Nosobora Kumanyirra Amananu?

1. Oyehurra ota hali amananu?

ABANTU ba Yahwe bagonza muno amananu agarukusangwa omu Kigambo kya Ruhanga. Twombekere okwikiriza kwaitu nitusigikirra ha Kigambo kya Ruhanga. (Bar. 10:17) Tusoboire kukigumya ngu Yahwe ataireho ekitebe Ekikristaayo ‘nk’enyomyo n’omusingi ogw’amazima.’ (1 Tim. 3:​15, NWT) Kandi n’okusemererwa, tworobera“abo [abarukutulema]” obu baba nibasoborra amananu kuruga omu Baibuli, n’obu batuha obuhabuzi oburukuhikaana n’ekigendererwa kya Ruhanga.—Baheb. 13:17.

2. Kusigikirra hali Yakobo 5:​19, kiki ekisobora kutuhikaho hanyuma y’okwega amananu?

² Baitu na hanyuma y’okwikiriza amananu, hamu n’omulimo ekitebe kya Ruhanga kikora omu kutuha obuhabuzi oburukwesigwa, nabwo nitusobora kuhabisibwa. (Soma Yakobo 5:19.) Sitaani yakugondeze tuleke kwesiga Baibuli rundi oburagirizi obu tutunga kuruga omu kitebe kya Ruhanga.—Bef. 4:14.

3. Habwaki tusemeriire kukwatira kimu amananu? (Abefeso 6:​13, 14)

³ Soma Abefeso 6:​13, 14. Omu kasumi akatali ka hara, Sitaani naija kukozesa ebisuba kuhakaniza amahanga goona, nukwo gahakanize Yahwe. (Kus. 16:​13, 14) Ekindi, tukimanyire ngu Sitaani naija kuteekamu amaani maingi kurora ngu yahabisa abantu ba Yahwe. (Kus. 12:9) Egi niyo ensonga habwaki kikuru kwetendeka nukwo turole embaganiza hagati y’amananu n’ebisuba n’okworobera amananu. (Bar. 6:17; 1 Pet. 1:22) Okukiraho kwaitu omu kasumi ak’omuhito omwingi nikwija kusigikirra h’amananu!

4. Biki ebiturukwija kubazaaho omu kicweka kinu?

⁴ Omu kicweka kinu, nitwija kurora emiringo ebiri ei turukwetaaga kusobora kumanyirra amananu kuruga omu Baibuli nokwikiriza oburagirizi kuruga omu kitebe kya Yahwe. Hanyuma nitwija kubazaaho ebintu bisatu ebi tusemeriire kukora kusobora kugumizaamu tukwatiire kimu amananu.

EMIRINGO EITURUKWETAAGA KUSOBORA KUMANYIRRA AMANANU

5. Okutiina Yahwe kutukonyera kuta kumanyirra amananu?

⁵ Kutiina Yahwe. Obu tukurakuraniza okutiina Yahwe okuhikire, tumugonza muno kuhika ha rulengo ngu tuba tutarukugonza kukora ekintu kyona kumubihiza. Tuba twine ekihika eky’okumanya embaganiza hagati y’ekihikire n’ekitahikire, n’embaganiza hagati y’amananu n’ebisuba, nukwo tusobole kusiimwa Yahwe. (Nfu. 2:​3-6; Baheb. 5:14) Titusemeriire kuleka okutiina abantu kukaba kw’amaani kukakira okugonza okutwiniire Yahwe, habwokuba ebintu ebisemeza abantu, emirundi erukukira obwingi bibihiza Yahwe.

