Maaci

Ensi empyaka tekaizire. Baitu tekerezaaho ebintu ebyorukurora nk’enyunyuuzi, emiti, ebisoro n’abantu. Busaho asobora kugurukyagurukya ngu ebintu binu tibiroho, n’obukiraaba ngu haroho akasumi obubikaba bitaroho. Biroho habwokuba Yahwe nuwe yabihangire. (Kub. 1:​1, 26, 27) Ruhanga waitu aine ekigendererwa eky’okuleetaho ensi empyaka. Kandi naija kukihikiiriza. Omu nsi empyaka abantu nibaija kwegondeza omu bwomeezi obutahwaho nambere hatali burwaire. Akasumi Ruhanga akataireho obukaraahika, naija kuhindura ensi yoona agifoole empyaka. (Is. 65:17; Kus. 21:​3, 4) Obutukyalinzire, leka tukozese omugisa gwona oguturatunga kugumya okwikiriza kwaitu. Ikara n’osiima habw’ekicunguro. Tekerezaaho amaani ga Yahwe. Kandi ikara n’oyejumbira omu bintu eby’omwoyo. Obworakora oti, noija kuba omu hali abo “abagwetwa emirago obwokuikiriza nokuguma.”—Baheb. 6:​11, 12. w23.04 31 ¶18-19

Yesu yarora haiguru yasaba omu maiso g’abantu. N’agonza abantu bahe Yahwe ekitiinisa habw’ekyarukugenda kukora. Hanyuma Yesu yayamirra ati: “Lazaro, turuka oije!” (Yoh. 11:43) Kandi Lazaro yaruga omu kituuro! Yesu akora ekintu baingi ekibasobora kuba baali nibatekereza ngu tikirukusoboka. Ebyahandiikirwe binu bigumya okwikiriza kwaitu omu kuhumbuuka. Omu mulingo ki? Ijuka Yesu ekiyaraganiize Maliza: “Munyanyoko nagenda okuhumbuka.” (Yoh. 11:23) Kusisanaho na Ise, Yesu n’agonza kandi aine amaani g’okuhikiiriza omurago ogu. Okurra kwe kukooleka ngu n’agondeza kimu kwihaho okufa n’obusaasi obuleetwa okufa. Kandi Lazaro obuyarugire omu kituuro, Yesu akoleka ngu aine amaani ag’okuhumbuura abafu. Ekindi, tekerezaaho Yesu ekiyagambiire Maliza nk’oku kyolekerwe omu kyahandiikirwe kya kiro kinu. Twine ensonga enungi habwaki nitwikiriza ngu omurago gwa Ruhanga ogw’okuhumbuura abafu nigwija kuhikirra. w23.04 11-12 ¶15-16

Nitusobora kuhinduramu esaara zaitu hanyuma y’okwetegereza Yahwe ekyarukugonza. Tusemeriire kwijuka ngu Yahwe aine ekigendererwa, kandi naija kuhikiiriza kusigikirra ha bwire obwataireho. Ekigendererwa kinu nikitwarramu kumaraho ebizibu byona ebiretiire abantu kubonabona nk’ebigwererezi, endwaire, n’okufa. Yahwe naija kuhikiiriza ekigendererwa kinu nakozesa Obukama bwe. (Dan. 2:44; Kus. 21:​3, 4) Nk’oku akasumi ako katakahikire, Yahwe aikiriize Sitaani kulema ensi. (Yoh. 12:31; Kus. 12:9) Kakuba Yahwe amaraho ebizibu byona hati, nikisobora kuzooka ngu Sitaani nalema kurungi abantu. N’obukiraaba ngu tukyalinzire akasumi Yahwe obwarahikiiriza emirago ye, kinu tikirukumanyisa ngu tatukonyera. Yahwe naija kutukonyera. w23.05 8 ¶4; 9-10 ¶7-8

Nitusobora tuta kukonyera abantu abandi kugasirwa ha kiro ky’Ekiijukyo? Eky’okubanza nukwo kubaraaliza. Oihireho kuraaliza abantu tutangatangana omu buheereza, nitusobora n’okuhandiika orukarra rw’abantu abaturukugonza kuraaliza. Banu nibatwarramu abanyabuzaale, abatukora nabo, abeegi bataahi baitu, hamu n’abandi. N’obuturaaba tutaine kaadi ezirukumara kubaraaliza, nitusobora kubasindikira endagirro nukwo bagitunge ha byoma ebya kalimagezi. Nikisobora kutuhuniiriza habw’abantu abaraabaho ha kiro ky’Ekiijukyo. (Mug. 11:6) Kiijuke ngu abantu turaaliza nibasobora kuba baine ebikaguzo bingi, kukira muno obubaba batakaijaga omu nsorrokano zaitu. Nahabweki nitusobora kutekerezaaho ebikaguzo ebibasobora kutukaguza kandi tutekanize eby’okugarukamu. Hanyuma y’Ekiijukyo, abaizire habw’omurundi gwabo ogw’okubanza nibasobora kuba baine ebikaguzo ebindi. Nitugonza kukora ekiturukusobora kukonyera abantu “abaine entekereza enungi ey’esobora kubaleetera kutunga obwomeezi obutahwaho” kugasirwa ha Kiijukyo.—Ebik. 13:​48, NWT. w24.01 11-12 ¶13, 15; 13 ¶16

