Ikara Nogendera omu Kwikiriza

1. Habwaki omukwenda Paulo akaba naayehurra aine okumarwa habw’ebintu akaba akozere omu bwomeezi bwe?

PAULO akaba akimanyire ngu akasumi kakaba kali haihi kuhika aitwe, baitu obuyatekerizeho omulingo akaba atwaizemu obwomeezi bwe akasemererwa muno. Obu natekerezaaho ebiyarabiremu akagamba ati: ‘Maliriize orugendo rwange, ndinzire okwikiriza.’ (2 Tim. 4:​6-8) Paulo akaba akozere encwamu ez’amagezi omu buheereza bwe obw’Ekikristaayo, kandi akaba naakigumya ngu Yahwe akaba naamusiima. Naitwe nitusobora kukora encwamu enungi tukasiimwa Ruhanga. Eki nitusobora kukikora tuta?

2. Nikimanyisa ki kugendera omu kwikiriza?

² Paulo akebazaaho hamu n’Abakristaayo abandi abesigwa ati: “Nitugendera omu kwikiriza, hatali omu kurora.” (2 Kol. 5:7) Paulo akaba namanyisa ki? Omu Baibuli, ekigambo, “kugenda” obwire obumu nikisobora kumanyisa omulingo omuntu acwamu kutwazaamu obwomeezi bwe. Omuntu obu agendera omu kurora kwonka, akora encwamu nasigikirra ha bintu ebi arukurora, ebi arukuhurra, hamu n’enyehurra ze. Harubaju orundi, omuntu obu agendera omu kwikiriza, akora encwamu nasigikirra ha bwesige bwe omuli Yahwe Ruhanga. Ebikorwa bye byoleka ngu nakigumya ngu Ruhanga naija kumuha empeera kandi ngu naija kugasirwa kuraba omu kuhondera oburagirizi bwa Yahwe oburukusangwa omu Kigambo Kye.—Zab. 119:66; Baheb. 11:6.

3. Tugasirwa tuta obu tugendera omu kwikiriza? (2 Abakolinso 4:18)

³ Kyamananu ngu itwena tukora encwamu nitusigikirra ha bintu ebi turora, ebi tuhurra, n’enyehurra zaitu. Baitu nitusobora kutunga ebizibu kakuba tutekerezaaho ebi byonka ebi turukurora rundi tukahurra obu turukuba nitukora encwamu ezirukukwata ha nsonga enkuru. Habwaki? Habwokuba ebi turora rundi tukahurra obwire obumu nibisobora kutuhabya. Ekindi, kakuba tukora encwamu nitusigikirra hali ebi ebi turukurora, ebi turukuhurra, rundi ha nyehurra zaitu, nitusobora kumalirra tugayire oburagirizi bwa Ruhanga. (Mug. 11:9; Mat. 24:​37-39) Baitu kakuba tugendera omu kwikiriza, nitwija kukora encwamu ‘ezirukusiimwa Mukama waitu.’ (Bef. 5:10) Kuhondera obuhabuzi bwa Ruhanga, nikiija kutuha obusinge omu mutima kandi kituleetere okusemererwa kwonyini. (Zab. 16:​8, 9; Is. 48:​17, 18) Kandi kakuba tugumizaamu nitugendera omu kwikiriza, nitwija kutunga obwomeezi obutahwaho omu kasumi ak’omumaiso.—Soma 2 Abakolinso 4:18.

4. Omuntu naasobora ata kumanya obu araaba naagendera omu kwikiriza rundi omu kurora?

⁴ Nitusobora tuta kumanya obuturaaba nitugendera omu kwikiriza rundi omu kurora? Nitusobora kwekaguza, obumba ninkora ncwamu, nsigikirra hali ki? Nsigikirra ha bintu ebi ndukurora rundi nyebemberwa oburagirizi bwa Yahwe? Leka turole omulingo tusobora kugumizaamu nitugendera omu kwikiriza omu nyikara zinu isatu enkuru: obuturukuba nitucwamu emirimo ei turakora, obuturukuba nituserra ou turataaha na uwe obuswere, n’obuturukuba nitutunga oburagirizi kuruga omu kitebe kya Yahwe. Omu buli nyikara, nitwija kubazaaho ebintu ebi tusemeriire kutekerezaaho kusobora kukora encwamu enungi.

