Kigumye Ngu Yahwe Akuganyiire

1-2. Twehurra tuta obu tukyetegereza ngu Yahwe atuganyiire? (Rora n’ekisisani ekya ha kyesweko.)

OMUKAMA Daudi akehurra kubi muno habw’ebibi ebi akaba akozere. (Zab. 40:12; 51:3; obugambo oburukwanjura esuura) Baitu akeegarukamu kuruga ha mutima kandi Yahwe akamuganyira. (2 Sam. 12:13) Ekyarugiremu, akasemererwa muno obu yakyetegeriize ngu Yahwe akaba amuganyiire.—Zab. 32:1.

² Kusisanaho na Daudi, na itwe tusemererwa obu tukyetegereza ngu Yahwe atwolekere embabazi yatuganyira ebibi byaitu. Mali ka nikihuumuza kukimanya ngu Yahwe ayeteekaniize kutuganyira ebibi byaitu, otwaliiremu n’ebibi eby’amaani kakuba twegarukamu tukabyatura, kandi tukakora kyona ekirukusoboka kutabigarukamu. (Nfu. 28:13; Ebik. 26:20; 1 Yoh. 1:9) Nikitusemeza muno kukimanya ngu Yahwe atuganyirra kimu kikasisana oti rundi titukakorahoga ekibi kyona.—Ez. 33:16.

3-4. Munyaanya itwe omu akeehurra ata hanyuma y’okubatizibwa, kandi kiki ekituraabazaaho omu kicweka kinu?

³ Obwire obumu, abamu nibasobora kwehurra ngu Yahwe tabaganyiire. Eki nikyo kyahikire hali Jennifer. Abazaire be bakamwegesa ebirukukwata hali Yahwe. Baitu obu yahikire omu myaka y’ensinganto, akatandika kukora ebintu ebibi kandi atagambire bazaire be. Hanyuma y’emyaka kurabaho, akagaruka hali Yahwe kandi yabatizibwa. Naagamba ati: “Nkaba nfookere muntu ow’arukugonza muno itungo, ow’arukwejumbira omu busiihani, kunywa amaarwa maingi kandi nyine ekiniga eky’amaani. Nkaba nkimanyire ngu kakuba nsaba ekiganyiro kandi nkegarukamu, Yahwe nanganyira naasigikirra ha kicunguro kya Yesu Kristo. Baitu noobu kiraaba ngu nkaba nyegarukiremu kandi nasaba Yahwe kunganyira, nkaba ntarukukiikiriza ngu mali anganyiire.”

⁴ Obwire obumu na iwe kikugumira kukiikiriza ngu Yahwe akuganyiire ensobi zaawe eza kara? Yahwe naagonza tukigumye ngu atuganyiire nkooku Daudi akaba naakigumya. Omu kicweka kinu nitwija kurora ensonga habwaki tusemeriire kukigumya ngu Yahwe atuganyiire n’ekisobora kutukoonyera kukigumya.

HABWAKI KIKURU KUKIIKIRIZA NGU YAHWE ATUGANYIIRE?

5. Kiki Sitaani eki arukugonza twikirize? Bazaaho ekyokurorraho.

⁵ Obu twikiriza ngu Yahwe atuganyiire kitukoonyera kwetantara emitego ya Sitaani. Ijuka ngu Sitaani naija kukora kyona ekirukusoboka kutulemesa kuheereza Yahwe. Kusobora kuhikiiriza ekigendererwa kye, alengaho kutuleetera kwikiriza ngu Yahwe tasobora kutuganyira. Teekerezaaho ekyokurorraho eky’omusaija ow’omu kitebe ekya Kolinso ayaihirwe omu kitebe habw’okwejumbira omu busiihani. (1 Kol. 5:1, 5, 13) Obu yayegarukiremu, Sitaani akaba naagonza ab’oruganda omu kitebe bange kumuganyira kandi batamutangirra obu araagaruka. Ekindi, Sitaani akaba naagonza ngu omusaija ogu ow’ayegarukiremu ayehurre ngu taganyiirwe, ayetuntule ekihinguraine kandi aleke kuheereza Yahwe. Na kasumi kanu Sitaani naagonza twehurre omu mulingo gunu. Baitu “tumanyire emitego ye.”—2 Kol. 2:5-11.

