EKICWEKA KY’OKWEGA 32
EKIZINA 38 Yahwe Arakuha Amaani
Omulingo Yahwe Atukoonyera Kugumiisiriza
“Ruhanga anyakwijwire embabazi enyingi muno. . . alibagumya, abafoole b’amaani, alibata ha musingi ogugumire.”—1 PET. 5:10.
EBI TURAYEGA
Nitwija kurora ebintu Yahwe atuhaire kutukoonyera kugumiisiriza n’omulingo tusobora kubikozesaamu.
1. Habwaki nitwetaaga kugumiisiriza, kandi bukoonyezi ki obu twine? (1 Petero 5:10)
ABANTU ba Yahwe nibeetaaga kugumiisiriza omu biro binu ebigumangaine. Abamu baine oburwaire obw’amaani, abandi nibaganya habw’okufeerwa omuntu wabo, kandi abandi nibahakanizibwa abanyabuzaale rundi ab’obusobozi. (Mat. 10:18, 36, 37) Kigumye ngu buli kizibu kyona eki orukurabamu, Yahwe naija kukukoonyera kukigumira.—Soma 1 Petero 5:10.
2. Kiki ekitukoonyera kugumiisiriza?
2 Kugumiisiriza nikimanyisa ngu twikara tuli beesigwa hali Yahwe, kandi tumuheereza n’okusemererwa obu tuhikwaho ebizibu, okuhiiganizibwa rundi ebyohyo kandi twikara twine okunihira ngu enyikara niija kutereekerra. Titusobora kugumiisiriza habw’amaani gaitu, oihireho Yahwe nuwe atukoonyera habwokuba atuha “amaani agarukukira ha ga buli kiro.” (2 Kol. 4:7) Omu kicweka kinu nitwija kubazaaho ebintu bbina Yahwe ebi atuhaire kutukoonyera kugumiisiriza n’omulingo tusobora kubikozesaamu.
OKUSABA
3. Habwaki nitugamba ngu okusaba kiri kintu ekirukuhuniiriza muno?
3 Yahwe atukoliire ekintu ekirukuhuniiriza ekitukoonyera kugumiisiriza. Nitusobora kubaza na uwe noobu kiraaba ngu tituhikiriire. (Baheb. 4:16) Kiteekerezeeho: Nitusobora kusaba Yahwe obwire bwona kandi naha buli nsonga yoona. Naasobora kutuhurra omu buli rulimi rwona n’omu kiikaro kyona, katube twesoroire rundi tutairwe omu nkomo. (Yon. 2:1, 2; Ebik. 16:25, 26) Noobu tuba twetuntwire muno tukaburwa n’ebigambo eby’okumugambira omu saara zaitu, aba naayetegereza ebiturukugonza kumugambira. (Bar. 8:26, 27) Mali okusaba kiri kintu ekirukuhuniriza muno!
4. Habwaki Yahwe naagonza tumusabe atukoonyere kugumiisiriza?
4 Omu Baibuli, Yahwe naatugumya ngu “kyona eki tumusaba ekirukuhikaana n’ebi agonza, atuhurra.” (1 Yoh. 5:14) Yahwe naasobora kutukoonyera kugumiisiriza obu tumusaba? Ego! Naagonza twikale nitugumiisiriza. Habwaki? Obu tugumira ebirengo, tuba nituha Yahwe eky’okugarukamu hali Sitaani ow’amujuma. (Nfu. 27:11) Kandi Baibuli egamba ngu Yahwe naagonza ‘kweyoleka ngu w’amaani hali abo abaine omutima oguhikiriire nambere ali.’ (2 Byom. 16:9) Nahabweki nitukigumya ngu aine amaani n’ekihika eky’okutukoonyera kugumiisiriza.—Is. 30:18; 41:10; Luk. 11:13.
5. Okusaba kutukoonyera kuta kutunga obusinge omu biteekerezo? (Isaaya 26:3)
5 Baibuli egamba ngu obu tusaba Yahwe tukamugambira ebirukutweraliikiiriza, ‘obusinge obwa Ruhanga oburukukirra kimu okwetegereza kwona, nibwija kulinda emitima yaitu n’ebiteekerezo byaitu.’ (Baf. 4:7) Mali eki nitukimusiimira. Abantu abatarukuheereza Yahwe obu bahikwaho ebirengo, nibasobora kulengaho kukozesa emiringo ey’erukwahukana kutunga obusinge omu biteekerezo. Ekyokurorraho, kuraba omu kwecumiitiriza, abamu balengaho kweihaho ebiteekerezo byona nukwo basobole kutunga obusinge. Omuntu obu akora ebintu binu, akalemwa kulema enteekereza ye, naasobora kutwalirizibwa badaimooni, kandi eki kyakabi. (Lengesaniza na Matayo 12:43-45.) Baitu nabwo, obusinge Yahwe obu atuha, nibukirra hara obusinge abantu batunga kuraba omu kweihaho ebiteekerezo. Obu tusaba Yahwe tuba nitumwoleka ngu nitumwesigira kimu kandi atuha “obusinge obutahwaho.” (Soma Isaaya 26:3, NWT.) Gumu ha miringo Yahwe akikoramu nukwo kutukoonyera kwijuka amananu agatwayegere agarukuhuumuza kuruga omu Baibuli. Gatuhuumuza habwokuba gatukoonyera kukimanya ngu Yahwe atufaaho kandi naagonza tube basinguzi.—Zab. 62:1, 2.