OBU TURUKUBA NITUCWAMU OMULIMO OGU TURAKORA

5. Bintu ki ebi tusemeriire kuteekerezaaho obu turukuba nitucwamu omulimo ogu turakora?

⁵ Itwena nitugonza kwehikyaho ebyetaago byaitu n’okuhikyaho ab’omu maka gaitu ebyetaago byabo . (Mug. 7:12; 1 Tim. 5:8) Emirimo emu esasura sente nyingi. Emirimo emu omukozi naasobora kuba n’atunga sente ezirukumara kwehikyaho ebyetaago bye n’eby’ab’omu ka ye kandi asaagiseeho na sente ez’okwahura. Kandi emirimo endi, omukozi naasobora kuba nasasurwa sente ntaito ezirukumukonyera kurolerra eka kwonka. Obuturukuba nitucwamu kwikiriza omulimo gwona, tutekerezaaho sente eziturukwija kutunga. Baitu kakuba tutekerezaaho ekintu kinu kyonka, nituba nitugendera omu kurora kwonka.

6. Nitusobora tuta kugendera omu kwikiriza obu turukuba nitucwamu omulimo ogu turakora? (Abaheburaniya 13:5)

⁶ Ekindi obuturukuba nitugendera omu kwikiriza, nitwija kuteekerezaaho omulingo omulimo gurakwataho enkoragana yaitu na Yahwe. Nitusobora kwekaguza: ‘Omulimo gunu nigusobora kunyetaagisa kwejumbira omu bikorwa Yahwe ebi anoba?’ (Nfu. 6:​16-19) ‘Gurakwataho okuramya kwange rundi gundetere kwikara hara n’eka yange kumara akasumi kaingi?’ (Baf. 1:10) Eky’okugarukamu eky’ebikaguzo ebi obu kiraaba kiri ego kyakubaire ky’amagezi kutaikiriza omulimo ogu, n’obu kiraaba ngu kigumire kutunga emirimo. Habwokuba nitugendera omu kwikiriza, tusemeriire kukora encwamu ezirukuwoleka ngu nitukigumya ngu Yahwe naija kutuha ebyetaago byaitu.—Mat. 6:33; soma Abaheburaniya 13:5.

7-8. Ow’oruganda omu kuruga South America akagendera ata omu kwikiriza? (Rora n’ekisisani.)

⁷ Wetegereze omulingo ow’oruganda Javier,a kuruga omu Amerika ey’omu Masirimuka, yayetegeriize obukuru obw’okugendera omu kwikiriza. Naagamba ati: “Nkaba ntaireyo okusaba kwange kutunga omulimo ogurukusasura sente nyingi kandi ogu nakwegondizeemu muno.” Baitu nabwo Javier akaba naagonza kufooka payoniya. Agumizaamu naagamba ati: “Nkaraalizibwa kukora interview na mukuru w’ekitongole omu ihanga lyona. Ntakakozere interview, nkasaba Yahwe kunkonyera habwokuba nkaba ninkigumya ngu akaba amanyire ekintu ekikaba nikikirayo oburungi hali nyowe. Nkaba ningonza kwongera ha bukugu bwange kandi nsasurwe sente nyingi baitu nkaba ntarukugonza omulimo gunu habwokuba gukaba gutarukwija kunkonyera kuhikiiriza ebigendererwa byange eby’omwoyo.”

⁸ Javier naagamba ati: “Obu nkaba ninkora interview, mukuru w’ekitongole akagambira ngu ninyija kukoraga obwire bwingi. N’obwebundazi nkamusobororra ngu tindukwija kusobora kukikora habw’okuramya kwange.” Kandi Javier akamalirra ayangire omulimo ogu. Hanyuma ya wiiki ibiri akatandika kuheereza nka payoniya. Kandi hanyuma y’emyezi nke akatunga omulimo ogurukumwetaagisa kukora ebiro bike. Naagamba ati: “Yahwe akahurra esaara zange kandi yankonyera kutunga omulimo ogurukunsobozesa kuheereza nka payoniya. Mali nsemeriirwe muno kuba n’omulimo ogurukunsobozesa kutunga obwire bwingi obw’okuheereza Yahwe hamu n’ab’oruganda.”

