Janwali

Yesu ‘obuyaboine’ omukazi naganya, “yamuganyira.” (Luk. 7:13) Baitu Yesu atagarukire ha kumukwatirwa embabazi, baitu akamwoleka ngu namusaalirirwa. Akabaza nauwe omu iraka erirukuhuumuza, n’agamba ati: “Otarra.” Hanyuma akamukonyera. Akamuhumbuura “yamuha nyina.” (Luk. 7:​14, 15) Ekyamahano kinu nikitwegesa ki? Nikitwegesa kwoleka embabazi abo abarukuganya. Nka Yesu, nitusobora kwoleka embabazi abo abaferiirwe, kuraba omu kwetegereza kurungi enyikara eibarumu. Nitusobora kubooleka ngu nitubasaalirirwa kuraba omu kubaza nabo, kubakonyera n’okubahuumuza. (Nfu. 17:17; 2 Kol. 1:​3, 4; 1 Pet. 3:8) Kandi ebikorwa n’ebigambo bike nibisobora kubakonyera muno. w23.04 5-6 ¶13-15

N’obukiraaba ngu Yesu akimanyire ngu munywani we Lazaro nubwo yakamara kufa, aikara nambere ali kumara ebiro bibiri kandi hanyuma agenda Besaniya. Nahabweki nambere yahikiire, Lazaro akaba amazire ebiro bbina afiire. Yesu n’agonza kukora ekintu ekiragasira banywani be kandi kikahaisa Ruhanga ekitiinisa. (Yoh. 11:​6, 11, 17) Ekyabaireho nikitwegesa isomo erirukukwata ha bunywani. Kitekerezeeho: Malyamu na Maliza obubaasindikiire Yesu obutumwa, batamusabe kwija Besaniya. Bakamugambira ngu munywani we arwaire. (Yoh. 11:3) Lazaro obuyafiire Yesu akaba n’asobora kumuhumbuura n’asigikirra nambere akaba ali. Baitu Yesu akacwamu kugenda Besaniya nukwo asobole kuba hamu na banywani be, Malyamu na Maliza. Oine omunywani ow’ayetekaniize kukukonyera n’obworukuba otamusabire obukonyezi? Obukiraaba nukwo kiri, kigumye ngu naija kukukonyera ‘omu kasumi ak’obujune.’ (Nfu. 17:17) Nka Yesu, naitwe leka tube banywani aba mulingo ogu! w23.04 10 ¶10-11

Obu tuba nituraba omu kirengo kyona, nitusobora kutandika kwehurra ngu ensi empyaka teriija. Baitu kinu kiba nikimanyisa ngu okwikiriza kwaitu kuceke? Nangwa. Tekerezaaho ekyokurorraho kinu. Kakuba hagwa enjura ey’amaani, nitusobora kutandika kutekereza ngu izooba tirilyongera kujwa. Izooba limara lijwa. Nikyo kimu obutuba tuhoiremu amaani, nitusobora kwehurra ngu ensi empyaka teriija. Baitu okwikiriza kwaitu obukuba kugumire, tuba nitukimanya ngu emirago ya Yahwe yoona niija kuhikirra. (Zab. 94:​3, 14, 15; Baheb. 6:​17-19) Kandi eki kitukonyera kwikara nitwebembeza kuramya Yahwe omu bwomeezi bwaitu. Nitwetaaga okwikiriza okugumire kusobora kukora omulimo ogw’okutebeza. Abantu baingi batekereza ngu ebintu ebirungi ebiraaba omu nsi empyaka tibirukusoboka. (Mat. 24:14; Ez. 33:32) Tutaliikiriza kuba n’entekereza ya mulingo ogu. Tusemeriire kwikara nitugumya okwikiriza kwaitu nukwo twetantale entekereza ya mulingo ogu. w23.04 27 ¶6-7; 28 ¶14

Wakekaguzaaga Yahwe obwaraaba agarukamu esaara zaawe? Obukiraaba nukwo kiri, toli wenka. Ab’oruganda na banyaanya itwe baingi bekaguza ekikaguzo kinu, kukira muno obubaba nibaraba omu bizibu. Naitwe obuturaaba nitubonabona, nikisobora kutugumira kwetegereza omulingo Yahwe agarukamu esaara zaitu. Habwaki nitusobora kukigumya ngu Yahwe agarukamu esaara z’abaheereza be? Ebyahandiikirwe bitwoleka ngu Yahwe n’atugonza muno kandi tuli b’omuhendo haluwe. (Hag. 2:7; 1 Yoh. 4:10) Niyo ensonga habwaki n’aturaaliza kumusaba obukonyezi. (1 Pet. 5:​6, 7) N’agonza kutukonyera kwikara tuli haihi nauwe n’okugumira ebizibu ebiturukurabamu. Omu Baibuli, tukira kusomaho omulingo Yahwe yagarukiremu esaara z’abaheereza be. Kyokurorraho ki eky’osobora kutekerezaaho? w23.05 8 ¶1-4

