Ekihikire n’Ekitahikire: Baibuli—Erumu Obuhabuzi Oburukwesigwa
Kakuba tukora encwamu ezirukukwata ha ngeso nitusigikirra ha nyehurra zaitu rundi ez’abantu abandi kyonka, titusobora kukigumya ngu niziija kuturugirramu ebirungi. Baibuli tegarukira ha kutwoleka ensonga habwaki, baitu etukonyera kumanya ekihikire n’ekitahikire—ekiratukonyera kutunga obwomeezi oburumu okusemererwa n’okumarwa.
NITWETAAGA OBUHABUZI BWA RUHANGA
Omu Baibuli, Yahwea Ruhanga natusoborra ngu abantu nibetaaga obukonyezi kandi tibasobora kukora ekintu kyona habwabo bonka. (Yeremiya 10:23) Egi niyo ensonga habwaki omu Baibuli atuteriiremu obuhabuzi oburukukwata ha ngeso. Nagonza abantu kandi tarukugonza tukole encwamu embi eziratusaaliza kandi zikagumanganiza obwomeezi bwaitu. (Ekyebiragiro 5:29; 1 Yohana 4:8) Ekirukukiraho, nk’Omuhangi waitu, aine amagezi n’okumanya ebirukwetaagisa kutuha obuhabuzi oburukukirayo. (Zabuli 100:3; 104:24) Baitu nabwo, Ruhanga tahambiriza abantu kuhondera endengo ze.
Yahwe akaha Adamu na Hawa, omusaija n’omukazi ab’okubanza, kyona ekibakaba nibeetaaga kusobora kusemererwa. (Okubanza 1:28, 29; 2:8, 15) Ekindi, akabaha obuhabuzi obwanguhire obw’akaba nanihira ngu nibaija kworobera. Baitu nabwo, akabaleka kwecweramu kubuhondera rundi kutabuhondera. (Okubanza 2:9, 16, 17) Eky’obusaasi, Adamu na Hawa bakacwamu kuhondera endengo zaabo omu kiikaro ky’okuhondera eza Ruhanga. (Okubanza 3:6) Biki ebirugiremu? Kwecweramu ekihikire n’ekitahikire kiretiire abantu kusemererwa? Nangwa. Kumara emyaka nyingi, tukirozere ngu kwanga kuhondera endengo za Yahwe tikisobora kuleetaho obusinge n’okusemererwa okw’ebiro n’ebiro.—Omugambizi 8:9.
Baibuli etukonyera kukora encwamu enungi katube nitwikara nkaha rundi nituruga omu ka ya mulingo ki. (2 Timoseo 3:16, 17; rora akasanduuko “Ekitabu ky’Abantu Boona.”) Rora omulingo Baibuli ekikoramu.
Manya habwaki Baibuli neeyetwa “ekigambo kya Ruhanga.”—1 Abasesalonika 2:13. Rora Vidiyo Nooha Ayahandiikisize Baibuli? ha jw.org.
BAIBULI ETUGAMBIRA RUHANGA EKYARUKUGONZA TUKOLE
Baibuli etugambira omulingo Ruhanga aikaire nakoragana n’abantu kuruga ha kutandika. Ebiri omu Baibuli bitukonyera kumanya Ruhanga eky’arora nk’ekihikire n’ekitahikire, ekirukutugasira n’eky’akabi. (Zabuli 19:7, 11) Twega emisingi eyetahwa ha mulembe ey’etukonyera kukora encwamu enungi obukirukuhika ha ngeso omu bwomeezi bwaitu obwa buli kiro.
Ekyokurorraho, wetegereze amagezi agarukusangwa omu Enfumo 13:20: “Gendaga nabantu abamagezi, kandi olifoka owamagezi: baitu mutahi wabadomadoma alisasa.” Omusingi gunu nigukyakora kasumi kanu nk’oku gwakoraga omu kasumi aka kara. Baibuli eijwiremu emisingi nk’egi eyesobora kutukonyera omu bwomeezi bwaitu obwa buli kiro.—Rora akasanduuko “Amagezi ga Baibuli Agatahwa Ha Mulembe.”
Baitu nosobora kwekaguza, ‘Ninsobora nta kukigumya ngu amagezi ga Baibuli agarukukwata ha ngeso nigakora n’omu kasumi kanu?’ Ekicweka ekirukuhonderaho nikiija kubazaaho ebyokurorraho ebyabaireho kwo.
a Yahwe niryo ibara lya Ruhanga.—Zabuli 83:18.