Febwali

Omukama Hezekiya obwakaba arwaire muno, akesengereza Yahwe kumukiza. Yahwe akagarukamu esaara ye, yamukiza. (2 Bakam. 20:​1-6) Ha rubaju orundi, omukwenda Paulo obuyayesengeriize Yahwe kumwihaho “ekicumita omu mubiri,” ataiheho ekizibu eki. (2 Kol. 12:​7-9) Omukwenda Yakobo na Petero, boona babiri Omukama Herode akaba n’agonza kubaita. Yakobo akaitwa, kandi Yahwe yajuna Petero omu mulingo ogw’ekyamahano. (Ebik. 12:​1-11) Nitusobora kwekaguza, ‘Habwaki Yahwe yajunire Petero baitu Yakobo yaitwa?’ Baibuli tetugambira ensonga habwaki. Nitusobora kukigumya ngu emihanda ya Yahwe “yobulyo.” (Bir. 32:4) Obwire obumu, Yahwe n’asobora kutagarukamu esaara zaitu nk’oku tubaire nitunihira. Baitu habwokuba nitukigumya ngu Yahwe agarukamu esaara zaitu omu mulingo ogw’okugonza kandi ogw’obwinganiza, tituhyema habw’omulingo gwona ogw’acwamu kutugarukamu.—Yob. 33:13. w23.11 21 ¶6

Yakobo akahandiika ngu abantu ab’amagezi baikara betekaniize kuba bahulizi. Kinu nikimanyisa ngu tusemeriire kwikara twetekaniize kworobera abo Yahwe abaahaire obusobozi. Baitu Yahwe tarukutunihirramu kworobera omuntu ow’atugambira kucwa ebiragiro Bye. (Ebik. 4:​18-20) Nikisobora kutwanguhira kworobera Yahwe kukira omuntu. Habwokuba Yahwe aikara natuha oburagirizi oburukukirayo oburungi. (Zab. 19:7) Baitu abo abaahaire obusobozi tibahikiriire. Baitu nabwo, Isiitwe ow’omu iguru ahaire abazaire, abalemi, hamu n’abagurusi omu kitebe obusobozi. (Nfu. 6:20; 1 Bas. 5:12; 1 Pet. 2:​13, 14) Obutuborobera, tuba nitworobera Yahwe. w23.10 6 ¶2-3

Omulingo gumu ogutusobora kugumya okwikiriza kwaitu nukwo kutekerezaaho amaani ga Yahwe. Aine amaani g’okuhikiiriza byona ebyaraganiza. Eki akikora habwokuba nuwe Ruhanga Ow’obusobozi bwona. (Yob. 42:2; Mar. 10:27; Bef. 3:20.) Akagambira Iburahimu na Sara ngu baakuzaire omwana omwojo omu myaka yabo ey’obukuru. (Kub. 17:​15-17) Ekindi, akaraganiza Iburahimu ngu oruzaaro rwe rwakwikaire omu nsi ya Kanaani. Abaisaleri abakaba bali baijukuru ba Iburahimu, bakamara emyaka nyingi omu nsi ya Misiri nk’abairu. Kikaba nikizooka ngu omurago ogu tigulihikirra, baitu gukamara gwahikirra. Akagambira Malyamu ow’akaba atamanyire musaija ngu naija kuzaara Omwana wa Ruhanga. Kinu kyakuhikiriize obunabbi Yahwe obuyarangire emyaka nyingi muno omu rugonjo rwa Adeni! (Kub. 3:15) Tugumya okwikiriza kwaitu ngu Yahwe aine amaani ag’okuleetaho ensi empyaka obutwecumiitirizaaho ebintu ebiyaraganiize kandi yabihikiiriza.—Yos. 23:14; Is. 55:​10, 11. w23.04 28 ¶10-12

Yahwe akagarukamu esaara za Daudi. (1 Sam. 19:​10, 18-20; 2 Sam. 5:​17-25) Naitwe nitusobora kukigumya ngu naija kugarukamu ezaitu. (Zab. 145:18) Yahwe n’asobora kutagarukamu esaara zaitu omu mulingo ogutubaire nitunihira. Paulo akasaba Ruhanga kumwihaho “ekicumita omu mubiri.” Emirundi esatu, akasabaho ekizibu nikyo kimu. Yahwe akagarukamu esaara ezo? Ego, baitu omu mulingo Paulo ogw’akaba atarukunihira. Omu kiikaro ky’okwihaho ekizibu eki, Yahwe akamuha amaani agaakaba nayetaaga kusobora kugumizaamu namuheereza n’obwesigwa. (2 Kol. 12:​7-10) Naitwe esaara zaitu nizisobora kugarukwamu omu mulingo tubaire tutarukunihira. Tusemeriire kukigumya ngu Yahwe amanyire omulingo ogurukukirayo oburungi ogw’okutukonyera. N’asobora “okukora okukira byona ebitusobora okusaba nokutekereza.” (Bef. 3:20) Nahabweki n’asobora kutugarukamu omu kasumi rundi omu mulingo tubaire tutarukunihira. w23.05 8-9 ¶4-6