9. Kiki eki orukwegera ha kyokurorraho kya Trésor?

⁹ Kiki eki tusemeriire kukora kakuba tukyetegereza ngu omulimo ogu twine tigurukutusobozesa kugendera omu kwikiriza? Tekerezaaho ekyokurorraho kya Trésor, kuruga Congo. Naagamba ati: “Omulimo omuhyaka ogunatungire gukaba mulimo ogu nagonzaaga muno. Omusaara ogu natungaga gukaba nigukira ogu nkaba nintunga ha mulimo gwange omukuru emirundi esatu, kandi nkaba ninteekwamu ekitiinisa ky’amaani.” Baitu Trésor yaikaraga naayosa kugenda omu nsorrokano habw’okukora obwire bwingi. Obwire obumu yasindikirizibwaga kwejumbira omu bikorwa eby’obugobya. Trésor akaba naagonza kuleka omulimo gwe baitu akaba ayeralikiriire ngu naasobora kutatunga omulimo ogundi. Kiki ekyamukonyiire? Naagamba ati: “Habakuki 3:​17-19 ekankonyera kwetegereza ngu n’obu naakufeerwa omulimo gwange, Yahwe akaba naija kundolerra. Nahabweki nkalekaho omulimo gwange.” Naagamba ati: “Abakama b’emirimo batekereza ngu omulimo obu gurukuba nigusasura sente nyingi, omuntu naija kwefereza buli kimu kyona otwaliremu eka ye hamu n’ebintu eby’omwoyo kusobora kugwikazaaho. Nyine okusemererwa kwingi ngu nkaikazaaho enkoragana yange na Yahwe hamu n’eya eka yange. Hanyuma y’omwaka gumu, akansobozesa kutunga omulimo omurungi ogurukunsobozesa kutunga ebyetaago byange n’okwejumbira omu bintu eby’omwoyo. Obu twebembeza Yahwe, obwire obumu nikisobora kutugumira kutunga sente eziturukwetaaga baitu Yahwe naija kuturolerra.” Ego, obu twesiga obuhabuzi bwa Yahwe hamu n’emirago ye, nitwija kugumizaamu nitugendera omu kwikiriza kandi naija kutuha emigisa.

OBU ORUKUBA NOKOMAMU OU ORATAAHA NA UWE OBUSWERE

10. Kiki ekisobora kutuleetera kugendera omu kurora obu turukuba nitukomamu ou turataaha na uwe obuswere?

¹⁰ Obuswere kiri kisembo kuruga hali Yahwe, kandi kyobuhangwa kugonza kutaaha obuswere. Munyaanya itwe obu arukuba naateekerezaaho omuntu ow’okutaaha na uwe obuswere, naasobora kwetegereza emiringo y’ow’oruganda, enzoka ye, omulingo abazibwaho, entahya ye, obujunanizibwa obu aine omuka hamu n’omulingo amuleetera kwehurramu.b Ebintu binu bikuru. Baitu kakuba ateeka omutima ha bintu binu byonka, naasobora kuba naagendera omu kurora.

11. Nitusobora tuta kugendera omu kwikiriza obukirukuhika ha kukomamu ou turataaha na uwe obuswere? (1 Abakolinso 7:39)

¹¹ Mali, Yahwe ka nayesiimisa ab’oruganda na banyaanya itwe abahondera obuhabuzi bwe obu barukuba nibakomamu ou barataaha na uwe obuswere! Ekyokurorraho, bateeka omu nkora okutererra okw’okulindaho kutandika kujumbira kuhikya bahingwire “akasumi ak’obusigazi omubiri obu guba gucamukiriire”. (1 Kol. 7:36) Kukira muno, bakigumya ngu omuntu ou barukugonza kutaaha na uwe obuswere aine emiringo Yahwe ei arukugamba ngu omusaija rundi omukazi omurungi asemeriire kuba nayo. (Nfu. 31:​10-13, 26-28; Bef. 5:33; 1 Tim. 5:8) Kakuba omuntu ow’atali omu h’Abakaiso ba Yahwe atandika kubagonza omu mulingo gw’embaganiza, besiga obuhabuzi oburukusangwa omu 1 Abakolinso 7:39. (Soma), oburukugamba ngu basemeriire kuswera “omu Mukama waitu honka.” Bagumizaamu nibagendera omu kwikiriza obu nibakigumya ngu Yahwe naija kufaaho enyehurra zaabo kukira omuntu ondi weena.—Zab. 55:22.