Malyamu akaba aine enkoragana ye habwe na Yahwe. Okwikiriza kwe kutasigikirre hali ebyo Yusufu akaba nakora. Akaba namanya kurungi Ebyahandiikirwe. Ekindi, akatunga obwire kwecumiitiriza ha byakaba n’asoma. (Luk. 2:​19, 51) Busaho kugurukyagurukya, enkoragana enungi ayakaba aine na Yahwe ekamufoora nyinabwenge omurungi. Kasumi kanu banyinabwenge baingi balengaho kwegera hali Malyamu. Ekyokurorraho, munyaanya itwe arukwetwa Emiko n’agamba ati: “Obunkaba ntakataahire obuswere, nkaba nyine entekaniza yange ey’eby’omwoyo, baitu obunabutaahire nkakyetegereza ngu habwokuba iba nyowe yayebemberaga omu kusaba n’omu kuramya okw’eka nyowe nkaleka kubikora habwange. Baitu nkakyetegereza ngu nkaba nyine kuba n’enkoragana yange habwange na Yahwe. Nahabweki nkatunga obwire bw’okusaba, kusoma Baibuli n’okwecumiitirizaaho ebinsomere.” (Bag. 6:5) Banyinabwenge, obumuragumizaamu nimugumya enkoragana yanyu na Yahwe, baiba inywe nibaija kweyongera kubagonza n’okubesiimisa.—Nfu. 31:30. w23.05 22 ¶6

Tituzaarwa nitutiina Ruhanga, baitu twine kwega kumutiina. Omulingo gumu tusobora kukikoramu nukwo kwetegereza kurungi ebyahangirwe. Obutweyongera kurora amagezi ga Ruhanga, amaani ge, n’okugonza okwingi okwatwiniire kuraba omu ‘byahangirwe,’ tweyongera kumutamu ekitiinisa n’okumugonza. (Bar. 1:20) Omulingo ogundi tusobora kukurakuranizaamu kutiina Ruhanga nukwo kusaba butoosa. Obutweyongera kumusaba, tweyongera kumumanya kurungi. Buli murundi tumusaba amaani agaratukonyera kugumira ekirengo, kitwijukya ngu aine amaani maingi. Obutumusiima habw’ekisembo ky’Omwana we, kitwijukya ngu natugonza muno. Obutumusaba kutukonyera obutuba tutungire ekizibu, kitwijukya ngu aine amagezi maingi. Esaara nk’ezo zitukonyera kweyongera kuteekamu Yahwe ekitiinisa, n’okwetantara kukora ekintu kyona ekirasiisa enkoragana yaitu nauwe. w23.06 15 ¶6-7

Yahwe aikaire nakonyera abantu be kwetegereza ebiragiro bye. Ekyokurorraho, akatebe akalemi ak’omu kyasa eky’okubanza kakabazaaho emiringo esatu Abakristaayo baali basemeriire kwikara niborobera Yahwe: (1) kwetantara kuramya ebisisani, baitu baramye Yahwe wenka, (2) kworobera Yahwe obukirukuhika ha kukozesa esagama, (3) n’okuhondera endengo za Baibuli ezirukukwata ha ngeso. (Ebik. 15:​28, 29) Abakristaayo kasumi kanu nibasobora bata kworobera Yahwe omu miringo enu esatu? Kuraba omu kuramya Yahwe n’okumworobera. Yahwe akaragira Abaisaleri kuramya uwe wenka. (Bir. 5:​6-10) Kandi Sitaani obuyayoheze Yesu, Yesu akagamba ngu tusemeriire kuramya Yahwe wenka. (Mat. 4:​8-10) Nahabweki, tituramya ebisisani. Ekindi, tituramya abantu, kababe bebembezi b’amadiini, ab’eby’obulemi rundi abantu ruranganwa oti rundi baruhanga. Twikara nituramya Yahwe Ruhanga ‘ayahangire byona.’—Kus. 4:11. w23.07 14-15 ¶3-4

Ensi ya Sitaani ekurakuraniza obusiihani n’ebisisani eby’orwanju. (Bef. 4:19) Nahabweki leka tukurakuranize okutiina Ruhanga kandi twetantale ebintu ebibi. Enfumo esuura 9, ebazaaho abakazi babiri abakokurorraho, omu nakikirra amagezi kandi ondi nakikirra obudomadoma. Buli mukazi nasisana arukugamba ati: ‘Mwije omu nju yange mulye ha byokulya byange.’ (Nfu. 9:​1, 4-6) Baitu ebirugamu hanyuma y’okwikiriza okuraalizibwa oku nibyahukana. Wetegereze okuraaliza ‘okw’omukazi omudomadoma.’ (Nfu. 9:​13-18) N’obumanzi ayeta abo abataine magezi n’agamba ati: “Muije mulye.” Baitu basangayo ki? “Abafu” bali oku. Nituterererwa kwetantara omukazi omusiihani. Nitusoma ngu: “Enjuye etwara omu kufa.” (Nfu. 2:​11-19) Enfumo 5:​3-10 ebazaaho omukazi ondi omusiihani ngu “ebigerebye bisirimuka [omu] kufa.” w23.06 21-22 ¶6-7

