Nitusobora Kwomeera Ebiro n’Ebiro

1. Kwecumitirizaaho omurago Yahwe atuhaire ogw’obwomeezi obutahwaho nikitukwataho kita?

YAHWE naraganiza ngu abo abarukumworobera nibaija kutunga ‘obwomeezi obutahwaho.’ (Bar. 6:23) Obutwecumitirizaaho omurago Yahwe ogw’arukutuha ogw’obwomeezi obutahwaho, hataroho kugurukyagurukya okugonza kwaitu hali uwe kweyongera kuguma. Kiteekerezeeho: Habwokuba Isiitwe ow’omu iguru natugonza muno, atuhaire ekisembo kinu nukwo tutalimurugaho ebiro n’ebiro.

2. Omurago ogw’obwomeezi obutahwaho gutukonyera guta?

² Omurago gwa Ruhanga ogw’obwomeezi obutahwaho gutukonyera kugumira ebirengo ebitwine kasumi kanu. Abanyanzigwa baitu n’obubatutiinisiriza kutwita, titurukwija kuleka kuheereza Yahwe. Habwaki? Habwokuba tukimanyire ngu kakuba tufa tuli besigwa hali Yahwe, naija kutuhumbuura twine okunihira okw’okutagarukamu kufa. (Yoh. 5:28, 29; 1 Kol. 15:55-58; Baheb. 2:15) Habwaki nitukigumiza kimu ngu nitusobora kwomeera ebiro n’ebiro? Tekeerezaaho ensonga zinu.

YAHWE AIKARAHO EBIRO N’EBIRO

3. Habwaki nitukigumya ngu Yahwe nasobora kutwikaza tuli bomeezi ebiro n’ebiro? (Zabuli 102:12, 24, 27)

³ Nitukimanya ngu Yahwe nasobora kutwikaza tuli bomeezi ebiro n’ebiro habwokuba nuwe Ndugirro y’obwomeezi, kandi aikaraho ebiro n’ebiro. (Zab. 36:9) Wetegereze bimu ha byahandiikirwe ebirugukigumya ngu Yahwe aikaireho kandi alikaraho ebiro n’ebiro. Zabuli 90:2 n’egamba ngu Yahwe aikaireho “okuruga obusinge bwona, okuhikya obusinge bwona.” Zabuli 102 nayo ebazaaho ekintu nikyo kimu. (Soma Zabuli 102:12, 24, 27.) Kandi nabbi Habakuki akabazaaho Isiitwe ow’omu iguru ati: “Tiniwe webiro nebiro, ai [Yahwe] Ruhanga wange, Arukwera wange?, [iwe tofa.]”​—Hab. 1:12.

4. Kisemeriire kutweraliikiriza kakuba kitugumira kwetegereza ngu Ruhanga aikaireho ebiro n’ebiro? Soborra.

⁴ Kikugumira kukiikiriza ngu Yahwe ali “Ruhanga atarukuhwaho”? (Is. 40:28) N’abantu abandi baingi kibagumira kukyetegereza. Erihu akabazaaho Ruhanga ati: “Omuhendo ogwemyakaye tigurukuserrwa.” (Yob. 36:26) Habwokuba titurukwetegereza ekintu, tikirukumanyisa ngu tikihikire. Ekyokurorraho, n’obukiraaba ngu nitusobora kutatetegereza kurungi omulingo ekyererezi kikoramu, eki nikimanyisa ngu ekyererezi tikiroho? Nangwa! Omulingo nugwo gumu, itwe abantu nitusobora kutetegereza kurungi ngu Yahwe aikaireho kandi aliikaraho ebiro n’ebiro. Baitu eki tikirukumanyisa ngu Ruhanga tayomeera ebiro n’ebiro. Amananu agarukukwata ha Muhangi waitu tigasigikirra ha bintu ebitusobora kuba tumanyire rundi ha bitutamanyire. (Bar. 11:33-36) Akabaho ensi niguru bitakahangirwe otwaliiremu izooba hamu n’enyunyuzi. Nitukigumya ngu Yahwe “Akakora ensi namanige.” Ego, akabaho ‘atakabambire iguru.’ (Yer. 51:15; Eng. 17:24) Nsonga ki endi ey’etuletera kukigumya ngu nitusobora kwomeera ebiro n’ebiro?