Omu Baibuli harumu ebyokurorraho munaana eby’abantu abaahumbuukire omu nsi. Habwaki otabyesomesaaho n’obwegendereza? Obworaaba n’okikora serra amasomo ag’osobora kwega. Tekerezaaho omulingo buli kyokurorraho kirukwoleka ngu Yahwe n’agonza kuhumbuura abafu kandi aine amaani ag’okukikora. Ekirukukirayo obukuru, wecumiitirizeeho okuhumbuuka okurukukirayo obukuru, okwa Yesu. Ijuka ngu abantu baingi bakamurora hanyuma y’okuhumbuuka kandi eki nikyongera kugumya okwikiriza kwaitu. (1 Kol. 15:​3-6, 20-22) Mali nitusiima muno Yahwe habw’okutuha omurago ogw’okuhumbuuka! Nitukigumya ngu nigwija kuhikirra habwokuba Yahwe n’agonza kandi aine maani ag’okuguhikiiriza. Leka tucweremu kimu kwikara nitugumya okwikiriza kwaitu omu kunihira kunu okw’omuhendo. Obuturakikora nitwija kweyongera kwirra haihi na Ruhanga, ow’aturaganiize ati: ‘Abantu baawe nibaija kuhumbuuka!’—Yoh. 11:23. w23.04 8 ¶2; 12 ¶17; 13 ¶20

Obuculeezi n’obwebundaazi eri miringo erukugonza kusisana. Twoleka ngu tuli baculeezi obutwerora omu mulingo oguhikire kandi tukamanya obugarukiro bwaitu. Twoleka ngu tuli bebundaazi obututeekamu abandi ekitiinisa kandi tukabarora nk’abarukutukira. (Baf. 2:3) Obwire oburukukira obwingi omuntu omuculeezi aba mwebundaazi. Gideoni akaba ali musaija omuculeezi kandi omwebundaazi. Malaika wa Yahwe obuyamugambiire ngu akaba akomerwe kujuna Abaisaleri omu mukono gw’Abamidiani, Gideoni akamugarukamu ati: “Bagenzi bange nibakira obunaku bona abomu Manase, nanyowe ninkira obuto bona abomu nju ya isenyowe.” (Bac. 6:15) Akerora nk’owatarukusobora kuhikiiriza obujunanizibwa obu, baitu Yahwe akaba akimanyire ngu n’asobora. Habw’obukonyezi bwa Yahwe, akasobora kubuhikiiriza kurungi. Abagurusi bekamba kwoleka obuculeezi n’obwebundaazi omu byona ebibarukukora. (Ebik. 20:​18, 19) Tibehaisaniza habw’ebibakozere rundi habw’ebibasobora kukora; kandi tiberora nk’abataine mugaso habw’ensobi ezimu ezibakora. w23.06 3 ¶4-5

Sitaani alihwerekerezebwa hanyuma y’emyaka1,000. (Kus. 20:​7-10) Baitu eki kitakabaireho, Baibuliegamba ngu haroho ebintu ebirukuhuniiriza ebiribanza kubaho. Eky’okubanza, amahanga galirangirra ngu “mirembe, busaho kabi.” (1 Bas. 5:​2, 3) Omuhito omwingi gulitandika “bwangu,” amahanga obugalitahirra amadiini goona ag’ebisuba. (Kus. 17:16) Hanyuma y’ebi, Yesu alicwera abantu omusango nayahukaniza entaama n’embuzi. (Mat. 25:​31-33, 46) Kasumi ako, Sitaani naija kulengaho kuhakaniza entekaniza za Yahwe. Habwokuba anoba abaheereza ba Ruhanga ab’amananu, naija kuleetera amahanga ageteraniize hamu Baibuli ageyeta Gogi wa Magogi kubatahirra. (Ez. 38:​2, 10, 11) Omu kasumi ak’omuhito omwingi, abaseserweho amagita abaliba bakyali omu nsi balitwarwa omu iguru kweteranizaaho Yesu n’ihe rye kurwana obulemu bwa Haramagedoni. (Mat. 24:31; Kus. 16:​14, 16) Hanyuma y’ebi, Obulemi bwa Kristo obw’Emyaka Rukumi bulitandika.—Kus. 20:6. w23.10 20-21 ¶9-10

Kasumi kanu baingi ha baheereza ba Yahwe bali omu mahanga nambere omulimo gwaitu gutangirwe. Booleka ngu nibateekamu ab’obusobozi ekitiinisa ekibasemeriire, baitu nka Obadiya, ab’oruganda na banyaanya itwe banu bagumizaamu nibaheereza Yahwe n’obwesigwa. (Mat. 22:21) Booleka ngu nibatiina Ruhanga kuraba omu kumworobera kukira kworobera abantu. (Ebik. 5:29) Kinu bakikora kuraba omu kwikara nibatebeza amakuru amarungi n’okusorrokana omunsita. (Mat. 10:​16, 28) Balengaho kurora ngu ab’oruganda na banyaanya itwe baatunga ebyokulya eby’omwoyo ebirabakonyera kwikara haihi na Yahwe. Tekerezaaho ekyokurorraho ky’ow’oruganda Henri, ow’arukwikara omu Afrika omu ihanga nambere omulimo gwaitu gwamazire akasumi gutangirwe. Omu kasumi ako, akehayo kutwarra Abakristaayo bagenzi be ebyokulya eby’omwoyo. Akagamba ati: “Ndi muntu w’ensoni. . . . Yahwe . . . akampa obumanzi obunkaba ninyetaaga.” Naiwe n’osobora kwoleka obumanzi nka Henri obuyayolekere? N’osobora kakuba okurakuraniza kutiina Ruhanga. w23.06 16 ¶9, 11

