaiso ba Yahwe bakabingwa omu masomero habw’okutagwera rubaju. Omu myaka nyingi enyuma, abaheereza ba Yahwe abarukwikara hansi y’obulemi bw’omukama w’obukiizi bw’obulyo, obwesigwa bwabo bukalengwa omu miringo nyingi. Ekyokurorraho, omu kasumi ak’okuteera oburuuru, Omukristaayo n’asobora kwohebwa kusagika ekitebe ekimu rundi omuntu ow’ayesimbireho. N’asobora kutateera akaruuru, baitu omu mutima gwe n’asobora kugwera orubaju. Mali kikuru muno kwikara tutagweriire rubaju omu by’obulemi, omu bikorwa, ebitekerezo, n’omu nyehurra zaitu!—Yoh. 15:​18, 19. w23.08 12 ¶17

Nk’abairuki abali omu kaliitango ak’obwomeezi, twine ‘kwiruka nukwo tuhabwe empeera.’ (1 Kol. 9:24) Yesu akagamba ngu nitusobora ‘kulemeererwa obwokukoija, n’okutamiira amaarwa, n’okutabaana okw’obwomeezi bunu.’ (Luk. 21:34) Ebyahandiikirwe binu n’ebindi nibisobora kukukonyera kumanya empindahinduka ez’osemeriire kukora nukwo oikale omu kaliitango ak’obwomeezi. Nitukigumya ngu nitwija kusingura akaliitango ak’obwomeezi habwokuba Yahwe naija kutuha amaani agaturukwetaaga. (Is. 40:​29-31) Nahabweki, ikara noiruka! Yegera ha mukwenda Paulo ayatairemu amaani ge goona nukwo asobole kuhabwa empeera. (Baf. 3:​13, 14) Busaho muntu arakwirukiraho akaliitango kanu baitu habw’obukonyezi bwa Yahwe noija kusingura. Yahwe n’asobora kukukonyera kwetweka emigugu yaawe n’okweyihaho ebirukulemeera ebitarukwetaagisa. Naija kukukonyera kugumiisiriza omu kwiruka akaliitango ak’obwomeezi kandi ohike ha businguzi! w23.08 31 ¶16-17

Yesu obwakaba aine emyaka 12, bazaire be bakamusiga Yerusalemu. (Luk. 2:​46-52) Bwali bujunanizibwa bwa Yusufu na Malyamu kukigumya ngu baagaruka omu ka n’abaana baabo boona. Yusufu na Malyamu obubazoire Yesu, Malyamu akamujunana habw’okuberalikiriza. Yesu akaba n’asobora kubagambira ngu tikihikire kumujunana. Oihireho, akabagarukamu omu mulingo ogw’ekitiinisa. Yusufu na Malyamu, “[batetegereze] kigambo ekiyabagambiire.” Baitu Yesu akagumizaamu naborobera. Abato, obwire obumu kibagumira kworobera bazaire banyu obubakora ensobi rundi obubalemwa kubetegereza kurungi? Kiki ekisobora kubakonyera kuborobera? Tekerezaaho omulingo Yahwe arukwehurra. Baibuli egamba ngu obwoyorobera abazaire baawe, kisemeza Yahwe. (Bak. 3:20) Yahwe akimanyire ngu obwire obumu bazaire baawe tibakwetegereza kurungi rundi nibasobora kuteekaho ebiragiro ebirukuzooka nk’ebigumire kubyorobera. Baitu obw’oborobera, kisemeza Yahwe. w23.10 7 ¶5-6

Omwegi mutaahi waawe n’asobora kugamba ngu Abakaiso ba Yahwe basemeriire kuhindura entekereza yabo ha bukuuhya. N’osobora kumusoborra ngu Abakaiso ba Yahwe bakimanyire ngu buli muntu aine obugabe bw’okwecweramu omulingo aratwazaamu obwomeezi bwe. (1 Pet. 2:17) Hanyuma nitusobora kumwoleka omugaso oguli omu kuhondera endengo za Baibuli. Kakuba omuntu atuhakaniza, tusemeriire kwetantara kwanguha kutekereza ngu nitumanya ebyarukwikiririzaamu. Ekyokurorraho, kakuba omwegi ha isomero agamba ngu tikiri ky’amagezi kwikiririza omuli Ruhanga, kihikire kutekereza ngu naikiririza omu nyegesa erukugamba ngu ebintu bitahangwe kandi nagyetegereza kurungi? N’asobora kuba nabaza ebintu ebiyahuliire. N’osobora kumwoleka vidiyo rundi ekicweka ekirukubazaaho okuhanga ekirukusangwa ha jw.org. Hanyuma n’asobora kwikiriza kubazaaho ekicweka eki rundi vidiyo. Obuturabaza n’abantu omu mulingo ogw’ekitiinisa, nikisobora kubaleetera kuhindura ha ntekereza yabo. w23.09 17 ¶12-13