TUKAHANGWA KWOMEERA EBIRO N’EBIRO

5. Adamu na Hawa bakaba baine kunihira ki?

⁵ Kwahukanaho n’abantu, ebintu byona Yahwe ebiyahangire ebiine obwomeezi byakuhikize akasumi bifa. Akaha abantu okunihira okw’embaganiza okw’okwomeera ebiro n’ebiro. Baitu Yahwe akahabura Adamu ati: “Ha muti ogwokumanya oburungi nobubi otaligulyaho: baitu omu kiro ekyoliguliramu, mazimakwo olifa.” (Kub. 2:17) Kakuba Adamu na Hawa bayorobiire Yahwe tibakufiire. Nahabweki nikyetegerezebwa kugamba ngu akasumi kakuhikire Yahwe abaikirize kulya “ha muti ogwobwomezi.” Kinu kyakumanyisize ngu Yahwe abagumize “okwomera ebiro nebiro.”b​—Kub. 3:22.

6-7. (a) Kiki ekindi ekirukwoleka ngu abantu batahangirwe kufa? (b) Bintu ki eby’olindiriire kukora omu nsi empyaka? (Rora ebisisani.)

⁶ Abanyasayansi abamu bazoire obwakaiso oburukwoleka ngu obwongo bwaitu nibusobora kwahura ebintu ebirukuhingura omu bintu ebitwega omu bwomeezi bwaitu. Omu 2010, orupapura rumu orw’amakuru rukasoborra ngu nikiteberezebwa ngu obwongo bw’abantu bwine obusobozi bw’okwahura vidiyo ey’ekwasirwe kumara nk’esaaha obukaikuru busatu. Nikisobora kutwara emyaka erukuhingura omu 300 kurora vidiyo enu ekahwayo. Nikisoboka kuba ngu obwongo bwaitu nibusobora kwahura ebintu ebirukuhingura omu muhendo ogu. Kinu nikyoleka ngu Yahwe akakora obwongo bwaitu kwahura ebintu bingi muno kukira ebitwega omu myaka 70 rundi 80.​—Zab. 90:10.

⁷ Ekindi, Yahwe akatuhanga n’ekihika eky’amaani oky’okugonza kwikara nitwomeera. Baibuli n’egamba ngu Ruhanga akahanga abantu n’ekiteekerezo “eky’okwomeera ebiro n’ebiro.” (Mug. 3:11, NWT) Kandi egi eri emu ha nsonga habwaki turora okufa nk’omunyanzigwa. (1 Kol. 15:26) Obuturwara muno, twikaraho kwonka tutaine ekitukozere tulindirire kufa? Nangwa. Tugenda omu irwarro kutunga obujanjabi. Amananu gali, tukora kyona ekiturukusobora kwerinda kufa. Kandi omuntu outurukugonza obwafa, kaabe mukuru rundi muto tuhurra obusaasi obw’amaani. (Yoh. 11:32, 33) Hataroho kugurukyagurukya, Omuhangi waitu ow’okugonza tiyakutuhaire ekiteekerezo hamu n’obusobozi obw’okugonza kwikara tuli bomeezi kakuba ekigendererwa kye kitarabaire eky’abantu kwomeera ebiro n’ebiro. Baitu haroho n’ensonga ezindi ezituletera kwikiriza ngu nitusobora kwomeera ebiro n’ebiro. Leka tubazeeho ebintu Yahwe yakozere kara hamu n’ebyarukukora hati kwoleka ngu ekigendererwa kye tikikahindukaga.

EKIGENDERERWA KYA YAHWE TIKIKAHINDUKAGA

8. Ekyahandikirwe ekiri omu Isaya 55:11 nikitwegesa ki ha kigendererwa kya Ruhanga haliitwe?

⁸ N’obukiraaba ngu Adamu na Hawa bakasiisa kandi baletera abaana baabo okufa, Yahwe atahindule enteekereza ye erukukwata ha kigendererwa kye. (Soma Isaya 55:11.) Ekigendererwa kye kikyali ngu bantu abesigwa bomeere ebiro n’ebiro. Kinu nikyeyolekera kimu obututeekerezaaho ebintu Yahwe ebyagambire hamu n’ebyakozere kusobora kuhikiriza ekigendererwa kye.