Tusemeriire kwikara nitutekerezaaho omurago gwa Baibuli ogw’okuhumbuuka. Habwaki? Habwokuba titumanyire nidi obutusobora kutunga oburwaire obw’amaani rundi kufeerwa omuntu waitu. (Mug. 9:11; Yak. 4:​13, 14) Okunihira kwaitu omu kuhumbuuka nikusobora kutukonyera kugumira ebizibu ebi. (1 Bas. 4:13) Ebyahandiikirwe nibitugumya ngu Isiitwe ow’omu iguru atumanyire kurungi kandi n’atugonza muno. (Luk. 12:7) Mali, Yahwe kusobora kutuhanga buhyaka, asemeriire kuba amanyire byona ebirukutukwataho n’ebiturabiremu. Habwokuba Yahwe n’atugonza muno, atuhaire omugisa gw’okwomeera ebiro n’ebiro, kandi naraganiza ngu naija kutuhumbuura obukiraaba nikyetaagisa! Habwaki nitusobora kwikiririza omu murago gw’okuhumbuuka? Habwokuba nitukigumya ngu ow’Aturaganiize n’agonza kandi aine amaani n’obusobozi obw’okuguhikiiriza. w23.04 8-9 ¶2-4

Yusufu na Malyamu baakorraga hamu kwikaza enkoragana yabo na Yahwe egumire. Bakaba bamanyire obukuru bw’okuramya Yahwe nk’eka. (Luk. 2:​22-24; 4:16) Mali bali kyokurorraho kirungi hali abo abali omu buswere! Nka Yusufu na Malyamu, obumuraaba mwine abaana, nikisobora kubagumira kubaleeta omu nsorrokano rundi kutunga obwire obw’okuramya okw’eka. Nikisobora n’okubagumira kutunga obwire bw’okwesomesa n’okusaba hamu muli inyweka. Baitu mukiijuke ngu obumuramya hamu Yahwe, mumwirra haihi kandi mweyongera kugonzangana. Nahabweki mwebembeze okuramya. Obumurukuba mwine ebizibu omu buswere bwanyu, nikisobora kubagumira kuba hamu omu kuramya okw’eka. Obukiraaba nukwo kiri, nimusobora kutandika nimubazaaho ekintu ekigufu kandi ekirukusemeza. Kinu nikisobora kubakonyera kugonzangana n’okugonza kuramiza hamu Yahwe. w23.05 22 ¶7-8

Kutiina Ruhanga kukakonyera kuta Obadiya? Kukamukonyera kuba muntu omwesigwa kandi owarukubaza amananu. Nahabweki omukama akamuha obujunanizibwa obwokurolerra enju ye. (Lengesaniza na Nehemiya 7:2.) Ekindi, kutiina Ruhanga kukakonyera Obadiya kuba n’obumanzi obwakaba nayetaaga. Kasumi ako omukama omubi Ahabu nuwe akaba nalema. (1 Bakam. 16:30) Ekindi, omukazi wa Ahabu ayaramyaga Bbaali akanoba muno Yahwe yalengaho n’okumaraho okuramya okw’amananu omu bukama bwa Isaleri obw’omu matemba. Akaita banabbi ba Ruhanga baingi. (1 Bakam. 18:4) Yezeberi obwakaba naserra banabbi ba Ruhanga kubaita, Obadiya akasereka 100 halibo omu bwingira, buli guruupu erumu banabbi ‘ataano ataano n’abaliisa ebyokulya n’amaizi.’ (1 Bakam. 18:​13, 14) Kakuba Yezeberi yamanyire Obadiya ekiyakozere, yakumwisire. Ky’amananu ngu Obadiya akatiina habwokuba akaba atarukugonza kufa. Baitu akaba n’agonza Yahwe n’abaheereza be kukira nk’oku akaba n’agonza obwomeezi bwe. w23.06 16 ¶9-10

