Nsemeriire Kusaba Hali Abahikiriire?

Eky’Okugarukamu Kuruga omu Baibuli

Nangwa. Baibuli eyoleka ngu tusemeriire kusaba hali Ruhanga wenka, kuraba omu ibara lya Yesu. Yesu akagambira abegeswa be ati: “Nukwo musabege muti, Isitwe ali omu iguru, ibara lyawe dyezebwe.” (Matayo 6:9, New American Bible) Atagambire abegeswa be kusaba hali abahikiriire, bamalaika, rundi omuntu ondi wena, oihireho Ruhanga wenka.

Yesu akongera yagambira abahondezi be ati: “Ninyowe muhanda namananu nobwomezi: Busaho aija hali Isenyowe atarabire omuli nyowe.” (Yohana 14:6, NAB) Obusobozi bwokututonganirra Ruhanga akabuha Yesu wenka.​—Abaheburaniya 7:25.

Baitu kakuba nsaba hali Ruhanga, nkasaba na hali abahikiriire?

Ruhanga obwakaba naaha Ebiragiro Ikumi akagamba ati: “Nyowe YAHWE Ruhanga wawe ndi Ruhanga wihali.” (Okuruga 20:5, NAB) Ruhanga ali “wihali” omu mulingo ki? Obugambo bwa hansi omu mpindura eya New American Bible nibugamba ngu “nagonza turamye uwe wenka.” Ruhanga n’agonza ebikorwa byaitu eby’okuramya​—otwaliiremu n’okusaba​—bihike hali uwe wenka.​—Isaya 48:11.

Tubiihiza Yahwe obutusaba hali abahikiriire rundi hali bamalaika abarukwera. Omukwenda Yohana obuyalengereho kuramya malaika, malaika akamutanga kandi yamugambira ati: “Otakikora: nyowe ndi muiru mutahi wawe na bene banyu abakwata okuranga kwa Yesu; ramya Ruhanga.”​—Okusuku’rwa 19:10, NAB.