6. Okutiina abantu kukaleetera kuta entasi ikumi ez’Abaisaleri kubuzabuza amananu?

⁶ Kakuba tutiina abantu kukira nk’oku tutiina Ruhanga, nitusobora kutandika kwikiriza ebintu ebisobora kutuhugura tukaruga omu mananu. Tekerezaaho ekyokurorraho eky’entasi 12 abaagenzere kutata ensi Yahwe ey’akaba araganiize kuha Abaisaleri. Entasi ikumi hali bo bakaleka okutiina kw’Abakanaani kwaba kw’amaani kukira okugonza okubakaba bainiire Yahwe. Bakagambira Abaisaleri bagenzi baabo bati: “Titurukusobora okuramagira abantu; baitu nibatukira amani.” (Kubar. 13:​27-31) Kusigikirra ha ndora y’abantu, Abakanaani baali b’amaani kukira Abaisaleri—kandi ago gakaba mananu. Baitu, wena ayagambire ngu Abaisaleri bakaba batasobora kusingura abanyanzigwa baabo, akaba atarukuteekerezaaho Yahwe. Entasi ikumi abo baakubaire bataire omutima ha kintu Yahwe akaba nagonza Abaisaleri bakole. Ekindi, baakwecumitiriize ha bintu Yahwe akaba abakoliire kara. Hanyuma baakukyetegeriize ngu amaani g’Abakanaani gakaba gatasobora kulengesanzibwa n’amaani ga Yahwe. Kwahukanaho n’entasi ikumi abakaba bataine okwikiriza, Yosuha na Kalebu, bakaba nibagonza kusiimwa Yahwe. Bakagambira abantu bati: “[Yahwe obwaraba natusima alitutahya omu nsi egi, kandi aligituha.”—Kubar. 14:​6-9.

7. Nitusobora tuta kugumya okutiina okutwiniire Yahwe? (Rora n’ekisisani.)

⁷ Kusobora kwongera ha kutiina okutwiniire Ruhanga, tusemeriire kuteeka omutima ha kumusemeza omu buli ncwamu yoona ei turukukora. (Zab. 16:8) Obu oraaba nosomaho ebyokurorraho eby’omu Baibuli, wekaguze, kakuba ninyowe ayakubaire omu nyikara egi, ncwamu ki ei nakukozere?’ Ekyokurorraho, teramu akasisani nohuliriza obu entasi ikumi Abaisaleri nibagamba ngu tibasobora kusingura Abakanaani. Wakwikiriize ebi barukugamba, naiwe okatandika kutiina abantu, rundi okugonza kwawe okwoiniire Yahwe nokugonza kukora ebirukumusemeza, byakubaire by’amaani kukira okutiina abantu? Abaisaleri boona abaarozere obwokurorraho bwa Yahwe omu Misiri, bakanga kwikiriza amananu Yosuha na Kalebu baabalize. Ekyarugiremu, bakafeerwa omugisa ogw’okutaaha omu Nsi ey’Ekaba Eraganiziibwe.—Kubar. 14:​10, 22, 23.

8. Mulingo ki ogutusemeriire kwekamba kukurakuraniza, kandi habwaki?

⁸ Obwebundaazi. Abantu abebundaazi, nubo Yahwe amanyisa amananu. (Mat. 11:25) N’obwebundaazi, twikiriza obukonyezi kusobora kwega amananu. (Eng. 8:​30, 31) Baitu nabwo twegendereza kurora ngu titwaba b’emyehembo. Obutuba b’emyehembo, nitusobora kutandika kutekereza ngu entekereza zaitu nazo zihikire, nk’oku emisingi kuruga omu Baibuli n’oburagirizi kuruga omu kitebe kya Yahwe, bihikire.

9. Nitusobora tuta kwikara tuli bebundaazi?

⁹ Kusobora kwikara tuli bebundaazi, tusemeriire kukiijuka ngu tuli ba hansi muno kakuba otulengesaniza na Yahwe. (Zab. 8:​3, 4) Ekindi, tusemeriire kusaba Yahwe nukwo atukonyere kukurakuraniza omutima ogw’obwebundaazi, kandi ogurukwegesebwa. Yahwe naija kutukonyera kwebembeza ebiteekerezo bye ebi twega kuruga omu Baibuli, hamu n’omu kitebe kye kukira ebyaitu. Obu oraaba noyesomesa Baibuli, serra ensonga ezirukwoleka ngu Yahwe agonza obwebundaazi, kandi anoba emyehembo hamu n’emyekuniko. Ekindi, wegendereze muno kurora ngu waikara oli mwebundaazi kakuba otunga obujunanizibwa obukuleetera kuba ruranganwa.