Adamu na Hawa obubaajeemiire Yahwe, kyali nikizooka nk’ekitarukusoboka abantu abahikiriire kandi abarukworobera Yahwe kwijuza ensi. Sitaani n’asobora kuba yatekeriize ngu eki Yahwe akaba atasobora kukihikiiriza. Yahwe akaba n’asobora kuhwerekereza Adamu na Hawa nukwo ahange abantu abandi abahikiriire nubo baijuze ensi. Kakuba Yahwe yakozere eki, Sitaani yakumwesere omubiihi w’ebisuba. Habwaki? Habwokuba Yahwe akaba araganiize Adamu na Hawa ngu oruzaaro rwabo nurwo rwakwijwize ensi nk’oku kyolekerwe omu Okubanza 1:28. Obundi Sitaani akatekereza ngu Yahwe akaba naija kwikiriza Adamu na Hawa kuzaara abaana baitu abatahikiriire. (Mug. 7:20; Bar. 3:23) Omu mulingo ogu, Sitaani yakugambire ngu Yahwe alemerwe kuhikiiriza ebiyaraganiize. Habwaki? Habwokuba eki tikyakuhikiiriize ekigendererwa kya Ruhanga eky’okufoora ensi orugonjo orurungi orurumu abantu abahikiriire, kandi abaijukuru ba Adamu na Hawa. w23.11 6 ¶15-16

Yahwe atuha oburagirizi oburukwetegerezebwa kurungi nakozesa Ekigambo kye n’ekitebe kye. Titusemeriire kugira ekitwayongeraho ha buragirizi obwarukutuha. (Nfu. 3:​5-7) Nahabweki, titweteraho ebiragiro ebitali omu Baibuli kandi tituteekaho ebiragiro ha nsonga buli omu ez’asemeriire kwecweramu. Sitaani akozesa ‘ebisuba ebitarumu’ hamu ‘n’eby’okubanza eby’ensi’ kuhabisa n’okubaganizaamu abantu. (Bak. 2:8) Omu kyasa eky’okubanza binu byatwarramuga ebifirosofo ebirukusigikirra ha ntekereza z’abantu, enyegesa z’ekiyudaaya ezitarukusigikirra ha Baibuli, n’enyegesa erukugamba ngu Abakristaayo basemeriire kuhondera Ebiragiro bya Musa. Ebi bikaba biri bisuba habwokuba bikahugura abantu, byabaiha hali Yahwe Endugirro y’amagezi. Kasumi kanu, Sitaani akozesa amakuru rundi emikura ey’okubalizaaho kurarangya amakuru agataine bwakaiso n’entekereza ezindi ezikurakuranizibwa ab’eby’obulemi. w23.07 16 ¶11-12

Yahwe akakora ekintu Sitaani akaba atasobora kunihira. Yahwe akooleka ngu abaza amananu, yaleka Adamu na Hawa baazaara abaana. Kandi akooleka ngu kakuba agamba ngu naija kukora ekintu, busaho ekisobora kumulemesa kukikora. Kusobora kuhikiiriza ekigendererwa kye, akaraganiza kusindika ‘oruzaaro’ orwakujunire abaijukuru ba Adamu na Hawa abaakucwiremu kumworobera. (Kub. 3:15; 22:18) Sitaani aine kuba akaba atarukunihira ngu Yahwe n’asobora kuteekaho entekaniza ey’ekicunguro. Habwaki? Habwokuba n’esigikirra ha kugonza okutarumu okwegondeza. (Mat. 20:28; Yoh. 3:16) Sitaani taine okugonza kunu habwokuba ayegondeza wenka. Hati, kiki ekirukwija kubaho habw’entekaniza ey’ekicunguro? Hakumalirra kw’Emyaka Rukumi ey’Obulemi bwa Kristo, abaijukuru ba Adamu na Hawa abahikiriire nibaija kwikara omu nsi ey’efookere orugonjo orurungi, nk’oku ekigendererwa kya Yahwe kikaba kiri ha kubanza. w23.11 6 ¶17