Abagurusi basemeriire kuteekaho ekyokurorraho obukirukuhika ha kwoleka okwetegereza. (1 Tim. 3:​2, 3) Ekyokurorraho, omugurusi tasemeriire kunihira ngu obwire bwona abagurusi abandi nibaija kwikiriza entekereza ye ngu habwokuba nabakira omu myaka. Yahwe n’asobora kukozesa omwoyo gwe ogurukwera kuleetera omugurusi ondi wena h’akatebe kubaza ekintu ekirabakonyera kukora encwamu enungi. Kandi kakuba abagurusi abaingi basagika encwamu, kandi hataroho omusingi gwa Baibuli ogucwirwe, omugurusi ayoleka okwetegereza obwagisagika n’obukiraaba ngu tarukwikiranganiza nayo. Abakristaayo obubooleka okwetegereza harugamu ebirungi bingi. Twikara twine enkoragana enungi n’ab’oruganda na banyaanya itwe kandi n’ekitebe kibamu obusinge. Twegondeza omu kuheereza Yahwe omu bumu n’obukiraaba ngu nitwetwaza omu miringo erukwahukana kandi turuga omu biikaro ebirukwahukana. Ekirukukirayo obukuru, kitusemeza kukimanya ngu nitwegera hali Yahwe, Ruhanga ow’ayoleka okwetegereza. w23.07 25 ¶16-17

Danieri akesomesaaho obunabbi bwa Baibuli n’ekigendererwa ekihikire eky’okumanya amananu. Ekindi, akaba ali mwebundaazi nakimanya ngu Yahwe aha okwetegereza abo abamumanyire kandi aborobera endengo ze. (Dan. 2:​27, 28) Danieri akakyoleka ngu akaba ali mwebundaazi kuraba omu kwesiga obukonyezi bwa Yahwe. (Dan. 2:18) Ekindi, yasomaga ataireho omutima. Akakora okuseruliiriza omu Byahandiikirwe ebyakaba aine kasumi ako. (Yer. 25:​11, 12; Dan. 9:2) N’osobora ota kwegera hali Danieri? Wekebiije ebigendererwa byawe. Oyesomesa n’ekigendererwa eky’okumanya amananu? Obukiraaba nukwo kiri, Yahwe naija kukukonyera. (Yoh. 4:​23, 24; 14:​16, 17) Abamu bakikora n’ekigendererwa eky’okutunga obwakaiso oburukwoleka ngu Baibuli etahandiikisibwe Ruhanga. Behurra ngu nibasobora kweteraho endengo zaabo bonka ezirukukwata ha kihikire n’ekitahikire kandi nizo bahondera. Baitu tusemeriire kwesomesa n’ekigendererwa ekihikire. w23.08 9-10 ¶7-8

Kwerengesaniza n’abandi nikisobora kutulemeeza. (Bag. 6:4) Kakuba twikara nitwerengesaniza n’abandi, nitusobora kugira ihali kandi tutandike kukora n’amaani kubakira. (Bag. 5:26) Habw’okugonza kutunga abandi ebibaine, nitusobora kwehambiriza kukora ebintu ebitutarukusobora kandi eki ky’akabi haliitwe. Baibuli egamba ngu ‘okunihira okurukuikaraho kusununura omutima.’ Nahabweki, kakuba tutandika kunihira ekintu ekitarukusoboka, nikisobora kutumarramu kimu amaani! (Nfu. 13:12) Eki nikisobora kuba nk’ekirukulemeera haliitwe kandi kituleetere kwiruka mpora omu kaliitango k’obwomeezi. Otenihirramu bingi kukira Yahwe ebyarukukwetaagisa. Tarukukukinihirramu kumuha ebyotaine. (2 Kol. 8:12) Kandi okigumye ngu Yahwe talengesaniza ebyorukusobora kukora n’abandi ebibakora. (Mat. 25:​20-23) Nasiima muno habw’okwikara oli mwesigwa haluwe, habw’okwikiriza kwawe, hamu n’okugumiisiriza kwawe. w23.08 29 ¶10-11

Yahwe akagarukamu okusaba kwa Samusoni kandi omu mulingo ogw’ekyamahano, yaleetaho ensoro y’amaizi. Samusoni obuyaganywire “omutimagwe gwagaruka, yaruhuka.” (Bac. 15:19) Nikizooka ngu ensoro y’amaizi enu empyaka ekaba eroho, hanyuma y’emyaka nyingi nabbi Samuiri obuyaterekereziibwe omwoyo ogurukwera kuhandiika ekitabu Ekyabacwi. Abaisaleri abaaroraga amaizi ago, baine kuba baijukaga ngu Yahwe n’asobora kubakonyera kakuba bamuheereza n’obwesigwa. Naitwe tusemeriire kwesiga Yahwe kutukonyera n’obuturaaba twine obukugu, ebisembo rundi tumazire akasumi nitumuheereza. Tusemeriire kukimanya ngu ekintu kyonka ekisobora kutukonyera kuba basinguzi nukwo kwesiga Yahwe. Nk’oku Samusoni yatungire amaani obuyanywire amaizi Yahwe yamuhaire, naitwe nitwija kutunga amaani omu by’omwoyo obuturakozesa kurungi ebintu byona Yahwe ebyarukutuha.—Mat. 11:28. w23.09 4 ¶8-10