NITUSOBORA TUTA KUKWATIRA KIMU AMANANU

10. Nibaha Yahwe abaikaire n’akozesa kuhikyaho abantu be oburagirizi?

¹⁰ Ikara noyesiga oburagirizi kuruga omu kitebe kya Yahwe. Omu Isaleri eya kara, Yahwe akakozesa Musa na Yosuha kuhikyaho abantu be oburagirizi. (Yos. 1:​16, 17) Ebintu byagenderaga kurungi Abaisaleri obu baroraga abasaija banu nk’abarukukikirra Yahwe Ruhanga. Ebyasa bingi hanyuma ekitebe Ekristaayo obu kyatandikirweho, abakwenda 12 nubo baahaga oburagirizi. (Eng. 8:​14, 15) Hanyuma guruupu egi ekafooka nkooto obu yayeteraniziibweho abagurusi kuruga omu Yerusalemu. Habw’okuhondera oburagirizi kuruga h’abasaija banu abesigwa, ebitebe bikaguma omu kwikiriza kandi buli kiro byakanyaga omuhendo. (Eng. 16:​4, 5) Kasumi kanu, naitwe Yahwe atuha emigisa obu tuhondera oburagirizi kuruga omu kitebe kye. Baitu noteekereza Yahwe ayehurra ata, kakuba twanga kworobera abo abaataireho kutwebembera? Kusobora kugarukamu ekikaguzo eki, leka tubazeeho biki ebyahikire hali Abaisaleri obu bakaba nibagenda omu Nsi ey’Ekaba Eraganiziibwe.

11. Kiki ekyahikire hali Abaisaleri abaahakaniize encwamu ya Ruhanga ey’okukoma Musa kwebembera abantu Be? (Rora n’ekisisani.)

¹¹ Abaisaleri obu bakaba nibagenda omu Nsi ey’Ekaba Eraganiziibwe, abasaija b’amaani bakahakaniza Musa hamu n’obujunanizibwa Yahwe akaba amuhaire. Bakagamba bati: “Ekitebe kyona [hatali Musa wenka] nikyo ekirukwera, omuntu wena omulibo, kandi [Yahwe] ali omulibo.” (Kubar. 16:​1-3) N’obu kiraaba ngu gakaba mananu ngu omu maiso ga Ruhanga “ekitebe kyona” kikaba nikyera, Yahwe akaba akomere Musa kwebembera abantu Be. (Kubar. 16:28) Abajeemu banu obubaajunaine Musa, bakaba nibajunana Yahwe. Batateeke omutima ha kintu Yahwe akaba nagonza; baitu bakaguteeka ha bibakaba nibagonza—kandi eki nikyo obusobozi n’okumanywa. Ruhanga akaita boona abaayebembiire obujeemu, otwaliiremu n’enkumi n’enkumi abaikiranganiize nabo. (Kubar. 16:​30-35, 41, 49) Nahabweki, kasumi kanu, nitukigumiza kimu ngu Yahwe anoba abo abatateekamu ekitiinisa enteekaniza ze ez’ekitebe.

12. Habwaki tusemeriire kwikara nitwesiga ekitebe kya Yahwe?

¹² Nitusobora kwikara nitwesiga ekitebe kya Yahwe. Obu kyeyoleka kurungi ngu empindahinduka neyetaagisibwa omu nyetegereza yaitu ey’amananu ag’omu Baibuli, rundi omulingo omulimo gw’Obukama guteekaniziibwe, abo abarukwebembera, ahonaaho bakora empindahinduka ezirukwetaagisa. (Nfu. 4:18) Eki bakikora habwokuba bagondeza kimu kusemeza Yahwe. Ekindi, bakora kyona ekirukusoboka kurora ngu encwamu zaabo zasigikirra ha Kigambo kya Ruhanga abantu ba Yahwe boona eki basemeriire kworobera.

13. “Orulengo rw’ebigambo ebisemiire,” nikimanyisa ki kandi tusemeriire kurukozesa tuta?

¹³ “Ikara okwatiire kimu orulengo rw’ebigambo ebisemiire.” (2 Tim. 1:​13, NWT) “Orulengo rw’ebigambo ebisemiire” nikimanyisa enyegesa ez’Ekikristaayo ezirukusangwa omu Baibuli. (Yoh. 17:17) Buli kimu kyona ekitwikiriza, kisigikirra ha nyegesa ezi. Ekitebe kya Yahwe kitwegeseze kurorra kimu ngu enyikiriza zaitu, zasigikirra ha rulengo oru. Obu turakikora, Yahwe naija kutuha emigisa.