12. Kiki eki orukwegera ha kyokurorraho kya Rosa?

¹² Tekerezaaho ekyokurorraho kya Rosa, ow’arukuheereza nka payoniya omu Colombia. Omulimo gwe gwamuleeteraga kumara obwire bwingi n’omusaija ow’akaba atali omu h’Abakaiso ba Yahwe ayatandikire kumwoleka ngu naamugonza omulingo ogw’embaganiza. Rosa na uwe akatandika kumugonza. Naagamba ati: “Yazookaga nk’omusaija omurungi muno, yakonyeraga abantu ab’omu kiikaro kye, kandi akaba atarukunywa etaaba, atarukukozesa ebitokooza bwongo kandi atarukunywa amaarwa maingi. Nagonzaaga omulingo yantwazaamuga. Akaba aine ebintu byona ebi nkaba ningonza omu musaija oihireho akaba atali omu h’Abakaiso ba Yahwe.” Agumizaamu naagamba ati: “Kikaba kigumire kumwangirra habwokuba kikaba kintu eki nkaba ningonza. Omu kasumi ako nayehurraga ndi nyenka, kandi nkaba ningonza kuswerwa baitu nkaba ntakatungire omuntu ow’arukuheereza Yahwe.” Baitu Rosa atateeke omutima ha bintu ebi akaba naarora byonka. Akatekerezaaho omulingo encwamu ye ekaba niija kukwataho enkoragana ye na Yahwe. Nahabweki akalekera kimu kukoragana n’omusaija ogu kandi yaikara aine bingi eby’okukora omu buheereza bwe hali Yahwe. Hanyuma y’akaire kake, akaraalizibwa kugenda omu Isomero ly’Abatebezi b’Obukama, kandi hati naaheereza nka payoniya ow’embaganiza. Rosa naagamba ati: “Yahwe ampaire emigisa nyingi ey’enkonyiire kutunga okusemererwa.” N’obu kiraaba ngu tikyanguhire kugendera omu kwikiriza omu nsonga ezirukukwataho enyehurra zaitu, amaani tutamu tigafa busa.

OBU TUTUNGA OBURAGIRIZI KURUGA OMU KITEBE KYA YAHWE

13. Kiki ekisobora kutuleetera kugendera omu kurora obu tutunga oburagirizi kuruga omu kitebe kya Yahwe?

¹³ Emirundi erukukira bwingi tutunga oburagirizi kuruga hali abagurusi, h’abaroleerezi b’ebicweka, ha ofiisi y’itaagi, hamu na h’Akatebe Akalemi obutukonyera kuheereza Yahwe. Kandi kakuba obwire obumu tulemwa kwetegereza ensonga habwaki tuhairwe oburagirizi obumu? Nitusobora kuteeka omutima ha bintu ebibi ebirukwija kutuhikaho habw’oburagirizi obu. Nitusobora n’okutandika kuteeka omutima ha butahikirra obw’ab’oruganda abatuhaire oburagirizi. Baitu kakuba tukora ebintu binu, nituba nitugendera omu kurora.

14. Kiki ekirukwija kutukonyera kugendera omu kwikiriza obu tutunga oburagirizi kuruga omu kitebe kya Yahwe? (Abaheburaniya 13:17)

¹⁴ Obu tugendera omu kwikiriza, twesiga ngu Yahwe naayebembera ekitebe kye kandi ngu naamanya ekirukukirayo oburungi hali itwe. Ekirugamu, twanguha kworoba kandi tukikora twine enteekereza ey’ehikire. (Soma Abaheburaniya 13:17.) Tukyetegereza ngu kuba bantu abahulizi kireetera ekitebe kuba omu bumu. (Bef. 4:​2, 3) N’obu kiraaba ngu ab’orugnda abarukutwebembera tibahikiriire, nitukigumya ngu Yahwe naija kutuha emigisa habw’okuba abantu abahulirizi. (1 Sam. 15:22) Omu kasumi ke, naija kuterekereza buli kintu kyona ekirukwetaagisa kuterekerezebwa.—Mik. 7:7.