6. Noosobora ota kukozesa kurungi ekisembo eky’okusaba? (Rora n’ekisisani.)
6 Eki tusobora kukora. Obu oraaba oine ekirengo eki orukugumira, ‘nagira Yahwe omugugu gwawe,’ kandi omusabe akuhe obusinge. (Zab. 55:22) Ekindi, musabe amagezi agaraakukoonyera kugumira ekirengo. (Nfu. 2:10, 11) Kandi obu oraaba noomusaba oteebwa kumusiima. (Baf. 4:6) Serra obwakaiso oburukwoleka ngu aliyo naakukoonyera omu kirengo kyawe kandi omusiime. Otaikiriza ekirengo kukulemesa kurora emigisa Yahwe ei akuhaire.—Zab. 16:5, 6.
Obu osaba, oba noobaza na Yahwe. Obu osoma Baibuli, Yahwe aba naabaza na iwe (Rora akacweka 6)b
EKIGAMBO KYA RUHANGA
7. Kwesomesa Baibuli kitukoonyera kita kugumiisiriza?
7 Yahwe atuhaire Baibuli kutukoonyera kugumiisiriza. Baibuli erumu ebyahandiikirwe bingi ebitugumya ngu Yahwe naagonza kutukoonyera. Teekerezaaho ekyokurorraho kinu. Matayo 6:8 nihagamba ngu: “Isiinywe aba amanyire eki murukwetaaga mutakakimusabire.” Yesu nuwe yabalize ebigambo ebi kandi amanyire kurungi Yahwe kukira omuntu ondi weena. Nahabweki nitukigumiza kimu ngu obu tuba nitubonabona, Yahwe aba naarora kandi atukoonyera. Omu Baibuli harumu enkarra ezindi nyingi ezitukoonyera kugumiisiriza.—Zab. 94:19.
8. Bazaaho omusingi gwa Baibuli ogutukoonyera kugumiisiriza. (b) Kiki ekiraatukoonyera kwijuka emisingi ya Baibuli obu turukuba nitugyetaaga?
8 Baibuli erumu emisingi ey’etukoonyera kugumiisiriza. Emisingi egi etukoonyera kukora encwamu enungi. (Nfu. 2:6, 7) Ekyokurorraho, Baibuli etwekambisa kuteeraliikirra ebiraabaho nyenkya n’okwikara nitwesiga Yahwe. (Mat. 6:34) Obu turaasoma Baibuli buli kiro kandi tukeecumiitirizaaho ebi turukusoma, nikiija kutukoonyera kwijuka emisingi ya Baibuli omu kasumi nambere turukugyetaagira.
9. Ebyokurorraho eby’omu Baibuli bitukoonyera bita kukigumya ngu Yahwe naija kutukoonyera?
9 Omu Baibuli, harumu ebyokurorraho eby’abantu abaayesigire Yahwe kandi yabakoonyera. (Baheb. 11:32-34; Yak. 5:17) Obu twecumiitirizaaho ebyokurorraho nk’ebi, tweyongera kukigumya ngu Yahwe ‘nurwo rukomero rwaitu, n’amaani gaitu, omukoonyezi mali atabura omu bujune.’ (Zab. 46:1) Obu twecumiitirizaaho ebyokurorraho by’abaheereza ba Yahwe abeesigwa aba kara, kitwekambisa kwegera ha kwikiriza, n’okugumiisiriza kwabo.—Yak. 5:10, 11.
10. Nitusobora tuta kukozesa kurungi Baibuli?
10 Eki tusobora kukora. Soma Baibuli buli kiro kandi ohandiike enkarra ezisobora kukukoonyera. Baingi bakyetegeriize ngu kusoma ekyahandiikirwe ekya buli kiro buli nyenkyakara, kibakoonyera kuba n’ekintu eki baraikara nibateekerezaaho ekiro kyona. Munyaanya itwe ow’arukwetwa Mariea akarora obukuru obw’ekintu kinu bazaire be obu baasangirwemu oburwaire obw’ekookoro. Kiki ekyamukoonyiire kugumiisiriza obu akaba naarolerra bazaire be omu myezi yabo ey’okumalirra? Naagamba ati: “Buli nyenkyakara nasomaga ekyahandiikirwe ekya buli kiro kandi nkyecumiitirizaaho. Kinu kikankoonyera kwikara ninteekerezaaho Yahwe n’emirago ye omu kiikaro ky’okuteekerezaaho ebizibu ebi nkaba nindabamu.”—Zab. 61:2.
