Ow’oli Nauwe omu Buswere obw’Alemwa Kuliinda Obwesigwa
OBUTALI bwesigwa omu buswere buseesa amaka. Abamu basoboire kuganyirangana n’okugarukamu kwombeka enkoragana yabo.a Baitu n’obubagumizaamu kwikara hamu rundi bakahukana, abo abakimanya ngu abagonzebwa baabo bakalemwa kuliinda obwesigwa bahurra obujune bwingi. Omuntu nk’ogu nasobora ata kugumira obusaasi obu?
EBYAHANDIIKIRWE EBISOBORA KUKUKONYERA
Abantu baingi basoboire kuhumuzibwa Ebyahandiikirwe n’obukiraaba ngu, bakasaasa muno abagonzebwa baabo obubalemerwe kusigara bali besigwa. Beegere ngu Ruhanga narora okurra kwabo kandi abakwatirwa embabazi.—Maraki 2:13-16.
“Omu bitekerezo byange ebingi ebiri omuli nyowe, okuhumuza kwawe [kusemeza] obwomezi bwange.”—Zabuli 94:19.
Bill nagamba ngu: “Obunasomere orukarra runu, nkarora Ruhanga nk’omuzaire ow’embabazi owarukumpumuza.
“Hali omwesigwa, oyeyoleka nkooku oli mwesigwa.”—Zabuli 18:25, Runyoro/Rutooro Bible 2012.
Carmen ou musaija we yamazire ameezi atali mwesigwa nagamba ati: “N’obukiraaba ngu iba nyowe akaba alemerwe kuliinda obwesigwa, nkesiga Yahwe habwokuba uwe mwesigwa kandi tasobora kundeka.”
“Mutatuntu’ra na kake, baitu omu kusaba kwona nokwesengereza . . . mumanyisege ebimuse’ra hali Ruhanga. Kandi nobusinge bwa Ruhanga oburukukira okumanywa kwona bulirinda emitima yanyu.”—Abafiripi 4:6, 7.
Omukazi arukwetwa Sasha nagamba ngu: “Enkarra zinu nkazisoma emirundi nyingi. Kandi obunasabire muno, Ruhanga akampa obusinge.”
Abantu boona abatubalizeeho bakaba nibehurra ngu obwomeezi bwabo tibukyaine mugaso. Baitu bakesiga Yahwe kandi basoma Ekigambo kye kyabagarramu amaani. Bill nasoborra ati: “Okwikiriza kwange kukankonyera kwikara nyine ekigendererwa omu bwomeezi n’obukiraaba ngu buli kimu kyona kikaba kihoireho. N’obukiraaba ngu nkaraba ‘omu kihanga eky’ekiituru eky’okufa,’ Ruhanga akaba ali hamu nanyowe.”—Zabuli 23:4.
a Kumanya ebirukukiraho ebirukukwata ha kuganyira rundi kutaganyira omuntu ow’agobiize mugenzi we omu buswere, rora ebicweka ebyaiziire omu Awake! eya Apuli 22, 1999, “When a Mate Is Unfaithful.”