Yahwe nakyagumizaamu kwebembera abantu nk’oku yakozere kara. Aikaire nakikora kuraba omu Kigambo kye Baibuli, n’omu Mwana we anyakuli mutwe gw’ekitebe. Haroho obwakaiso oburukwoleka ngu na kasumi kanu, Yahwe nakyakozesa abantu kutwebembera? Ego. Tekerezaaho ekyabaireho hanyuma y’omwaka 1870. Charles Taze Russell n’abanywani be bakatandika kukyetegereza ngu omu mwaka 1914, hakubaireho ebintu ebirukwoleka ngu Obukama bwa Ruhanga butandikire kulema. (Dan. 4:​25, 26) Obunabbi bwa Baibuli nubwo bwabakonyiire kumanya ekintu kinu. Yahwe nuwe akaba nabebembera omu kuseruliiriza oku? Ego. Ebintu ebyabaireho omu 1914 bikooleka ngu Obukama bwa Ruhanga butandikire kulema. Obulemu obw’Ensi Yoona obw’Okubanza bukatandika, hayongeraho endwaire ez’amaani, emisisa hamu n’enjara. (Luk. 21:​10, 11) Mali Yahwe akaba nakozesa abasaija abo abesigwa kuha abantu be oburagirizi. w24.02 22 ¶11

Nk’abantu ba Yahwe, tukimanyire ngu n’atugonza muno kandi n’agonza twegondeze omu bwomeezi. (Bar. 8:​35-39) Nitukigumya ngu emisingi ya Baibuli etugasira obutugiteeka omu nkora. (Is. 48:​17, 18) Baitu turakora ki obuturatunga ebizibu ebitubaire tutarukunihira? Ekyokurorraho, omunyabuzaale n’asobora kutukora ekintu ekitali kirungi. Nitusobora kuba twine oburwaire oburukutulemesa kuheereza Yahwe nk’okutwakugondeze. Nitusobora kuhikwaho ebigwererezi, rundi nituhiiganizibwa habw’enyikiriza zaitu. Obutuhikwaho ebizibu nk’ebi, nitusobora kwekaguza: ‘Habwaki kinu kimpikireho? Haroho ekibi ekinkozere? Kinu nikyoleka ngu Yahwe tarukumpa emigisa?’ Wakehurraga omu mulingo nk’ogu? Obukiraaba nukwo kiri otahwamu amaani. Abaheereza ba Yahwe baingi abesigwa bakarwanisa enyehurra nk’ezi.—Zab. 22:​1, 2; Hab. 1:​2, 3. w23.04 14 ¶1-2

Obutwohebwa, ahonaaho twangirra ekitekerezo rundi ekikorwa kyona ekisobora kusiisa enkoragana yaitu na Ruhanga. Yahwe natunihirramu kumworobera kuruga ha mutima. (Bar. 6:17) Ebyatugambira kukora bigasira itwe kandi titusobora kuhindura ebiragiro bye. (Is. 48:​17, 18; 1 Kol. 6:​9, 10) Sitaani alengaho kucekya encwamu yaitu ey’okworobera Yahwe kuraba omu kutumara amaani n’okutukora kubi. Ekigendererwa kye ‘ky’okutulya,’ obu nasiisa enkoragana yaitu na Yahwe. (1 Pet. 5:8) Abakristaayo ab’omu kyasa eky’okubanza bakatiinisirizibwa, baateerwa, kandi abandi baitwa habwokuba bakacwamu kworobera Yahwe. (Ebik. 5:​27, 28, 40; 7:​54-60) N’omu kasumi kanu, Sitaani n’akyakozesa omutego ogw’okuhiiganizibwa. Kinu nitukirorra ha mulingo ab’oruganda na banyaanya itwe ab’omu Russia n’omu biikaro ebindi barukutwazibwamu kubi, n’omulingo abantu abandi batuhakaniza. Oihireho emitego etanguhire kurorwa, Sitaani akozesa “obudupe” kuturwanisa.—Bef. 6:11. w23.07 15-16 ¶6-9

Obworayeyongera kwesomesa Baibuli, okugonza kwawe hali Yahwe nikwija kweyongera. Okugonza oku kukwekambisa kuteeka omu nkora ebyoyegere. Okora encwamu enungi nosigikirra ha misingi ya Baibuli. Ohinduramu entekereza yaawe, kandi oleka engeso embi habwokuba n’ogonza kusemeza Ruhanga. Otandika kwegera hali Yahwe nk’omwana omuto okwayegera ha muzaire ow’okugonza. (Bef. 5:​1, 2) Nitusobora kwekaguza tuti: ‘Okugonza okunyiniire Yahwe kweyongiire kukira obunkaba nkyabatiziibwe? Nyeyongiire kwegera hali Yahwe omu kwoleka ab’oruganda na banyaanya itwe okugonza?’ “Okugonza kwawe okwokubanza” obukuraaba kukeehere, otahwamu amaani. N’Abakristaayo ab’okubanza bakahikwaho ekintu nikyo kimu. Baitu Yesu atabange kandi naitwe tarukwija kutwanga. (Kus. 2:​4, 7) Akimanyire ngu nitusobora kwongera kutunga okugonza okutwali twine obutwayegere amananu. w23.07 8 ¶2-3