ABAKRISTAAYO BAGENZI BAITU
11. Habwaki nikigarramu amaani kukimanya ngu tali niitwe itwenka abarukuraba omu birengo?
11 Yahwe atuhaire ab’oruganda na banyaanya itwe kutukoonyera kugumiisiriza. Kukimanya ngu “ab’oruganda omu nsi yoona nibahikwaho okubonabona nukwo kumu” kituhuumuza habwokuba tuba nitukimanya ngu tituli itwenka. (1 Pet. 5:9) Eki nikimanyisa ngu haroho ab’oruganda na banyaanya itwe abandi abarabire omu nyikara ei turumu kandi baikara bali beesigwa hali Yahwe. Nahabweki, na itwe nitusobora kugumiisiriza nka bo!—Ebik. 14:22.
12. Abakristaayo bagenzi baitu nibasobora kutukoonyera bata, kandi na itwe nitusobora kubakoonyera tuta? (2 Abakolinso 1:3, 4)
12 Ab’oruganda na banyaanya itwe nibasobora kutukoonyera kugumira ebirengo kuraba omu bigambo n’ebikorwa byabo. Eki nikyo kyahikire hali omukwenda Paulo. Yaikaraga naasiima abo abaamukoonyiire obu akaba asibiirwe omu nju obu naabaza amabara gaabo. Baamuhuumuzaaga, bamugarramu amaani, kandi bamukoonyera. (Baf. 2:25, 29, 30; Bak. 4:10, 11) Na kasumi kanu, ab’oruganda na banyaanya itwe nibasobora kutuhuumuza kandi bakatukoonyera kugumira ebizibu. Na itwe nitusobora kubakoonyera omu mulingo nugwo gumu.—Soma 2 Abakolinso 1:3, 4.
13. Kiki ekyakoonyiire munyaanya itwe ow’arukwetwa Maya kugumiisiriza?
13 Ab’oruganda na banyaanya itwe bakakoonyera muno munyaanya itwe ow’arukwetwa Maya kuruga omu Russia. Ab’obusobozi bakaaza enju ye omu 2020, kandi hanyuma akatwarwa omu kooti kwerwanaho. Naagamba ati: “Omu kasumi nambere nkaba mpoirwemu amaani, ab’oruganda na banyaanya itwe baikaraga nibanterra amasimu, nibampandiikira ebbaruha kandi nibangambira nkooku barukungonza. Nkaba nkimanyire ngu ab’oruganda na banyaanya itwe nibangonza kandi ngu bali kicweka ky’eka yange. Baitu ekintu eki bankoliire kuruga omu 2020, kikeeyongera kugumiza kimu ekintu eki.”
14. Nitusobora tuta kugasirwa omu bukoonyezi bw’ab’oruganda na banyaanya itwe obu turukuba nitugumira ekirengo? (Rora n’ekisisani.)
14 Eki tusobora kukora. Obu oraaba noogumira ekirengo, kikuru muno kwikara haihi n’ab’oruganda na banyaanya itwe. Otatiina kusaba abagurusi obukoonyezi. Nibasobora kuba ‘nk’ekiikaro ky’okweserekamu hali omuyaga, kandi eky’okwebingiramu hali ihunga.’ (Is. 32:2) Ijuka ngu ab’oruganda na banyaanya itwe na bo nibagumira ebizibu. Nahabweki kukorra omuntu ekikorwa eky’embabazi nikiija kukukoonyera kwikara oine enteekereza ey’ehikire obu noogumira ekirengo.—Ebik. 20:35.
Ikara haihi n’Abakristaayo bagenzi baawe (Rora akacweka 14)c
OKUNIHIRA KWAITU
15. Okunihira kukakoonyera kuta Yesu, kandi na itwe kutukoonyera kuta? (Abahebburaniya 12:2)
15 Yahwe atuhaire okunihira okugumire okutukoonyera kugumiisiriza. (Bar. 15:13) Teekerezaaho omulingo okunihira kwakoonyiire Yesu kugumira ekiro ekyakizireyo kuguma omu bwomeezi bwe omu nsi. (Soma Abahebburaniya 12:2.) Yesu akaba akimanyire ngu kwikara ali mwesigwa kyakuleetiire ibara lya Yahwe kwezebwa. Ekindi, akaba alindiriire n’ekihika kwongera kweteeranizaaho Ise n’okuheereza hamu na bagenzi be omu Bukama bwe obw’omu iguru. Omu mulingo nugwo gumu, na itwe kakuba tuteekerezaaho okunihira kwaitu okw’okwomeera ebiro n’ebiro omu nsi empyaka, nikiija kutukoonyera kugumira ebirengo byona ebisobora kutuhikaho omu nsi enu eya Sitaani.
