Obunabbi Obwizire Nibuhikirra

Tusangirwe tubalizeeho ekyokurorraho eky’Omukama Croesus ayahabisiibwe omuraguzi owa Delphi, kinu kikamuletera kusingurwa omukama wa Buperesi. Baitu Baibuli, erumu obunabbi oburukukwata ha mukama wa Buperesi kandi byona ebiyarangire bikahikirra.

Emyaka nka 200 enyuma​—Omukama Kuro atakazairwe—​nabbi Isaya ow’akaba ali Muheburaniya akaba arangire ira ibara lya Kuro kandi yayoleka n’omulingo nk’oku akaba nagenda kusingura orubuga orw’amaani orwa Baburoni.

Isaya 44:24, 27, 28: “Nukwo agambire Mukama, . . . ‘arukugambira enziha ati, “Yoma, kandi ati Ndyomya ebisaru byawe;” Arukugamba ha Kuro ati, “Nuwe mulisa wange, alihikya byona ebindukwenda:” nkokwagamba ebya Yerusalemu ati “Eryombekwa;” nebya yekaru ati “Emiganda yawe eritebwaho.”

Omusaija omunyabyafaayo Omuyonaani arukwetwa Herodotus akagamba ngu, ihe lya Kuro likahugura amaizi g’Ekyambu Furati, ekyageraga nikiraba omu rubuga rwa Baburoni. Amagezi ganu, Kuro yakozeseze gakasobozesa amahege kutaaha orubuga nibarubatira omu Kyambu. Hanyuma y’okukwata orubuga, Kuro akalekera Abayudaaya abaali batwairwe omu bunyagwa omu Baburoni kandi yabaikiriza kugarukayo n’okwombeka orubuga rwa Yerusalemu, orukaba ruhwerekereziibwe kumara emyaka 70.

Isaya 45:1: “Nukwo Mukama agambire omuntuwe ouyasesereho amagita, Kuro ounkwasire ha mukonogwe ogwobulyo, okusigura amahanga omu maisoge, kandi ndisumurra amaguru gabakama; okukingura enyigi omu maisoge, namalembo tigalikingwaho.”

Abaperesi bakataaha omu rubuga nibaraba omu nyigi ibiri enkooto ez’orubuga Abababuroni ezibatarafiireyo kukinga. Abababuroni kakuba baali bamanyire entegeka za Kuro, bakukingire enyigi zoona eziri haihi n’ekyambu. Baitu batakikole, orubuga baruleka rutaine bulinzi.

Obunabbi bunu obukuhuniriza buli bumu ha bunabbi obwingi obuli omu Baibuli obwahikiriziibwe nk’oku bwali burangirwe.a Okutasisana n’entebereza ez’abantu ezibakora nibasigikirra ha baruhanga babo ab’ebisuba, obunabbi bwa Baibuli bwo buruga hali Ogu ayagambire ati: “Ninsoborra empero kuruga ha kubanza, nokuruga ebiro byaira ebigambo bitakakozirwe.”​—Isaya 46:10.

Ruhanga omu wenka ow’amananu arukwetwa Yahwe, nuwe wenka asobora kubaza ebigambo nk’ebi. Ibara lye nirimanyisa “Afoora Buli Kintu Ekyaba Agondeze.” Ibara lye niryoleka nk’oku aine obusobozi obw’okumanya n’okuterekereza ebiraabaho omu busumi obw’omu maiso kusigikirra ha kigendererwa kye. Kinu nikitugumya ngu byona ebyaraganiize naija kubihikiriza.

OBUNABBI OBUKUHIKIRRA KASUMI KANU

Wakugondeze kumanya nk’oku obunabbi obuli omu Baibuli bubazaaho obusumi bunu obuturumu? Emyaka nka 2,000 enyuma, Baibuli ekaranga ngu “ebiro ebyakabi kaingi” biriija ‘omu biro bya ha mpero.’ Empero ya ki? Hatali empero y’ensi, rundi ey’abantu baitu empero y’ebintu nk’obutaikiraniza, kurubatirra obugabe bw’abantu, hamu n’okubonabona okumazire emyaka nyingi muno. Leka twetegereze bumu ha bunabbi oburukwoleka ngu tuli omu biro ebya ha mpero.