Tworobera ekiragiro kya Yahwe ekirukwoleka ngu obwomeezi n’esagama by’omuhendo. Habwaki? Habwokuba Yahwe agamba ngu esagama ekikirra obwomeezi, ekisembo eky’omuhendo kuruga haluwe. (Lev. 17:14) Yahwe obuyaikiriize abantu kulya enyama habw’omurundi gw’okubanza, akabagambira kutalya esagama. (Kub. 9:4) Akongera yagarukamu ekiragiro kinu obuyahaire Abaisaleri Ebiragiro bya Musa. (Lev. 17:10) Kandi akaragira akatebe ak’omu kyasa eky’okubanza kutererra Abakristaayo ‘kulekerayo kimu . . . esagama.’ (Ebik. 15:​28, 29) Tworobera ekiragiro kinu obutucwamu kara obujanjabi obuturaikiriza. Tworobera endengo za Yahwe ezirukukwata ha ngeso. Omukwenda Paulo akakozesa ekyokurorraho ekirukwetegerezebwa kurungi obwakaba natutererra ‘kufiisa’ ebicweka byaitu eby’omubiri. Eki nikimanyisa ngu tusemeriire kweyihamu okwegomba okubi. Twetantara kurora rundi kukora ekintu kyona ekisobora kutuleetera kusiihana.—Bak. 3:5; Yob. 31:1. w23.07 15 ¶5-6

Samusoni akesiga Derira habwokuba akaba namugonza muno, yalemwa kumanya ebigendererwa bye. Derira akaikara namukaguliiriza habwaki aine amaani maingi kandi Samusoni yamalirra amugambiire. Eky’obusaasi, Samusoni aketeeka omu nyikara eyamurugiiremu kufeerwa amaani ge n’enkoragana ye na Yahwe. (Bac. 16:​16-20) Akatunga ebizibu habw’okwesiga Derira omu kiikaro ky’okwesiga Yahwe. Abafirisiti bakakwata Samusoni kandi bamwihamu amaiso. Bakamuteeka omu nkomo omu Gaza, baamufoora mwiru w’okusa engano. Hanyuma, Abafirisiti bakamuleeta ha bugenyi. Bakahayo ebihongwa bingi hali Dagoni ruhanga wabo ow’ebisuba, nibatekereza ngu nuwe yabakonyiire kukwata Samusoni. Bakamwiha omu nkomo, baamuleeta ha bugenyi bwabo nukwo ‘abasekese.’—Bac. 16:​21-25. w23.09 5-6 ¶13-14

Omukozi rundi omwegi mutaahi waitu n’asobora kutukaguza habwaki tuhondera endengo za Baibuli. Nitusobora kukora ekiturukusobora kumusoborra baitu tuteekamu ekitiinisa entekereza ye. (1 Pet. 3:15) Omu kiikaro ky’okumurora nk’ow’arukukuhakaniza, kozesa omugisa ogu kumanya ekyarukutekereza. Ensonga yoona eraaba emuletiire kukaguza, lengaho kumugarukamu omu mulingo gw’obuculeezi. Kakuba tumugarukamu omu mulingo gw’embabazi, nikisobora kumuleetera kuhindura entekereza ye. Ekyokurorraho, omukozi mutaahi waitu n’asobora kutukaguza habwaki tutajaguza amazaarwa, habwokuba natekereza ngu titurukwikirizibwa kwegonza. Nitusobora kumusiima habw’okufaaho abakozi abandi. Eki nikisobora kutuha omugisa gw’okumusoborra Baibuli eky’ebazaaho ha kujaguza amazaarwa. w23.09 17 ¶10-11

Mali katwine omugisa ogw’amaani kukozesa obwire obusigaireyo kutebeza abantu omu nsi yoona. Omukwenda Petero akatwekambisa ‘kutegereza’ ekiro kya Yahwe. (2 Pet. 3:​11, 12) Eki nitusobora kukikora tuta? Buli kiro tulengeho kutekerezaaho emigisa eiturayengondezaamu omu nsi empyaka. Teeramu akasisani noikya orwoya orwecumi, nolya ebyokulya ebirumu ekiriisa, notangirra abantu baawe abaafiire, kandi n’oyegesa abantu abaabaireho emyaka nyingi muno ha bunabbi bwa Baibuli obwahikiriire. Kutekerezaaho ebintu nka binu nikiija kutukonyera kwikara tulindiriire akasumi ako n’ekihika, nitukigumya ngu empero eri haihi. Habwokuba ‘tubandize kumanya ebigambo binu’ ebirukukwata ha kasumi ak’omumaiso, titurukwija ‘kuhabisibwa’ abeegesa ab’ebisuba. w23.09 27 ¶5-6

Abato betoroirwe abato abandi ‘abatarukuhurra abazaire.’ (2 Tim. 3:​1, 2) Habwaki baingi bajeemera abazaire? Abamu barora abazaire baabo bali bagobya. Abazaire bagonza abaana baabo bakole ubo ekyabalemere kukora. Abamu barora obuhabuzi bw’abazaire baabo nk’obwahoire hamulembe, rundi nk’oburukubamaraho obugabe. Obworaaba oli muto, naiwe nukwo orukwehurra oti? Baingi kibagumira kuteeka omu nkora ekiragiro kya Yahwe ekiri omu kyahandiikirwe ekya kiro kinu. Kiki ekirakukonyera kukyorobera? N’osobora kwegera ha kyokurorraho kya Yesu ekyokuba muhulizi. (1 Pet. 2:​21-24) Akaba muntu ow’ahikiriire baitu aine abazaire abatahikiriire. Baitu nabwo, Yesu yateekamuga bazaire be ekitiinisa n’obukiraaba ngu baakoraga ensobi, kandi obwire obumu tibamwetegerezaaga.—Kurug. 20:12. w23.10 7 ¶4-5