16. Okunihira kukakoonyera kuta munyaanya itwe arukwetwa Anna kugumiisiriza, kandi kiki eki orukwegera ha bigambo bye?
16 Teekerezaaho omulingo okunihira kwakoonyiire munyaanya itwe kuruga Russia ow’arukwetwa Anna. Musaija we akatwarwa nambere balindira abasibi abatakacweriirwe omusango. Anna naagamba ati: “Kuruga ekintu kinu kibaho, nyikaire nimbazaaho okunihira Yahwe oku atuhaire omu kusaba kandi nyikara ninkuteekerezaaho muno, kinu kinkoonyera kutahwamu amaani. Nkimanyire ngu hanyuma y’ebizibu binu kuhwaho nihaija kubaho ebintu ebirungi. Yahwe naija kusingura abanyanzigwa be kandi atuhe empeera.”
17. Nitusobora kwoleka tuta ngu nitusiima habw’okunihira Yahwe oku atuhaire? (Rora n’ekisisani.)
17 Eki tusobora kukora. Tunga obwire oteekerezeeho akasumi ak’omumaiso Yahwe akaatuteekaniriize. Weerole oli omu nsi empyaka kandi teeramu akasisani nooyegondeza omu migisa ei tulitunga. Obu oraakikora, noija kurora emihito ei orukurabamu ‘nk’ey’akacu kake kandi etarukulemeera.’ (2 Kol. 4:17) Ekindi, gambiraho abandi ha kwikiriza kwawe. Teekerezaaho omulingo obwomeezi bugumiire abantu abatamanyire Yahwe n’ekigendererwa kye eky’omu kasumi ak’omumaiso. Nitusobora kutandika nitubagambiraho ebintu bike, kandi kinu nikisobora kubeekambisa kugonza kumanya ebirukukiraho ha Bukama bwa Ruhanga n’emirago ye.
Tunga obwire oteekerezeeho akasumi akarungi Yahwe akaatuteekaniriize (Rora akacweka 17)d
18. Habwaki nitwesiga emirago ya Yahwe?
18 Hanyuma ya Yobbu kugumira ebirengo ebi akaba naarabamu kandi yaikara ali mwesigwa hali Yahwe akagamba ati: “Manyire nosobora okukora byona, kandi busaho kigambo ekyomaliriire ekisobora okutangwa.” (Yob. 42:2) Yobbu akakyetegereza ngu busaho ekisobora kulemesa ekigendererwa kya Yahwe kuhikirra. Isomo eri yayegere nirisobora kutukoonyera kugumiisiriza. Ekyokurorraho, teekerezaaho omukazi ow’arwaire kandi ow’ahoirwemu amaani habwokuba badakitaali abarukwahukana balemerwe kumujanjaba. Baitu teekerezaaho okusemererwa oku atunga obu akyetegereza ngu haroho dakitaali omukugu ow’asobora kujanjaba oburwaire bwe noobu kiraaba ngu nikiija kumutwarra akasumi kukira. Nikisobora kumwanguhira kugumiisiriza habwokuba naakimanya ngu naija kuba kurungi. Omu mulingo nugwo gumu, okunihira oku twine kutukoonyera kugumiisiriza.
19. Biki ebiraatukoonyera kugumiisiriza?
19 Nkooku turozere, Yahwe atukoonyera kugumira ebirengo kuraba omu kusaba, Baibuli, Abakristaayo bagenzi baitu, hamu n’okunihira kwaitu. Obu turaakozesa kurungi ebintu binu, Yahwe naija kutukoonyera kugumira ebizibu byona ebiturukurabamu kuhikira kimu ensi ya Sitaani obu erihwaho.—Baf. 4:13.
EKIZINA 33 Nagira Yahwe Emigugu Yaawe
a Amabara agamu omu kicweka kinu gahindwirwe.
b KUSOBORRA EKISISANI: Ow’oruganda ow’akuzire omu myaka aikara naagumiisiriza buli kiro.
c KUSOBORRA EKISISANI: Ow’oruganda ow’akuzire omu myaka aikara naagumiisiriza buli kiro.
d KUSOBORRA EKISISANI: Ow’oruganda ow’akuzire omu myaka aikara naagumiisiriza buli kiro.