Nitusobora kukora ki kakuba abantu abandi batuhakaniza, kandi bakabazaaho kubi ibara lya Ruhanga waitu na Baibuli? Tusemeriire kusaba Yahwe atuhe omwoyo ogurukwera, n’amagezi nukwo tusobole kubagarukamu kurungi. Tusemeriire kukora ki kakuba tukyetegereza ngu tulemerwe kwoleka obuculeezi? Nitusobora kwongera nitusaba kandi tutekerezeeho omulingo tusobora kwoleka obuculeezi omurundi ogundi. Yahwe naija kutuha omwoyo ogurukwera oguratukonyera kwetanga n’okwoleka obuculeezi. Omu Baibuli harumu enkarra ezisobora kutukonyera kugarukamu abantu kurungi obutwesanga omu nyikara ezigumire. Omwoyo gwa Ruhanga nigusobora kutukonyera kwijuka enkarra zinu. (Yoh. 14:26) Ekyokurorraho, emisingi erukusangwa omu kitabu ky’Enfumo n’esobora kutukonyera kuba baculeezi. (Nfu. 15: 18) Ekitabu eki nikyoleka ebirungi ebiruga omu kwoleka okwetanga.—Nfu. 10:19; 17:27; 21:23; 25:15. w23.09 15 ¶6-7

Omukwenda Petero akaheereza Yahwe n’obwesigwa kumara emyaka nyingi. Yagendaga na Yesu obwakaba natebeza, nuwe yatandikireho omulimo gw’okutebeza omu bantu abaali batali Bayudaaya, kandi akaheereza h’akatebe akalemi. Omu biro by’okumalirra eby’obwomeezi bwe, Petero obuyakimanyire ngu ali haihi kufa, akaba aine omulimo omukuru ogw’okukora. Nka hagati y’omwaka 62-64 Y.A.K., Yahwe akamukozesa kuhandiika ebbaruha ibiri hati ezitumanyire nka 1 Petero na 2 Petero. (2 Pet. 1:​13-15) Petero akahandiika ebbaruha zinu omu kasumi nambere Abakristaayo bagenzi be baali betuntwire habw’ebirengo bingi. (1 Pet. 1:6) Abantu ababi baali nibalengaho kuleeta enyegesa ez’ebisuba kandi ezitasemiire omu kitebe Ekikristaayo. (2 Pet. 2:​1, 2, 14) Abakristaayo abarukwikara omu Yerusalemu baakuhikirweho “empero ya byona” kandi eki kyakubaireho Abarooma obubaakuhwerekeriize orubuga oru, na yekaru y’Abayudaaya. (1 Pet. 4:7) Hataroho kugurukyagurukya, ebbaruha za Petero zikakonyera Abakristaayo kumanya ekibaali basemeriire kukora kugumira emitalibaine baali nibarabamu n’okwetekaniriza ebirengo eby’omu kasumi ak’omumaiso. w23.09 26 ¶1-2

Kusisanaho na Yesu, naitwe tukira kwega kuba bahulizi obutuba omu nyikara ezigumire. Ekyokurorraho, oburwaire bwa Korona obubwali bukyacwekereho tukasabwa kuleka kusorrokanira omu Byombeko by’Obukama, n’okutebeza nju ha nju. Kikakugumira kworobera oburagirizi obu? Baitu obuwabuhondiire bukakulinda, kyaikaza ekitebe omu bumu, kandi kyasemeza na Yahwe. Itwena kitukonyiire kwetekaniza kworobera oburagirizi bwona obuturatuga omu kasumi ak’omuhito omwingi. Kworobera oburagirizi bunu nikiija kujuna obwomeezi bwaitu! (Yob. 36:11) Tucwamu kworobera Yahwe habwokuba nitumugonza kandi nitugonza n’okumusemeza. (1 Yoh. 5:3) Titusobora kusasura Yahwe habwa byona eby’atukoliire. (Zab. 116:12) Baitu nitusobora kumworobera kandi nitworobera naabo abaahaire obusobozi. Obutuba bahulizi, twoleka ngu tuli bamagezi. Abantu nk’abo basemeza omutima gwa Yahwe.—Nfu. 27:11. w23.10 11 ¶18-19

Kakuba malaika aba n’agonza kubaza naiwe, n’osobora kuhuliiriza kurungi ebyarukukugambira? Kasumi kanu malaika nabaza “namahanga gona, nenganda, nendimi, nabantu.” Nabagambira ki? “Mutine Ruhanga, mumuhe ekitinisa . . . Mumuramye ayakozere iguru, nensi.” (Kus. 14:​6, 7) Yahwe nuwe Ruhanga wenka ow’amananu buli muntu ow’asemeriire kuramya. Mali nitusiima muno habw’okutuha omugisa ogw’amaani ogw’okumuramya omu yekaru ye ey’eby’omwoyo! Yekaru ey’eby’omwoyo nikyo kiki, kandi ebirukugisoborra omu bwijwire nitusobora kubisanga nkaha? Yekaru ey’eby’omwoyo tikiri kyombeko. Eri ntekaniza Yahwe eyataireho ey’okumuramya omulingo ogwarukusiima kusigikirra ha kicunguro kya Yesu. Omukwenda Paulo akasoborra entekaniza enu omu bbaruha ye eyiyahandikiire Abakristaayo Abaheburaniya ab’omu kyasa eky’okubaza abaikaraga omu Buyudaaya. w23.10 24 ¶1-2