6. Kiki ekisobora kutukoonyera kuleka kwecwera omusango habw’ebibi ebi twakozere?

⁶ Obu twikiriza ngu Yahwe atuganyiire, kitukoonyera kuleka kwecwera omusango. Obu tusiisa twehurra kubi. (Zab. 51:17) Kandi eki kirungi. Omuntu waitu ow’omunda naasobora kutuleetera kukora empindahinduka kandi tukakora ekihikire. (2 Kol. 7:10, 11) Baitu kakuba twikara nitwecwera omusango, na hanyuma y’okurabaho obwire bwingi twegarukiremu, nikisobora kutumaramu amaani kandi tuleke kuheereza Yahwe. Baitu obu twikiriza ngu mali Yahwe atuganyiire, kitukoonyera kuleka kwecwera omusango. Kandi eki kituleetera kwongera kuheereza Yahwe twine omuntu ow’omunda omurungi n’okusemererwa. (Bak. 1:10, 11; 2 Tim. 1:3) Baitu nitusobora tuta kuleka kwehurra kubi kandi tukakigumya ngu Yahwe atuganyiire?

KIKI EKISOBORA KUTUKOONYERA KUKIIKIRIZA NGU YAHWE ATUGANYIIRE?

7-8. Kiki Yahwe eki yagambiire Musa, kandi eki nikituleetera kugumya ki? (Okuruga 34:6, 7)

⁷ Teekerezaaho omulingo Yahwe ayebazaaho. Ekyokurorraho, weetegereze Yahwe eki yagambiire Musa ha Rusozi Sinai.a (Soma Okuruga 34:6, 7.) Noobu kiraaba ngu Yahwe aine emiringo nyingi enungi, akacwamu kugambira Musa nkooku ali “Ruhanga aijuire okuganyira kandi owembabazi.” Mali Ruhanga nk’ogu naasobora kwanga kuganyira omuheereza we ow’ayegarukiremu kuruga ha mutima? Nangwa! Habwokuba tasobora kwetwaza omu mulingo nk’ogu.

⁸ Mali nitukigumya ngu Yahwe obu agamba ngu w’embabazi, aba naabaza amananu kandi tasobora kubiiha. (Zab. 31:5) Nahabweki tusemeriire kwikiriza ebi arukubaza. Obu kiraaba nikikugumira kuleka kwecwera omusango habw’ebibi ebi wakozere kara, weekaguze: ‘Ninyikiriza ngu Ruhanga aijwire okuganyira kandi w’embabazi kandi ngu aganyira buli omu ow’ayegarukamu ebibi bye? Eki obu oraaba nookiikiriza, kigumye ngu akuganyiire.’

9. Nikimanyisa ki kuganyirwa ebibi byaitu? (Zabbuli 32:5)

⁹ Weecumiitirizeeho Yahwe eki atwegesa kuruga omu Baibuli ha kuganyira kwe. Ekyokurorraho, teekerezaaho omulingo Daudi yabalizeeho okuganyira kwa Yahwe. (Soma Zabbuli 32:5.) Akagamba ati: ‘Wanganyira ensobi zange n’ebibi byange.’ Ekigambo “wanganyira” ekirukukozesebwa omu nkarra zinu nikisobora nookumanyisa “kwimukya,” “kutwara,” rundi “kuhimba.” Yahwe obu yaganyiire Daudi akasisana nk’ayahimbire ebibi bye yabitwara. Daudi akasemererwa muno obu yakimanyire ngu Yahwe akaba amuganyiriire kimu. (Zab. 32:2-4) Na itwe nitusobora kwehurra nka Daudi. Hanyuma y’okwegarukamu kuruga ha mutima, titusemeriire kugumizaamu nitwecwera omusango habw’ebibi Yahwe ebi aba atuganyiire.

