Ninkaha Nambere Osobora Kutunga Obuhabuzi Oburakukonyera Kuba n’Obusumi bw’Omumaiso Oburungi?

Nk’oku kyolekerwe omu bicweka ebihoire, abantu balengereho kuserra obusumi bw’omumaiso oburungi kuraba omu bintu nk’obwegese, kuragura nibakozesa enyunyuuzi, obuguuda, n’okuba bantu barungi. Baitu kukora ebintu binu kisisana nk’okukozesa maapu etahikire kugenda omu kiikaro eky’otamanyire. Eki nikimanyisa ngu busaho buhabuzi oburukwesigwa oburatukonyera kuba n’obusumi bw’omumaiso oburungi? Nangwa!

OBUHABUZI OBURUKUKIRAYO OBURUNGI

Obutuba tutakakozere encwamu, tukira kwekaguzaaho omuntu arukutukira obukuru rundi amagezi. Omulingo nugwo gumu, nitusobora kutunga obuhabuzi oburungi kuruga ha muntu arukukirrayo kimu obukuru n’amagezi. Obuhabuzi bw’omuntu ogu buli omu kitabu ekyahandiikirwe nk’emyaka 3,500 enyuma. Ebyahandiikirwe binu ebirukwera nitubisanga omu kitabu ekirukwetwa Baibuli.

Habwaki n’osobora kwesiga Baibuli? Habwokuba ayagihandikisize nuwe arukukirrayo kimu obukuru n’amagezi omu buhangwa bwona. Baibuli n’emweta “anyakuhikize ebiro bingi,” kandi ow’aikaireho ‘kuruga obusinge bwona, okuhikya obusinge bwona.’ (Danieri 7:9; Zabuli 90:2) Nuwe “ayahangire iguru; nuwe Ruhanga; ayabumbire ensi nagikora.” (Isaya 45:18) Kandi atugambira ngu ibara lye nuwe Yahwe.—Zabuli 83:18.

Baibuli tegamba ngu abantu ab’oruganda rumu nibakira abandi, kandi eki nukwo kiri habwokuba eruga hali ogu ayahangire abantu boona. Obuhabuzi obw’etuha tibuhwa ha mulembe kandi bugasiire abantu omu mahanga goona. Baibuli eri omu ndimi nyingi kandi nikyo kitabu abantu baingi basoboire kutunga kukira ebitabu ebindi byona.a Ekirukumanyisa ngu abantu kuruga omu biikaro byona nibasobora kugyetegereza kandi n’ebahabura. Kinu kiikiranganiza n’ebigambo bya Baibuli binu:

‘Ruhanga tasoroora omu bantu: baitu, omu ihanga lyona lyona, anyakumutiina nakora okuhikirra nuwe asiimwa.’—ENGESO EZABAKWENDA 10:34, 35.

Nk’oku omuzaire ow’arukugonza abaana be abaha obuhabuzi, Yahwe, Isiitwe ow’okugonza atukonyera kuraba omu Kigambo kye Baibuli. (2 Timoseo 3:16) N’osobora kwesiga ekigambo kye habwokuba nuwe yatuhangire kandi amanyire ebiratuleetera okusemererwa.

OBUHABUZI OBUTUSOBORA KWESIGA

Nitusobora kwesiga Baibuli habwokuba emyaka 2,000 enyuma ekabazaaho ebintu ebyakubaireho omu nsi n’omulingo abantu baakwetwaize kandi nitubirora nibibaho kasumi kanu.

EBINTU EBYAKUBAIREHO

‘Ihanga liriramagira ihanga, n’obukama buliramagira obukama: halibaho emisisa emikooto, n’ebiihe n’orufu biribaho ahandi n’ahandi.’—LUKA 21:10, 11.

