Kigumye Ngu Yahwe Naakugonza

1. Habwaki wayehaireyo hali Yahwe? (Rora n’ekisisani.)

NOIJUKA obu wayehaireyo hali Yahwe? Okakora encwamu egi habwokuba okamumanya kandi wamugonza. Okamuraganiza ngu noija kwebembeza ebi agonza kandi ngu noija kugumizaamu n’omugonza n’omutima gwawe gwona, n’obwomeezi bwawe bwona, n’ebiteekerezo byawe byona, n’amaani gaawe goona. (Mar. 12:30) Kurugira kimu omu kasumi ako, okugonza oku omwiniire kweyongiire. Hati noosobora kugarukamu ota kakuba omuntu akukaguza ati: “Nookigumya ngu noogonza Yahwe?” Hataroho kugurukyagurukya noomugarukamu oti: “Nimmugonza muno kukira ekintu ekindi kyona, rundi omuntu ondi weena!”

2-3. Kiki Yahwe eki arukugonza tugumye, kandi kiki eki turukwija kubazaaho omu kicweka kinu? (Yeremiya 31:3)

² Baitu noosobora kugarukamu ota kakuba omuntu akukaguza ati: “Nookigumya ngu Yahwe naakugonza?” Noosobora kutiina kugarukamu habwokuba noogurukyagurukya obu araaba naakugonza? Munyaanya itwe omu ayayehuliire atarukugonzebwa obu akaba akyali muto naagamba ati: “Hataroho kugurukyagurukya, ningonza Yahwe n’omutima gwange gwona. Baitu emirundi ey’erukukira obwingi nkira kugurukyagurukya obu araaba nangonza.” Hati kiki ekisobora kukukoonyera kumanya Yahwe obu araaba naakugonza?

³ Yahwe naagonza okigumize kimu ngu naakugonza. (Soma Yeremiya 31:3, NWT.) Amananu gali, akakucunda yakwiriza haihi na uwe. Kandi obu wayehaireyo hali uwe wabatizibwa, okatunga ekintu eky’omuhendo muno kandi oku nukwo, okugonza kwe okutahwaho. Kinu nikimanyisa ngu naakugonza muno kandi talikulekaho. Okugonza oku kumuleetera kurora abaheereza be abeesigwa otwaliiremu na iwe, nk’abantu be ab’omuhendo. (Mara. 3:17) Yahwe naagonza okigumye ngu naakugonza nkooku omukwenda Paulo yakigumize. Paulo akaba naakigumiza kimu ngu Yahwe naamugonza, ekyamuletiire kuhandiika ati: “Ninkigumya ngu noobu kwakuba okufa, noobu bwakuba obwomeezi, noobu baakuba bamalaika, noobu baakuba ab’obusobozi, noobu byakuba ebintu ebiroho hati, noobu byakuba ebintu ebirukugenda okwija, noobu gaakuba amaani, noobu kwakuba okuraiha, noobu kwakuba okuhama, noobu kyakuba ekyahangirwe ekindi kyona, busaho ekirisobora kutubaganiza hali okugonza kwa Ruhanga okuli omu Kristo Yesu Mukama waitu.” (Bar. 8:38, 39) Omu kicweka kinu nitwija kubazaaho ensonga habwaki tusemeriire kukigumya ngu Yahwe naatugonza, n’omulingo tusobora kweyongera kukigumya.