10-11. Ebigambo ‘arahuka okuganyira’ nibyoleka ki hali Yahwe? (Zabbuli 86:5)

¹⁰ Soma Zabbuli 86:5. Daudi akagamba ngu Yahwe ‘arahuka okuganyira.’ Kinu nikimanyisa ngu Yahwe tarahuka kukwatwa ekiniga obu tukora ensobi kandi aikara naagonza kuganyira abo abeegarukamu. Habwaki ayetwaza omu mulingo ogu? Ekicweka ekirukuhondera eky’orukarra runu nikigamba kiti: “Kandi oijura embabazi hali abo boona abanyakukukunga.” Omu kicweka ekyahoire tukeega ngu Yahwe naaraganiza kwoleka okugonza okutahwaho hali abo boona abamugonza kandi talibalekaho. Okugonza okutahwaho nukwo kuleetera Yahwe kuganyirra kimu abasiisi boona abeegarukamu. (Is. 55:7) Obu kiraaba nikikugumira kukiikiriza ngu Ruhanga akuganyiire, weekaguze: ‘Ninyikiriza ngu Yahwe aikara ayeteekanize kuganyira abo boona abeegarukamu kandi abamusaba ekiganyiro? Obu ndaaba ninkiikiriza, tinsemeriire kukigumya ngu akanganyira obu namusabire ekiganyiro?’

¹¹ Nikihuumuza kukimanya ngu Yahwe naamanya kurungi ngu tuli bantu abatahikiriire. (Zab. 139:1, 2) Leka turole Daudi eki arukugamba omu Zabbuli ye endi, n’omulingo kisobora kutukoonyera kwikiriza ngu Yahwe naagonza kutuganyira.

OTEEBWA OMULINGO YAHWE AKURORAMU

12-13. Kusigikirra ha Zabbuli 103:14, kiki Yahwe eki atwijukaho kandi kinu kimuleetera kukora ki?

¹² Soma Zabbuli 103:14. Daudi abazaaho Yahwe naagamba ngu ‘aijuka okutuli ecucu.’ Daudi akozesa ebigambo ebi kusoborra ensonga habwaki Yahwe aikara ayeteekaniize kuganyira abaheereza be obu beegarukamu. Aikara naijuka ngu tituhikiriire. Kusobora kwetegereza ensonga enu, leka twongere twecumiitirizeeho ebigambo bya Daudi.

¹³ Daudi agamba ngu Yahwe “amanyire omubiri gwaitu.” Yahwe akahanga Adamu kuruga “omu cucu yitaka” nahabweki amanyire omulingo abantu baahangirwemu n’ebintu ebi barukwetaaga. Ekyokurorraho nibeetaaga kulya, kubyama n’okwikya. Ebintu binu n’abantu abahikiriire nibabyetaaga (Kub. 2:7) Baitu habwokuba Adamu na Hawa bakasiisa, abantu bakafooka cuucu omu mulingo ogundi. Habwokuba tuli baijukuru ba Adamu na Hawa, tukaijukura obutahikirra, ekituleetera kukora ebintu ebitahikire. Yahwe tagarukira ha kumanya ngu tituhikiriire. Daudi amubazaaho naagamba ngu aikara ‘naakiijuka,’ ekimuleetera kututwaza omu mulingo ogw’embabazi. Nahabweki ebigambo bya Daudi nibisobora kumanyisa ngu: Yahwe akimanyire ngu obwire obumu itwena tukora ensobi, baitu obu tuzikora, tukeegarukamu kuruga ha mutima, atwoleka embabazi kandi atuganyira.—Zab. 78:38, 39.

14. (a) Kintu ki ekindi Daudi eki agamba obukirukuhika ha mulingo Yahwe atuganyiramu? (Zabbuli 103:12) (b) Kiki ekiturukwegera ha mulingo Yahwe yaganyiire Daudi? (Rora akasanduuko “Omulingo Yahwe Atuganyira Ebibi Byaitu Kandi Akabyebwa.”)

¹⁴ Kintu ki ekindi ekirukutugumya ngu Yahwe atuganyira? (Soma Zabbuli 103:12.) Daudi agamba ngu Yahwe obu atuganyira ata hara ebibi byaitu “nkoburugwaizoba okubuli hara nobugwaizoba.” Burugaizooba buli hara muno na bugwaizooba; ebiikaro binu bibiri tibisobora kutangatangana. Kinu nikitwegesa ki ha bibi Yahwe ebi aba atuganyiire? Ekitabu kimu kisoborra ha rukarra runu nikigamba ngu: Omulingo Ruhanga ata hara ebibi byaitu, kisisana nk’akahooho k’ekintu obu kahweraho kimu. Nahabweki nitukigumiza kimu ngu talyongera kubiteekerezaaho rundi kubitwijukya. Akahooho nikasobora kuleetera omuntu kwijuka ekintu, baitu Yahwe obu atuganyira, kiba nikisisana oti rundi busaho n’akahooho ak’ekintu akasigaireho akasobora kumwijukya ekibi kandi kakamuleetera kutujunaana—Ez. 18:21, 22; Ebik. 3:19.