Omukwenda Paulo akabasoborra ngu ebihongwa ebyaragirwaga omu Biragiro bya Musa, byali bitasobora kwihiraho kimu ekibi. Habw’ensonga egi, Ebiragiro bya Musa byali ‘biihirweho.’ Kandi hanyuma Paulo akabeegesa amananu agahamire. Akabaijukya “okunihira okurukukira oburungi” okurukusigikirra ha kihongwa kya Yesu, okwakubakonyiire kwirra “haihi Ruhanga.” (Baheb. 7:19) Paulo akabasoborra omulingo kuramya kwabo kasumi ako kwali nikukira omulingo baaramyamuga batakafookere Bakristaayo. Okuramya okw’Ekiyudaaya okurukusigikirra ha Biragiro bya Musa kikaba kiri “kiituuru kyebi ebirukuija, baitu ekintu kyonyini nuwe Kristo.” (Bak. 2:​17, NWT) Ekiituuru ky’omuntu kiba kikozerwe nkauwe, baitu ekiituuru eki aba atali muntu. Nahabweki, omulingo Abayudaaya baaramyamuga gukaba guli nk’ekiituuru habwokuba omulingo ogw’okuramya ogurukukirayo oburungi gwali nigugenda kwija. Tusemeriire kwetegereza entekaniza Yahwe ataireho kutusobozesa kuganyirwa ebibi byaitu, nukwo tusobole kumuramya omu mulingo ogwarukugonza. w23.10 25 ¶4-5

Danieri esuura 11 ebazaaho abakama babiri rundi gavumenti ibiri ezirukurwana kulema ensi. Obutulengesaniza obunabbi bunu n’obundi obuli omu Baibuli nitumanya ngu kasumi kanu “omukama wobukizi bwemoso” nuwe Russia n’amahanga agarukugisagika, kandi “omukama wobukizi bwobulyo” nubwo obulemi kirimaani obwa Bungereeza n’Amerika. Abantu ba Ruhanga abali hansi y’obulemi ‘bw’omukama w’obukiizi bw’emoso’ nibahiiganizibwa omukama ogu. Bamu h’Abakaiso ba Yahwe, batiirwe kandi batairwe omu nkomo habw’okwikiriza kwabo. Omu kiikaro ky’okumaramu ab’oruganda banu amaani, ebintu “omukama wobukizi bwemoso” arukukora byeyongiire kugumya okwikiriza kwabo. Omu mulingo ki? Habwokuba ab’oruganda bakimanyire ngu okuhiiganiza abantu ba Ruhanga kihikiiriza obunabbi obuli omu kitabu kya Danieri. (Dan. 11:41) Kumanya eki nikisobora kutukonyera kugumya okunihira kwaitu n’okwikara tuli besigwa hali Yahwe. w23.08 11 ¶15-16

Habwokuba Yahwe atugonza, amanyire omulingo twehurramu kandi n’agonza kutulinda. Asaasa muno obutuba nitubonabona. Nahabweki nitusobora kukigumya ngu naija kugarukamu esaara zaitu obutumusaba tuti: “Ondindege nkemboni eyeriso.” (Zab. 17:8) Eriso kiri kimu ha bicweka eby’omubiri ebitukirayo kulinda muno. Nahabweki Yahwe obwatulengesaniza n’emboni ey’eriso lye, aba nasisana nk’ow’arukugamba ngu, ‘Omuntu wena ow’akora kubi abantu bange, akora kubi ekintu eky’omuhendo hali nyowe.’ Yahwe n’agonza tukigumye ngu n’agonza buli omu haliitwe. Baitu akimanyire ngu ebintu ebitwarabiremu, rundi ebizibu ebiturukurabamu nibisobora kutuleetera kugurukyagurukya obwaraaba n’atugonza. Kiki ekiratukonyera kukigumya ngu Yahwe n’atugonza? Nukwo kumanya omulingo ayoleka ngu n’agonza Yesu, abaseserweho amagita, hamu naitwe itwena. w24.01 27 ¶6-7

Ezera akaba arozere omulingo Yahwe yasagikire abantu be omu bwire bw’ebizibu. Emyaka nke enyuma omu mwaka 484 Y.A., Ezera n’asobora kuba akaba naikara omu Baburoni, Omukama Ahasuero obuyahaire ekiragiro ngu Abayudaaya boona abarukwikara omu Bukama bwa Buperesi baitwe. (Es. 3:​7, 13-15) Obwomeezi bwa Ezera n’obw’Abayudaaya boona bukaba buli omu kabi! Obubaakihuliire, baketuntura muno, baaleka kulya obu nibarra kandi baasaba Yahwe abakonyere. (Es. 4:3) Tekerezaaho omulingo Ezera n’Abayudaaya abandi boona bayehuliire obukyabaireho ngu abo abaali nibagonza kubaita nubo baisirwe! (Es. 9:​1, 2) Ezera ebiyarabiremu kasumi ako bikamukonyera kwetekaniriza ebizibu ebiyakutungire omu kasumi ak’omumaiso, kandi nikisobora kuba kyamuletiire kweyongera kwesigira kimu Yahwe ngu naija kulinda abantu be. w23.11 17 ¶12-13