ENSONGA HABWAKI TUSEMERIIRE KUKIGUMYA NGU YAHWE NAATUGONZA

4. Nitusobora tuta kurwanisa gumu ha mitego ya Sitaani?

⁴ Obu turaakigumya ngu Yahwe naatugonza nikiija kutukoonyera kurwanisa “emitego ya Sitaani.” (Bef. 6:11) Sitaani naija kukora kyona ekirukusoboka kutulemesa kuheereza Yahwe. Gumu ha mitego Sitaani akozesa nukwo kukurakuraniza ekisuba ekirukugamba ngu Yahwe tatugonza. Ijuka ngu Sitaani aikara naaserra omugisa ogw’okutwohya. Akira kutwohya obu tuba tuhoirwemu amaani obundi habw’ebintu ebi twarabiremu kara, ebizibu ebi turukurabamu, rundi obu tuba tweraliikiriire ha kiraabaho omu kasumi ak’omumaiso. (Nfu. 24:10) Sitaani ali nk’entale erukwikara neeserra kulya ebisoro ebitaine maani kandi ebitaine bulinzi. Nahabweki alindirra akasumi obu tuba tuhoirwemu amaani nukwo atuleetere kulekeraho kuheereza Yahwe. Baitu obu turaayeyongera kukigumya ngu Yahwe naatugonza, nikiija kutukoonyera ‘kwangirra’ Sitaani n’emitego ye.—1 Pet. 5:8, 9; Yak. 4:7.

5. Habwaki tusemeriire kwehurra ngu Yahwe naatugonza kandi tuli b’omuhendo hali uwe?

⁵ Obu turaakigumya ngu Yahwe naatugonza nikiija kutukoonyera kumwirra haihi. Habwaki? Yahwe akatuhanga n’obusobozi obw’okwoleka okugonza, nookugonzebwa. Ky’obuhangwa ngu omuntu obu atwoleka okugonza, na itwe kitwekambisa kumugonza. (1 Yoh. 4:19) Nahabweki obu turaayeyongera kwehurra ngu Yahwe naatugonza kandi naaturora nk’ab’omuhendo, nikiija kutuleetera kweyongera kumugonza. Kandi obu turaayeyongera kumugonza, na uwe naija kweyongera kutugonza. Baibuli etugambira eti: “Mwirre haihi na Ruhanga, kandi na uwe naija kubairra haihi.” (Yak. 4:8) Hati nitusobora kukigumya tuta ngu Yahwe naatugonza?

KIKI EKISOBORA KUTUKOONYERA KUKIGUMYA NGU YAHWE NAATUGONZA?

6. Obu oraaba otarukukigumya ngu Yahwe naakugonza, kiki eki osemeriire kukora?

⁶ Ikara noosaba Yahwe kukukoonyera kumanya ensonga habwaki naakugonza. (Luk. 18:1; Bar. 12:12) Obu kiraaba nikyetaagisa, ikara noosaba Yahwe emirundi nyingi buli kiro akukoonyere kwerora nkooku arukukurora. Amananu gali ngu obu oba nooyecwera omusango, kiguma kukiikiriza ngu Yahwe naakugonza. Baitu ijuka ngu Yahwe naakira omutima gwawe. (1 Yoh. 3:19, 20) Akumanyire kurungi kukira nkooku orukwemanya, kandi akuroramu emiringo enungi iwe ei otasobora kwororamu. (1 Sam. 16:7; 2 Byom. 6:30) Nahabweki otatiina kumugambira omulingo gwonyini ogw’orukwehurra, kandi musabe akukoonyere kukigumya ngu naakugonza. (Zab. 62:8) Hanyuma korra ha saara zaawe kuraba omu kuta omu nkora amagezi ganu.

7-8. Ebyahandiikirwe ebiri omu Zabbuli nibitukoonyera bita kukigumya ngu Yahwe naatugonza?