15-16. Kiki ekyakonyiire ow’oruganda kugendera omu kwikiriza n’obu kiraaba ngu akaba naagurukyagurukya oburagirizi obu akaba atungire? (Rora n’ekisisani.)

¹⁵ Tekerezaaho ekyokurorraho ekirukwoleka ebirungi ebiruga omu kugendera omu kwikiriza. N’obu kiraaba ngu orulimi Orusipanisi nurwo rurukukirayo kukozesebwa omu Peru, abantu ab’omu kiikaro bakira kubaza endimi ez’enzaarwa. Rumu ha ndimi zinu nurwo orulimi Orukecwa. Kumara emyaka nyingi ab’oruganda na banyaanya itwe abarukubaza Orukecwa, baaserraga abantu abarukubaza Orukecwa omu kiikaro kyabo eky’okutebezaamu. Baitu habwokuba tukaba nitugonza kworobera ebiragiro bya gavumenti, hakabaho empindahinduka ha mulingo gw’okuhikirramu abantu. (Bar. 13:1) Ekyarugiremu, abamu bakeralikirra ngu kikaba nikiija kuguma muno kutunga abantu abarukubaza orulimu oru omu kiikaro kyabo. Baitu habwokuba ab’oruganda bakahondera empindahinduka enu, Yahwe akaha omugisa amaani baatairemu kuserra abantu abarukubaza Orukecwa.

¹⁶ Kevin, omugurusi w’ekitebe kuruga omu kitebe ekirukubaza Orukecwa, akaba ali omu hali abo abakaba beralikiriire. Naagamba ati: “Nkekaguza, ‘Nitwija kutunga tuta abantu abarukubaza Orukecwa?’” Kiki Kevin eki yakozere? Naagamba ati: “Nkaijuka ekyahandiikirwe ekirukusangwa omu Enfumo 3:5. Kandi nateekerezaaho Musa. Akaba aine kwebembera Abaisaleri kuruga omu ihanga lya Misiri kuraba omu Nyanja ey’Erukutukura ekyaletiire Abaisaleri kuteekereza ngu Abamisiri abakaba nibabahambya bakaba nibaija kubakwata. Musa akooroba, kandi Yahwe yamuha omugisa kuraba omu kukora ekyamahano ekirukuhuniiriza kusobora kubajuna.” (Kurug. 14:​1, 2, 9-11, 21, 22) Kevin akaba ayetekaniize kuhinduramu obuheereza bwe. Kiki ekyarugiremu? Naagamba ati: “Nkahunirra omulingo Yahwe yatuhairemu emigisa. Enyumaho twarubataga muno omu buheereza kandi obwire obumu twatungaga omuntu omu rundi babiri abarukubaza Orukecwa. Hati nituteeka omutima ha biikaro nambere hali abantu abarukubaza Orukecwa. Ekirugiremu, hati nitubaza muno n’abantu, twine ab’okugarukira hamu n’abeegi ba Baibuli. Omuhendo gw’abantu abarukwija omu nsorrokano gweyongiire.” Mali, obu tugendera omu kwikiriza, Yahwe aikara naatuha emigisa.

17. Kiki eki oyegere omu kicweka kinu?

¹⁷ Turozere omulingo tusemeriire kugumizaamu nitugendera omu kwikiriza omu nyikara isatu enkuru. Baitu tusemeriire kwikara nitugendera omu kwikiriza omu nyikara zoona omu bwomeezi bwaitu nk’ekyokurorraho obu turukuba nitukomamu eby’okwesemeza, n’obu turukuba nitukora encwamu ezirukukwata ha bwegese rundi kukuza abaana. Encwamu zoona ezi turaakora, tusemeriire kwikara nitwebemberwa hatali ebi turukurora byonka, baitu twebemberwe enkoragana yaitu na Yahwe, oburagirizi bwe hamu n’omurago gwe ogw’okuturolerra. Obu turakikora nitwija kusobora ‘kugendera omu ibara lya Yahwe Ruhanga waitu ebiro n’ebiro.’—Mik. 4:5.