OMULINGO ABANTU BAAKWETWAIZE

‘Omu biro bya hanyuma ebiro ebyakabi kaingi biriija. Baitu abantu baliba abegonza bonka, nabagonza erupiya, n’abemyehembo, n’abekuniki, n’abajumi, n’abatarukuhurra abaabazaire, n’abatarukusiima, n’abatarukwera, n’abatagonza bene baabu n’abataterana hamu, n’abahangirizi, n’abatanyina okwetanga, n’abarruma, n’abatagonza oburungi, n’abadupi, n’abagumangana, n’abenyumiza bonka, n’abagonza okwesemeza bonka okukira okusemeza Ruhanga.’—2 TIMOSEO 3:1-4.

Obworora ebintu Baibuli ebiyarangire nibibaho, kikuleetera kwehurra ota? Busaho kugurukyagurukya noikiranganiza n’ebigambo by’omusaija arukwetwa Leung, kuruga Hong Kong, ayagambire ati: “Obunabbi bwa Baibuli bukahandiikwa ira muno. Busaho muntu wena omu nsi akaba n’asobora kugamba ngu ebintu binu biribaho nk’oku biriyo nibihikirra. Mali Baibuli ekahandiikisibwa omuntu arukukirrayo kimu amagezi.”

Omu Baibuli harumu obunabbi bwingi muno obwahikiiriziibwe.b Kinu nikyoleka ngu mali Baibuli Kigambo kya Ruhanga. Yahwe n’agamba ati: “Ninyowe Ruhanga busaho ondi; ninyowe Ruhanga busaho arukusisana nanyowe,” ayongera agamba ati: “Ninsoborra empero kuruga ha kubanza.” (Isaya 46:9, 10) Mali eki nikyolekera kimu ngu n’osobora kwesiga Baibuli eby’erukugamba ha busumi obw’omumaiso.

OBUHABUZI OBURAKUKONYERA HATI N’EBIRO BYONA

Obwohondera obuhabuzi obuli omu Byahandiikirwe, noija kugasirwa. Tekerezaaho bimu hali byo.

KUBA N’ENTEKEREZA EHIKIRE HA MIRIMO NA SENTE

“Ekiganja kimu eky’okuhuumura nikikira ebiganja bibiri eby’okukora muno n’okuhambya omuyaga.”—OMUGAMBIZI 4:6, NWT.

KUBA N’AMAKA AGARUMU OKUSEMERERWA

‘Omuntu wena agonzege mukazi we nkauwe wenka; kandi n’omukazi atiinege iba.’—ABEFESO 5:33.

KUKORAGANA N’ABANDI

‘Leka okubiihirwa, oruge omu kiniga: otabiihirwa biihirwa; tikurukugasa, rundi nikuleeta obubi.’—ZABULI 37:8.

Kakuba oteeka omu nkora obuhabuzi bwa Baibuli noija kugasirwa hati kandi nikiija kukukonyera kuba n’obwomeezi obw’omumaiso oburungi. Kuraba omu Baibuli, Ruhanga aturaganiza kuba n’obusumi bw’omumaiso oburungi oburumu ebintu nka binu

OBUSINGE N’OBULINZI

‘Balikyanganuka obw’obusinge obwingi.’—ZABULI 37:11.

ABANTU BOONA BALIBA N’AMAJU HAMU N’EBYOKULYA

‘Balyombeka enju balizitaahamu; balibyara emisiri ey’emizabibu, balilyaho ebyana.’—ISAYA 65:21.

TIHAKIROHO OBURWAIRE N’OKUFA

‘Tihakiroho okufa; n’obukwakuba okuteera empamo, n’obukwakuba okurra, n’obukwakuba okusaasa.’—OKUSUKU’RWA 21:4.

Kiki eky’osemeriire kukora kuba n’obusumi oburungi obw’omumaiso? Wetegereze ekicweka ekirukuhonderaho.

a Kumanya ebirukukiraho ha kuhindura n’okugabwa kwa Baibuli, genda ha www.pr418.com kandi orole hansi y’omutwe BIBLE TEACHINGS > HISTORY & THE BIBLE.

b Kumanya ebirukukiraho, rora esuura 9 ey’akatabu The Bible—God’s Word or Man’s? Akaatiirwe Abakaiso ba Yahwe. Kandi kali na ha mukura gwa www.pr418.com. Genda hansi y’omutwe LIBRARY > BOOKS & BROCHURES.