Omukwenda Paulo akaba namanyisa “emirimo eyebiragiro,” kandi ebi nibyo Ebiragiro bya Musa, Yahwe ebiyahaire Abaisaleri ha Rusozi Sinai. (Bar. 3:​21, 28) Nikizooka ngu omu kasumi ako, Abakristaayo Abayudaaya kyali nikibagumira kwikiriza ngu kikaba kitakyayetaagisa kworobera ebiragiro bya Musa kandi nk’oku byali bihoireho. Nahabweki, Paulo akakozesa ekyokurorraho kya Iburahimu kubooleka ngu omuntu kusobora kusiimwa Ruhanga, kikaba kitarukumwetaagisa kworobera ebiragiro ebi. Oihireho, akooleka ngu nikyetaagisa kuba n’okwikiriza. Eki nikigarramu amaani habwokuba nikitukonyera kukimanya ngu naitwe nitusobora kusiimwa Ruhanga. Kakuba twikiririza omuli Ruhanga hamu na Kristo, nitusobora kubarwa nk’abantu ab’okuhikirra. Baitu harubaju orundi, ebikorwa rundi “emirimo” erukubazibwaho omu Yakobo esuura 2, teri niyo emirimo y’ebiragiro Paulo eiyabalizeeho. Yakobo akaba nabazaaho ebintu Abakristaayo ebibakora omu bwomeezi bwabo obwa buli kiro. (Yak. 2:24) Ebikorwa ebi byoleka omuntu obwaraaba aine okwikiriza okugumire omuli Ruhanga rundi nangwa. w23.12 3 ¶8; 4-5 ¶10-11

Banyaanya itwe abarukutekerezaaho kutaaha obuswere, komamu ou orataaha na uwe obuswere n’obwegendereza. Ijuka ngu nikiija kukwetaagisa kworobera baro nk’omutwe gw’eka. (Bar. 7:2; Bef. 5:33) Nahabweki wekaguze: ‘Ali Mukristaayo ow’akuzire omu by’omwoyo? N’ayebembeza ebintu eby’omwoyo? Akora encwamu ez’amagezi? Ateekamu abakazi ekitiinisa? N’asobora kurolerra eka omu by’omubiri n’omu by’omwoyo? Obworaaba n’ogonza omusaija omurungi na iwe osemeriire kuba omukazi omurungi. Nyinabwenge omurungi ‘mukonyezi’ hali iba. (Kub. 2:18) Kandi habwokuba agonza Yahwe, nyinabwenge ayekamba kuhaisa iba ekitiinisa. (Nfu. 31:​11, 12; 1 Tim. 3:11) N’osobora kwetekaniza hati kufooka nyinabwenge omurungi kuraba omu kukurakuraniza okugonza oku oiniire Yahwe, n’okukonyera abandi omu ka hamu n’omu kitebe. w23.12 22-23 ¶18-19

Yahwe aturaganiize kutuha amagezi agaturukwetaaga kusobora kukora encwamu enungi. Nitwetaaga amagezi kuruga hali Ruhanga kukira muno obutuba nitugenda kukora encwamu ezirakwataho obwomeezi bwaitu. Ekindi, atuha amaani kusobora kugumiisiriza. Nk’oku yakozere hali omukwenda Paulo, Yahwe atuha amaani agaturukwetaaga kugumira ebizibu byaitu. (Baf. 4:13) Ekindi, akozesa eka yaitu ey’eby’omwoyo. Omu bwire bw’ekiro Yesu atakahaireyo obwomeezi bwe, akasaba muno. Akasaba Yahwe kumwihaho okuswara okw’okurorwa nk’omuntu arukujuma Ruhanga. Omu kiikaro ky’okukora eki, Yahwe akamusindikira omu h’abamalaika kumugumya. (Luk. 22:​42, 43) Naitwe Yahwe n’asobora kutukonyera nakozesa ab’oruganda na banyaanya itwe abasobora kututerraho esimu rundi kutubungira. Itwena nitusobora kuserra omugisa ogw’okugambira ab’oruganda na banyaanya itwe “ekigambo ekirungi.”—Nfu. 12:25. w23.05 10-11 ¶9-11

Abafukire omu by’omwoyo abaija ha Kiijukyo nibasobora kuba baikaire nibatiina ngu tibarukwija kubatangirra kurungi. Nahabweki wetantale kubakaguliiriza ebikaguzo ebirukubaswaza rundi kubagambira ebigambo ebisobora kubasaaliza. Ab’oruganda na banyaanya itwe banu abagonzebwa nabo baheereza ba Yahwe. Tusemererwa obubaija kutweteranizaaho omu kumuramya. (Zab. 119:176; Ebik. 20:35) Nitusiima muno Yesu habw’okuturagira kwijuka okufa kwe buli mwaka. Kandi tumanyire ensonga habwaki kikuru muno. Obutubaho ha Kiijukyo, tugasirwa kandi tukonyera n’abandi kugasirwa omu miringo nyingi. (Is. 48:​17, 18) Tweyongera kugonza Yahwe na Yesu. Twoleka ngu nitusiima habw’ekibaatukoliire. Tweyongera kugumya enkoragana yaitu n’ab’oruganda na banyaanya itwe. Kandi nitusobora kukonyera n’abandi kugasirwa omu migisa eiturayegondezaamu habw’ekicunguro. Leka itwena tukole ekiturukusobora kwetekaniriza Ekiijukyo eky’omwaka gunu, ekiro ekirukukirayo obukuru omu mwaka! w24.01 14 ¶18-19