Omu mwaka 522 Y.A., abanyanzigwa b’Abayudaaya bakasingura omu kubalemesa kwongera kwombeka yekeru ya Yahwe. Baitu Zakaliya akabagumya ngu Yahwe naija kugumizaamu nabakonyera n’obubaakweyongiire kutunga ebizibu. Omu mwaka 520 Y.A., Omukama Daliyo akabaikiriza kugumizaamu nibombeka yekaru, yabaha sente ez’okukozesa, kandi yaragira n’abalemi ab’ekiikaro eki kubakonyera. (Ezer. 6:​1, 6-10) Yahwe akaraganiza abantu be ngu naija kugumizaamu nabasagika obubarayebembeza omulimo ogw’okwombeka yekaru. (Hag. 1:​8, 13, 14; Zak. 1:​3, 16) Habw’okwekambisibwa banabbi, Abayudaaya bakongera baatandika kwombeka yekaru, omu mwaka 520 Y.A., kandi baagimalirra omu myaka etarukuhika etaano. Habwokuba Abayudaaya bakebembeza kukora omulimo gwa Yahwe n’obukiraaba ngu bakatunga ebizibu, Yahwe akabasagika. Kandi ekyarugiremu, bakaramya Yahwe baine okusemererwa.—Ezer. 6:​14-16, 22. w23.11 15 ¶6-7

N’obukiraaba ngu abantu baingi bakahurraho Iburahimu, abarukukira obwingi bamanyire bike ebirukumukwataho. Baitu iwe omumanyireho bingi. Ekyokurorraho, okimanyire ngu Baibuli emweta “isenkurubo bona abanyakuikiriza.” (Bar. 4:11) Baitu n’osobora kwekaguza oti: ‘Nikisoboka kuhondera ekyokurorraho kya Iburahimu kandi nkatunga okwikiriza nk’okwe?’ Ego, n’osobora. Gumu ha mulingo tusobora kutunga okwikiriza nk’okwa Iburahimu nukwo kuraba omu kwesomesaaho ekyokurorraho kye. Iburahimu yayoroberaga Yahwe. Akaragirwa kugenda omu nsi eya hara, yaikara omu heema kumara emyaka nyingi, kandi yaikiriza kuhayo omwana we Isaka nk’ekihongwa. Ebikorwa ebi byona nibyoleka ngu akaba aine okwikiriza kw’amaani. Kandi eki, kikamuleetera kusiimwa Ruhanga, n’okuba munywani we. (Yak. 2:​22, 23) Yahwe n’agonza itwena, otwaliiremu naiwe, kuba bantu abarukusiimwa omu maiso ge kandi banywani be. Habw’ensonga egi, akakozesa Paulo na Yakobo kuhandiikaho ekyokurorraho kya Iburahimu eky’okwikiriza. w23.12 2 ¶1-2

Banyaanya itwe mwege kubaza kurungi n’abantu abandi. Kikuru muno Abakristaayo boona kwega kubaza kurungi n’abantu abandi. Ha nsonga enu, omwegeswa Yakobo akatutererra naakozesa ebigambo ebiri omu Kyahandiikirwe ekya kiro kinu. Obw’ohuliiriza n’obwegendereza abandi obubaba nibabaza, obooleka embabazi hamu n’okugonza. (1 Pet. 3:8) Obu oba otetegeriize omuntu ebi arukubaza rundi omulingo arukwehurramu, kaguza ebikaguzo ebisemeriire. Hanyuma banza otekereze otakabalize. (Nfu. 15:28) Wekaguze: ‘Ebi ndukugenda kubaza bihikire kandi nibyombeka? Nibyoleka embabazi kandi ngu ninteekamu abandi ekitiinisa?’ Yegera ha banyaanya itwe abakuzire omu by’omwoyo abamanyire kuhuliiriza kurungi kandi abarukubaza omu mulingo ogw’embabazi. (Nfu. 31:26) Wetegereze ebi barukubaza n’omulingo barukubibazaamu. Obu orayega kubaza kurungi n’abantu abandi, noija kweyongera kukoragana kurungi nabo. w23.12 21 ¶12

