Yahwe Abaza na Samuiri

Nyakatagara Omukuru Eri akaba aine abatabani babiri abaheerezaga nk’abanyakatagara ha heema. Omu bamwetaga Hofuni kandi ondi bamwetaga Finehasi. Batabani be banu, tibahonderaga ebiragiro bya Yahwe kandi batwazaga kubi abantu abandi. Abaisareri obu baleteraga Yahwe ebihongwa, Hofuni na Finehasi bayetwarraga enyama enungi. Eri obuyahuliire ha ngeso z’abatabani be embi, taine eki yakozereho. Yahwe yakulekere ebikorwa nka binu kugumizaamu?

N’obukiraaba ngu Samuiri akaba ali muto hali Hofuni na Finehasi, akanga kuhondera ebyokurorraho byabo ebibi. Ekintu kinu kikasemeza muno Yahwe. Kiro kimu Samuiri obwakaba abyamire obwire bw’ekiro, akahurra iraka nirimweta. Akaimuka yagenda hali Eri yamugamba ati: ‘Ndi hanu, nyizire!’ Baitu Eri akamugarukamu ati: ‘Nyowe tinkakwesere. Garukayo obyame.’ Samuiri akagarukayo omu kitabu kye yabyama. Yahwe akagarukamu yamweta omurundi ogwakabiri. Samuiri obuyahuliire iraka linu omurundi ogwakasatu, Eri akakimanya ngu Yahwe nuwe akaba namweta. Akagambira Samuiri ati obworagarukamu kuhurra iraka eri, ogambe oti: ‘Baza, Yahwe. Omuheereza wawe ahuliriize.’

Samuiri akagarukayo omu kitabu. Akongera yahurra iraka nirigamba liti: ‘Samuiri! Samuiri!’ Akagarukamu ati: ‘Baza, omwiru wawe nahurra.’ Yahwe akamugambira ati: ‘Gambira Eri ngu ningenda kumufubira, uwe n’eka ye. Akimanyire ngu batabani be nibakora ebintu ebibi omu heema yange baitu taine ekyarukukoraho.’ Obwire obu bwakiire, Samuiri akakingura enyigi za heema nk’oku yakoraga buli kiro. Baitu, akatiina kugambira Eri Yahwe eky‘akaba amutumire. Eri akamweta yamukaguza ati: ‘Mutabani, Yahwe akugambiire ki? Ngambira buli kimu.’ Obu nubwo Samuiri yagambiire Eri byona Yahwe eby’akaba amugambiire.

Samuiri akeyongera kukura, kandi Yahwe akeyongera kumukonyera. Buli nsonda yoona eya Isareri, ekaba emanyire ngu Yahwe akakoma Samuiri kuba nabbi kandi omucwi w’emisango.