14. Abakristaayo abamu, bakalemwa bata kukwatira kimu “orulengo rw’ebigambo ebisemiire”?

¹⁴ Kiki ekisobora kutuhikaho, kakuba tuleka kuhondera “orulengo rw’ebigambo ebisemiire”? Tekerezaaho ekyokurorraho kinu. Omu kyasa eky’okubanza, haroho Abakristaayo abamu abakaba nibaranga nibagamba ngu ekiro kya Yahwe, kikaba kihikire. Nihasobora kuba hakaba haroho ebbaruha—abantu ei baatekeriize ngu ekaba ehandiikirwe omukwenda Paulo ey’ekaba nebazaaho ensonga enu. Batabandize kwekebiija kurora obu garaaba gali mananu, Abakristaayo abamu omu Sesalonika bakaikiriza orugambo oru kandi nabo batandika kururarangya. Baakubaire batahabisiibwe kakuba baijukire ebintu omukwenda Paulo akaba abeegeseze obu akaba akyali nabo. (2 Bas. 2:​1-5) Paulo akaba abahaire obuhabuzi kutamara gaikiriza buli kintu kyona eki bakaba bahuliire. Kandi kusobora kubakonyera habw’akasumi ak’omumaiso, Paulo akamalirra ebbaruha ye eyakabiri hali Abasesalonika n’ebigambo binu: “Kunu nukwo okuramukya kwange Paulo nomukono gwange nyenka, niko kokurorraho omu bbaruha yona: nukwo mpandika nti.”—2 Bas. 3:17.

15. Nitusobora tuta kwerinda ebisuba ebizooka nk’ebihikire? Bazaaho ekyokurorraho. (Rora n’ekisisani.)

¹⁵ Kiki eki tusobora kwegera ha bigambo bya Paulo hali Abasesalonika? Obu tuhurra ekintu ekitarukuhikaana n’ebintu ebitwegere kuruga omu Baibuli rundi obu tuhurra amakuru agarukuhuniriza, kiba nikitwetaagisa kukozesa amagezi. Omu Soviet Union eya kara, abantu kuruga omu gavumenti haroho obu baararangize ebbaruha ey’ekaba nezooka nk’ey’erukuruga ha kitebe ekikuru. Ebbaruha enu ekekambisa bamu h’ab’oruganda kutandikaho ekitebe kyabo habwabo. Ebbaruha enu ekaba nezooka nk’ey’erumu ebihikire. Baitu ab’oruganda abesigwa, batabiihabiihibwe. Bakakyetegereza ngu obutumwa obukaba buli omu bbaruha enu, bukaba butarukuhikaana n’ebintu bakaba begesiibwe. Kasumi kanu, abantu abatarukugonza amananu obwire obumu bakozesa ebintu nka intaneeti n’emikura ey’okubalizaaho kulengaho kutubuzabuza n’okutuleetera kwebaganizaamu. Omu kiikaro ‘ky’okutabatabana omu magezi gaitu,’ nitusobora kwerinda kuraba omu kuteekerezaaho ebintu ebituhurra rundi ebitusoma obu biraaba nibihikaana n’amananu agatumazire ira kwega.—2 Bas. 2:2; 1 Yoh. 4:1.

16. Kusigikirra ha Abarumi 16:​17, 18, kiki eki tusemerire kukora kakuba abamu baruga omu mananu?

¹⁶ Ikara oli omu bumu n’abo abesigwa hali Yahwe. Ruhanga nagonza tumuramye tuli omu bumu. Nitwija kwikara omu bumu kakuba tukwatira kimu amananu. Omuntu wena ow’ararangya obutumwa obutarukuhikaana n’amananu, aleetaho okwebaganizaamu omu kitebe, nahabweki, Ruhanga natutererra ‘kubatera amabega.’ Kitali eki, naitwe nitusobora kuhuguka tukaruga omu mananu.—Soma Abarumi 16:​17, 18.

17. Tugasirwa tuta obu tumanyirra amananu kandi tukagakwatira kimu?

¹⁷ Obu turamanyirra amananu kandi tukagakwatira kimu, nitwija kutunga enkoragana enungi na Yahwe kandi n’okwikiriza kwaitu kugume. (Bef. 4:​15, 16) Titurukwija kuhabisibwa ebisuba bya Sitaani, kandi nitwija kwikara twine obulinzi hansi y’oburoleerezi bwa Yahwe omu kasumi ak’omuhito omwingi. Ikara okwatiire kimu amananu, “kandi Ruhanga owobusinge araikaraga [naiwe].”—Baf. 4:​8, 9.