⁷ Wesige Yahwe eki agamba. Akatereekereza abahandiiki ba Baibuli kubazaaho kiki kyonyini eki ali. Teekerezaaho omulingo Daudi yabalizeeho Yahwe. Akagamba ati: ‘Yahwe aikara haihi n’abo ab’omutima ogucwekere, ajuna abo abahoirwemu amaani.’ (Zab. 34:18) Obu oba ohoirwemu amaani, noosobora kwehurra ngu oli wenka. Yahwe naaraganiza ngu omu busumi nk’obu aba ali haihi na iwe habwokuba aba akimanyire ngu nooyetaaga obukoonyezi bwe. Omu zabbuli endi, Daudi akahandiika naagamba ati: ‘Amaizi omu maiso gange ogate omu cupa yaawe ey’oruhu.’ (Zab. 56:8) Yahwe akurora obu oba oine enaku kandi oli omu busaasi. Akufaaho muno kandi asaalirwa obu arora nooraba omu busaasi. Amaziga gaawe g’omuhendo muno hali Yahwe nkooku amaizi agali omu cupa y’oruhu gaba g’omuhendo muno hali omuntu ow’arukuraba omu irungu. Omu Zabbuli 139:3, nihagamba: “[Yahwe] omanyire amagenda gange gona.” Yahwe arora emihanda yaawe yoona, baitu ata omutima ha birungi ebi okora. (Baheb. 6:10) Habwaki? Habwokuba asiima amaani goona ag’otamu kumusemeza.a

⁸ Kuraba omu kukozesa ebyahandiikirwe nk’ebi ebirukutuhuumuza, Yahwe asisana nk’ow’arukugamba ati: “Ningonza okimanye ngu ninkugonza muno kandi ninkufaaho.” Baitu nkooku tusangirwe turozere, Sitaani aleetera abantu kuteekereza ngu Yahwe tabagonza. Nahabweki kakuba obwire obumu otandika kugurukyagurukya Yahwe obu araaba naakugonza, weekaguze: ‘Nooha ou ndaikiririzaamu—Sitaani “ise ebisuba” rundi “Ruhanga ow’amananu”?’—Yoh. 8:44; Zab. 31:5.

9. Kiki Yahwe eki arukuraganiza abo abamugonza? (Okuruga 20:5, 6)

⁹ Teekerezaaho omulingo Yahwe ayehurra hali abo abarukumugonza. Weetegereze Yahwe eki yagambiire Musa n’Abaisaleeri. (Soma Okuruga 20:5, 6.) Naaraganiza ngu naija kugumizaamu naayoleka abo abamugonza okugonza okutalekera. Ebigambo ebi nibitugumya ngu Ruhanga waitu omwesigwa tasobora kulemwa kugonza abo abamugonza. (Neh. 1:5) Kakuba otandika kuteekereza ngu Yahwe tarukukugonza, weekaguze: ‘Nyowe nimmugonza?’ Hanyuma teekerezaaho kinu: Obu oraaba noomugonza kandi nookora kyona ekirukusoboka kumusemeza, kigumye ngu na uwe naakugonza muno. (Dan. 9:4; 1 Kol. 8:3) Nahabweki, obu oraaba nookigumya ngu noogonza Yahwe, habwaki noogurukyagurukya ngu uwe tarukukugonza? Kigumize kimu ngu naija kwikara naakugonza kandi talikulekaho.

10-11. Yahwe naagonza orole ota ekicunguro? (Abagaratiya 2:20)

¹⁰ Weecumiitirizeeho ekicunguro. Ekicunguro kya Yesu Kristo nikyo kisembo ekirukukirayo Yahwe eki yahaire abantu. (Yoh. 3:16) Baitu okirora nk’ekisembo Yahwe eki yahaire iwe nk’omuntu? Ego! Weetegereze ekyokurorraho ky’omukwenda Paulo. Ijuka ngu akaba aine ebibi by’amaani ebi akaba akozere obu akaba atakafookere Mukristaayo, kandi akaba naakyayetaaga kugumizaamu naarwanisa obutahikirra bwe. (Bar. 7:24, 25; 1 Tim. 1:12-14) Baitu noobu kiraaba nukwo kiri, akarora ekicunguro nk’ekisembo Yahwe eki akaba amuhaire nk’omuntu. (Soma Abagaratiya 2:20.) Ijuka ngu Yahwe nuwe yatereekeriize Paulo kuhandiika ebigambo binu. Kandi buli kimu kyona ekiri omu Baibuli kirumu habw’okutwegesa. (Bar. 15:4) Ebigambo bya Paulo nibyoleka omulingo Yahwe arukugonza orolemu ekicunguro. Naagonza okirole nk’ekisembo eki yakuhaire iwe nk’omuntu. Obu oraarora ekicunguro omu mulingo ogu, noija kukigumya ngu Yahwe naakugonza iwe nk’omuntu.