9. Kiki Yahwe ekyaraganiize? (Danieri 12:2, 13)

⁹ Yahwe akaraganiza ngu naija kuhumbuura abaafiire kandi abahe omugisa ogw’okwomeera ebiro n’ebiro. (Eng. 24:15; Tit. 1:1, 2) Omusaija omwesigwa Yobu akaba nakigumiza kimu ngu Yahwe aine ekihika eky’okuhumbuura abo abaafiire. (Yob. 14:14, 15) Nabbi Danieri akaba akimanyire ngu abantu bakuhumbwirwe kandi batunge omugisa ogw’okwomeera ebiro n’ebiro. (Zab. 37:29; soma Danieri 12:2, 12b.) Abayudaaya ab’omu kasumi ka Yesu bakaba nabo bakimanyire ngu Yahwe yakuhaire abaheereza be abesigwa “obwomezi obutahwaho.” (Luk. 10:25; 18:18) Yesu akabazaaho omurago gunu emirundi nyingi, kandi uwe wenyini Ise akamuhumbuura.​—Mat. 19:29; 22:31, 32; Luk. 18:30; Yoh. 11:25.

10. Ebyokurorraho eby’abantu abaahumbwirwe kara, nibyoleka ki? (Rora ekisisani.)

¹⁰ Yahwe nuwe atuha obwomeezi kandi aine amaani ag’okuhumbuura abantu. Akasobozesa nabbi Eriya kuhumbuura mutabani w’omufaakati ow’omu Zalefasi. (1 Bakam. 17:21-23) Hanyuma, habw’obusobozi bwa Ruhanga nabbi Erisa akahumbuura mutabani w’Omusunamu. (2 Bakam. 4:18-20, 34-37) Ebyokurorraho binu hamu n’eby’abantu abandi abaahumbwirwe nibikigumiza kimu ngu Ruhanga aine amaani ag’okuhumbuura abantu. Yesu obwakaba ali omu nsi, akakyolekera kimu ngu Ise akaba amuhaire amaani ago. (Yoh. 11:23-25, 43, 44) Hati Yesu ali omu iguru kandi ahairwe “obusobozi bwona omu iguru na hansi.” Nahabweki, aine obusobozi obw’okuhikiriza omurago ogurukugamba ngu “bona abali omu bituro” nibaija kuhumbuurwa baine okunihira okw’okwikara bali bomeezi ebiro n’ebiro.​—Mat. 28:18; Yoh. 5:25-29.

11. Ekicunguro kitusobozesa kita kwomeera ebiro n’ebiro?

¹¹ Habwaki Yahwe yaikiriize Omwana we omugonzebwa kufa omu mulingo ogw’obusaasi? Yesu akaha eky’okugarukamu ky’ekikaguzo eki obuyagambire ati: “Ruhanga nukwo yagondeze ati Ensi, nahayo Omwanawe ayazairwe omu wenka, omuntu wena anyakumuikiriza aleke okubura, baitu atunge obwomezi obutahwaho.” (Yoh. 3:16) Ruhanga habw’okutuha Omwana we nk’ekicunguro kutwogyaho ebibi byaitu, nitusobora kutunga obwomeezi obutahwaho. (Mat. 20:28) Omukwenda Paulo akasoborra ha kicweka kinu ekikuru eky’ekigenderewa kya Ruhanga obuyahandiikire ati: “Nkokufa okukwaizire obwomuntu, nukwo obwomuntu okuhumbuka kwabafu kwaizire kuti. Baitu nka bona okubafa omu Adamu, nukwo omu Kristo bona balyomezebwa.”​—1 Kol. 15:21, 22.

12. Yahwe naija kuhikiriza ata ekigendererwa kye?

¹² Yesu akegesa abahondezi be kusaba ngu Obukama bwa Ruhanga bwije kandi ngu Ruhanga eby’agonza bikorwe omu nsi. (Mat. 6:9, 10) Kimu ha kicweka ky’ekigendererwa kya Ruhanga nikyo eky’abantu kwomeera ebiro n’ebiro omu nsi. Kusobora kuhikiiriza eki, Yahwe akakoma Omwana we kuba Mukama w’Obukama bwa Ruhanga. Ruhanga aikaire nasorooza abantu 144,000 kuruga omu nsi, kukora hamu na Yesu omu kuhikiiriza Ruhanga eby’agonza.​—Kus. 5:9, 10.