Yahwe atwebembera ata? Omulingo omukuru ogwakikora nukwo kuraba omu Kigambo kye Baibuli. Ekindi, akozesa abantu. Ekyokurorraho, akozesa ‘omwiru omwesigwa kandi ow’amagezi’ kutuha ebyokulya eby’omwoyo ebitukonyera kukora encwamu ez’amagezi. (Mat. 24:45) Yahwe akozesa abasaija abandi abesigwa kutwebembera. Ekyokurorraho, akozesa abaroleerezi b’ebicweka hamu n’abagurusi b’ekitebe kutugarramu amaani, n’okutuha oburagirizi obutukonyera obutuba tuli omu kasumi akagumire. Mali nitusiima muno oburagirizi Yahwe obwatuha omu biro binu ebya ha mpero! Kandi kitukonyera kwikara twine enkoragana enungi na Yahwe n’okwikara omu muhanda ogw’obwomeezi obutahwaho. Baitu obwire obumu, nikisobora kutugumira kuhondera oburagirizi bwa Yahwe, kukira muno obutubutunga kuruga h’abantu abatahikiriire. Omu kasumi nk’ako, tusemeriire kukiijuka ngu Yahwe nuwe aliyo nayebembera abantu be kandi kuhondera oburagirizi bwe kitugasira. w24.02 20 ¶2-3

Nitusobora kweyongera kugonza Ruhanga kuraba omu kwesomesa Ekigambo kye. Obworaaba n’osoma Baibuli, lengaho kwetegereza eby’orukusoma ekibirukukwegesa hali Yahwe. Wekaguze: Ebindukusoma nibyoleka bita ngu Yahwe nangonza? Nibinyekambisa bita kugonza Yahwe?’ Omulingo ogundi ogutukonyera kweyongera kugonza Yahwe, nukwo kumusaba buli kiro kuruga ha mutima. (Zab. 25:​4, 5) Kandi naija kugarukamu esaara zaitu. (1 Yoh. 3:​21, 22) Tusemeriire kukurakuraniza okugonza kwaitu hali abantu abandi. Emyaka nyingi hanyuma y’Omukwenda Paulo kuhinduka Omukristaayo, akatangatangana omusigazi arukwetwa Timoseo. Timoseo yagonzaga Yahwe n’abantu abandi. Paulo akagambira Abafiripi ati: “Tinyina ondi nomu anyina omutima okuingana [n’ogwa Timoseo], alitaho omutima ebigambo byanyu.” (Baf. 2:20) Paulo akakwatwaho muno okugonza Timoseo okuyayolekaga Abakristaayo bagenzi be. Hataroho kugurukyagurukya, Abakristaayo ab’omu bitebe Timoseo ebiyabungiraga baikaraga bamulindiriire n’ekihika.—1 Kol. 4:17. w23.07 9 ¶7-10

Abaisaleri obubakaba bali haihi kutaaha omu Ensi ey’Ekaba Eraganiziibwe, Musa akafa. Yahwe akaleka kukonyera abantu be hanyuma y’omusaija onu omwesigwa kufa? Nangwa. Obubaikaraga bali besigwa, Yahwe yagumizaamuga n’abakonyera. Musa obwakaba atakafiire, Yahwe akamuragira kukoma Yosuha kwebembera abantu be. Musa akaba amazire emyaka nyingi natendeka Yosuha. (Kurug. 33:11; Bir. 34:9) Ekindi, hakaba haroho abasaija abandi abaali baine obusobozi obw’okwebembera abantu. Abamu baayebemberaga guruupu ezirumu abantu rukumi, kikumi, makumi ataano, rundi ikumi. (Bir. 1:15) Abantu ba Ruhanga bakatunga obukonyezi obubakaba nibetaaga. Ekyokurorraho ekindi ekirukusisana na kinu nikyo ekya Eriya. Akaba amazire emyaka nyingi nayebembera Abaisaleri omu kuramya okw’amananu. Baitu hanyuma, Yahwe akamutwara kuheereza omu kiikaro ekindi omu masirimuka ga Yuda. (2 Bakam. 2:1; 2 Byom. 21:12) Abaheereza ba Ruhanga abesigwa ab’omu nganda ikumi eza Isaleri bakasigara bataine bukonyezi? Nangwa. Eriya akaba amazire emyaka nyingi natendeka Erisa. Yahwe akagumizaamu nahikiriza ekigendererwa kye kandi nakonyera abaheereza be abesigwa. w24.02 5 ¶12