Omukwenda Petero akakora ensobi. Eky’okubanza, Petero akooleka ngu naayeyesiga ekihinguraine obu yagambire ngu naija kwikara na Yesu, abakwenda abandi n’obu baramurugaho. (Mar. 14:​27-29) Ekindi, Petero akalemwa kwikara naarora. (Mar. 14:​32, 37-41) Ekitebe ky’abantu obu kyaizire kukwata Yesu, Petero akamusigaho. (Mar. 14:50) Hanyuma, Petero akehakana Yesu emirundi esatu, yahika n’okurahira ngu tamumanyire. (Mar. 14:​66-71) Petero aketwaza ata, obu yakimanyire ngu akozere ekibi eky’amaani? Akarra muno. (Mar. 14:72) Omu kiikaro ky’okumujunaana, Yesu akamugambira ngu naija kutunga obujunanizibwa oburukukiraho. (Yoh. 21:​15-17) Petero akaba akimanyire ngu asiisire muno, baitu ataleke kuteekamu amaani kukora ekihikire. Habwaki? Habwokuba akaba akimanyire ngu Mukama we Yesu, nakyamugonza. Isomo ki eri turukwega? Yahwe naagonza tukigumye ngu naatugonza kandi ayetekaniize kutuganyira.—Bar. 8:​38, 39. w24.03 18-19 ¶13-15

Ebikorwa eby’obusiihani nibisobora kuleetera omuntu kuhurra aswaire, kwehurra nkataine mugaso, kutunga enda ezatetekaniriize, rundi eka ye kuseeseka. Nahabweki, ky’amagezi kwetantarra kimu “enju” y’omukazi omudomadoma. Oihireho kufa omu by’omwoyo, abantu abasiihani batungire endwaire ezibaletiire kufa kara. (Nfu. 7:23) Enfumo esuura 9 orukarra 18 rumalirra nirugamba ngu: ‘N’abagenyi be bali okuzimu.’ Baitu habwaki abantu baingi baikiriza kutaaha omu nju y’omukazi onu n’obukiraaba ngu nikirugamu akabi? (Nfu. 9:​13-18) Ebisisani eby’orwanju nugwo mutego ogukanyire. Abantu abamu batekereza ngu kurora ebisisani by’orwanju tikiine kabi. Baitu amananu gali ngu byakabi, biretera ababirora kuleka kwetekamu ekitiinisa, kandi nikisobora kubagumira muno kubireka. Ekindi, omuntu arukubirora kimugumira kubyeberwa kimu. Ekirukukirayo, tibimukonyera kurwanisa okwegomba okubi baitu bikuleetera kweyongerra kimu. (Bak. 3:5; Yak. 1:​14, 15) Kandi baingi abarora ebisisani eby’orwanju bamalirra bejumbiire omu bikorwa eby’obusiihani. w23.06 23 ¶10-11

N’obukiraaba ngu obwire obumu amahanga agamu gahakaniza obulemi bunu kirimaani, busaho ihanga erirukwija kugaruka omu kiikaro kyabwo. Kinu tukimanyire habwokuba “ibale” erirukukikirra Obukama bwa Ruhanga riricwacwana ebigere by’ekisisani kinu ebirukukikirra obulemi kirimaani obwa Bungereeza n’Amerika. (Dan. 2:​34, 35, 44, 45) Nokigumya ngu obunabbi bwa Danieri oburukukwata ha bigere by’ekyoma niibumba buhikire? Obukiraaba nukwo kiri, nikiija kukwataho omulingo otwazaamu obwomeezi bwawe. Torukwija kuteeka omutima ha kweserurra sente nyingi omu nsi enu ey’eri haihi kuhwerekerezebwa. (Luk. 12:​16-21; 1 Yoh. 2:​15-17) Ekindi, kwetegereza obunabbi bunu nikiija kutukonyera kurora obukuru bw’omulimo ogw’okutebeza n’okwegesa abantu. (Mat. 6:33; 28:​18-20) Hanyuma y’okwesomesaaho obunabbi bunu, n’osobora kwekaguza ekikaguzo kinu: ‘Encwamu zange zooleka ngu ninkigumya ngu Obukama bwa Ruhanga buli haihi kuhwerekereza gavumenti zoona ez’abantu?’ w23.08 11 ¶13-14

