Obwohikwaho Ebigwererezi

“Ha kubanza tukehurra nk’abataine kunihira kwona. Ebintu byaitu byona bikahwerekerra omu kusandaara okw’amaizi n’esaabu.”—Andrew , Sierra Leone.

“Hanyuma y’ihunga ery’amaani kuteera, tukagaruka omuka, baitu tutasangeyo kintu kyona. Tukaterwa ibumba kanwa. Muhara wange akagwa hansi yarra muno.”—David, Virgin Islands.

OBWORAABA wakahikwahoga ekigwererezi, nosobora kuba omanyire omulingo abantu behurra hanyuma y’ekizibu kinu. Abamu batiina muno, beralikirra, basoberwa, baroota ebintu ebirukutiinisa. Baingi abahikirweho ebigwererezi bahurra bahwairwemu amaani kandi batamirwe obwomeezi.

Obworaaba oferiirwe ebintu byawe habw’ekigwererezi, naiwe n’osobora kwehurra oyetuntwire otakyasobora kugumiisiriza. Nosobora kutandika kutekereza ngu obwomeezi bwawe tibukyaine mugaso. Baitu, Baibuli n’eyoleka ngu obwomeezi bwawe bwine omugaso kandi n’osobora kuba n’okunihira okw’ebiro ebirungi eby’omu maiso.

AMANANU KURUGA OMU BAIBULI GATUHA OKUNIHIRA

Omugambizi 7:8 nirugamba ngu: “Empero eyekigambo nekira oburungi okubanza kwakyo.” Obworukuba wakahikwaho ekigwererezi, n’osobora kwehurra otakyaine okunihira kwona. Baitu obwogumiisiriza okatandika kwombeka obwomeezi bwawe, oyongera otunga okusemererwa.

Baibuli n’ebazaaho akasumu nambere “iraka eryoku’ra tiririhu’rwa . . . nobulyakuba iraka eryokucura.” (Isaya 65:19) Kinu nikiija kubaho ensi obweraaba efookere orugonjo orurungi hansi y’Obukama bwa Ruhanga. (Zabuli 37:11, 29) Ebigwererezi tibiryongera kubaho. Obusaasi bwona obwoine omu mutima, habw’ebintu ebiwarabiremu, Ruhanga Ow’obusobozi Bwona naija kubwihiraho kimu habwokuba naraganiza ngu: ‘Ebigambo bya kara tibiriijukwa, kunu tibiritaaha omu mutima.’—Isaya 65:17.

Tekerezaaho kinu: Ruhanga atekaniize kukuha “okunihira” n’ebiro eby’omu maiso ebirungi—ebirumu obusinge hansi y’Obukama bwe. (Yeremiya 29:11) Kumanya amananu ganu, nikisobora kita kufoora obwomeezi bwawe obw’omugaso? Sally, ou tusangirwe tubalizeeho, nagamba ati: “Kutekerezaaho ebintu ebirungi ebirakorwa Obukama bwa Ruhanga omu busumi obw’omu maiso, nikisobora kukukonyera kwebwa enaku ey’ebizibu warabiremu n’okugumira eby’orukurabamu hati.”

Nitukusaba kwega ebirukukiraho ebirukukwata ha bintu Obukama bwa Ruhanga buli haihi kukorra abantu. Obworakikora noija kugumya ngu obwomeezi bwawe bwine omugaso kandi olindirre n’ekihika akasumi akatalibamu ebigwererezi. Baitu omu kasumi kanu, Baibuli n’etuha obuhabuzi obusobora kutukonyera kugumiisiriza hanyuma y’okuhikwaho ebigwererezi. Tekerezaaho ebyokurorraho binu.

Ebyahandiikirwe Ebisobora Kukukonyera

Humura Ekirukumara.

“Ekiganja kimu eky’okuhumura nikikira ebiganja bibiri eby’okukora muno kandi n’okuhambya omuyaga.”—Omugambizi 4:6, NWT.

Abarukuseruliiriza nibagamba ngu omuntu ow’ahikirweho ekizibu eky’amaani, “kuba atagwijagira kurungi . . . ayeyongera kwetuntura kandi kimugumira kutunga entekereza ey’ehikire.” Nahabweki, ky’amagezi kutunga obwire oburukumara okahumuraho.

Gambira omuntu ondi enyehurra yaawe.

“Obujune obububa omu mutima gwomuntu buguinamya; Baitu ekigambo ekirungi kigusemeza.”—Enfumo 12:25.

Gambira omunyabuzaale rundi omunywani ow’orukwesiga nk’oku orukwehurra. Tibarukwija kukuhuliiriza kwonka, baitu nibaija n’okukugambira ebigambo ebirungi ebirakugarramu amaani kandi nibaija n’okukukonyera.a

Tekerezaaho obusumi obw’omu maiso nambere ebintu biriba kurungi.

“Nkomuragogwe okuguli, itwe ntutegereza iguru erihyaka nensi empyaka, nambere haikara okuhiki’ra.”—2 Petero 3:13.

a Omuntu bwamara akasumi kaingi ayeralikiriire muno rundi ayetuntwire muno, asemeriire kuserra obujanjabi.