Kasumi kanu, Yahwe n’asobora kukozesa ab’omu maka gaitu, abanywani, rundi abagurusi kutusagika. Baitu obutuhikwaho enyikara egumire, tukira kwehurra tutarukugonza kuba hamu n’abantu abandi. Nahabweki, nitusobora kwesoroora. Kyabulikiro kwehurra oti. Baitu kiki ekitusobora kukora kutunga obukonyezi bwa Yahwe? Otesoroora hali abandi. Kakuba twesoroora, nitusobora kutandika kwetekerezaaho itwenka n’ebizibu ebiturukurabamu. Eki nikisobora kutuleetera kukora encwamu ezitali nungi. Itwena haroho obutuba nitugonza kuba itwenka, kukira muno obutuba nituraba omu kizibu eky’amaani. Baitu, kakuba twesoroora hali abandi kumara akasumi akaraihire, nitusobora kuba nitwanga obukonyezi obw’abantu Yahwe abarukukozesa kutusagika. Nahabweki, ikiriza obukonyezi kuruga omu b’omu ka yaawe, abanywani, n’abagurusi. Barole nk’abantu Yahwe abaarukukozesa kukusagika.—Nfu. 17:17; Is. 32:​1, 2. w24.01 24 ¶12-13

Abanaziri bakaragirwa kutasara isoke. Obubayoroberaga ekiragiro eki, baayolekaga ngu nibagonza kworobera Yahwe. Eky’obusaasi, haroho akasumi Abaisaleri obubaalekere kuteekamu ekitiinisa encwamu y’Abanaziri kandi baaleka n’okubasagika. Kiine kuba kyabetaagisaaga obumanzi bw’amaani kusobora kugumira ha ncwamu yabo ey’okutanywa amaarwa n’okwikara bali bembaganiza. (Am. 2:12) Habwokuba tucwamu kworobera Yahwe, naitwe tuba bembaganiza hali abantu abandi. Nitwetaaga obumanzi kusobora kugambira abandi ha mulimo rundi ha isomero ngu tuli bamu h’Abakaiso ba Yahwe. Kandi nk’oku enyetwaza n’entekereza y’abantu omu nsi ey’eyongiire kusiisikara, nikisobora kutugumira kuhondera emisingi ya Baibuli n’okugambiraho abandi amakuru amarungi. (2 Tim. 1:8; 3:13) Baitu ijuka ngu ‘tusemeza omutima gwa Yahwe,’ obutwoleka obumanzi tukaikara tuli bembaganiza hali abo abatarukumuheereza.—Nfu. 27:11; Mara. 3:18. w24.02 16 ¶7; 17 ¶9

Tekerezaaho ekitebe ekya Rooma. Kikaba kirumu Abayudaaya abaali begesiibwe kworobera Ebiragiro bya Musa, n’Abayamahanga abaali nibaruga omu biikaro ebirukwahukana. Abakristaayo abamu nibasobora kuba baali bairu kandi abandi bali bakama ba bairu. Abakristaayo abo bakasobora bata kwikara niboolekangana okugonza n’obukiraaba ngu baali nibahukana? Omukwenda Paulo akabagambira ati: “Muirizanganege inywenka nainywenka.” Akaba namanyisa ki? Ekigambo ekihindurwa nka “mwirizanganege” nikimanyisa kutangirra omuntu omu ka yaawe okamwoleka embabazi n’amakune, rundi kumwikiriza kufooka omu h’abanywani baawe. Ekyokurorraho, Paulo akagambira Firemoni omulingo aratangirramu omwiru we Onesimo owakaba amwirukireho. Akagamba ati: “Omuikirize nka nyowe nyenka.” (Fir. 17) Pirisikira na Akura baali bamanyire bingi ebirukukwata ha Bukristaayo kukira Apolo, baitu bakamutangirra kandi “bamutwara nambere bali.” (Ebik. 18:26) Abakristaayo abo bataikirize enyikara ezirukwahukana ezibaakuliremu kubaleetera kwebaganizaamu rundi kubalemesa kutangirra abandi. w23.07 6 ¶13

Ensonga ey’erukukirayo obukuru ey’esemeriire kukuleetera kwehayo hali Yahwe nukwo okugonza oku omwiniire. Okugonza oku tikurukusigikirra ha nyehurra kwonka. Baitu kusigikirra ha “kumanya” nokwetegereza amananu agarukukwata hali Yahwe n’ekigendererwa kye. (Bak. 1:9) Kwega Baibuli kikukonyiire kukigumya ngu (1) Yahwe aroho kwo, (2) Baibuli Kigambo kye ekyaterekereziibwe omwoyo ogurukwera, kandi ngu (3)  akozesa ekitebe kye kuhikiiriza eby’agonza. Abo abehayo hali Yahwe basemeriire kuba bamanyire enyegesa ezokubandizaaho kandi nibahondera endengo za Baibuli. Bakora kyona eki barukusobora kugambiraho abandi ebi beegere. (Mat. 28:​19, 20) Habwokuba nibagonza Yahwe, kibekambisa kuheereza uwe wenka. Na iwe nukwo orukwehurra oti? w24.03 4-5 ¶6-8