Ba mwebundaazi okiikirize ngu okukura omu myaka, obuceke, n’enyikara ey’orumu hati nibisobora kukulemesa kuheereza Yahwe nk’oku wakugondeze. Nka Bazilai, n’osobora kwanga obujunanizibwa obumu kakuba okirora ngu torukwija kubuhikiiriza kurungi habw’obuceka bw’omubiri. (2 Sam. 19:​35, 36) Nka Musa, ikiriza abandi bakukonyere nambere kisemeriire. (Kurug. 18:​21, 22) Kumanya obugarukiro bwawe nikiija kukukonyera kuleka kunihira ebitarukusoboka ekisobora kukumaramu amaani omu kaliitango k’obwomeezi. Titusemeriire kwehurra ngu nitujunanizibwa habw’encwamu embi abandi ezibakora. Titusobora kukorra abandi encwamu rundi kutanga ebizibu kubahikaho kakuba bakora encwamu embi. Ekyokurorraho, omwana n’asobora kucwamu kuleka kuheereza Yahwe. Eki nikisobora kuleetera abazaire obusaasi bw’amaani. Baitu, abazaire abejunana habw’encwamu embi ey’omwana wabo, baba nibetweka ekirukulemeera ekitarukwetaagisa. Yahwe tarukubanihirramu kwetweka obulemeezi bunu. w23.08 29 ¶11-12

Samusoni akaba atahikiriire nkaitwe, nahabweki obwire obumu yakoraga encwamu ezitahikire. Encwamu emu eiyakozere ekarugamu ebizibu. Hanyuma ya Samusoni kumara akasumi naheereza nk’omucwi w’emisango, “yagonza omukazi owomu kihanga kya Soleki, ibaralye nuwe Derira.” Enyumaho, akaba ajumbiire omukazi Omufirisiti baitu kinu ‘kikaruga hali Yahwe’ habwokuba “akaserra omwanya hokurwanira Nabafirisiti.” Hanyuma, akaikara omu nju y’omukazi omusiihani Omufirisiti, omu rubuga rwa Gaza. Kandi Ruhanga akaha Samusoni amaani kwihamu enyigi z’orubaga, ekyaruletiire kwikara rutaine bulinzi. (Bac. 14:​1-4; 16:​1-3) Baitu enkoragana ya Samusoni na Derira ekaba etaine kakwate n’okuhoora enzigu hali Abafirisiti, habwokuba nikisobora kuba ngu Derira akaba ali Omunyaisaleri. Derira akaikiriza Abafirisiti kumuha sente nyingi nukwo agobeze Samusoni. w23.09 5 ¶12-13

Kwoleka okwetegereza nikisobora kutukonyera kuba bantu abaculeezi. Omuntu arukwetegereza ayoleka okwetanga abantu abandi obubahakaniza enyikiriza ze. Obwire oburukukira obwingi abantu obubatukaguza ebikaguzo tibatugambira ensonga yonyini habwaki bakagwize. Ekyokurorraho, omuntu n’asobora kutukaguza habwokuba nagonza kumanya rundi habw’ebigendererwa ebindi. Nahabweki tutakagarukiremu, tusemeriire kukiijuka ngu nitusobora kuba tutamanyire ekimuletiire kutukaguza. (Nfu. 16:23) Tekerezaaho omulingo Gideoni yagarukiremu abasaija Abeferaimu. Bakaija n’ekiniga baamukaguza habwaki yayangire kubeeta kumweteranizaaho kurwanisa abanyanzigwa ba Isaleri. Kiki ekyabaletiire kwetwaza bati? Nikisobora kuba ngu baali baine emyehembo? Kebe nsonga ki eyabaletiire kwetwaza omu mulingo ogu, Gideoni akalengaho kwetegereza omulingo barukwehurra, kandi yabagarukamu n’obuculeezi. Kiki ekyarugiremu? Baibuli etugambira ngu, “nubwo ekiniga kyabu kyakeha.”—Bac. 8:​1-3. w23.09 16 ¶8-9