Obutukora ensobi baitu tukegarukamu kandi tukagumizaamu nitwesiga Yahwe, nitusobora kukigumya ngu naija kugumizaamu natukozesa kandi natuha emigisa. (Nfu. 28:13) Samusoni akaba atahikiriire, baitu ataleke kuheereza Yahwe n’obuyamazire kukora ensobi na Derira. Kandi Yahwe akagumizaamu nakozesa Samusoni. Ruhanga akongera yamukozesa omu mulingo ogw’amaani. Ekindi, akamubara nk’omu h’abasaija ab’okwikiriza, kandi yamuhandiikisa omu rukarra rw’abantu abesigwa abarukusangwa omu Abaheburaniya esuura 11. Kanikigarramu amaani kukimanya ngu nituheereza Isiitwe ow’omu iguru ow’okugonza, ow’ayetekaniize kutuha amaani obuturukuba tuli baceke! Nahabweki nka Samusoni, leka twesengereze Yahwe tuti: “Onyijuke nkwesengeriize, ompe amani.”—Bac. 16:28. w23.09 7 ¶18-19

Habwokuba tukimanyire ngu ekiro kya Yahwe kiri haihi kwija, tugambira abantu amakuru amarungi. Baitu nitusobora kutiina kutebeza. Habwaki? Obwire obumu nitusobora kutiina abantu. Eki nikyo kyahikire hali Petero. Omu bwire bw’ekiro Yesu obuyacweriirwemu omusango, Petero akatiina kugamba ngu ali omu ha begeswa be kandi akaikara namwehakana n’agamba ngu tamumanyire. (Mat. 26:​69-75) Baitu Petero akahika yaleka kutiina abantu, kandi hanyuma n’obumanzi akagamba ati: “Mutalitina okutinisa kwabu, nobukwakuba okutuntura.” (1 Pet. 3:14) Ebigambo bya Petero nibitugumya ngu naitwe nitusobora kuleka kutiina abantu. Kiki ekisobora kutukonyera kuleka kutiina abantu? Petero natugambira ati: “Mweze Kristo omu mitima yanyu okuba Mukama wanyu.” (1 Pet. 3:15) Kinu nikitwarramu kukiijuka ngu Yesu Kristo nuwe Mukama waitu kandi nk’oku aine amaani maingi muno. w23.09 27-28 ¶6-8

Tusemeriire kwetantarra kimu engeso z’omwirima ezitarukwana. (Bef. 5:11) Kyeyolekiire kimu ngu omuntu obu aikara naarora, naahuliiriza, rundi naabaza ebigambo eby’obusiihani kimwanguhira kubikora. (Kub. 3:6; Yak. 1:​14, 15) Ensi ya Sitaani n’erengaho kutubiihabiiha nukwo twikirize ngu ebikorwa Ruhanga ebi atugambira ngu by’obusiihani kandi ebitasemiire tibiri bibi. (2 Pet. 2:19) Kurugira kimu kara, Sitaani aikaire naaburanganiza abantu nukwo balemwe kwahukaniza ekihikire n’ekitahikire. (Is. 5:20; 2 Kol. 4:4) Filimu ezirukukira obwingi, puroguraamu eza ha tiivi, n’emikura ya intaneeti nibikurakuraniza ebintu ebitarukusigikirra ha ndengo za Yahwe. Sitaani naalengaho kutuleetera kutekereza ngu ebikorwa ebitasemiire hamu n’eby’obusiihani ebikanyire kasumi kanu tibiri by’akabi.—Bef. 5:6. w24.03 22 ¶8-10