2 Timoseo 3:1-5: “Omu biro bya hanyuma . . . , abantu baliba abegonza bonka, nabagonza erupiya, nabemyehembo, nabekuniki, nabajumi, nabatarukuhurra ababazaire, nabatarukusima, nabatarukwera, nabatagonza bene babu, nabataterana hamu, nabahangirizi, nabatanyina okwetanga, naba’ruma, nabatagonza oburungi, nabadupi, nabagumangana, nabenyumiza bonka, nabagonza okwesemeza bonka okukira okusemeza Ruhanga; banyina okusisana nkokutina Ruhanga, baitu amani gakwo bagehakaine.”

Torukukiikiriza ngu abantu beyongiire kwetwaza omu miringo nk’enu kasumi kanu? N’orora omulingo abantu abatwetoroire nk’oku beyongiire kwegonza bonka, kugonza muno sente, kandi nk’oku baine emyehembo? Oyetegeriize omulingo obutasiima bweyongiire omu bantu kandi nk’oku batarukugonza kwikiraniza? Mali naiwe norora omulingo abaana beyongiire kujeemera abazaire babo kandi n’omulingo nk’oku abantu aburukukira obwingi bagonza eby’okwesemeza kukira kugonza Ruhanga. Kandi buli kiro ebintu nibyoyengera kusisikara.

Matayo 24:6, 7: “Nainywe mulihurra obulemu, nokuranganwa okwobulemu. . . . Ihanga liriramagira ihanga, nomukama aliramagira omukama.”

Kusigikirra h’abarukuseruliriza abamu nibatebereza ngu abantu abarukuhingura omu bukaikuru 100 nubo baferiire omu bulemu hamu n’obutabanguko kuruga omu mwaka gwa 1914, omuhendo gunu nigukira enamba y’abantu ey’amahanga maingi. Tekerezaaho amaziga, enaku, hamu n’okubonabona ebyaleserweho kufa okw’abantu abo boona. Baitu, amahanga galekere kurwana habw’okurora ebizibu ebirugamu?

Matayo 24:7: “Halibaho ekiihe” rundi enjara.

Ekitongole ekya World Food Programme kikagamba ngu: “Omu nsi enu nambere tuturukya eby’okulya ebirukumara kuliisa buli omu, abantu obukaikuru 815​—rundi omuntu omu, omu bantu mwenda—​nubo baraara enjara buli kiro. Ekirukukiraho​—omuntu omu, omu bantu basatu—​nuwe arwaire oburwaire oburukuletwa amalya mabi.” Kandi nikiteberezebwa ngu buli mwaka abaana abarukuhika nk’obukaikuru busatu nubo bafa habw’enjara.

Luka 21:11: “Halibaho emisisa emikoto.”

Buli mwaka, emisisa nka 50,000 eteera. Emisisa nka 100 esiisa ebyombeko kandi haihi buli mwaka omusisa gumu ogw’amaani muno gutera. Kusigikirra ha kuseruliiriza okumu, nikiteberezebwa ngu hagati y’omwaka 1975 na 2000 abantu 471,000 bakafa habw’emisisa.

Matayo 24:14: “Nenjiri enu eyobukama eritebezebwa omu nsi zona, okuba kaiso hali amahanga gona; nubwo empero erihika.”

Abakaiso ba Yahwe abarukuhingura omu bukaikuru munaana, baikeire nibatebeza kandi nibaha obwakaiso oburukukwata ha Bukama bwa Ruhanga omu mahanga nka 240 omu nsi yoona. Batebeza amakuru amarungi omu mbuga eziijwire abantu, omu byaro, omu bibira, hamu na ha nsozi. Obunabbi nibwoleka ngu, omulimo gunu obuguliba gukozerwe kuhika ha rulengo Ruhanga arukugonza, “nubwo empero erihika.” Eki kirimanyisa ki? Kinu kirimanyisa ngu obulemi obw’abantu bulihwaho kandi Obukama bwa Ruhanga butandike kulema. Mirago ki erukugenda kuhikirra omu Bukama bwa Ruhanga? Soma ebirukwongeraho nukwo omanye.