Yahwe na Yesu bagonzangana muno nk’oku taata agonza mutabani we. Hataroho kugurukyagurukya, Yahwe akasaasa muno obuyaboine Omwana we natwazibwa kubi, nibamwanga, kandi nabonabona. Omuzaire wena ayafeeriirwe omwana amanyire obusaasi obuleetwa kufeerwa omwana. Twine okwikiriza okw’amaani omu kuhumbuuka baitu nabwo tusaasa muno obutufeerwa omuntu outurukugonza. Ekyokurorraho kinu nikitukonyera kumanya omulingo Yahwe yayehuliiremu obuyarozere Omwana we owarukugonza muno nabonabonesebwa kandi naitwa omu mwaka 33 Y.A.K. (Mat. 3:17) Ekiijukyo kitakahikire, habwaki buli omu nk’omuntu rundi omu kuramya kwanyu okw’eka mutesomesaaho ebirukukwata ha kicunguro? Kandi ha kiro ky’Ekiijukyo oteebwa kurora puroguraamu ey’embaganiza ey’Okuramya okwa Nyenkyakara. Obututekaniza emitima yaitu habw’ekiro ky’Ekiijukyo, kitusobozesa kukonyera n’abantu abandi kugasirwa.—Ezer. 7:10. w24.01 11 ¶10-12

Gumu ha miringo tusobora kutunga amaani kuruga hali Yahwe nukwo kumusaba. Agarukamu esaara zaitu kuraba omu kutuha “amani agali amaingi muno.” (2 Kol. 4:7) Ekindi, nitusobora kutunga amaani kuraba omu kwesomesa Ekigambo kye Baibuli n’okukyecumiitirizaaho. (Zab. 86:11) Obutumwa bwa Yahwe haliitwe oburukusangwa omu Baibuli bwine ‘amaani.’ (Baheb. 4:12) Obworamusaba kandi okasoma Ekigambo kye, noija kutunga amaani ag’orukwetaaga kugumiisiriza, kwikara oine okusemererwa, n’okuhikiiriza obujunanizibwa obugumire. Wetegereze omulingo Yahwe yahaire nabbi Yona obumanzi n’amaani. Yona akairuka yagenda omu kiikaro ekindi. Ekyarugiremu, akaba ali haihi kufa ihunga ery’amaani obulyatiire kandi akateeka n’obwomeezi obw’abantu abaakaba ali nabo omu kabi. Obuyanagirwe omu maizi, encu enkooto ekamumira, kandi aine kuba yatiinire muno obwakaba ali omunda y’encu. Kiki Yona ekiyakozere kutunga amaani obwakaba ali munda y’encu? Akasaba Yahwe.—Yon. 2:​1, 2, 7. w23.10 13 ¶4-6

N’obukiraaba ngu ebbaruha zinu omukwenda Petero akazihandiikira Abakristaayo ab’omu kyasa eky’okubanza, Yahwe akazifoora kicweka kya Baibuli. Nahabweki ebirumu naitwe nibitugasira. (Bar. 15:4) Twetoroirwe abantu abatarukwikiririza omu bunabbi bwa Baibuli. Abarukutuhakaniza batusekereza ngu habwokuba twikaire tulindiriire empero kumara emyaka nyingi. Abantu abamu bagamba ngu teriija. (2 Pet. 3:​3, 4) Kakuba omuntu outurukutebeza, omukozi mutaahi waitu, rundi omunyabuzaale abaza ekintu nka kinu, naitwe nitusobora kutandika kugurukyagurukya. Petero akabazaaho ekintu ekisobora kutukonyera. Abamu nibasobora kutekereza ngu Yahwe akereriirwe muno kuleeta empero y’ensi enu. Ebigambo bya Petero nibisobora kutukonyera kwikara twine entekereza ey’ehikire, habwokuba nibitwijukya ngu omulingo Yahwe aroramu obwire nigwahukana ha mulingo abantu baburoramu. (2 Pet. 3:​8, 9) Hali Yahwe emyaka rukumi eri nk’ekiro kimu. Yahwe agumiisiriize habwokuba tarukugonza omuntu wena ahwerekerre. Ekiro kye obukirahika, ensi enu embi erihwaho. w23.09 26-27 ¶2-5