Abigairi akaba aswirwe Nabbali, Baibuli ou ebazaaho ngu akaba ali mukaali kandi aine engeso embi. (1 Sam. 25:3) Nikisobora kuba kyagumiire muno Abigairi kwikara n’omusaija nk’ogu. Baitu, Abigairi akaba aine omulingo ogwanguhire ogw’okuruga omu buswere obu? Ego. Akatunga omugisa gunu, Daudi ow’akaba naija kuba omukama wa Isaleri obu yaizire kuhwerekereza Nabbali habw’okumutwaza kubi n’abasaija be. (1 Sam. 25:​9-13) Abigairi akaba naasobora kwiruka, naaleka Daudi naita iba. Baitu eki atakikole. Oihireho akesengereza Daudi kutaita Nabbali. (1 Sam. 25:​23-27) Habwaki eki nikyo yakozere? Abigairi yagonzaaga Yahwe kandi yateekamuga ekitiinisa endengo za Yahwe ezirukukwata ha buswere. Akaba akimanyire ngu obuswere ntekaniza erukwera. Habwokuba Abigairi akaba naagonza kusemeza Ruhanga, akakora kyona ekirukusoboka kujuna ab’omu ka ye, otwaliiremu na iba. Akagira eki yakoraho bwangu-bwangu nukwo atange Daudi kwita Nabbali. w24.03 16-17 ¶9-10

Omu kitebe kyanyu, harumu abarukulengaho kworobyamu obwomeezi bwabo nukwo bongere ha buheereza bwabo? Oine abato abomanyire, abarukwoleka obumanzi bakaikara bali bembaganiza ha isomero n’obukiraaba ngu tikyanguhire? Rundi haroho aborukumanya abarukuteekamu amaani kwikara bali besigwa n’obukiraaba ngu nibahakanizibwa abanyabuzaale? Kora kyona eky’orukusobora kubagarramu amaani kandi obasiime habw’amaani barukuteekamu kwikara bali besigwa hali Yahwe. (Fir. 4, 5, 7) Yahwe akimanyire ngu nitugonza kumusemeza, kandi ngu nitusobora kwefeereza nukwo tuhikiirize okweraga kwaitu. Ayoleka ngu natwesiga kuraba omu kutuha omugisa ogw’okwecweramu kumwoleka ngu nitumugonza. (Nfu. 23:​15, 16) Nahabweki, leka tucweremu kimu kugumizaamu nituheereza Yahwe kandi nitumuheereza ekirukukirayo oburungi, twegondiize. w24.02 18 ¶14; 19 ¶16

Teeramu akasisani guli mwaka 29 Y.A.K. ha kutandika kw’obuheereza bwa Yesu. Uwe na nyina arukwetwa Malyamu, n’abamu h’abegeswa be baraaliziibwe ha bugenyi omu Kana. Malyamu aliyo nakonyera kurolerra abagenyi. Baitu obugenyi obububa nibugenda omu maiso, amaarwa gahwaho. Malyamu ahinduka arora mutabani we amugambira ati: “Tibanyina marwa.” (Yoh. 2:​1-3) Yesu akora ki? Omu mulingo gw’ekyamahano, afoora amaizi “amarwa amarungi.” (Yoh. 2:​9, 10) Yesu akakora ebyamahano ebindi bingi omu buheereza bwe. Akakozesa amaani ge kukonyera enkumi n’enkumi z’abantu. Ekyokurorraho, akaliisa abasaija 5,000 kandi ha murundi ogundi abasaija 4,000, n’asobora kuba yaliisize abantu nka 27,000 kakuba oteranizaaho abakazi n’abaana abaali baroho. (Mat. 14:​15-21; 15:​32-38) Omu kasumi ako, Yesu akakiza baingi abaali barwaire.—Mat. 14:14; 15:​30, 31. w23.04 2 ¶1-2

Hanyuma y’okutunga ekizibu eky’amaani, obwire obumu nitusobora kwehura tutaine amaani. Nka Eriya, nikisobora kutugumira kwimuka omu kitabu, nitugonza kwikara tubyamire. (1 Bakam. 19:​5-7) Nitusobora kwetaaga obukonyezi kwikara nituheereza Yahwe. Obutuba tuli omu nyikara nk’egi, Yahwe naturaganiza ngu naija kutukonyera nk’oku kyolekerwe omu kyahandiikirwe kya kiro kinu. Omukama Daudi akarora omulingo Yahwe yamukonyiire. Obwakaba naraba omu bizibu bingi, n’abanyanzigwa be nibamutiinisiriza, akagambira Yahwe ati: “Nomukono gwawe ogwobulyo gukansagika.” (Zab. 18:35) Yahwe atusagika kuraba omu kwekambisa abandi kutukonyera. Ekyokurorraho, Daudi obwakaba ahoirwemu amaani, munywani we Yonasani akagenda nambere ali yamugarramu amaani. (1 Sam. 23:​16, 17) Kandi Yahwe akakoma Erisa kukonyera Eriya.—1 Bakam. 19:​16, 21; 2 Bakam. 2:2. w24.01 23-24 ¶10-12