Ha kubanza Abaisaleri baahimbaga eheema eyokutangataganiramu obubaabaga nibaruga omu kiikaro ekimu nibagenda omu kiikaro ekindi. Bakagikozesa kumara emyaka nka 500 kuhikya yekaru obuyayombekerwe omu Yerusalemu. (Kurug. 25:​8, 9; Kubar. 9:22) Abaisaleri bayesorolezaaga ha ‘heema eyokutangatanganiramu’ kusobora kuramya Ruhanga n’okuhayo ebihongwa. (Kurug. 29:​43-46) Baitu eheema enu, ekaba n’ekikirra ekintu ekirukukirayo oburungi. Kikaba ‘kiituuru ky’eby’omu iguru,’ kandi ekisisani kya yekaru ya Yahwe erukukirayo obukuru. Omukwenda Paulo akagamba ngu “ehema eyokubanza . . . nikyo kisisani omu biro bya hati bunu.” (Baheb. 9:9) Nahabweki omu kasumi yahandikiire Abaheburaniya ebbaruha, yekaru ey’eby’omwoyo ekaba eroho. Ekabaho omu mwaka 29 Y.A.K. Omu mwaka ogu, Yesu akabatizibwa kandi Yahwe yamufoora “nyakatagara omukuru arukukira” omu yekaru ey’eby’omwoyo.—Baheb. 4:14; Ebik. 10:​37, 38. w23.10 25-26 ¶6-7

Kusobora kwikara nituheereza Yahwe n’okusemererwa enyikara obw’ehinduka, tusemeriire kuba bantu abarukwegema, ekirukumanyisa kuhindahinduramu. Omu mulingo ki? Tusemeriire kwoleka okwetegereza kuraba omu kuhinduramu enyikara obuzihinduka, kandi tuteekemu ekitiinisa entekereza n’encwamu ez’abantu abandi. Nk’abaheereza ba Yahwe, nitugonza kuba bantu abarukwetegereza. Nitugonza n’okuba bantu abebundaazi kandi ab’embabazi. Yahwe ayetwa “Mwandara” habwokuba tahinduka. (Bir. 32:4) Baitu ayoleka okwetegereza. Enyikara omu nsi obw’ehinduka, Ruhanga waitu nauwe ahinduramu nukwo asobole kuhikiiriza ekigendererwa kye. Yahwe akahanga abantu omu kisisani kye kandi yabaha obusobozi obw’okuhindahinduramu. Akatuha emisingi ya Baibuli ey’etukonyera kukora encwamu ez’amagezi n’obutuba omu nyikara ya mulingo ki. Ekyokurorraho kya Yahwe n’emisingi ey’atuhaire bwakaiso oburukwoleka ngu n’obwaraaba ali “Mwandara,” ali muntu arukwetegereza. w23.07 20 ¶1-3

Omu Baibuli Yahwe ayerengesaniza na maama ow’aine okugonza. (Is. 66:​12, 13) Tekerezaaho omulingo maama ow’okugonza afaaho omwana we omuto obwaba ali omu busaasi, amuha ekyarukwetaaga nukwo aculeere. Obuturukuba tuli omu busaasi, twikale nitwijuka ngu Yahwe n’atugonza. Tayanguhiriza kutulekaho obutukora ekintu ekibi. (Zab. 103:8) Abaisaleri bakaikara nibabiihiza Yahwe, baitu obubaayegarukamuga kuruga ha mutima, yaikaraga n’abooleka okugonza. Ekyokurorraho, akabagambira ati: “Okaba oli womuhendo omu maiso gange, kandi owekitinisa, kandi nkakugonza.” (Is. 43:​4, 5) N’akasumi kanu Yahwe atwiniire okugonza nk’okwakaba ainiire Abaisaleri. N’obuturaaba tukozere ensobi ez’amaani, obutwegarukamu kuruga ha mutima kandi tukagaruka hali Yahwe, agumizaamu natwoleka okugonza. Aturaganiza ngu naija ‘kutuganyira.’ (Is. 55:7) Baibuli egamba ngu Yahwe obwatuganyira, tutunga “ebiro ebyokuhumuzibwa” kuruga haluwe.—Ebik. 3:19. w24.01 27-28 ¶4-5

Yahwe n’asobora kutukonyera obutuba tuli omu nyikara ey’egumire. Ekyokurorraho, obw’osaba mukama waawe kukwikiriza kugenda omu rusorrokano orukooto rundi kuhinduramu ha bwire obworukukora kusobora kugenda omu nsorrokano zoona, kikuha omugisa ogw’okurora omulingo Yahwe arukukukonyeramu. Ekiraabaho nikisobora kukuhuniriza. Kandi ekirugamu, weyongera kwesiga Yahwe. Ezera akasaba Yahwe amukonyere. Buli murundi yayetunturaga habw’obujunanizibwa obwakaba aine kuhikiiriza, yasabaga Yahwe. (Ezer. 8:​21-23; 9:​3-5) Habwokuba Ezera yayesigaga Yahwe, kikekambisa abandi kumusagika n’okwegera ha kwikiriza kwe. (Ezer. 10:​1-4) Obutuba twetuntwire habw’omulingo turayehikyaho ebyetaago byaitu, rundi ha bulinzi obw’ab’omu maka gaitu, tusemeriire kusaba Yahwe kutukonyera. w23.11 18 ¶15-17