Habwaki Paulo yahandikiire Abakristaayo Abaheburaniya abaikaraga omu Buyudaaya ebbaruha enu? N’asobora kuba yagihandiikire habw’ensonga zinu ibiri enkuru. Ey’okubanza, akaba n’agonza kubagarramu amaani. Baingi halibo baali bakuliire omu diini y’Ekiyudaaya. Obubafookere Abakristaayo, abebembezi baabo ab’ediini abaakara nibasobora kuba babasekeriize. Habwaki? Habwokuba Abakristaayo baali bataine yekaru ey’eyombekerwe nambere baakugenzere kuramya, baali bataine ekyoto nambere basobora kuhayo ebihongwa hali Ruhanga, kandi baali bataine banyakatagara abarabihayo. Kinu kiine kuba kyamaziremu abahondezi ba Kristo amaani kandi kyaleetera okwikiriza kwabo kuceka. (Baheb. 3:​12, 14) Abamu nibasobora kuba baatekeriize kugaruka omu diini y’Ekiyudaaya. Ekyakabiri, Paulo akagambira Abakristaayo Abaheburaniya ngu baali batarukuteekamu amaani kwetegereza ebintu ebihyaka ebibaali begere, rundi enyegesa ezihamire eziyayesere “ebyokulya ebigumire” ebirukusangwa omu Kigambo kya Ruhanga. (Baheb. 5:​11-14) Nikisobora kuba ngu bamu halibo bakaba nibakyahondera Ebiragiro bya Musa. w23.10 24-25 ¶3-4

Abakazi abamu nibasobora kucwamu kutataaha obuswere. (Mat. 19:​10-12) Baitu kigumye ngu Yahwe na Yesu nibakurora nk’ow’omuhendo. Banyaanya itwe abatali omu buswere omu nsi yoona bateraho abandi ekyokurorraho ekirungi omu kitebe. Habwokuba bagonza kandi bafaaho abantu abandi, baingi omu kitebe babarora nk’abanyaanya rundi banyinabo. (Mar. 10:​29, 30) Abamu bataahire obuheereza obw’akasumi koona. Banyaanya itwe nibekamba omu mulimo ogw’okutebeza omu nsi yoona. (Zab. 68:11) Hati, n’osobora kweteraho ekigendererwa eky’okuheereza omu buheereza obw’akasumi koona? N’osobora kuheereza nka payoniya, kukonyera omu mulimo ogw’okwombeka, rundi kuheereza ha Beseri. Kuraba omu kusaba, gambira Yahwe ha kigendererwa kyawe. Baza n’abandi abasoboire kuhikiiriza ekigendererwa nk’eki, omanye ebi osemeriire kukora kusobora kukihikaho. Hanyuma, okole ebintu ebirakukonyera kuhika ha kigendererwa kyawe. Obu orahika ha kigendererwa kyawe, nikiija kukukonyera kuheereza Yahwe omu miringo endi. w23.12 22 ¶16-17

Nk’oku omuhito omwingi guliyo nigwirirra haihi, kikuru muno kukijuka ngu tusemeriire kworobera ekiragiro eky’okutebeza amakuru amarungi. Baitu nikisobora kutugumira kakuba tuba twine ebizibu omu byentahya rundi nituhakanizibwa omu kutebeza. Kiki ekisobora kutukonyera kwebembeza omulimo gw’Obukama? Tusemeriire kukigumya ngu “[Yahwe] wamahe” ali naitwe. Naija kutusagika obuturagumizaamu nitwebembeza Obukama. Nahabweki titusemeriire kutiina ekintu kyona. (Hag. 2:4) Yahwe n’agonza tuteeke omutima ha mulimo ogw’okufoora abantu abegeswa ogurukujuna obwomeezi. Hagai akekambisa abantu ba Yahwe kutandika omulimo ogw’okwongera kwombeka yekaru. Obubaakukozere eki, Yahwe akabaraganiza ati: “Ndabahaga omugisa.” (Hag. 2:​18, 19) Naitwe nitusobora kukigumya ngu Yahwe naija kutuha emigisa kakuba twebembeza omulimo ogw’atuhaire kukora. w23.11 16 ¶8; 17 ¶11

Omu bbaruha ye hali Abarooma, omukwenda Paulo akagamba ngu abantu boona basiisi. Hati nikisoboka kita omuntu kuba ow’ahikiriire kandi akasiimwa omu maiso ga Ruhanga? Paulo akakozesa ekyokurorraho kya Iburahimu kukonyera Abakristaayo. Iburahimu obwakaba naikara omu nsi ya Kanaani, Yahwe nubwo yamwesere ow’okuhikirra. Habwaki Yahwe yayesere Iburahimu ow’okuhikirra? Kinu akakikora ngu habwokuba akaba nayorobera Ebiragiro bya Musa? Nangwa. (Bar. 4:13) Yahwe akaha ihanga lya Isaleri ebiragiro binu emyaka nka 400 hanyuma y’okweta Iburahimu ow’okuhikirra. Hati, habwaki Ruhanga yayesere Iburahimu ow’okuhikirra? Yahwe akamwoleka embabazi yamweta ow’okuhikirra habw’okwikiriza okw’akaba aine.—Bar. 4:​2-4. w23.12 3 ¶4-5