¹¹ Nitusiima Yahwe habw’okusiindika Yesu Kristo omu nsi kutufeera. Baitu ensonga endi habwaki Yesu yaizire omu nsi nukwo kwegesa abantu amananu agarukukwata hali Ruhanga. (Yoh. 18:37) Amananu ago nigatwarramu omulingo Yahwe ayehurra hali abaana be.

OMULINGO YESU ATUKOONYERA KUKIGUMYA NGU YAHWE NAATUGONZA

12. Habwaki nitwesiga ebintu Yesu yabalizeeho Yahwe?

¹² Yesu obu akaba ali omu nsi akakoonyera abantu kwetegereza kurungi Yahwe. (Luk. 10:22) Nitusobora kwikiriza ebintu Yesu yabalizeeho Yahwe. Habwaki? Habwokuba Yesu akamara emyaka nyingi muno na Yahwe omu iguru kukira omuntu ondi weena. (Bak. 1:15) Yesu akaba amanyire omulingo Ise amugonzaamu, omulingo agonza bamalaika abeesigwa n’omulingo agonzaamu batabani be n’abahara be hanu omu nsi. Yesu akoonyera ata abantu kukigumya ngu Ruhanga naabagonza?

13. Yesu naagonza turole tuta Yahwe?

¹³ Yesu naagonza turole Yahwe nkooku uwe amurora. Omu bitabu by’Enjiri, Yesu abazaaho Yahwe nka “Taata” emirundi nyingi. Kandi obu yabaga naabaza n’abahondezi be yakozesaaga ebigambo nka “Isiinywe” rundi “Isiinywe ow’omu iguru.” (Mat. 5:16; 6:26) Obugambo oburukusoborra Matayo 5:16 nibugamba buti: “Abaheereza ba Yahwe aba kara baabazaahoga Yahwe nibakozesa ebitiinisa nka ‘Ow’Obusobozi bwona,’ ‘ow’Ali Haiguru Muno’ hamu ‘n’Omuhangi,’ baitu Yesu yakiraga kweta Yahwe ‘Isiitwe.’” Eki nikyoleka ngu Yahwe naagonza abaheereza be kwehurra bali haihi na uwe nkooku omwana ayehurra ali haihi na ise ow’okugonza. Nahabweki Yesu akaba naatwegesa ngu Yahwe naatugonza nkooku taata omurungi agonza abaana be ab’omuhendo. Leka turole ebyokurorraho bibiri nambere Yesu yabalizeeho Yahwe nka “Taata.”

14. Yesu akooleka ata ngu buli omu hali itwe w’omuhendo hali Isiitwe ow’omu iguru? (Matayo 10:29-31) (Rora n’ekisisani.)

¹⁴ Eky’okubanza, teekerezaaho ebigambo bya Yesu ebirukusanga omu Matayo 10:29-31. (Soma.) Ebisirya buli bunyonyi obutaito obutasobora kugonza Yahwe rundi kumuramya. Baitu busaho na kimu ha bisirya binu ekigwa hansi Isiitwe atakimanyire. Yahwe obu araaba naafaaho obunyonyi bunu obutaito, nitusobora kukigumya ngu naafaaho buli omu hali itwe habwokuba nitumugonza kandi nitumuramya. Ekindi, Yesu akagamba ngu Isiitwe naamanya omuhendo gw’isoke eriri ha mutwe gwa buli muntu. Nahabweki Yahwe obu araaba naamanya obuntu obutaito oburukutukwataho, nitusobora kukigumiza kimu ngu naatufaaho muno. Mali nikyeyolekera kimu ngu Yesu naagonza buli omu hali itwe akigumize kimu ngu w’omuhendo muno hali Isiitwe ow’omu iguru.