13. Kiki Yahwe ekyarukukora kasumi kanu, kandi iwe kiki eky’osemeriire kukora?

¹³ Kasumi kanu, Yahwe aliyo nacunda “ekitebe kingi” eky’abantu kandi n’abatendeka kuba abantu abaraikara hansi y’Obukama bwe. (Kus. 7:9, 10; Yak. 2:8) Nobukiraaba ngu abantu abarukukira obwingi kasumi kanu babaganiziibwemu habw’enobi n’obulemu, abo ab’ekitebe ekingi bekamba kweihamu enobi eya buli mulingo gwona. Omu mulingo ogw’akokurorraho, bakatandika ira kufoora eby’okurwanisa byabo enfuka. (Mik. 4:3) Omu kiikaro ky’okwejumbira omu bulemu obuleetaho okufa kwingi, baliyo nibakonyera abantu kutunga ‘obwomezi mali’ kuraba omu kubeegesa hali Ruhanga ow’amananu hamu n’ekigendererwa kye. (1 Tim. 6:19) Abanyabuzaale baabo nibasobora kubahakaniza, rundi nibasobora kutunga ebizibu omu by’entaahya habw’okusagika Obukama bwa Ruhanga, baitu Yahwe akigumya ngu batunga ebyetaago byabo. (Mat. 6:25, 30-33; Luk. 18:29, 30) Binu byona nibitugumya ngu Obukama bwa Ruhanga buroho kwo, kandi nibwija kugumizaamu nibuhikiriza ekigendererwa kya Yahwe.

AKASUMI AKARUNGI AK’OMU MAISO

14-15. Omurago gwa Yahwe ogw’okumaraho okufa ebiro n’ebiro, gurahikirizibwa guta hakumalirra?

¹⁴ Hati, Yesu Mukama w’Obukama bwa Ruhanga omu iguru, kandi naija kuhikiriza emirago yoona Yahwe ey’aturaganiize. (2 Kol. 1:20) Kuruga omu 1914, Yesu aikaire nasingura abanyanzigwa be. (Zab. 110:1, 2) Omu kasumi akatali kahara, Yesu hamu nabaralema nabo nibaija kuhwerekereza abantu ababi boona.​—Kus. 6:2.

¹⁵ Omu Bulemi bwa Yesu obw’Emyaka Rukumi, naija kuhumbuura abafu kandi akonyere abo boona abarayorobera Yahwe kufooka abahikiriire. Hanyuma y’ekirengo eky’okumalirra, abo Yahwe abararora nk’abahikiriire ‘baligwetwa ensi, baragiikaramuga ebiro nebiro.’ (Zab. 37:10, 11, 29) Ekirukusemeza kiri ngu, “omunyanzigwa owa ha mpero aliihibwaho nukwo kufa.”​—1 Kol. 15:26.

16. Nsonga ki enkuru ey’esemeriire kutwekambisa kuheereza Yahwe?

¹⁶ Nk’oku turozere, okunihira kwaitu okw’okwomeera ebiro n’ebiro nikusigikirra ha Kigambo kya Ruhanga. Okunihira oku nikusobora kutukonyera kwikara tuli besigwa hali Yahwe omu biro binu ebya ha mpero ebigumangaine. Baitu okwegomba okw’okwikara tuli bomeezi ebiro n’ebiro, tesemeriire kuba niyo nsonga yonka ey’etuletera kugonza kukora ebintu ebirukusemeza Yahwe. Ensonga ey’erukukirrayo kimu ey’etuletera kwikara tuli besigwa hali Yahwe hamu na Yesu niyo ngu habwokuba nitubagonza muno. (2 Kol. 5:14, 15) Okugonza oku kutwekambisa kubeegeraho, n’okugambiraho abandi okunihira okutwine. (Bar. 10:13-15) Obutweyongera kwega kuba abantu abatarukwegondeza itwenka, kandi abagabi, tufooka abantu Yahwe abarukugonza kuba banywani be ebiro n’ebiro.​—Baheb. 13:16.

17. Buli muntu aine bujunanizibwa ki? (Matayo 7:13, 14)

¹⁷ Oraaba omu hali abo abaratunga obwomeezi obutahwaho? Yahwe akuhaire omugisa ogu. Hati kiri haliiwe kwikara omu muhanda ogurukugenda omu bwomeezi. (Soma Matayo 7:13, 14.) Obwomeezi buliba buta obutuliba nitwomeera ebiro n’ebiro? Omu kicweka ekirahonderaho, nitwija kugarukamu ekikaguzo eki.