Yahwe atuha ebintu bingi muno. Kinu nitukirorra omu kyokurorraho eky’omukazi ow’akokurorraho ow’arukumanyisa amagezi nk’oku kyolekerwe omu Enfumo esuura 9. Omu suura egi niholeka ngu omukazi onu acumbire enyama, atekaniize amaarwa, n’emeeza omu nju ye. (Nfu. 9:2) Kusigikirra ha rukarra rwa 4 n’orwa 5, agambira abataine magezi ati: “Muije, mulye ha byokulya byange.” Habwaki tusemeriire kwikiriza okuraaliza kw’omukazi onu kandi tukalya ha kiihuro ekyatekaniize? Yahwe n’agonza abaana be babe b’amagezi kandi tarukugonza bahikweho akabi. Tarukugonza twege isomo hanyuma y’okukora ensobi eziratuleetera kubonabona n’okweyijukya. Enu niyo ensonga habwaki “ayahurra abahikiriire amagezi.” (Nfu. 2:7) Obuturaaba nitutiina Yahwe nitwija kwekamba kukora ebirukumusemeza. Obuturahurra obuhabuzi bwe obw’amagezi, n’okusemererwa nitwija kubuteeka omu nkora.—Yak. 1:25. w23.06 23 ¶14-15

N’obuturaaba tutakyasobora kuheereza Yahwe nk’oku twakugondeze, nitusobora kukigumya ngu n’asiima amaani turukuteekamu kumuheereza. Eki nitukimanya tuta? Omu kasumi ka Zakaliya, Yahwe akasaba nabbi kukora ekondo kuruga omu zaabbu n’efeeza ebyasindikirwe Abayudaaya abaali nibaikara Baburoni. (Zak. 6:11) ‘Ekondo’ enu yakubaire ‘nk’ekiijukyo’ habw’okuhayo kwabo. (Zak. 6:14) Nitusobora kukigumya ngu Yahwe talyebwa amaani tuteekamu kumuheereza n’obutuba tuli omu nyikara ezigumire. Nitwija kweyongera kutunga ebizibu omu biro binu ebya ha mpero kandi enyikara nizisobora kweyongera kusiisikara omu kasumi ak’omumaiso. (2 Tim. 3:​1, 13) Baitu titusemeriire kwetuntura ekihinguraine. Ijuka ebigambo Yahwe yagambiire abantu be omu kasumi ka Hagai. Akagamba ati: “Nyowe ndi hamu nainywe, . . . mutatina.” (Hag. 2:​4, 5) Naitwe nitusobora kukigumya ngu Yahwe naija kwikara hamu naitwe obuturagumizaamu nitwekamba kukora eby’agonza. w23.11 19 ¶20-21

Yahwe yakucwiremu kutahandikisa ensobi za Petero omu Baibuli, baitu akaziteekamu nukwo tusobole kuzegeraho. (2 Tim. 3:​16, 17) Kwega ha musaija onu ow’akaba aine enyehurra n’obuceke nk’obwaitu nikisobora kutukonyera kukirora ngu Yahwe tatunihirramu kuba bantu abahikiriire. Nagonza tugumizeemu nitumuheereza n’obukiraaba ngu twine obuceke. Habwaki kikuru kutahwamu amaani? Omulingo nugwo gumu, na hanyuma y’okutekereza ngu twine obuceke obutusingwire, nitusobora kugarukirra. Baitu twikara nituteekamu amaani kweyongera kusemezaamu. Itwena tukora rundi tubaza ebintu ebitweyijukya hanyuma. Baitu kakuba tutahwamu amaani, Yahwe naija kutukonyera kwikara nitusemezaamu. (1 Pet. 5:10) Kumanya ngu Yesu akooleka Petero embabazi n’obukiraaba ngu akakora ensobi, nikisobora kutwekambisa kugumizaamu nituheereza Yahwe. w23.09 20-21 ¶2-3

Yesu akaba n’asobora kukiza Lazaro, nk’oku Maliza yagambire omu kyahandiikirwe ekya kiro kinu. Baitu Yesu n’agonza kukora ekintu ekirukuhuniiriza. Araganiza ati: “Munyanyoko nagenda okuhumbuka.” Kandi amugambira ati: “Ninyowe kuhumbuka, nobwomezi.” (Yoh. 11:​23, 25) Ruhanga akaha Yesu amaani ag’okuhumbuura abafu. Enyumaho, akaba ahumbwire omwisiki hanyuma y’obwire buke afiire kandi yahumbuura n’omusigazi ow’asobora kuba akaba afiire ha kiro eki kyonyini. (Luk. 7:​11-15; 8:​49-55) Baitu arasobora kuhumbuura omuntu ow’amazire ebiro bbina afiire kandi omubiri gwe gutandikire kujunda? Malyamu, munyaanya Lazaro nauwe agenda hali Yesu. Agarukamu ebigambo Maliza ebyabalize: “Mukama wange, kakuba okaboli hanu, [mugenzi wange] tiyakufire.” (Yoh. 11:32) Yesu obu yarozere kandi yahurra Malyamu n’abandi nibarra, yasaasa muno. Habwokuba akaba nasaliirirwa banywani be nauwe akarra. Nayetegereza obusaasi obutuhurra obutufeerwa omuntu waitu. Nitukigumya ngu aine ekihika eky’okwihaho byona ebituleetera kurra. w23.04 10-11 ¶12-13