Abakristaayo ab’omu Efeso bakaba baikiriize amananu agali nk’ekyererezi. (Zab. 119:105) Bakaba balekere kuhondera enyegesa ez’ebisuba n’okwejumbira omu bikorwa eby’obusiihani. Bakaba nibakuratira ekyokurorraho kya Ruhanga kandi baali nibateekamu amaani kuramya Yahwe n’okukora ebi agonza. (Bef. 5:1) Omulingo nugwo gumu, obu tukaba tutakeegere amananu, tukaba tuli omu mwirima habwokuba tukaba tuli omu madiini ag’ebisuba kandi nitukora ebintu ebitarukusemeza Ruhanga. Bamu hali itwe nitusobora kuba twayejumbiire omu bijaguzo by’amadiini ag’ebisuba, rundi omu bikorwa eby’obusiihani. Baitu obu twayegere ha ndengo za Yahwe ezirukukwata ha kihikire n’ekitahikire, tukakora empindahinduka. Tukatandika kuhondera endengo za Yahwe omu bwomeezi bwaitu. Kandi mali tutungire ebirungi bingi. (Is. 48:17) Baitu haroho ekintu ekikuru eki tusemeriire kugumizaamu nitukora. Tusemeriire kwetantara engeso ez’omwirima ezi twalekere kandi ‘tugendege nk’abaana ab’omusana.’ w24.03 21 ¶6-7

N’osobora kwehurra ngu tokahikire kwehayo kandi okabatizibwa. Obundi oine empindahinduka ezi osemeriire kukora omu bwomeezi bwawe kusobora kuteeka omu nkora ebi orukwega, rundi noyetaaga obwire kweyongera kugumya okwikiriza kwawe. (Bak. 2:​6, 7) Abeegi boona bakurakurana ha rulengo orurukwahukana kandi abaana boona tibehayo bakabatizibwa ha myaka niyo emu. Lengaho kwetegereza empindahinduka ezi osemeriire kukora hatali kwerengesaniza n’omuntu ondi. (Bag. 6:​4, 5) N’obu oraaba noyehurra ngu tokahikire kwehayo hali Yahwe, n’osobora kukyeteraho nk’ekigendererwa. Saba Yahwe akukonyere kukora empindahinduka ezirukwetaagisa. (Baf. 2:13) Kandi kigumye ngu naija kugarukamu esaara yaawe.—1 Yoh. 5:14. w24.03 5 ¶9-10

Kiro kimu Sara akaba ayetuntwire muno kandi akagambiraho Iburahimu omulingo akaba nayehurra, yatandika n’okumujunana. Iburahimu akaba akimanyire ngu Sara akaba ali mukazi ayamworoberaga kandi ayasagikaga encwamu ze. Akamuhuliiriza kandi yalengaho kumaraho ekizibu. (Kub. 16:​5, 6) Kinu nikitwegesa ki? Banyineeka, mwine obujunanizibwa bw’okukorra eka yanyu encwamu. (1 Kol. 11:3) Baitu kirungi ohuliirize mukazi waawe kandi otekerezeeho enyehurra ye otakakozere encwamu kukira muno obwerukuba n’emukwataho. (1 Kol. 13:​4, 5) Omurundi ogundi, Iburahimu akakunira abagenyi abaakaba atetekaniriize. Akagambira Sara kuleka ebyakaba nakora nukwo atekanirize abagenyi emigaati nyingi. (Kub. 18:6) Sara akajwambura yasagika encwamu ya Iburahimu. Banyinabwenge, nimusobora kwegera ha kyokurorraho kya Sara kuraba omu kusagika encwamu za baiba inywe. Obumukora muti, mweyongera kugumya obuswere bwanyu.—1 Pet. 3:​5, 6. w23.05 24-25 ¶16-17

Hanyuma ya Gideoni kukomwa nk’omucwi w’emisango omu Isaleri, kikamwetaagisa kwoleka obuhulizi n’obumanzi. Akaheebwa obujunanizibwa obwakutaire obwomeezi bwe omu kabi obwokuhwerekereza ekyoto kya ise ekiyaramizaahoga Bbaali. (Bac. 6:​25, 26) Hanyuma ya Gideoni kusorooza ihe, emirundi ebiri Yahwe akamugambira kulikehya. (Bac. 7:​2-7) Kandi akagambirwa kutahirra enkambi y’abanyanzigwa ekiro omu itumbi. (Bac. 7:​9-11) Abagurusi basemeriire kwikara betekaniize ‘kuba bahulizi.’ Omugurusi omuhulizi aikara ayetekaniize kworobera Ebyahandiikirwe n’oburagirizi oburuga omu kitebe kya Yahwe. Omu mulingo ogu ateraho abandi ekyokurorraho ekirungi. Baitu obwire obumu nikisobora kumugumira kuhondera oburagirizi obuhairwe. Kandi n’asobora kwekaguza oburagirizi obu obuburaaba nibukora rundi bw’amagezi. Rundi n’asobora kusabwa kuhikiiriza obujunanizibwa obusobora kuteeka obugabe bwe omu kabi. Abagurusi nibasobora bata kwegera ha kyokurorraho kya Gideoni eky’obuhulizi omu nyikara nk’ezi? Huliiriza kurungi obuhabuzi kandi obuteeke omu nkora. w23.06 4-5 ¶9-11