15. Ebigambo bya Yesu ebirukusangwa omu Yohana 6:44 nibitugambira ki hali Isiitwe ow’omu iguru?

¹⁵ Weetegereze ekyokurorraho kya kabiri nambere Yesu yakozeseze ekigambo “Taata.” (Soma Yohaana 6:44.) So ow’omu iguru akakucunda yakuleeta omu mananu. Habwaki yakucunzire? Habwokuba akakuroramu emiringo enungi. (Ebik. 13:48) Yesu obu yabalize ebigambo ebirukusangwa omu Yohaana 6:44, naasobora kuba akaba naajuliza ebigambo bya Yahwe ebirukusangwa omu Yeremiya 31:3. Omu kyahandiikirwe eki, Yahwe akagambira abantu be ati: “Nkulesere nambere ndi n’okugonza okutalekera” (Yer. 31:3, NWT; lengesaniza na Hoseya 11:4.) Eki nikimanyisa ki? Isiitwe ow’omu iguru ow’okugonza aikara naaturoramu ebirungi itwe ebi tutasobora kweroramu.

16. (a) Kiki Yesu eki asobora kuba akaba naamanyisa obu yabalizeeho Yahwe nka Isiitwe? (b) Kiki ekisobora kukukoonyera kukigumya ngu Yahwe nuwe taata ow’arukukirayo oburungi? (Rora akasanduuko “Taata Itwena Ou Turukwetaaga.”)

¹⁶ Yesu obu yabalizeeho Yahwe nka Isiitwe, akaba naasisana nk’ow’arukugamba ngu “Yahwe tali Isenyowe nyenka, baitu Isiinywe. Kandi ningonza mukigumye ngu naabagonza kandi naabafaaho muno.” Nahabweki obwire obumu obu oraaba noogurukyagurukya Yahwe obu araaba naakugonza, weekaguze, ‘Mali tinsemeriire kwesiga ebigambo by’Omwana wa Ruhanga ow’amanyire kurungi Isiitwe kandi ow’aikara naabaza amananu?’—1 Pet. 2:22.

IKARA NOOKIGUMYA NGU YAHWE NAAKUGONZA

17. Habwaki tusemeriire kwikara nitukigumya ngu Yahwe naatugonza?

¹⁷ Tusemeriire kwikara nitukigumya ngu Yahwe naatugonza. Nkooku tusangirwe turozere, Sitaani naalengaho kukora kyona ekirukusoboka kutulemesa kugumizaamu nituheereza Yahwe. Naagonza kutumaramu amaani obu naatuleetera kuteekereza ngu Ruhanga tarukutugonza. Nahabweki titusemeriire kwikiriza Sitaani kusingura!—Yob. 27:5.

18. Kiki eki osobora kukora kwikara nookigumya ngu Yahwe naakugonza?

¹⁸ Kusobora kukigumya ngu Yahwe naakugonza, ikara noomusaba kukukoonyera kwerora nkooku uwe akurora. Weecumiitirizeeho muno ebyahandiikirwe ebirukusoborra omulingo Yahwe afaaho abo abamugonza. Weecumiitirizeeho omulingo akwatwaho obu tumwoleka ngu nitumugonza. Titusobora kumugonza kandi uwe akalemwa kutugonza. Teekerezaaho ensonga habwaki osemeriire kurora ekicunguro nk’ekisembo hali iwe nk’omuntu. Kandi wesige ngu Yahwe ali So ow’omu iguru nkooku Yesu yagambire. Kandi kakuba omuntu akukaguza ati: “Nookigumya ngu Yahwe naakugonza?” hataroho kugurukyagurukya n’obumanzi noija kumugarukamu oti: “Ego nangonza! kandi na nyowe nkora kyona ekirukusoboka buli kiro kumwoleka ngu nimmugonza!”