Yahwe tatugambira ngu tusemeriire kukora ebintu byonyini Iburahimu yakozere kusobora kwetwa ab’okuhikirra. Haroho emiringo nyingi eitusobora kwolekamu okwikiriza kwaitu kuraba omu bikorwa. Yahwe asemererwa kandi atuha emigisa obututangirra abahyaka abaizire omu nsorrokano, tukakonyera ab’oruganda na banyaanya itwe abali omu bwetaago, kandi tukakorra ab’omu maka gaitu ebirungi. (Bar. 15:7; 1 Tim. 5:​4, 8; 1 Yoh. 3:18) Gumu ha mulingo omukuru twoleka ngu twine okwikiriza nubwo obutwekamba kutebeza abandi. (1 Tim. 4:16) Kuraba omu bikorwa byaitu, itwena nitusobora kwoleka ngu nitwikiriza ngu emirago ya Yahwe niija kuhikirra kandi emihanda ye niyo erukukirayo oburungi. Obuturakora eki, nitwija kukigumiza kimu ngu Yahwe naija kuturora nk’abantu ab’okuhikirra kandi tube banywani be. w23.12 2 ¶3; 6 ¶15

Omukama Daudi obwakaba ali haihi kufa, akagambira Suleimani ebigambo ebi. (1 Bakam. 2:​1, 3) Kasumi kanu, kikuru abasaija Abakristaayo boona kuteeka omu nkora obuhabuzi bunu. Kusobora kuba basinguzi, basemeriire kworobera ebiragiro bya Ruhanga n’okuteeka omu nkora emisingi ya Baibuli. (Luk. 2:52) Habwaki kikuru muno ab’oruganda abato kufooka abasaija abakuzire omu by’omwoyo? Abasaija Abakristaayo baine obujunanizibwa omu maka gaabo n’omu kitebe. Hataroho kugurukyagurukya, ab’oruganda bato mutekeriizeeho obujunanizibwa obu musobora kutunga omu busumi obw’omumaiso. N’osobora kuba oine ekigendererwa eky’okutaaha obuheereza obw’akasumi koona, kufooka muheereza rundi mugurusi omu kitebe. Ekindi, n’osobora kuba nogonza kutaaha obuswere kandi ozaale abaana. (Bef. 6:4; 1 Tim. 3:1) Kusobora kuhika ha bigendererwa binu kandi okaba musinguzi, osemeriire kuba Mukristaayo ow’akuzire omu by’omwoyo. w23.12 24 ¶1-2

Abagurusi b’ekitebe baine obujunanizibwa obw’okurolerra entaama za Yahwe ez’omuhendo. Omugisa gunu ogw’okuheereza ab’oruganda na banyaanya itwe bagutwara kuba gw’omuhendo, kandi bekamba kuba “abalisa” abarungi. (Yer. 23:4; 1 Pet. 5:2) Mali nitusiima muno kuba n’abasaija bamulingo ogu omu bitebe byaitu! Abagurusi nibasobora kwegera ha kyokurorraho eky’omucwi w’emisango Gideoni. (Baheb. 6:12; 11:32) Akarolerra kandi yalinda abantu ba Ruhanga. (Bac. 2:16; 1 Byom. 17:6) Nka Gideoni, abagurusi nabo bakomerwe kurolerra n’okulinda abantu ba Ruhanga omu kasumi akagumire. (Ebik. 20:28; 2 Tim. 3:1) Nitusobora kwegera ha kyokurorraho kya Gideoni eky’obuculeezi, obwebundaazi, n’obuhulizi. Okugumiisiriza kwe kukalengwa obwakaba nahikiiriza obujunanizibwa bwe. Katube nituheereza nk’abagurusi rundi nangwa, itwena tusemeriire kusiima omulimo abagurusi barukukora. Tusemeriire kusagika abasaija banu abekambi.—Baheb. 13:17. w23.06 2 ¶1; 3 ¶3