Ha kiro nabbi Nasani yabaliize Omukama Daudi ebigambo eby’ekyahandiikirwe kya kiro kinu, Yahwe akagambira Nasani ngu Daudi tinuwe yakwombekere yekaru. (1 Byom. 17:​3, 4, 11, 12) Daudi akehurra ata obuyahuliire obutumwa bunu? Akateeka omutima ha kusorooza ebintu mutabani we yakukozeseze omu kwombeka yekaru. (1 Byom. 29:​1-5) Hanyuma y’okugambira Daudi ngu tali nuwe yakwombekere yekaru, Yahwe akakora nauwe endagaano. Yahwe akamuraganiza ngu omu h’abaijukuru be yakulemere ebiro n’ebiro. (2 Sam. 7:16) Omu nsi empyaka, tekerezaaho omulingo Daudi alyehurramu obwalikimanya ngu n’ayegondeza omu bwomeezi hansi y’Obulemi bw’Emyaka Rukumi oburalemwa Yesu, omu h’abaijukuru be. Ekyokurorraho kinu nikitukonyera kurora ngu n’obuturaaba tutarukusobora kukora byona ebiturukugonza omu kuheereza Yahwe, n’asobora kutuha emigisa endi eitubaire tutarukunihira. w23.04 16 ¶8-10

N’osobora kuserra enkarra ezirukukirayo kukuhuumuza obworukuba otiinire. N’osobora kugarukwamu amaani kakuba osoma ekitabu kya Yobu, Zabuli, Enfumo n’ebigambo bya Yesu ebiri omu Matayo esuura 6. Obworasaba hali Yahwe kandi okasoma Ekigambo kye, noija kwehurra ngu nakuhuumuza. Nitusobora kukigumya ngu Yahwe naija kutukonyera obutuhikwaho enyikara ezigumire omu bwomeezi. Yahwe talitulekaho nakake. (Zab. 23:4) Naraganiza ngu naija kutulinda, atugarremu amaani, atusagike kandi atuhuumuze. Isaya 26:3 niholeka Yahwe ekyarukwija kutukorra. Nihagamba ngu: “Oramulindiraga omu businge obuhikiriire anyakugumya okutekerezakwe haliwe baitu niwe arukwesiga.” Nahabweki, wesige Yahwe kandi okole kyona ekirukusoboka kugasirwa omu bintu ebyataireho kukukonyera. Obworakora eki noija kusobora kwikara ogumire n’obworatunga ebizibu eby’amaani. w24.01 25 ¶16-17

Ebigambo eby’omu kyahandiikirwe ekyolekerwe eruguru biriyo nibihikirra kasumi kanu. N’ebigambo binu ebirukuhonderaho ebirukuhuumuza nibihikirra omu kasumi kanu: “Nabana bawe balyegesebwa [Yahwe]; nobusinge bwabana bawe buliba bwingi. Omu kuhikirra nuho oligumwa: . . . Tolitina; kandi nokwekanga kulikuba hara.” (Is. 54:​13, 14) Na Sitaani, “ruhanga owobusinge bunu,” tasobora kutanga omulimo ogw’okwegesa ogurukukorwa abantu ba Yahwe. (2 Kol. 4:4) Okuramya okw’amananu kugarwirweho, tikulyongera kusiisikara, kandi nikwija kwikaraho ebiro n’ebiro. Mali, busaho eky’okurwanisa ekirikorwa kuturwanisa ekiribona omugisa! w24.02 4 ¶10

Nk’Abakristaayo, okweraga kwaitu okw’okuheereza Yahwe tukutwara nk’ekintu ekikuru. Kandi kinu kikwataho encwamu zaitu n’omulingo tukoragana n’ab’omu maka gaitu. Twekamba kubahikyaho ebyetaago byabo, baitu twebembeza Yahwe ebyarukugonza kukira ab’omu maka gaitu ebibarukugonza. (Mat. 10:​35, 36; 1 Tim. 5:8) Obwire obumu, nikisobora kutwetaagisa kukora encwamu ezirukusemeza Yahwe baitu ezitarukusemeza abanyabuzaale baitu. Yahwe nuwe yatandikireho eka, kandi n’agonza amaka gabemu okusemererwa. (Bef. 3:​14, 15) Baitu kuba n’okusemererwa kwonyini, tusemeriire kukora ebintu omu mulingo Yahwe arukugonza. Kigumye ngu Yahwe nasiima habw’ebintu orukwefeereza nukwo omuheereze, ha murundi nugwo gumu n’oyoleka ab’omuka yaawe okugonza kandi n’obatwaza kurungi.—Bar. 12:10. w24.02 18 ¶11, 13