15. Kiki eki tusemeriire kukora kakuba twikara nitwecwera omusango habw’ebibi ebi twakozere kara?

¹⁵ Ebigambo bya Daudi ebiri omu Zabbuli 103 bitukoonyera bita kukigumya ngu Yahwe atuganyira? Obu turaaba nitwejunaana habw’ebibi ebi twakozere kara nitusobora kwekaguza: ‘Nyeberwe ngu Yahwe aijuka ngu ndi muntu atahikiriire kandi aganyira omusiisi ow’ayegarukamu nka nyowe? Nyikara ninyijuka ebibi ebi yanganyiire kandi ebi atalyongera kunjunaana?’ Yahwe tata omutima ha bibi ebi twakozere kara, kandi na itwe titusemeriire kubitaho omutima. (Zab. 130:3) Obu turaakigumya ngu Yahwe atuganyira, nitwija kuleka kwecwera omusango habw’ebibi ebi twakozere kandi tugumizeemu nitumuheereza n’okusemererwa.

16. Bazaaho ekyokukorraho ekirukwoleka akabi akaruga omu kwikara tutaire omutima ha bibi ebi twakozere kara. (Rora n’ekisisani.)

¹⁶ Teekerezaaho ekyokurorraho kinu. Omuntu obu aba naavuga motoka, naasobora kwikara naarora omu ndolerwamu ey’emukoonyera kurora ebintu ebimuli enyuma. Kirungi kuroramu obwire obumu. Baitu ky’akabi muno kuroramu atarukuleka. Kusobora kwikara naavuga kurungi asemeriire kwikara naarora ebimuli omu maiso. Omu mulingo nugwo gumu, nikisobora kutukoonyera kakuba obwire obumu twijuka ensobi ezi twakozere kara, habwokuba nitusobora kuzeegeraho kandi tukacweramu kimu kutazigarukamu. Baitu kakuba twikara tuzitaireho omutima, nikisobora kutuleetera kuburwa okusemererwa kandi tukalemwa kuha Yahwe ekirukukirayo oburungi. Oihireho, leka tute omutima ha kuheereza Yahwe, kandi twikale nituteekerezaaho akasumi ak’omumaiso akaaturaganiize nambere ebintu ebibi bitaliijukwa.—Is. 65:17; Nfu. 4:25.

GUMIZAAMU NOOKIGUMYA NGU YAHWE AKUGANYIIRE

17. Habwaki tusemeriire kwikara nitukigumya ngu Yahwe naatugonza kandi atuganyira?

¹⁷ Tusemeriire kwikara nitukigumya ngu Yahwe naatugonza kandi ayeteekaniize kutuganyira. (1 Yoh. 3:19) Habwaki? Habwokuba Sitaani naija kwikara naakora kyona eki arukusobora kutuleetera kuteekereza ngu Yahwe tarukutugonza kandi ngu tatuganyira. Ekigendererwa kye kiri ky’okutuleetera kuleka kuheereza Yahwe. Kandi nitunihira ngu Sitaani naija kwongeramu amaani habwokuba akimanyire ngu asigaizeyo akacu kake. (Kus. 12:12) Baitu titusemeriire kumwikiriza kusingura.

18. Kiki eki osobora kukora kukigumya ngu Yahwe naakugonza kandi ayeteekaniize kukuganyira?

¹⁸ Kusobora kukigumya ngu Yahwe naakugonza, ta omu nkora amagezi agatwabalizeeho omu kicweka ekyahoire. Kukigumya ngu Yahwe akuganyiire teekerezaaho omulingo arukwebazaaho. Weecumiitirizeeho abahandiiki ba Baibuli ekibaagambire ha kuganyira kwa Yahwe. Ijuka ngu Yahwe atumanyire nkooku tuli bantu abatahikiriire kandi atutwaza omu mulingo gw’embabazi. Ekindi, ijuka ngu obu atuganyira, atuganyirra kimu. Na itwe nitwija kuba twine obumanzi nk’obwa Daudi obukirukuhika ha mbabazi za Yahwe, kandi tugambe tuti: “Webale Yahwe kunganyira ‘ensobi zange n’ebibi byange’!”—Zab. 32:5.